Zeremi 3:17 - A SƐB-SÕW

¹⁷ A lɛn daar a, bɛ na bʋɔlɛ nɩ a Zerizalɛm kɛ́ “Sore naalʋ-dà-kɔw”. A nɩ-bʋʋr-yoru na zɔ na ɓã taa a ɩ̃ zie, a Sore yúor na kʋ̀ a Zerizalɛm a zũú, ɛ́ bɛ na zawr'ɩ a bɛ tɩɛr-faar bɛr.

Zeremi 3:17 ပူးပေါင်းရင်းမြစ်များ

Yele-za-pɛr-tib 8:21

A Sore tɩ wõ n a nyũu na nyu vla a, ɛ́ tɩɛr ʋ pʋɔ: «Ɩ̃ bɛ be za na lɛb ŋmɛ ƴãw a tẽsɔw a nɩsaal ƴãw ɛ. Sɩza n'a, a nɩsaal pɔ̀lʋ daarɩ́ za n'a a ʋ socir mɩ́ tu a faa pùor, ɛcɛ ɩ̃ bɛ be za na lɛb dɔwrɩ bʋ̃-vʋʋra za mɛ̃ à à ŋá ɩ̃ na ɩ a ɩ.

1 Na-mɩnɛ 8:41

«Bɛlɛ wa ƴɛ̀rɛ a fʋ yúor na ɩ kpɛ̃ɛ a ƴɛ̀rʋ a, nɩ a fʋ kpɛnʋ nɩ a fʋ fãw tome ƴɛ̀rʋ a, a nɩ-bʋʋr-yoru tɛɛ za na wõ a na. A lɛ a, sãan na bɛ pʋɔ a fʋ nɩ-bʋʋrɛ Ɩsɩrayɛl pʋɔ a, wa yi tẽ-zãána kãw wa k'ʋʋ wa puori fʋ a Ŋmɩn-yir-kpɛ̃ɛ ŋa pʋɔ a,

Sɛb-sõw yielu 102:23

a lɛn daar a nɩ-bʋʋrɛ za nãà wa ɓã taa a, a naalʋ-ten za nãà wa puore a Sore a.

Sɛb-sõw yielu 78:8

A lɛn daar a, bɛ kʋ̃ ŋmɛ̃ taa nɩ a bɛ sãàkʋm-kore daar nɩbɛ na zawr'ɩ a Naaŋmɩn nʋɔr ɛ́ gaarɩ a ɩ. A bɛ tɩɛrʋ tɩ lɩɛbɛ nɩ kʋralɛ, ɛ́ bɛ tu a Naaŋmɩn ɛ.

Sɛb-sõw yielu 87:3

Naaŋmɩn tẽ-kpɛ̃ɛ ɛ, yel-vɩɛlɩ n'a ʋ manɛ a fʋ ƴãw: Tɛw-àrʋ

Ɩzayi 26:8

Sɩza n'a, Sore e, a sɔ́r fʋ na yel kɛ́ tɩ tuur a zu a, tɩ mɩ́ ƴãw nɩ a tɩ tɩɛrʋ a fʋ ƴãw. A ʋlɩ bom nɛ tɩ na bɔbr a n'ɩ kɛ́ tɩ bʋɔlɛ fʋ, tɩ tɩ́ɛrɛ fʋ.

Ɩzayi 56:6

A sãanbɛ bɛl na tu a Sore pùor, kɛ́ bɛ ƴãwnɛ ʋ ɛ́ nɔnɛ ʋ, kɛ́ bɛ ɩ a ʋ tõ-tõ-biir a, a Sore yere nɩ à ŋá a bɛ ƴãw: «Bɛlɛ wa maal tɛr a ɩ̃ pɩ̃ɛnʋ-bibir vla a, bɛlɛ wa tu a ɩ̃ wõ-taa pùor a,

Ɩzayi 59:19

Lɛ n'a a mʋ̃tɔ̃w puru zie tɩ tɔ a kpɛb zie, a nɩbɛ za na zɔrɛ a Sore, bɛ za na zɔrɛ a ʋ yúor-vɩɛlʋ-danʋ. Bʋ̃ʋ n'ʋ vɛ̃, a Sore na wa na mɛ̃ man-fɩɩra kʋ̃ɔ saa-sɛsɛb na fure darɛ a.

Ɩzayi 6:1

A nãà Ozɩasɩ kũu yũon, ɩ̃ tɩ nyɛ̃ nɩ a Sore ʋ zɩ̃ naalʋ-dà-kɔw na kɛrɩ yaga za a zu. A ʋ kpar-kpɛ̃ɛ pɛr na mɩ́ vure a tẽw a pùorí a tɩ paal'ɩ a Ŋmɩn-yir-kpɛ̃ɛ.

Ɩzayi 66:1

À ŋá n'a a Sore yere: «A salom ɩ n a ɩ̃ naalʋ-dà-kɔw ɛ́ a tẽsɔw ɩ a ɩ̃ gbɛ́ɛ dɔwlʋ zie. Yir bʋ̃ʋ n'ʋ nyɩ na tʋ̃ɔ́ ŋmãa kʋ̀ m? A zie n'ɩ buor ɩ na na tʋ̃ɔ́ kpɩɛr a?

Ɩzayi 66:18

A Sore yere na: «Ɩ̃ bãw nɩ a alɩ bome nɛ bɛ na ɩrɛ a, nɩ a alɩ bome nɛ bɛ na tɩɛrɛ a. Ɩ̃ waar'a k'ɩ̃ɩ wa ɓã a nɩ-bʋʋrɛ za na ƴɛ̀rɛ ƴɛ̀r-pɛ-bʋʋrɛ za a taa.

Ɩzayi 66:20

A nɩbɛ bɛ ŋa na tɛr'ɩ a nyɩ yɛbr za na tɩ be a bɛ zie a lɛb wa n. Wie zu, zɛbr-torkori pʋɔ, torkori na pàw ɓaarʋ a pʋɔ, mílɛ̀ nɩ nyɔ̃wmɩ zu n'a bɛ na tɛr bɛ lɛb wa n a ɩ̃ tãw-sõw zu a Zerizalɛm. A Sore n'ʋ yel. A na ɩ n a bɛ de-kʋ̀b bom a ɩ̃ ƴãw. Ɩ̃ na sàw na de ʋ mɛ̃ a de-kʋ̀b bom ʋl a Ɩsɩrayɛl nɩbɛ na mɩ́ wa n a ɩ̃ Yir laar na bɛ tɛr dɛwr a pʋɔ a.

Zeremi 11:8

Ɛcɛ bɛ bɛ tɩ bɛr wõ ɩ, bɛ bɛ tɩ ƴãw tobr ɛ, bɛ tɩ tu n a bɛ pʋ-tɩɛr-faar. Lɛ n'a ɩ̃ tɩ ɩ a wõ-taa ƴɛ̀r-bie ɩ̃ na tɩ ƴãw nʋɔr kɛ́ bɛ tuur, ɛ́ bɛ bɛ tu a, a lo a bɛ zu.»

Zeremi 12:15

Al pùorí, ɩ̃ na lɛb'a zɔ a bɛ nɩbaalʋ, ɛ́ lɛb tɛr ŋa za cen nɩ a ʋ zi-sóra pʋɔ, a ʋ tẽw pʋɔ.

Zeremi 12:16

Bɛ tɩ zanɩ nɩ nɩ a ɩ̃ nɩ-bʋʋrɛ bɛ mɩ́ pɔ a Báàl yúor ƴãw. Ɛcɛ bɛlɛ mɩ̀ wa sɩrɩ zanɩ a tub a na fɛr k'aa ɩ̃ nɩ-bʋʋrɛ tuur a, bɛlɛ mɩ́ wa pɔ a ɩ̃ yúor ƴãw yel: “Ɩ̃ pɔrɛ nɩ nɩ a Sore na vʋʋrɛ a”, a lɛ pʋɔ a, bɛ na nyɛ̃ nɩ zie a ɩ̃ nɩ-bʋʋrɛ pʋɔ.

Zeremi 14:21

A fʋ yúor zũú a, ta jɛ a fʋ naalʋ-dà-kɔw-yúor bɛr ɛ, ta jewr'ʋ ɛ! Lɛb tɩɛrɩ a wõ-taa fʋ na maal'ɩ tɩ a, ta sãw ʋ bɛr ɛ.

Zeremi 16:12

Ɛ́ a nyɩɩm a, nyɩ ɩrɛ nɩ faa zuo a nyɩ sãàkʋm-kore. Ŋa za mɩ́ tuur'ɩ a ʋ pʋ-tɩɛr-faa ɛ́ nɩ̃ɛ bɛr a ɩ̃ bɛr-wob.

Zeremi 16:19

Sore e, fʋ̃ʋ n'ɩ a ɩ̃ fãw na mɩ́ piw mɛ̃ tɛr a, fʋ̃ʋ n'ɩ a ɩ̃ sɔwlʋ zie a kpɩɛrʋ daar. Fʋ̃ʋ zie n'a a nɩ-bʋʋr-yoru na yi a tẽw baarʋ ziir za wa, wa yere à ŋá: «A tɩ sãàkʋm-kore bʋ̃-sori bɛ na páw a ɩ n ziri tɛwr, bome na bɛ tɛr pɛr ɛ́ mɩ̀ bɛ tɛr yel-ɩra a n'a.

Zeremi 17:12

Naalʋ-dà-kɔw-yúor be n a saa-zu a pɛr-tib daar za: a tɩ zi-sõw beba zie n'a.

Zeremi 18:12

Ɛcɛ bɛ na sɔw na: «Fʋ bàlɛ nɩ fʋ tʋɔra! Tɩ na ɩ n a lɛ tɩ na yel a, tɩ na tuur'ɩ a tɩ tɩɛr-faar.»

Zeremi 3:19

Ɩ̃ tɩ tɩɛr'ɩ ɩ̃ pʋɔ à ŋá: «Ɩ̃ tɩ bɔbr'a k'ɩ̃ɩ nãà sɔr fʋ ƴãw a ɩ̃ bidɛbr pʋɔ, ɛ́ kʋ̀ b tẽw na vɩɛl vɩɛl a, a tẽ-daa zi-vla za zie!» Ɩ̃ tɩ tɩɛr'ɩ ɩ̃ pʋɔ: Fʋ na bʋɔlɛ mɛ̃ na: “Ɩ̃ sãà”, ɛ́ fʋ kʋ̃ lɛb gùr pùor cɔw mɛ̃ ɩ.

Zeremi 31:23

À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Mãa wa lɛb maalɩ a Zuda tẽw nɩ a ʋ tẽ-bɛrɛ ƴãw a lɛn daar a, a nɩbɛ na lɛb'a yere a ƴɛ̀r-bie á ŋá: “A Sore, ʋ maalɩ fʋ, Sɩyɔ̃ tãli-sõw i, fʋ na ɩ zie a faafʋ na kpɩɛr a!”

Zeremi 33:9

Lɛ n'a nʋ̃ɔ̀ na mɩ́ ɩrɛ mɛ̃ a Zerizalɛm yúor bʋɔlʋ ƴãw. A tẽ-kpɛ̃ɛ ŋa na ɩ na ɩ̃ tɛr yúor, ʋlɛ n'ʋ na so ɩ̃ nyʋʋr a tẽw zu nɩ-bʋʋrɛ za niŋé. Bɛlɛ wa wõ a vla al za ɩ̃ na na maal'ʋ a, bɛ na màwr'ɩ dɛ̃bɩ̃-mawfʋ, ɛ́ pʋ̀lá vʋ̃ɔnɛ bɛ, bɛ na nyɛ̃ a nʋ̃ɔ̀ nɩ a ƴã-ɓaarʋ al za ɩ̃ na na kʋ̀ ʋ a.»

Zeremi 4:2

A fʋ pɔb pʋɔ fʋ̃ʋ mɩ́ wa yel: “Ɩ̃ pɔ n nɩ a Sore na vʋʋrɛ a,” ɛ́ a tu a yel-mɩŋa, a lɛ-na-tu-sɔr-a nɩ a mɩnʋ a, a nɩ-bʋʋr-yoru na mɩ́ zɛlɛ na k'ɩ̃ɩ maalɩ bɛ, ɛ́ bɛ na mɩ́ nyʋʋr'ɩ a ɩ̃ ƴãw.

Zeremi 7:24

Ɛcɛ bɛ bɛ bɛr wõ ɩ, bɛ bɛ cɛlɩ be ɩ, bɛ ɩ n lɛ bɛ na nɔnɛ a, a bɛ zu-kpɛ̃w-faa faa pʋɔ. Bɛ nãá lɩɛbɩ a bɛ niwn cɔw mɛ̃ a, bɛ bɛr'a ɛ́ lɩɛbɩ kpaar cɔw mɛ̃.

Zeremi 9:14

A na ɩ à ŋá a, à ŋá n'a a mãa, a Sore, a kpɛnʋ-za-sob, a Ɩsɩrayɛl Naaŋmɩn, yere: Ɩ̃ na ɩ na a nɩbɛ bɛ ŋa 'wɔb tɩ-va-tuo, ɛ́ nyũ kʋ̃ɔ na tɛr lɔw a.

Ezekɩɛl 1:26

A bɩwra na tɩ be a zu-sɔw a saa-zu a pʋɔ a, bɛ tɩ nyɛ̃ nɩ safɩɩr kʋsɩɛr na ŋmɛ̃ taa nɩ naalʋ-dà-kɔw a. A naalʋ-dà-kɔw ŋmɛ̃-ta-tɔ ŋa zu, a saa-zu za a, ŋmɛ̃a na ŋmɛ̃ mɛ̃ nɩr a tɩ àr'a.

Ezekɩɛl 43:7

A kɔkɔr nɛ tɩ yel mɛ̃ na: «Nɩsaal bie e, bɛrɛ wone! A ka ɩ n a ɩ̃ naalʋ-dà-kɔw zie, a tẽsɔw ɩ̃ na mɩ́ bin a ɩ̃ gbɛ́ɛ a. Ɩ̃ na kpɩɛr'ɩ a ka a Ɩsɩrayɛl nɩbɛ sɔgɔ kʋralɛ. A Ɩsɩrayɛl nɩbɛ nɩ a bɛ na-mɩnɛ kʋ̃ lɛb ɩ a ɩ̃ yo-sõw la ɩ: bɛ kʋ̃ cãà ɩrɛ a pɔw-yɛm ɩb ɛ́ kʋ̃ cãà ũùne a bɛ na-mɩnɛ na kpi a ƴã-gamɛ a ka ɩ.

Ezekɩɛl 48:35

A dacine na na viiri koli a tẽ-kpɛ̃ɛ a wowr za na ɩ n mɛtɩr tùr-piwaɩ (9 000). A na dɛ tĩ a ʋlɩ bibir nɛ a, bɛ na bʋɔlɛ nɩ a tẽ-kpɛ̃ɛ kɛ́: “A-Sore-be-n-ka.”»

Zakari 2:11

Alɛ! Zerizalɛm nɩbɛ bɛ na diw cen nɩ a Babɩlɔn a, nyɩ paw fɔ̃w zɔ cɩ̃ɛ.»

Zakari 8:8

Ɩ̃ na ɩ na bɛ yi a be lɛb wa wa kpɩɛr a Zerizalɛm. Bɛ na ɩ n a ɩ̃ nɩ-bʋʋrɛ, ɩ̃ɩ ɩ a bɛ Naaŋmɩn. Ɩ̃ na dɩrɛ nɩ naalʋ a bɛ zu, nɩ yel-mɩŋa nɩ mɩnʋ.»

Sɔr-nɛ́ɛ 15:39

A na ɩ lɛ a, nyɩ na suur'ɩ kparɩ na tɛr zʋɔrɛ a, ɛ́ nyɩmɛ mɩ́ wa nyɛ̃ a a, nyɩ na mɩ́ lɛb'a bãwnɩ a ɩ̃ nɛ-ƴãwnɩ ɛ́ tuur a. Lɛ n'a nyɩ kʋ̃ mɩ́ bɛr a nyɩ mimie nɩ a nyɩ socie tɛr nyɩ tu n a tɩbɛ pùor ɛ.

Ʋrɔm 1:21

Bʋ̃ʋ n'ʋ vɛ̃, bɛ bãw nɩ a Naaŋmɩn ɛ́ bɛ zɛw a ʋ yúor-vɩɛlʋ-danʋ ɛ, bɛ puor'ʋ yãanɩ na sɛw taa nɩ ʋ a ɩ. A bɛ tɩɛrʋ nɩ̃ɛ na lɩɛbɩ tɩɛr-zawlɛ, ɛ́ a bɛ gẽgẽ-yã be lige pʋɔ ʋ za.

Ʋrɔm 6:14

Bʋ̃ʋ n'ʋ vɛ̃, a yel-bier kʋ̃ cãà dɩrɛ naalʋ a nyɩ zu ɛ, a Naaŋmɩn wulu na bɛ cãà so nyɩ, ɛ́ Naaŋmɩn maalʋ so nyɩ a ƴãw.

Galasi 4:26

Ɛcɛ a Zerizalɛm na be a saa-zu a bɛ ɩ gbãgbaa ɩ, ɛ́ ʋlɛ n'ɩ a tɩ mã.

Ƴɛ̀r-dɩrbɛ 2:19

Ɛcɛ a ƴɛ̀r-dɩrɛ wa kpi a, bɛ mɩ́ lɛb'a tĩ ɩrɛ a ɩ-faar, a nɩ̃ɛ zuo a bɛ sãàkʋm-kore dem. Bɛ mɩ́ tɩ puore nɩ ŋmɩn yoru, ɛ́ gbine dume a niŋé. Bɛ bɛ mɩ́ tɩ zawrɩ a bɛ ɩ-faar ɛ, ɛ́ cãà zawrɛ a Naaŋmɩn nʋɔr cere nɩ.