1 Petro 5:9 - MUMA MALER 2015

⁹ Chung’uru motegno kuom yie ma un-go, mondo utame, ka ung’eyo ni oweteu moyie manie piny duto, bende yudo chandruok ma kamago.

Motingʼo Loko Manyien

⁹ Chungʼuru motegno kuom yie ma un-go kendo tameuru, nikech ungʼeyo ni joweteu moyie e piny ngima bende neno chandruok machal gi ma uneno.

1 Petro 5:9 ပူးပေါင်းရင်းမြစ်များ

Luka 22:32

To in aselemoni mondo yieni kik lal, kendo ka iselokori, miduogo ira, to nyaka ijiw oweteni.”

Johana 16:33

Asenyisou wechegi duto mondo kubedo kuoma, to uyud kue. Unune malit e piny, to beduru modhil, nimar an aseloyo piny!”

Tich Joote 14:22

Ne gitego chuny jopuonjre ka gijiwogi mondo gisik gibed gi yie motegno, ka giwachonigi niya, “Nyaka wane masiche mang’eny, eka wadonj e Piny Ruodh Nyasaye.”

1 Jo-Korintho 10:13

Onge tem ma useyudo mopogore gi tem ma ji duto yudo. Nyasaye en jaadiera, omiyo ok noyie mondo uyud tem mohingo tekreu, to nomiu yo ma uwuokgo e tem moro amora, kendo nomiu teko mar dhil gi tem go.

Jo-Efeso 4:27

Kik umi Satan thuolo ma kamano.

Jo-Efeso 6:16

Ting’uru yie ka okumba kinde duto, mondo uneggo aserni makakni ka mach mag Ng’ama Rach.

Jo-Kolosai 2:5

Kata obedo ni ok an kodu gi ringra, to an kodu gi chunya, kendo amor ahinya kaneno kaka uritoru maber, kendo kaka un gi yie motegno kuom Kristo.

1 Jo-Thesalonika 3:3

mondo kik ng’ato kuomu dog chien nikech masiche muneno. Un uwegi ung’eyo ni wan jo-Kristo nyaka wane sandruok ma kamago,

1 Timotheo 6:12

Ked lweny maber mar yie kimako ngima mochwere, ma en ngima mane oluongie kane ihulo malong’o ni iyie kuom Kristo e nyim ji mang’eny.

2 Timotheo 3:12

Chutho, ji duto madwaro doko joma oluoro Nyasaye kodembore kuom Kristo Yesu to nyaka yud sand.

2 Timotheo 4:7

Asekedo lweny maber, kendo asetieko ng’weya, bende aserito yie marwa.

Jo-Hibrania 11:33

Yie ema ne omiyo giloyo pinje mamoko, kendo girito ji gi bura makare, mi giyudo ni Nyasaye ochopo singruokne.

Jo-Hibrania 12:8

Ka Nyasaye ok kumu kaka okumo yawuote duto, to mano nyiso ni ok un yawuote hie, to un mana kimirwa.

Jakobo 4:7

Emomiyo, winjuru Nyasaye. Tamuru Satan to noringu.

1 Petro 1:6

Beduru mamor kuom wachno, kata obedo ni usebedo kuchandoru kuom tem mopogore opogore kuom kinde matin.

1 Petro 2:21

Mano e gima Nyasaye noluongou mondo utim, nimar Kristo owuon bende nosandore nikech un, mi oweyonu ranyisi mondo uluw timne.,

1 Petro 3:14

To bende kata kapo ni uyudo sandruok nikech timbe mabeyo, to mano kaka un johawi! Kik uluor ji, kendo kik uwe gibwogu.

1 Petro 4:13

To beduru mamor, kaka joma oriwore gi Kristo e masichene, mondo ubed gi mor mathoth, chieng, ma duong’ne maler ofwenyore.

Fweny 1:9

An owadu Johana, an e achiel kodu e sand gi loch kod kinda ma wan-go kuom Kristo Yesu. Ne oketa e chula miluongo ni Patmo nikech nalando wach Nyasaye, kendo awuoyo kuom Yesu e lela.

Fweny 6:11

Eka ne omigi law marachar ng’ato ka ng’ato, kendo ne owachnigi ni mondo gimed yueyo mondi matin nyaka chop kar romb jotich wetegi kod owetegi mane ibiro nego kaka gin, rom.

Fweny 7:14

To ne adwoke ni, “Jaduong’, in ema ing’eyo.” Eka ne owachona niya, “Magi e joma oseneno Sand Maduong’. Giselwoko lepgi e remb Nyarombo, mi gimiyo odoko marachere.