Mika 5:8 - Deduamiti

⁸ Anu bangeha bangeha yenearunac Yacakowareng tosea yeneng ngiha ngiha yeneac botucfu kateac wasaiyang yenearunac laiong isoc nga ramahabu yenearunac laiong medaha mong kuchagocngo mesariyunuma mereckperecge meyunumanu mongngo naric mi kasokpeude.

Mika 5:8 ပူးပေါင်းရင်းမြစ်များ

Fingec fingec 49:9

Yehuda ye laionmedaha isoc. O medacna, ge yang kpema nannec. Ye laionyang isoc ngonducnema fenegenude. Amma ye laionngagera isoc andeac mongngo ye yarudeac naric mi suruckeude.

Mitiyegec 104:20

Geng kundung faina ama toforeu kateu yang yeneng kenghaanggecde.

Mitiyegec 44:5

Ngabafocnina yeneng wegenac hagec neni geac kucfu igocyununi worama kenggec geac kpacfu ngabafocnina tidzicyunuma memayununide.

Mitiyegec 50:22

Ngeni Anutu nigecngunuande, ngeni wiac imoc negensibisia. Ifi mi negensigecdeu neng ine kpedzamengunuba mongngo naric mi onggongngunuude.

Mika 2:12

“Foracngoc, Ni Yacakowac esamedacfora sasawa mekpedzuc angemmebade; Ni Isracel ngicngac ngeni monggoc wangecyunu habade. Ni rama odau kecandae ifi isoc kpedzucngunuba, ngicngac yeneng bangecnginau sokoma udumeng gombunga meficgema ramahabu yeneng kpindzing nema kpedzucfu kecandae, ifi isoc kecgecde.

Mika 4:13

“O Yerusalaimgac ngicngac, ngeni yacma tidzameyunugec. Ammanu neng baic serigbanggbanggea nga sepatoga aieng sacsac ngemmeba imocngo bangeha bangeha nendzicyunugec kapickapic anggecde.” Amma ngeni ngabafocngina yeneng dzikacfunac wiac damoc medacgec, imoc mema Kebu midacbisia. Nga ngabafocngina yenearunac dzofinac megec imoc ifingoc Kebu midacbisia.

Mika 4:7

Anu neng ngicngacfocna hani mangang tosea damoc meicyunukenggec, yeni meseriyunuba bangecareng kucnginagoc anggecde. Nga Ni Kebu neannaoc Tsion tikiu ngictaungina amma nasoyakpac bubungyunuma kecengkecbesanduae.

Mika 5:3

Ifiac amma Isracelngo kebuac ubangadeau kecmanungoc ngacnaroang monggac medac meme naso haude. Anu dacmunacfora tosea Isracelareng yeneng yearu monggoc dzigenema tahockedacbesandae.

Mika 7:18

Mongngo Anutu ge isoc mi kecdae, ge maridzomingfocga tosea kecdae, yeneac kopocsic wayemmeannec. Amma herebu naso herea mi mekecma ubamangang ayecayemmeac negenna ngereeande.

Dzekarya 10:5

Amma yeni yenahafocngoc gareng uangina mebesandae. Ngic kuctoanginagoc amma dzikac kpema ngabafocngina gotennu tirusueyunuandae, yeni kuc ifia mekecbesandae. Kebungo yenigoc kecdeac amma yeni dzikacfu firang amma ngabafocngina becosicfu kengkeng game kpekpeu faiyunubesandae.

Dzekarya 11:6

Kebungo yofi dede, “Ni bangec yomocac mingina yeneac ubamangang monggoc mi ambade. Negenggec, ni ngeneac tosofocngina nga ngictaufocngina yeneac mariu enggecdeac faingunubade, faingunuba yeneng amabangecngina memanganemagec yeneac mariunac mi mesingunubade.”

Dzekarya 12:3

Kecma naso debadeu faka meba Yerusalaim taongngo ngiha ngiha yenearu dzamandzing hoc isoc ebira yombong anu miacgecdeac ambibiema yenaocngoc memanganeemebesandae. Memanganeemema bangeha bangeha yeneng kpeturanggema ngaba sikemibesandae.

Dzekarya 14:18

Amma Aigita habu yeni imohai emma sing imoc mi modacgecdeu yenearu kia mong mi kpehembesande. Kebungo bangeha bangehaac ngic Yerusalaim taontoau emma bedzo bedzoac tatac nasoac hombang imocac sing mi modacgecdeu, yenearu ebictoa fingerudeac deec, ebic imocngo Aigita habu yeneac witiu embesande.

Dzekarya 9:15

Kurumenggac wasaiareng habuya habuya yeneac Kebungo agengngina tiu yeni tacbang kperec kperecgengic haningina bageau faiyunuma firang ambesandae. Firang amma minggongngic arohoandae ifi isoc arohobesandae. Amma sacngo sesememeac sokocfu wakeu kpetinggegec arata baiha nadzicmiande, ifi isoc ngabafocngina yeneac sacnginango sebinginau sokoma nadzicngemmedacbesande.

Malecaki 4:3

Amma ni faka mebesandua naso imohai ngeni mangana meme tidzameyunugec hanitabenginaac bageau yube isoc ambesandae.

Bangec kisiu 24:9

Yeni laionyang isoc mama fedae, yeni laiongngagera isoc fedae. Mongngo ye yarudeac ammiudeacsoc mi ambesande. Ngic kenecngunubesandae, yeni kenecnginagoc. Sowecngunubesandae yeni sowecnginagoc.”

Mataio 10:14

Nga mongngo mi hoangngunuma yoacngina mi negenudeu ngeneng ama me taong imoc wama haninginaunac yube kpegec mau kembisia.

Aposoro 18:6

Ifi ayemmeu yeni yoara surema deendema ammigec yeng fakangina wama wambaya kpeihaiu yube mau yofi edeyunuec, “Ngeneac sacngo ngenang orucfu habeso. Nga kopocsicnginaac turunga neac mi anude, imoc ngenang anude. Imocac yaguc wangunuma bangec monnunac ngicngac, yenearu kembade.”

Hebiraio 12:25

Imocac ngeni ngic yoac edengunukecde, ye ngadehebauac garengngina mema kecbisia. Imoc yofiac, Mosengo bangecfu kecma ngicngac goroyoac seria edeyunuu yeni yeac yoac negenggecdeac wama kecma kopocsicac turunga, imohacnac naric mi woragec. Nga yeng kurumenga kurumenga imohacnac mama goroyoac edenunumanu yoara ngadehenideu kopocsicac turung imohacnac ifingoc naric mi woranide.

Hebiraio 2:3

Anu Kebungo monggoc memengerecac sing mong kuha engena yombong edenunuec. Yeng imoc hanaheu yoara negenggec yeneng imocac hepuc amma edenunugec. Anu Anutu yengenaoc yoara meserima negensinggegecdeac kucfaka nga faka kiwa morora mema songoya modacma Tiri Asuac wosoefacac kuc nemmekefec. Ye ifi anecac nenang memengerecac sing kpenideu turungaac naric mi woranide.