Dzekarya 14:21 - Deduamiti

²¹ Ammanu Yerusalaim taontoau nga Yehuda bangecfu enang kudzi tackende imoc dzuacma, kurumenggac wasaiareng habuya habuya yeneac Kebu yeac amma kpetiac dedea. Ammanu ngicngac sasawa sesegerec faigecdeac sikebesandae yeni enang kudzi imohacnac goa mema sesegerecngina ihainoc ohobesandae. Ifi anggec, kurumenggac wasaiareng habuya habuya yeneac Kebu yeac womonnu, ngicngac kenacanareng yeneac nemu afeheyunuandae yeni ihai monggoc mi tacbesandae.

Dzekarya 14:21 ပူးပေါင်းရင်းမြစ်များ

Nehemia 8:10

Anu Nehemiango yofi edeyunuec, “Uameme yomocngo Kebuac kicfu kpetiac andeac amma ngeni kemma semengngina nga waing songeagoc nesogai anggec. Amma ngicngac damoc yeneng semengngina memengere mi anggec, yeni yemmegec negec. Ngeni imocac ubamangang mi ambisia. Kebuac sogacsogai imoc ngeneac kucngina.”

Yoele 3:17

Ifi fingecmanu ngeneng Ni Kebu Anutungina kpetiac tikina Tsionnu kecduae, imoc negenggecde. Ammanu Yerusalaimngo kpetiac anude. Anu kuricngic yeneng ihai susuferecge monggoc mi anggecde.

Tsefanya 1:11

O Yerusalaim tosea Mortar mingina tumiau kecdae ngeni arohoma winggema kiacbisia. Imoc yofiac, ngic finacamagoc sasawa imoc yeni kpac andacbesandae nga ngic silwa sigeriu faifai imoc yeni ifingoc kpac andacbesandae.

Dzekarya 14:20

Naso imohai becosic yeneac ubau wesic faifaia ihai kibi yofi oho ohoya febesande, “Kebuac kpetiacareng.” Ammanu Kebuac womonnu kudzi nganoc tackende imocngo aratau enang tackende imoc isocngoc ambesande.

Dzekarya 7:6

Ngeni nenedoku neandae, naso imohai ngenanggacsac negemma neandae.

1 Korinti 10:31

Ngeni nenedoku nedae me wiac mong angandaeu ngeni Anutuac negensima dengerebisia.

1 Timoteo 3:15

Nga uango dzegenuu bic mi habade isoc kpebunnu yeni sing dafiu kecbisia, imoc negembesena, imocac amma kibi yomoc ohoduae. Kpebung yeni Anutu kekehagoc, yeac ama nga yoac foraac karu amma wotung seria.

Hebiraio 3:6

Mose ye kingangkpepe kecma Anutuac uayoac modackefec nga Kristongo Anutuac Medac kecma uayoac modacma yeac amagareng kecde. Amma nenang kengeha kpac kurumenggac wiac menide, imoc wiac engena negemma serima mekecnideu Anutuac amanoc angkecnide.

1 Petoro 4:17

Imoc yofiac, Anutu ye yengena ama arengfora yenearu sing hanahema faka nga angammemengina isinggema desiudeac nasoya mi ukuude. Amma ye nenanggaru sing uaya imoc hanaheudeu areng goa yeni siduc gombunggac yoac kpeandae, yenearu uaya torokpema angammemenginaac turunga engenangoc yemmebesande.

Yohaneac kpefing 21:27

Amma wiac mong wonongagoc nga ngicngac angammemengina mangac manganea amma ikocnginagoc, yeneng taongtoa imocac manau naric mi enggecde, kpac. Ngicngac kpacngina ramamedahaac kekecac kibiu fede, yenengsac embesandae.

Yohaneac kpefing 22:15

Anu ngicngac kasi isoc kecdae nga mosocfaka mekecdae nga seroareng amma ngickpekpefaka mekecdae nga nemu numuyemmeandae amma sasawango ikocfakaac songo negemma ikoc angandae, yeneng ine ngadeau kecgecde.