1 Johana 4:12 - MUMA MALER 2015

¹² Kata obedo ni nyaka nene onge ng’at moseneno Nyasaye, to ka waherore waduto, to Nyasaye osiko e iwa, kendo herane chopo tichne kuomwa chuth.

Motingʼo Loko Manyien

¹² Onge ngʼama oseneno Nyasaye, to ka waherore ngʼato gi ngʼato to Nyasaye odak eiwa, kendo herane chopo kare eiwa.

1 Johana 4:12 ပူးပေါင်းရင်းမြစ်များ

Chakruok 32:30

Jakobo nowacho niya, “Aseneno Nyasaye wang’ gi wang’, to pod angima!” Omiyo nochako nying kanyo ni Peniel (tiende ni, wang’ Nyasaye).

Wuok 33:20

Nomedo wacho ni Musa ni, “To ok inyal neno wang’a, nikech onge dhano ma nyalo neno wang’a, mi pod obed mangima.”

Kwan 12:8

En awuoyo kode wang’ gi wang’, kende mana moyangore ma onge ngero. Enone kit Ruoth Nyasaye. Ere kaka uhedhoru kuodho jatichna Musa?”

Johana 1:18

Onge ng’ama oseneno Nyasaye, to Wuowi ma miderma, machiegni gi Wuoro moloyo, ema osemiyo wang’eye.

1 Jo-Korintho 13:13

To gik moko adek ema osiko. Gin yie, gi geno, kod hera; to gima duong’ moloyo kuomgi en hera.

1 Timotheo 1:17

Opak Ruoth mochwere! En Ruoth ma ok tho, kendo ma ok ne. En e Nyasaye kende. Duong’ obedne ma nyaka chieng’. Amin.

1 Timotheo 6:16

En kende ema ok otho, kendo odak e ler ma dhano ok nyal chopoe. Onge dhano mosenene, kata manyalo nene. Pak gi loch ma nyaka chieng’ obedne! Amin.

Jo-Hibrania 11:27

Yie ema nomiyo owuok Misri ka ok oluoro mirimb ruoth. Ne odhil mana ka ng’ama oneno Nyasaye ma ok ne.

1 Johana 2:5

To ng’ama orito wach Nyasaye ema hera moherogo Nyasaye oselosi mobedo malong’o chuth. Mano e kaka wanyalo bedo gi ratiro ni wan jo-Nyasaye.

1 Johana 3:24

Ng’at momako chik Nyasaye osiko kuom Nyasaye, to Nyasaye bende osiko kuome. Wang’eyo ni Nyasaye osiko kuomwa nikech Roho ma osemiyowa.

1 Johana 4:16

Wang’eyo hera ma Nyasaye oherowago, kendo wageno kuom herano. Nyasaye en hera kendo ng’at mosiko ei hera, osiko ei Nyasaye, kendo Nyasaye osiko e iye.

1 Johana 4:20

Ka ng’ato wacho ni ohero Nyasaye to omon gi owadgi, to ojamriambo, nikech ok nyal bet ni ng’ama ok ohero owadgi ma oneno, nyalo hero Nyasaye mapok oneno.

1 Johana 4:6

Wan to wan mag Nyasaye, omiyo ng’at mong’eyo Nyasaye ema winjowa, to ng’at ma ok ja-Nyasaye ok winjwa. Mano e yo ma wang’eyogo pogruok manie kind Roho mar adiera, gi roho mar miriambo.