A Abɩa tɩ do n a Semarayim tãw na be a Efarayim tan vuo pʋɔ a nyʋɔrɩ́ tɩ ìr àr a be ɛ́ yel: «Zerobowam nɩ Ɩsɩrayɛl nɩbɛ za a, nyɩ bɛr wõ a ɩ̃ ƴɛ̀rʋ.
Lɛ n'a a Zuda nɩ a Bɛ̃zamɛ yie nɩ-bɛrɛ, a bàwr-maalbɛ nɩ a levitɩ mɩnɛ mɩnɛ nɩ a bɛlɩ dem za a Sore Naaŋmɩn na tɩ ƴãw a tɩɛrʋ kɛ́ bɛ cen tɩ lɛb mɛ a ʋ yir a Zerizalɛm a, bɛ tɩ cɔbrɩ a cenu.
A ʋlɩ bibir nɛ a, a ɩɩl-kpɛ̃ɛ na pɛbl'a. Lɛ n'a a bɛlɩ dem na tɩ bɔr be a Asiiri tẽw a, nɩ a bɛl bɛ na tɩ diw cen nɩ a Eziptɩ tẽw a, na lɛb wa. Bɛ na wa gbĩ n dume gũu tɩ tɔ tẽw a Sore niŋé, a tãw-sõw zu, a Zerizalɛm.
Zerizalɛm i, do tãw na kɛrɩ a zu, Sɩyɔ̃ i, cɩɩrɛ nɩ a fʋ fãw za. Fʋ̃ʋ na waar'ɩ yel-nʋ̃ɔ̀ a, zɛw a kɔkɔr, ta zɔrɛ dɛ̃bɩ̃ɛ ɩ. Yel a Zuda tẽw tẽ-bɛrɛ: «Nyɩ nyɛ̃ a nyɩ Naaŋmɩn!
Zerizalɛm i, a fʋ dacĩ-bɛrɛ zu a, ɩ̃ ƴãw nɩ zi-gùrbɛ. Bɛ bɛ be za na ɩ gbili a mʋ̃tɔ̃w nɩ a tɩ̃ɩsɔw ɛ. «Nyɩɩm na lɛb sɩ̃wnɛ a Sore tɩɛrʋ a Zerizalɛm ƴãw a, pɩ̃ɛnʋ bɛ ka a nyɩ zie ɩ!
Bibiir a tɩɛrʋ na lɩɛbɛ a, nyɩ lɛb wa, a Sore n'ʋ yere, bʋ̃ʋ n'ʋ vɛ̃, mãa n'ʋ ɩ a nyɩ zu-sob! Ɩ̃ na de nyɩ na, nɩ-been tẽ-kpɛ̃ɛ pʋɔ, nɩbɛ ayi tẽle pʋɔ, ɩ̃ɩ na lɛb'a tɛr nyɩ wa n a Sɩyɔ̃ tẽw pʋɔ.
Bɛ na lɔb'ɩ nʋ̃ɔ̀ cɛlsɩ ta n a Sɩyɔ̃ tãw zu. A bɛ niŋe na caal'ɩ a za a Sore bʋ̃-vɩɛlɩ niŋé: a ble, a divɛ̃-paala, a kãá-paala, píir, bʋʋr nɩ nĩi. Bɛ na ɩ na mɛ̃ zaadɛ̃ bɛ na cɔ̀r vla vla a, ɛ́ a bɛ fãw kʋ̃ lɛb siwri towtow ɛ.
Ɩ̃ na tɛr'ɩ a Ɩsɩrayɛl lɛb wa n a ʋ zi-sóra pʋɔ, ʋʋ na páw nɩ a bʋ̃-dɩrɩ a Karmɛl tãw zu nɩ a Basan tã-sɛr zu. Ʋ kʋ̃ mɩ́ bɔ bom gú a Efarayim tãw zu nɩ a Galaadɩ tẽw pʋɔ ɩ.
«Fʋ ɩ n nɩsaal tɛwr, ɛcɛ ɩ̃ ƴãw na fʋ ɩ zi-piwre a Ɩsɩrayɛl nɩbɛ ƴãw. Fʋ na bɛrɛ na wone a ɩ̃ ƴɛ̀rʋ, ɛ́ yere a yelu ɩ̃ na yere a Ɩsɩrayɛl nɩbɛ a kʋ̀rɛ bɛ.
«A fʋ̃ʋ nɩsaal bie, lɛb kpaalɩ a Ɩsɩrayɛl nɩbɛ bom nɛ na mɩ́ ɩ, mãa wa ɩ zɛbr lo tẽw kãw pʋɔ a. A bɛlɩ dem na kpɩɛr a tẽw nɛ pʋɔ a mɩ́ kaa na ír nɩr a bɛ pʋɔ, ʋ ɩ a bɛ zi-piwre.
A Sob nɛ na piwre a zie a Efarayim ƴãw a be n a Naaŋmɩn zie, a naaŋmɩn-ƴɛ̀r-manɛ n'ʋ. Ɛcɛ bɛ ƴãwnɛ nɩ bɛrɩ a ʋ sɛ́ɛ za zu, bɛ mɩ́ diw ʋ na tɩ sãá nɩ a ʋ Naaŋmɩn yir.