Zeremi 3:13 - A SƐB-SÕW

¹³ Dɛ́ sàw a fʋ sãwna: fʋ gáarɩ nɩ a ɩ̃ zu, a mãa Sore fʋ Naaŋmɩn zu. Fʋ zɔ na cɔlɩ a ziir za, a ŋmɩn-sãanbɛ zie, a tɩ-zimpiri za pile, ɛ́ bɛ bɛr wõ a ɩ̃ ƴɛ̀rʋ ɛ, a Sore n'ʋ yel.”»

Zeremi 3:13 ပူးပေါင်းရင်းမြစ်များ

Neemi 9:2

Bɛ tɩ ow na yi a bɛlɩ dem za na bɛ ɩ Zifʋ mɩnɛ a pʋɔ, ɛ́ yere kɛ́ bɛ maal'ɩ yel-bebe, bɛlɛ nɩ a bɛ sãàkʋm-kore.

Zʋkpaɩ 28:13

Nɩr na sɔwlɛ a ʋ sãwna bɛrɛ a, a ʋ yel kãw za kʋ̃ maal ɛ, ɛcɛ nɩr na bãw a ʋ sãwna, ɛ́ zawr'ʋ bɛr a, ʋ na páw nɩ suur-dɩ-kʋ̀b.

Ɩzayi 57:5

Nyɩ mɩ́ ɩ na a ƴãw cɩrɛ nyɩ a nyɩ maalʋ-ziir tɩɩr pɛr, tɩ-zimpiri za pile. Nyɩ mɩ́ maal'ɩ nɩ bibiir bàwr a fʋɔlɩ pʋɔ, a pìe bɔwrɩ pʋɔ.

Zeremi 14:10

À ŋá n'a a Sore ƴɛ̀rɛ a nɩbɛ bɛ ŋa ƴãw: «Sɩza, a nɩbɛ bɛ ŋa nɔnɛ nɩ cɔlʋ, bɛ bɛ zɩnɛ zi-been ɛ.» Ɛcɛ, bɛ na bɛ pɛlɩ a Sore pʋɔ a, ƴɛrɛŋa a, ʋ lɛb'a tɩɛrɩ a bɛ sãwna ɛ́ na dɔwrɩ bɛ a bɛ yel-bebe zũú.

Zeremi 14:20

Sore e, tɩ sàw na kɛ́ tɩ bɛ tõ vla ɩ, tɩ sàw nɩ a tɩ sãàkʋm-kore sãwna. Tɩ sãw fʋ na.

Zeremi 2:20

«Koro za n'a fʋ gáarɛ a ɩ̃ zu. Fʋ ɩ na a baarɩ mãa nɩ a fʋ̃ʋ cara pʋɔ, ɛ́ fʋ yel: “Ɩ̃ bɛ cãà bɔbr k'ɩ̃ɩ ɩ gbãgbaa ɩ.” Bʋ̃ʋ n'ʋ vɛ̃, tãle za zu, tɩ-zimpiri za pile, fʋ mɩ́ gã na mɛ̃ pɔw-yɛm a.

Zeremi 2:25

“Maal ɩrɛ, Ɩsɩrayɛl i! Fʋ na ƴãw nɩ a fʋ gbɛ́ɛ bàalʋ ɛ́ a fʋ kɔkɔr ko.” Ɛcɛ fʋ sɔw na: “Nyɩ ta dɩ tuo bàlɛ nyɩ tʋɔra ɩ! Ɩ̃ nɔnɛ nɩ a ŋmɩn-sãanbɛ ɛ́ bɔbr k'ɩ̃ɩ tu a!”

Zeremi 3:2

Dʋɔ a zu a tãli lowr ɛ́ jɩ́r nyɛ̃, tãli-been be n be zie fʋ bɛ gã nɩ a fʋ sɛn kãw ɛ? Fʋ mɩ́ tɩ zɩ̃ n a sɔ́r nʋɔr gùre a fʋ sɛnbɛ, mɛ̃ a wɛja-kpalɛ pʋɔ nɩ-yʋɔra na gùre a nɩbɛ ʋ na na ŋmãa a. Fʋ dɛw nɩ a tẽw nɩ a fʋ pɔw-yɛm ɩ-ɩrɩ, nɩ a fʋ cenu na bɛ vɩɛl a.

Zeremi 3:25

Tɩ gã nɩ a tɩ vĩ, tɩ sàw a tɩ yúor na sãw a. Bʋ̃ʋ n'ʋ vɛ̃, tɩɩm nɩ a tɩ sãàkʋm-kore mɩnɛ maal'ɩ yel-bier sãw nɩ a Sore tɩ Naaŋmɩn, a tɩ pɔ̀lʋ daarɩ́ za wa tɔ a dɩ̃a. Tɩ bɛ bɛr wõ a lɛ a Sore tɩ Naaŋmɩn na tɩ yere kʋ̀rɛ tɩ a ɩ.»

Zeremi 3:6

A nãà Zozɩasɩ daar a, a Sore tɩ yel mɛ̃ na: «Fʋ nyɛ̃ nɩ a ʋlɩ bom nɛ a Ɩsɩrayɛl a tɩɛrʋ na lɩɛbɛ a na ɩ a? Ʋ do n tãw za na kɛrɩ a zu, ʋ cen nɩ tɩ-zimpiri za pile tɩ tõ a pɔw-yɛm tome a be.

Zeremi 7:24

Ɛcɛ bɛ bɛ bɛr wõ ɩ, bɛ bɛ cɛlɩ be ɩ, bɛ ɩ n lɛ bɛ na nɔnɛ a, a bɛ zu-kpɛ̃w-faa faa pʋɔ. Bɛ nãá lɩɛbɩ a bɛ niwn cɔw mɛ̃ a, bɛ bɛr'a ɛ́ lɩɛbɩ kpaar cɔw mɛ̃.

Zeremi 7:26

Ɛcɛ nyɩ bɛ bɛr wõ m ɛ, nyɩ bɛ cɛlɩ be ɩ, nyɩ ɩ n zu-kpɛ̃w ɩb. Nyɩ kpɛ n faa zuo a nyɩ sãàkʋm-kore.

Ezekɩɛl 16:15

«Ɛcɛ, fʋ tɩ ɩrɛ na ƴãwn fʋ na pɔ̀l a ƴãw, Zerizalɛm i! Bɛ na tɩ bãw fʋ a ziir za a zũú a, fʋ tɩ tõ n pɔw-yɛm tome. Fʋ gã nɩ nɩ a dɛbr za na tɩ tɔlɛ a, bɛ tɩ so b'a.

A naaŋmɩn-ƴèr-manɛ Oze sɛbɛ 5:15

«A Sore yere na: Ɩ̃ na tɔlɛ na cere, ɩ̃ na lɛb'a cen a ɩ̃ beba zie, ɛ́ gù bɛ wa tɩ sàw kɛ́ bɛ sãw na, ɛ́ bɔbr a ɩ̃ niwn. A bɛ kpɩɛrʋ pʋɔ a, bɛ na ìr'a bɔbr mɛ̃.»

Wulu-ayi-sob 12:2

Nyɩ na sãw nɩ a maalʋ-ziir al za na be a tã-kɛrɩ, a tãli nɩ a tɩ-zimpiri zimpiri za pile a bɛr. Be n'a a nɩ-bʋʋr-yoru nyɩ na na diw ɛ́ de a ten a tɩ maalɛ a bɛ ŋmɩmɛ.