1 Ruodhi 21:13 - MUMA MALER 2015

¹³ Ji ariyo macheje nodonjo, mobet momanyore kode. Eka ne gidonjo ni Naboth e nyim ji duto, ka giwacho niya, “Naboth noyanyo Nyasaye kod ruoth bende.” Omiyo ji nogole oko, kendo ne gigoye gi kite nyaka otho.

Motingʼo Loko Manyien

¹³ Eka ji ariyo ma timbegi mono nobiro mobedo momanyore kode e nyim ji, mohangone wach kawacho niya, “Naboth osekwongʼo Nyasaye gi ruoth.” Omiyo ne gigole oko mar dala mi gigoye gi kite ma otho.

1 Ruodhi 21:13 ပူးပေါင်းရင်းမြစ်များ

1 Ruodhi 21:14

Bang’e ne gioro ni Jezebel wach niya, “Osego Naboth gi kite, kendo osetho.”

2 Ruodhi 6:32

Noyudo ka Elisha obet ewi ode kaachiel gi jodongo. Ruoth nooro jaote ire, to kane pok jaoteno ochopo, Elisha nowacho ni jodongo niya, “Uneno kaka ng’at ma janekno oro ng’ato mondo obi ong’ad wiya oko? Ka jaoteneno ochopo ka, to ulor dhoot matek, nikech ruodhe luwo bang’e machiegni.”

2 Ruodhi 9:26

Donge Ruoth Nyasaye nowacho kuome ni, ‘Nyoro aneni kinego Naboth gi yawuote, to abiro chuloni kuor e puodhoni’? Omiyo kawe, ibole e puodhono, mondo wach Ruoth Nyasaye ochop kare.”

2 Weche mag Ndalo 24:21

To ne giriwore ni Zekaria mi ne gigoye gi kite e laru mar Od Ruoth Nyasaye kaka ruoth nochikogi, mi otho.

Ayub 1:11

To koro sani temie kawo gik moko ma en go ka ane ka dang’ ok okuong’i e wang’i!”

Ayub 1:5

Kane sawo ka sawo oserumo, Ayub ne chiew gokinyi mang’ich, kendo timo misango mondo opwodhgo nyithinde. Ne otimo kamano pile, koparo ni dipo ka achiel kuomgi oketho kuom yanyo Nyasaye gi chunye.

Ayub 2:9

Eka chiege nopenje niya, “Pod iyie ayiea kuom Nyasachi? Ere gimomiyo ok inyal yanye mondo itho?”

Ayub 31:39

kata kapo ni ne achamo cham monyakie, to eka jopur mane opure kech nego,

Zaburi 27:12

Kik ijwang’a e lwet wasika ma monja gi weche mag miriambo, kendo ma bwoga.

Zaburi 35:11

Joricho bedo joneno mag miriambo kuoma, kendo gidonjona kuom ketho ma ok ang’eyo.

Wuok 20:16

“Kik ihang ni ng’ato wach.

Ngeche 19:28

Janeno man gi sadha e chunye ketho bura. Joricho to chadho mana weche mamono.

Ngeche 19:5

Janeno ma jamriambo ok nyal tony mak okum. Adier, ng’at ma wacho miriambo lilo ok tony.

Ngeche 19:9

Janeno mariambo ok nyal tony mak okum. Ng’at ma kamano nolal nono.

Ngeche 25:18

Ng’at ma riambo kuom wadgi chalo mana gi arungu kata ligangla kata asere mabith.

Ngeche 6:19

mar auchiel en janeno mawacho miriambo lilo, mar abiriyo en ng’at mathuwo osiepe mondo odhaw.

Eklesiastes 10:20

Kik ikuong’ ruoth kata mana e chunyi. Bende kik iwuo marach kuom jomwandu kata mana ka in kendi e odi mar nindo, nimar dipo ka winyo okawo wachno, motero oko.

Eklesiastes 4:1

Bang’e ne achako arango timbe ma isandogo ji e pinyni, mi ne aneno joma isando kaywak, to onge ng’ama konygi, nikech joma ne sandogi ne nigi teko mathoth.

Isaya 8:21

Ginikadhi e piny ka githagore kendo ka gidenyo. Kamano igi nowang’, mi giyany ruodhgi kendo Nyasachgi.

Amos 7:10

Amazia jadolo man Bethel nonyiso Jeroboam ruodh Israel niya, “Amos piem kodi e Israel, kendo wechene biro ketho piny.

Malaki 3:5

Ruoth Nyasaye Manyalo Gik Moko Duto owacho niya, “Abiro ng’adonu bura, kendo bedo janeno kuomu piyo piyo, ka ayalo ajuoke gi joma terore gi joma kuong’ore kayiem gi joma wuondo jotichgi e yor misara, kod joma ok oluora, ma timo marach ni mond liete gi nyithi kiye kod jopinje mamoko modak kuomu.”

Mathayo 9:3

To jopuonj Chik moko noparo e chunygi giwegi ni, “Jali yanyo Nyasaye!”

Luka 23:2

mi gichako donjone kuno, ka giwacho niya, “Ne wanwang’o jali kapuonjo jowa marach, kokwerogi ni kik gigol osuru ni Kaisar, kendo kowacho ni en owuon en Mesia, tiende ni ruoth.”

Johana 19:12

Mano omiyo Pilato nomedo dwaro gonye, to jo-Yahudi nogoyo koko matek ni, “Ka igonyo ng’atni to kara ok in osiep Kaisar, nikech ng’ato ang’ata ma owacho ni en ruoth to opiem gi Kaisar.”

Tich Joote 24:5

Wasenwang’o ni ng’atni en achach marach, kendo okelo jemo e kind jo-Yahudi e piny ngima, to bende en jatend kanyakla mar jo-Nazareth.

Tich Joote 6:11

Kuom mano, ne gimiyo jomoko asoya mondo owach ni ne giwinjo Stefano ka yanyo Musa kod Nyasaye.

Rapar mar Chik 13:10

Unugoye gi kite nyaka otho, nimar notemo hoyou mondo uwe Ruoth Nyasaye ma Nyasachu mane ogolou Misri kuma nubedoe wasumbni.

Rapar mar Chik 21:21

Eka jodalano duto nyaka goye gi kite nyaka otho. Mano e kaka unupwodhru kuom richo ma kamano, mi jo-Israel duto nowinj wachno, kendo nobed maluor.

Rapar mar Chik 22:21

to nyaka tere e dhood wuon mare, kendo jodalagi nogoye gi kite nyaka otho nimar osekelo wichkuot e piny Israel kochodo ka pod en e dala wuon. Mano e kaka unupwodhru kuom richo ma kamano.

Rapar mar Chik 22:24

to nyaka ukelgi giduto e dhoranga dala, mi ugogi gi kite nyaka githo. Nyaka neg nyakono nikech kata obedo ni ne en e dala kamano, to ne ok ogoyo uwi mondo okonye. Ng’atno to nyaka neg kuom kuodo wi chi wadgi. Mano e kaka unupwodh ogandau kuom richo ma kamano.

Rapar mar Chik 5:20

“ ‘Kik ihang ni ng’ato wach.

Jo-Hibrania 11:37

Moko ne ogo gi kite, to moko nong’ad sirunda, to moko bende noneg gi ligangla. Ne girwakore gi piende rombe kod piende diek, ka gidhier kendo kisandogi, bende ka gin gi chandruok malit.