Yohane 2:11 - Deduamiti

¹¹ Yesungo Gariraia bangecfu Kana taonnu kecma negensinggegecdeac faka kuhagoc imoc hanahema meec. Mema kuc nga kibikperagia ifi mekperagiu medacfora yeneng imoc hemma ye negensinggegec.

Yoak kekehagocac Dzadzahac gboria nga Mitiyegec

¹¹ Yesungo Gariraia bangecfu Kana taonnu kecma negensinggegecdeac faka kuhagoc imoc hanahema meec. Mema kuc nga kibikperagia ifi mekperagiu medacfora yeneng imoc hemma ye negensinggegec.

Yohane 2:11 ပူးပေါင်းရင်းမြစ်များ

Mitiyegec 72:19

Yeac kpac kuneng imoc kuc nga kibikperagiagoc, imocac nasoya nasoya ye kenehebesonga. Yeac kuc nga kibikperagiango bangeha bangeha sokodacbeso. Imoc fora nga fora yombong.

Mitiyegec 96:3

Kebu ye kuc nga kibikperagiagoc, imoc bangeha bangeha ngicngacareng botucnginau dekperagima edeyunugec. Nga yeng kucfaka bibiagoc meec, imoc ngiha ngiha botucnginau edeyunubisia.

Makekeng 14:31

Anu Kebu kuctoayagocngo aigitangic faka ayemmeu Isracelngicngac yeni imoc henggec. Hemma damuyunuu Kebu negensinggegec nga enactofoc tofohongiha Mose ye ifingoc negensinggegec.

Makekeng 4:9

Me kucfaka yohockang imoc ifingoc negenggec fora mi anudeu ge Nilidokuunac doku efeanec fima bangec gbangge gbanggeau kpakebesena. Kpakena Nilidokuunac doku fidang imocngo bangec gbangge gbanggeau heiu sac anude.”

Malecaki 2:2

“Ngeni neac yoac mi negenggecde amma heregoc neac kpacnaac ewe mi heigecdeu sowecnango ngeneac witiu enu kenecngina ifingoc soweckebade. Ni kenecngina imoc bic soweckeai nocac ngeni heregoc neac ewe mi heinenggec.

Yohane 1:14

Anu enacyoacngo sebifusiagoc amma botucninau kefec. Kefu medac mocgungo fingecma Manggacarunac kuc nga kibikperagia mekefec, kuc nga kibikperagia imocnoc hening. Henni yearu danggunuc nga yoac fora wake wakea fede.

Yohane 1:43

Wereckengau Yesungo Gariraia bangecfu kembesonga negemma Firipo meficgema yofi edeec, “Ge hama modacnuna.”

Yohane 1:50

Ifi deu Yesungo yofi meremmiec, “Ge fig ic haniau tacna gendua deduaeac negensinnunec. Kecma faka yofia monggoc ferahema fingeru hennade.

Yohane 10:41

Ihai kecmanu ngicngac homacngo yearu hama degec, “Yohanengo negensinggegecdeac faka kuhagoc mong mi mekefec. Amma ye ngic yomocac hania deec, imoc sasawa sifu fora ande.”

Yohane 11:15

Nga ngeni negensinggegecdeac amma ni imohai mi kefaiac ubangerec negenduae. Ngeni yaguc hagec yearu kenni.

Yohane 11:47

Ayemmegec womonggareng enarafocngina amma farisaio, yeni tutumangtoaac memba kpedzucyunuma yofi degec, “Ngic yomoc ye negensinggegecdeac faka kuhagoc homac medeac nenang dafi anni?

Yohane 12:18

Ye faka kuhagoc imoc meecac amma habutoango yegoc ewacgecdeac kenggec.

Yohane 12:37

Yesungo faka kuhagoc homac kicnginau meu yeni ine ye mi negensinggegec.

Yohane 12:41

Yesaiango Yesuac kuc kibikperagiagoc henecac yeac negemma yoac yomoc deec.

Yohane 14:13

Medacngo Manggacac kuc nga kibikperagi heficgeudeac amma ngeni wiac sasawa neac kpacfu kpesigec, imoc ambade.

Yohane 16:27

Ngeni heregoc neac songo negendae nga ni Manggacarunac hayai, imoc negensinggegecde. Imocac Manggac yengenaoc ngeneac songo negende.

Yohane 16:30

Amma wiac sasawa negendacnec, imoc yaguc negendimbe. Ge mongngo kpesigenggecdeac mi obohonecac amma ge Anutuarunac hanec, imoc negensinggedimbe.

Yohane 2:1

Uameme yohockang wisickeu Gariraia bangecfu Kana taonnu memeturang fingerec. Nga Yesuac nonggea ihai kecmanu

Yohane 2:23

Anu Yesungo Yerusalennu makekenggac hombang naso femanu ihai kecma faka kuhagoc meu ngicngac homacngo hemma yeac kpara negensinggegec.

Yohane 3:2

Nga yeng tofocnac dzongiau Yesuaru hama deec, “Rabbi, geng Anutuarunac mama kpoukpou ua mekecnec, imoc negendimbe. Geng faka kuhagoc meannec, ua ifia ngic mongngo Anutuya kpac kecma naric mi mebac.”

Yohane 4:3

Nga Yesungo yoac ifi negemma Yudaia bangec wama Gariraia bangecfu monggoc dzigeneec.

Yohane 4:46

Heitaigec Yesungo Kana taong Gariraia bangecfu doku merennu waing anec, ihai monggoc dzigene kenec. Kenu ihai ngictauac kia mong haec, yeac medacngo Kafanaung taonnu hafei feec.

Yohane 4:54

Yesungo Yudaia bangecfunac Gariraia bangecfu dzigene hama negensinggegecdeac faka kuhagoc meu imocngo naso yohockang anec.

Yohane 6:14

Wakeu ngicngac yeng faka kuhagoc meec, imoc hemma degec, “Foracngoc, ngic yocnoc profete bangecfu haudeac dedea.”

Yohane 6:2

Nga yeng hafeigoc yenearu faka kuhagoc meu ngicngac yeneng imoc henggecac amma ngicngac habutoango ye modacgec.

Yohane 6:26

Ifi degec Yesungo yofi edeyunuec, “Foracngoc, neng faka kuhagoc meba hendau, imocac amma mi hofocnudae, imoc edengunuduae. Ngeni yaka negebec andauac hofocnudae.

Yohane 6:30

Ifi deu yeneng degec, “Hemma negensinggunideac noc faka kuhagoc menade nga ge noc ua naric menade?

Yohane 7:31

Nga habutoa yenearunac ngicngac homacngo ye negensinggema degec, “Messiango haude, imohai yeng faka kuhagoc meude, imoc ngic yocngo faka kuhagoc homacngoc meande, imoc mi ferahema meude.”

Yohane 9:16

Ifi deu farisaio goango degec, “Ngic imoc ye sabata tatacninaac sing mi modacde, imocac ye Anutuarunac kpac.” Ifi degec goango degec, “Ngic kopocsihagocngo dafi faka kuhagoc ifia mebac?” Ifi dema yenaocngoc tohogec.

2 Korinti 3:18

Nga nenang sasawa kicmesunina kperaha kpac kecni Kebuac kuc kibikperagingo kicninau wiking isoc heimerenu yeac onga annide. Amma yeac kperagingo kekecninau yadima saheude. Kebu ye Asu amma Asungo uaya meu faka imoc fingerude.

2 Korinti 4:17

Anu ebic nga kpendzeng kpeandimbe, imoc naso wegenanecsac feude, imocngo wiac kuneng mi ande. Imocngo ine sinnina meu kekecseriac kuc nga kibikperagia engenatoa menide.

2 Korinti 4:6

Anutungo yofi deec, “Kundununac kperagi fingecna.” (Fing 1:3) Anutu yennoc ubaherenina mekperagikecde. Amma Kristo ye Anutuac kuc nga kibikperagia negentegecde, negen negentegec imocngo yeac kicmesuyaunac hama ubaherenina mekperagiude.

1 Yohane 5:13

Ngicngac Anutu Medahaac kpac negensinggedae, yeneng kekecserigoc kecgecde, ngeni imoc negentegecgecdeac kibi yomoc ohongemmeduae.