Zeremi 4:14 - A SƐB-SÕW

¹⁴ «Zerizalɛm i, fʋ̃ʋ wa bɔbr kɛ́ fʋ nyɛ̃ a faafʋ a, fʋ̃ʋ pɛ́w a fʋ socir faalʋ za bɛr. Debor'a a pʋ-tɩɛr-faar na yi zaa a fʋ pʋɔ?

Zeremi 4:14 ပူးပေါင်းရင်းမြစ်များ

Sɛb-sõw yielu 119:113

Ɩ̃ bɛ nɔnɛ a nɩbɛ a tɩɛrʋ na mɩ́ põ a ɩ, a fʋ wulu n'ʋ ɩ̃ nɔnɛ.

Sɛb-sõw yielu 51:2

A Daviir na tɩ gã nɩ a Bɛtɩsabe baarɩ, ɛ́ a naaŋmɩn-ƴɛ̀r-manɛ Natan cen tɩ páw ʋ a lɛn daar a n'a.

Sɛb-sõw yielu 66:18

Mãa tɩ ɩ mɛ̃ ɩ̃ tɛr'ɩ pʋ-tɩɛr-faa a, a Sore kʋ̃ʋ bɛr wõ m ɛ.

Zʋkpaɩ 1:22

«A nyɩɩm na bɛ bãw bom za a, debor'a nyɩ na nɔ̃w a nyɩ bom bɛ-bãwfʋ tɩ ta? A nyɩɩm nɩ-ɩ-laarbɛ, debor'a nyɩ na ɩ m la tɩ ta? A nyɩɩm dãbole, debor'a nyɩ na zawrɩ a bãwfʋ bɛr tɩ ta?

Ɩzayi 55:7

A nɩ-faa, ʋ bɛr a ʋ ɩb! A yel-fa-maalɛ, ʋ bɛr a ʋ tɩɛr-faar! Bɛ lɛb wa a Sore zie bɛ za, bʋ̃ʋ n'ʋ vɛ̃, ʋ na zɔ n bɛ nɩbaalʋ! Bɛ lɛb wa a tɩ Naaŋmɩn zie, ʋ mɩ́ dɩ n suur yaga za!

Zeremi 13:27

Aa! a fʋ pɩ̃ɔ ɩ-ɩrɩ, a dɛb vʋla kon, a fʋ pɔw-yɛm vĩ tome! Ɩ̃ nyɛ̃ nɩ a za vla a tãli zu nɩ a póru pʋɔ, a fʋ tɩb-faar faar! Bʋnʋ baw-bio n'a Zerizalɛm i, fʋ bɛ bɔbr kɛ́ fʋ so a fʋ dɛwr bɛr ɛ! Debor'a a na cãà cɛlɩ tɩ ta?»

Zeremi 17:1

«A Zuda nɩbɛ sãwna sɛb'a nɩ kur-nɔ-cɩlʋ bɩɩ kʋsɛ-bi-nyɩla kãw bɛ na bʋɔlɛ dɩamã a nɔ-cɩlʋ. Ʋ sɛb'ɩ a bɛ socie pʋɔ nɩ a bɛ bàwr-maal-kube ɩ́lɛ́ zu.

Zeremi 18:11

Ƴɛrɛŋa a, Zeremi i, ƴɛ̀r a Zuda nɩbɛ nɩ a bɛlɩ dem na kpɩɛr a Zerizalɛm a zie à ŋá: “À ŋá n'a a Sore yere: ɩ̃ cɔbrɛ nɩ kpɩɛrʋ a nyɩ ƴãw, ɩ̃ tɩɛrɛ nɩ yele a nyɩ ƴãw. A nyɩ kãw za, ʋ mɩ́ bɛr a ʋ ɩ-faa. Sɩza, nyɩ lɩɛbɩ a nyɩ vʋʋrʋ nɩ a nyɩ ɩb.”»

Zeremi 2:22

Fʋ̃ʋ saa na so kʋ̃ɔ nɩ zɩ̃ɛ a, fʋ̃ʋ saa na so kʋ̃ɔ nɩ sɩfan-yaga yaga a, a fʋ faalʋ dɛwr na cãà na be a ɩ̃ niŋé, a Sore Naaŋmɩn n'ʋ yel.

Zeremi 6:19

Tẽ-daa za nɩbɛ ɛ, nyɩ bɛrɛ wone: A mãa a, ɩ̃ na ɩ na a faa páw a nɩbɛ bɛ ŋa. A lɛ bɛl mɩŋa na tɩɛrɩ a yele bin a bʋ̃-páwra n'ʋ. Ɩ̃ ƴɛ̀r'ɩ a bɛ zie bɛ bɛ cɛlɩ be ɩ, bɛ zawr'ɩ a ɩ̃ wulu bɛr.

Ezekɩɛl 18:31

Nyɩ zawrɩ a nyɩ ɩ-faar za bɛr, nyɩ lɩɛbɩ a nyɩ socie nɩ a nyɩ tɩɛrʋ. Bʋ̃ʋ n'ʋ so nyɩ bɔbr kɛ́ nyɩ kpi, Ɩsɩrayɛl nɩbɛ ɛ?

Zakari 8:17

Nyɩ ta mɩ́ tɩ́ɛrɛ kɛ́ nyɩ maalɩ taa faa ɩ, nyɩ zawrɩ a pɔ-ziri pɔb, bʋ̃ʋ n'ʋ vɛ̃, ɩ̃ bɛ nɔnɛ a yele á ŋá taabɛ ɩ, mãa n'ʋ yere, a mãa Sore.»

Matie 12:33

«Tɩɛ wa vɩɛl a, a ʋ wɔmɛ na vɩɛl a, ɛ́ tɩɛ wa ɩ tɩ-sãwna a, a ʋ wɔmɛ na ɩ n wɔ̃-sãwnɩ. A tɩɛ wɔm zie n'a bɛ mɩ́ tʋ̃ɔ́ bãw a tɩɛ.

Luka 11:39

Lɛ n'a a Sore tɩ yel ʋ: «A nyɩɩm Faarizɩ̃ɛ mɩnɛ a, à ŋá n'a nyɩ ŋmɛ̃: nyɩ mɩ́ pɛ́w nɩ a koli-nyúura nɩ a laa zikur a vɩɛl, ɛcɛ a nyɩ pʋɔ nɩ̃ɛ paalɩ nyãnyu-tɩɛrʋ nɩ po-to-ɩb.

Zã 13:9

A Sɩmʋ̃ Pɩɛr yel ʋ: «Alɛ wa ŋmɛ̃ lɛ a, Sore e, ta pɛ́w a ɩ̃ gbɛ́ɛ tɛwr ɛ, pɛ́w lãwnɩ a ɩ̃ nuru nɩ a ɩ̃ zu za!»

Nɩ-toni 8:22

A na ɩ lɛ a, zawrɩ a fʋ yel-faa ŋa bɛr ɛ́ puori a Sore: a mɩnɛ kãw, ʋ na dɩ n a tɩɛr-faa ŋa na wa a fʋ zie a sãwna suur kʋ̀ b.

Ʋrɔm 1:21

Bʋ̃ʋ n'ʋ vɛ̃, bɛ bãw nɩ a Naaŋmɩn ɛ́ bɛ zɛw a ʋ yúor-vɩɛlʋ-danʋ ɛ, bɛ puor'ʋ yãanɩ na sɛw taa nɩ ʋ a ɩ. A bɛ tɩɛrʋ nɩ̃ɛ na lɩɛbɩ tɩɛr-zawlɛ, ɛ́ a bɛ gẽgẽ-yã be lige pʋɔ ʋ za.

1 Korɛ̃tɩ 3:20

lɛ nɩ kɛ́: «A Sore bãw nɩ a yã-bãwnbɛ pʋ-tɩɛrʋ, ʋ bãwnɩ a na a na ɩ tɩɛr-zawlɛ a.»

Zakɩ 4:8

Nyɩ taw pɩɛlɩ a Naaŋmɩn, ʋʋ na taw na pɩɛlɩ nyɩ. Nyɩ pɛ́w a nyɩ nuru, nyɩɩm yel-bebe dem bɛ ŋan i. Nyɩ maalɩ a nyɩ socie a vɩɛl, nyɩɩm nɩbɛ a tɩɛrʋ na põ a!