Zeremi 4:7 - A SƐB-SÕW

⁷ A gbẽw yi n a ʋ tuw pʋɔ, a nɩ-bʋʋr-yoru sãw-sãwnɛ lo n a sɔ́r, ʋ yi n a ʋ beba zie, k'ʋʋ tʋ̃ɔ́ sãw a fʋ tẽw bɛr: a fʋ tẽ-bɛrɛ na dɩ n vũu, ɛ́ kʋ̃ cãà tɛr nɩbɛ bɛ kpɩɛr a pʋɔ ɩ.

Zeremi 4:7 ပူးပေါင်းရင်းမြစ်များ

2 Na-mɩnɛ 24:1

A ʋ naalʋ-dɩb daar'a a Babɩlɔn tẽw nãà, Nabikodonozɔɔr, tɩ wa zɛb de a Zuda tẽw. Ʋ tɩ só nɩ a Yoyakim yome ata. Al pùorí a Yoyakim bɛ lɛb cãà sàw ʋ só ʋ ɛ.

2 Na-mɩnɛ 25:1

Lɛ n'a a Babɩlɔn tẽw nãà, Nabikodonozɔɔr, tɩ wa a Zerizalɛm nɩ a ʋ zɛbr-nɩbɛ za, wa maalɩ a ʋ laɩ a tẽw niŋé. A Babɩlɔn tẽw dem tɩ wɛr'ɩ bɔwrɩ viiri koli a tẽw. A Sedesɩasɩ naalʋ-dɩb yome piwaɩ sob tɩ n'a, a cuwr pie sob bibie pie sob daar.

Ɩzayi 1:7

A nyɩ tẽw sãw nɩ ʋ za, vũu dɩ n a nyɩ tẽ-bɛrɛ. Sãanbɛ báarɛ nɩ a nyɩ tẽsɔw bʋ̃-kʋ́ɔrɩ a nyɩ mimié. A nyɩ tẽsɔw gã nɩ zawla, ʋ sãw nɩ ʋ za, ɩ mɛ̃ a lɛ dɔ̃ dem na mɩ́ wa tɔl baarɩ ʋʋ ŋmɛ̃ a.

Ɩzayi 5:9

A Sore, a kpɛnʋ-za-sob pɔb ŋa lo n a ɩ̃ tobe pʋɔ: «Yir-yaga, yir-bɛrɛ nɩ yir-vɩɛlɩ na lo na, nɩr kʋ̃ cãà kpɩɛr a ɩ.

Ɩzayi 6:11

Lɛ n'a ɩ̃ tɩ sowri: «Tɩ ta debor daar, Sore e?» Ʋ sɔw: «Tɩ ta a lɛn daar a tẽ-bɛrɛ na na sãw gã nɩbɛ bɛ cãà kpɩɛr a, a yie gã zawlɛ nɩsaalɛ za bɛ cãà nyùur a, ɛ́ a tẽsɔw sãw ʋ za a ɩ kpɩɛrʋ a.»

Zeremi 2:15

Bɛ ùore na mɛ̃ gben a, bɛ ŋmɛrɛ nɩ kɔkɛɛ a ʋ ƴãw. Bɛ sãw nɩ a tẽw za bɛr pelẽpelẽ. Bɛ nyɩw nɩ a ʋ tẽ-bɛrɛ bɛr, nɩr bɛ cãà kpɩɛr a pʋɔ ɩ.

Zeremi 22:6

A Zuda tẽw nãà yir ƴãw a, à ŋá n'a a Sore yere: «Ɩ̃ na saa nyɛ b fʋ vɩɛl man Galaadɩ tẽw tuwr a, bɩɩ ɩ mɛ̃ a Libã tẽw tan nyʋɔr a, ɩ̃ bɛ bʋ́nɛ nɩ na ɩ fʋ lɩɛbɩ a wɛja-kpalɛ ɩ, tẽ-kpɛ̃ɛ nɩr za na bɛ kpɩɛr a ɩ.

Zeremi 22:7

Ɩ̃ cɔbrɛ nɩ nɩbɛ na na ŋmɛr fʋ bɛr a, ŋa za tɛr'ɩ a ʋ tõ-tõ-bome. Bɛ na cɛ n a fʋ sɛɛdɩr tɩɩr dàar kpul-vɩɛlɩ ŋma lɔb a ƴãw vũumí.»

Zeremi 25:38

A gbẽw yi n a ʋ tuw pʋɔ. A bɛ tẽw lɩɛb'ɩ wɛja-kpalɛ, a zɛbr na zɛbr bɛ bãw nɩbaalʋ a ƴãw, nɩ a Sore su-tʋlʋ kpãkpã zũú.

Zeremi 25:9

ɩ̃ na tõ na bɛ tɩ bʋɔlɩ a Saa-pɛrɩ́-gʋba-lowr nɩbɛ za, lãwnɩ a ɩ̃ tõ-tõ-bie, a Nabikodonozɔɔr, a Babɩlɔn tẽw nãà. Ɩ̃ na ɩ na bɛ wa a tẽw ŋa nɩ a ʋ nɩbɛ nɩ a tẽ-kpɔwlɩ za na viiri koli ʋ a ƴãw. Ɩ̃ na kʋ nyɩ na pàw pɛr, a bɛl nɩ a nyɩɩm, ɩ̃ɩ na ɩ n a tẽw ŋa yie lɩɛbɩ deboru gã kʋralɛ, bɛ mɩ́ nyɛ̃ ŋmɩɛr pʋl-vʋ̃ɔ cɛlsɩ.

Zeremi 26:9

Fʋ sʋ̃ɔm'a ƴɛ̀rɛ a Sore yúor ƴãw yel à ŋá: «Bɛ na ŋmɛr'ɩ a Ŋmɩn-yir-kpɛ̃ɛ ŋa bɛr mɛ̃ a Silo tẽw dem a! Bɛ na ŋmɛr'ɩ a Zerizalɛm tẽw bɛr, ʋ kʋ̃ cãà tɛr nɩr ɛ!» A bɛlɩ dem za na tɩ be a Ŋmɩn-yir-kpɛ̃ɛ pʋɔ a tɩ gbõ n taa a Zeremi ƴãw.

Zeremi 27:8

A Sore yere na: Tẽw kãw bɩɩ naalʋ-tẽw kãw wa zawrɩ na tone a Nabikodonozɔɔr a, tẽw kãw bɛ wa sàw a Babɩlɔn tẽw nãà nɩ-kpɛ̃ɛnʋ dĩ ʋ mɛ̃ na-kʋ́ɔra-dàa a, ɩ̃ na ìr'ɩ a tẽw ŋa ƴãw nɩ zɛbr nɩ kɔ̃ nɩ jɛ̀lmɛ̃ bàalʋ. Ɩ̃ na tu n a Babɩlɔn tẽw nãà sãw a tẽw ŋa bɛr.

Zeremi 33:10

À ŋá n'a a Sore yere: «A nyɩɩm, a Zuda tẽw dem a, nyɩ yere na: “A tẽw ɩ n wɛja-kpalɛ, nɩbɛ nɩ dʋn bɛ cãà kpɩɛr ʋ ɛ.” Sɩza n'a, a Zuda tẽ-bɛrɛ nɩ a Zerizalɛm tẽw sɛ́ɛ gã nɩ zawlɛ. Nɩr za bɛ cãà kpɩɛr a pʋɔ ɩ, a nɩsaalbɛ nɩ a dʋn. Ɛcɛ a tẽw ŋa pʋɔ a, bɛ na lɛb'a wone

Zeremi 34:22

ɩ̃ na ƴãw nɩ nʋɔr kʋ̀ bɛ, kɛ̀ bɛ lɛb wa wa zɛb'ɩ a tẽ-kpɛ̃ɛ ŋa, zɛb de ʋ, ɛ́ nyɩw ʋ bɛr. Ɩ̃ na ɩ n a Zuda tẽ-bɛrɛ a lɩɛbɩ wɛja-kpalɛ, nɩr na bɛ kpɩɛr a», a Sore n'ʋ yel.

Zeremi 4:29

A wi-zɔmnbɛ nɩ a tã-tɛbrbɛ gɔmɛ ƴãw nɩ a tẽ-bɛrɛ za nɩbɛ zɔrʋ. Bɛ kpɩɛr'ɩ a tuwr pʋɔ, bɛ dúor'ɩ a pie zu. A tẽ-bɛrɛ za gã nɩ zawlɛ, nɩr za bɛ cãà be ɩ.

Zeremi 44:2

«À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Nyɩ nyɛ̃ nɩ a kpɩɛrʋ al za ɩ̃ na ɩ a páw a Zerizalɛm nɩ a Zuda tẽ-bɛrɛ a. A dɩ̃a a, a lɩɛb'ɩ deboru, nɩr bɛ lɛb cãà kpɩɛr a pʋɔ ɩ.

Zeremi 46:18

A nãà a yúor na dɩ kɛ́: “Sore kpɛnʋ-za-sob” a, yere nɩ à ŋá: “Mãa bɛ wa vʋʋrɛ a na, alɛ bɛ ɩ lɛ, a dɔ̃ sob na wa na. A bɛ tɛr bʋnʋ, mɛ̃ a Tabɔɔr tãw a ɩ, a bɛ tɛr bʋnʋ, mɛ̃ a Karmɛl tãw na do gãw a kʋ̃ɔ-kpɛ̃ɛ a ɩ.”

Zeremi 49:19

A Sore yere na: «Ɩ̃ na ɩ na mɛ̃ gbẽw na yire Zurdɛ̃ man tuwr pʋɔ cere zie mɔ̃-ɓaar na be kʋralɛ a. Fɔ̃wlɛ, ɩ̃ na ƴãw na a nɩbɛ za ìr a be. Lɛ n'a ɩ̃ na ƴãw a nɩ-kpɛ̃ɛ ɩ̃ na na kaa ír a, a Edɔm tẽw pʋɔ. Bʋ̃ʋ n'ʋ vɛ̃, ãa n'ʋ ŋmɛ̃ mɛ̃ a mãa a? Ãa n'ʋ na tʋ̃ɔ́ sowri mɛ̃ bom? Ɛ́ nɩ-kpɛ̃ɛ buor'ʋ na tʋ̃ɔ́ bà gbɛ́r a ɩ̃ niŋé?»

Zeremi 5:6

Alɛ so a gbẽw mɩ́ yi a tuwr pʋɔ bɛ bɛrɛ bɛ ɩ, a wɛja-kpalɛ pʋɔ wɛ-baar 'wɔbr bɛ. A nyũo mɩ́ gù a tẽ-bɛrɛ ƴãw tawr nɩr za na yire a cɩɛrɛ. Bʋ̃ʋ n'ʋ vɛ̃, a bɛ na gaarɩ a ɩ-ɩrɩ dɔwlɛ nɩ taa, ɛ́ nɩr kʋ̃ tʋ̃ɔ́ sɔ́r a Sore pùor-bɛ-tub ɩ-ɩrɩ ɛ.

Zeremi 50:17

A Ɩsɩrayɛl tɩ ɩ na mɛ̃ pɛrʋ na bɔr kɛ̀ gben diwr a. A dãw-niwn sob na tĩ 'wɔb ʋ a n'ɩ a Asiiri tẽw nãà. Al pùorí, a Babɩlɔn tẽw nãà, Nabikodonozɔɔr, wa kar ʋ a kɔbɛ.

Zeremi 50:44

A Sore yere na: Ɩ̃ na ɩ na mɛ̃ gbẽw na yire Zurdɛ̃ man tuwr pʋɔ cere zie mɔ̃-ɓaar na be kʋralɛ a. Fɔ̃wlɛ, ɩ̃ na ƴãw na a nɩbɛ za ìr a be. Lɛ n'a ɩ̃ na ƴãw a nɩ-kpɛ̃ɛ ɩ̃ na na kaa ír a, a Edɔm tẽw pʋɔ. Bʋ̃ʋ n'ʋ vɛ̃, ãa n'ʋ ŋmɛ̃ a mãa? Ãa n'ʋ na tʋ̃ɔ́ sowri mɛ̃ bom? Ɛ́ nɩ-kpɛ̃ɛ buor'ʋ na tʋ̃ɔ́ bà gbɛ́r a ɩ̃ niŋé?»

Zeremi 8:16

A dɔ̃ sob ta n a Dan tẽw baarɩ. A ʋ wie na vʋʋrɛ nɩ fãw a vʋʋrʋ yire nɩ a tẽ-kpɛ̃ɛ ŋa pʋɔ. A gɔmɛ a na kone ɩrɛ a ɩ na a tẽw za màwr. A waar'a k'aa wa sãw a tẽw nɩ bom za na be a ʋ pʋɔ a bɛr, a tẽ-kpɛ̃ɛ nɩ a ʋ nɩbɛ.»

Zeremi 9:11

Nɩr ɩ n yã-bãwnɛ a sɛw ʋ na bãw a yele á ŋá pɛr ɩ? A Sore wa ƴɛ̀r a ʋ zie a, ʋ̃ʋ ɩ bɛ bãw bʋ̃ʋ n'ʋ so a tẽw sãw, bʋ̃ʋ n'ʋ so ʋ dɩ a vũu mɛ̃ wɛja-kpalɛ a, ɛ́ ɩ zie nɩr za na bɛ tuur tɔlɛ a?

Ezekɩɛl 12:20

Nɩbɛ kʋ̃ be be kpɩɛr a tẽ-bɛrɛ pʋɔ ɩ, ɛ́ a tẽw na ɩ n wɛja-kpalɛ. Lɛ n'a nyɩ na bãw kɛ́ mãa n'ɩ a Sore.”»

Ezekɩɛl 21:31

À ŋá n'a a mãa Sore Naaŋmɩn yere: Fʋ kʋ̃ cãà tɛr a fʋ naalʋ bãwfʋ ɛ, bɛ na vɔw nɩ a fʋ naalʋ-kpawʋɔ. A yele lɩɛb'a! Bɛ na zɛw nɩ a nɩ-bɛ-tɛr-yée ɛ́ siwri a nɩ-yée.

Ezekɩɛl 32:2

«A fʋ̃ʋ nɩsaal bie, ŋmãa lãw-mʋɔlɛ a Eziptɩ tẽw nãà, Faarawɔ̃, ƴãw: “Fʋ ŋmɛ̃ na mɛ̃ gbẽw-pɔl a, a nɩ-bʋʋrɛ sɔgɔ. Ɛcɛ fʋ mɩ̀ ɩrɛ na mɛ̃ ɩba na be kʋ̃ɔ-kpɛ̃ɛ pʋɔ a. Fʋ damnɛ nɩ fʋ tʋɔra a fʋ man pʋɔ, fʋ dɛwr ʋ na bɛrɛ nɩ a fʋ gbɛ́ɛ, fʋ ɓʋɔlɛ nɩ a ʋ kʋ̃ɔ.

Levitɩ mɩnɛ 26:31

Ɩ̃ na ŋmɛr'ɩ a nyɩ tẽ-bɛrɛ bɛr, ɛ́ nɩr kʋ̃ cãà be a nyɩ zi-son pʋɔ ɩ. Ɩ̃ kʋ̃ cãà sàwr a nyɩ bagɛ zʋ̀ʋ́r na nyùur nʋ̃ɔ̀ nʋ̃ɔ̀ a ɩ.

Levitɩ mɩnɛ 26:33

Ɩ̃ na vʋ̃ɔ nɩ a zɛbr-sɔ-kpɛ̃ɛ a nyɩ ƴãw, ɛ́ diw nyɩ yaarɩ a nɩ-bʋʋr-yoru pʋɔ. A nyɩ tẽw na lɩɛb'ɩ wɛja-kpalɛ, ɛ́ a nyɩ tẽ-bɛrɛ lɩɛbɩ debo-bɛrɛ.