A nɩbɛ do n a ŋmɩn-yir, a Divon nɩ a maalʋ-ziir kɛ́ bɛ tɩ kõ. A Mowab tẽw dem kone nɩ lãw-mʋɔlɛ Nebo nɩ Medeva. A zuru za fɔr fɔr a, ɛ́ a tɩ̃ɛmɛ za põ.
A Mowab tẽw ƴãw. À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Nyɛ̃ kpɩɛrʋ na páw a Nebo tẽw a, bɛ sãw ʋ na bɛr! Nyɛ̃ vĩ na nyɔw a Kiriyatayim tẽ-kpɛ̃ɛ a, bɛ zɛb'a de ʋ! Nyɛ̃ vĩ na nyɔw a zɛbr-yir-kpɛ̃ɛ ŋa a, ʋ lo na!
Divon tẽw nɩbɛ ɛ, nyɩ siw a nyɩ da-kɔw-yúor zu, nyɩ zɩ̃ a sagɛ pʋɔ. Bʋ̃ʋ n'ʋ vɛ̃, a sob nɛ na sãwnɛ a Mowab tẽw a, waar'ɩ a nyɩ ƴãw. Ʋ darɛ nɩ a nyɩ zɛbr-yir-kpɛn lɔbr.
Ɩ̃ na wul bɛ nɩ a ɩ̃ fãw. Ɩ̃ na sãw nɩ a bɛ tẽw bɛr, ɛ́ ɩ a ziir al za bɛ na kpɩɛr a ɩ zawlɛ, a na yi a wɛja-kpalɛ na be a saa-pɛrɩ́-dʋrʋ-lowr ɛ́ tɩ tɔ a Divla tẽ-kpɛ̃ɛ na be a saa-pɛrɩ́-gʋba-lowr a. Lɛ n'a bɛ za na sàw k'ɩ̃ɩ ɩ n a Sore.»
