Zeremi 23:6 - A SƐB-SÕW

⁶ A ʋ daar a, a Zuda na nyɛ̃ nɩ a faafʋ, a Ɩsɩrayɛl na vʋʋrɛ nɩ zoom bɛ bãw damnʋ ɛ. Nyɛ̃ a yúor bɛ na na bʋɔlɛ ʋ a: “A Sore n'ɩ a tɩ mɩnʋ.”

Zeremi 23:6 ပူးပေါင်းရင်းမြစ်များ

Sɛb-sõw yielu 45:5

a fʋ dɛpaalʋ yel-mɩŋa! Cere, gárɛ nɩ a fʋ wur, a yel-mɩŋa, a tʋɔra-siwru nɩ a yel-mɩnʋ zɛb-faafʋ ƴãw! A fʋ dʋrʋ nũu na wul fʋ nɩ yel-bɛrɛ fʋ maalɩ.

Eziptɩ tẽw yib 9:26

Gosɛn vuo yõ pʋɔ n'a a sa-bi-kube bɛ tɩ lo ɩ, a be a Ɩsɩrayɛl nɩbɛ na tɩ kpɩɛr a.

Ɩzayi 2:4

Ʋ na mɩ́ dɩ n a ƴɛ̀rʋ kʋ̀ nɩ-bʋʋrɛ na tɛr taw-taa a, ʋ na mɩ́ bãw nɩ nɩ-bʋʋr-yaga yele kʋ̀ bɛ. Bɛ na mɩ́ de nɩ a bɛ zɛbr-sɔ-bɛrɛ zuw maal'ɩ kue, ɛ́ de a bɛ kafine maal'ɩ sɔ-nɔ-gori. Tẽw kãw kʋ̃ mɩ́ lɛb ŋmãa nɩ tẽw kãw zɛbr ɛ, nɩr kʋ̃ lɛb cãà zanɛ zɛbr zɛbrʋ ɛ.

Ɩzayi 32:1

Nãà na be n be dɩrɛ a naalʋ nɩ mɩnʋ. A nɩ-bɛrɛ na dɩrɛ nɩ a nɩ-kpɛ̃ɛnʋ a nɩbɛ zu mɛ̃ a lɛ a na tu sɔ́r a.

Ɩzayi 32:18

A Sore nɩbɛ na kpɩɛr'ɩ zie ƴã-ɓaarʋ na be a, bɛ na kpɩɛr'ɩ yie yel-faa na bɛ ka a, pɩ̃ɛnʋ ziir na bɛ bãw damnʋ a.

Ɩzayi 33:22

A Sore n'ɩ a tɩ nɩ-kpɛ̃ɛ, ʋlɛ n'ʋ de tɩ a niwn. A Sore n'ɩ a tɩ nãà, ʋlɛ n'ɩ a tɩ faarɛ.

Ɩzayi 33:5

A Sore zɛw na do, bʋ̃ʋ n'ʋ vɛ̃, ʋ kpɩɛr'ɩ a saa-zu. Ʋ paal'ɩ a Zerizalɛm nɩ a lɛ-na-tu-sɔr-a, nɩ a mɩnʋ.

Ɩzayi 35:9

Nɩr bɛ tuore gbẽw a ʋ zu ɛ, wɛ-dʋ̃-faa kãw za bɛ yire a ʋ zu ɛ, nɩr bɛ nyɛrɛ ʋ ɛ. A nɩbɛ a Sore na na faa a, bɛlɛ nɛbɛ na lo a sɔ́r ŋa.

Ɩzayi 42:6

«A mãa, a Sore, ɩ̃ bʋɔlɩ fʋ na mɛ̃ a lɛ-na-tu-sɔr-a, ɩ̃ nyɔw fʋ nɩ nũú, ɩ̃ mɛ b'a, ɛ́ ƴãw kɛ́ fʋ wa ɩ mãa nɩ a ɩ̃ nɩbɛ wõ-taa, kɛ́ fʋ wa ɩ a tẽ-daa nɩbɛ cãà.

Ɩzayi 45:17

Ɛcɛ a Sore faa nɩ a Ɩsɩrayɛl faafʋ na be kʋralɛ a. Nyɩɩm na ɩ a ʋ nɩbɛ a, nyɩ bɛ be za na lɛb nyɛ̃ vĩ nɩ zʋmɛ ɩ, towtow!

Ɩzayi 54:17

Zɛbr bom kãw za bɛ na maalɩ a fʋ ƴãw a, kʋ̃ tʋ̃ɔ́ ɩ b faa ɩ. Nɩr za nãà wa yere a fʋ sãwna a ƴɛ̀rʋ-dɩb zie a, fʋ na tʋ̃ɔ́ na ƴɛ̀r wul k'ʋʋ sãw na. A bom ɩ̃ na bin gùre nɩ a ɩ̃ tõ-tõ-biir a n'ɩ à ŋà, à ŋá n'a ɩ̃ wule a bɛ mɩnʋ, a Sore n'ʋ yere.»

Ɩzayi 7:14

A na ɩ à ŋá a, a Sore mɩŋa na kʋ̀ nyɩ nɩ bãwfʋ: a pɔwsɩra na tɛr'ɩ pʋɔ dɔw dɛb por ʋ Ɩmanɩɛl, a pɛr lɛ kɛ́ “Ŋmɩn-be-n-tɩ-zie”.

Ɩzayi 9:6

Ʋ na dɩ n a nɩ-kpɛ̃ɛnʋ yaga za, ɛ́ ɩ ƴã-ɓaarʋ na bɛ tɛr baarʋ a ʋ be be. Ʋ na zɩ̃ n a Daviir naalʋ-dà-kɔw zu, ɛ́ dɩ naalʋ a ʋ naalʋ-tẽw zu. Ʋ na ɩ n a lɛ-na-tu-sɔr-a nɩ a mɩnʋ a be be, k'ʋʋ tʋ̃ɔ́ ɩ a ʋ naalʋ-tẽw ʋ be be, ɛ́ kpɛmɛ a ƴɛrɛŋa nɩ a kʋralɛ. A yel ŋa n'ʋ a Sore, a kpɛnʋ-za-sob na maalɩ, a ʋ nɔ̃wfʋ na dɩrɛ mɛ̃ vũu a ƴãw.

Zeremi 29:11

A mãa, a Sore, ɩ̃ bãw nɩ a yele al ɩ̃ na tɩɛrɛ a nyɩ ƴãw a, ɩ̃ɩ yere na kʋ̀rɛ nyɩ: kpɩɛrʋ yele bɛ n'a ɩ̃ tɩɛrɛ ɩ, nʋ̃ɔ̀ yele n'a. Ɩ̃ bɔbr'a k'ɩ̃ɩ kʋ̀ nyɩ nɩdaar nyɩ na na ƴãw a nyɩ tɩɛrʋ a ʋ ƴãw a.

Zeremi 30:10

«A fʋ̃ʋ, Ɩsɩrayɛl, ɩ̃ tõ-tõ-bie e, ta zɔrɛ dɛ̃bɩ̃ɛ ɩ, a Sore n'ʋ yere. Pʋl-vʋ̃ɔ ta tɛr fʋ ɛ, fʋ̃ʋ, a sãàkʋm-kʋra na n'ɩ Zakɔb a. Ɩ̃ na faa fʋ nɩ a tẽ-zãánɩ pʋɔ, ɛ́ faa a fʋ bibiir a tẽw ʋl pʋɔ bɛ na diw bɛ cen nɩ a. Ɩsɩrayɛl i, fʋ na lɛb'a wa, wa vʋʋrɛ zoom ɛ́ bɛ bãw damnʋ ɛ. Ɛ́ nɩr za kʋ̃ lɛb ƴãw fʋ dɛ̃bɩ̃ɛ ɩ.

Zeremi 31:23

À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Mãa wa lɛb maalɩ a Zuda tẽw nɩ a ʋ tẽ-bɛrɛ ƴãw a lɛn daar a, a nɩbɛ na lɛb'a yere a ƴɛ̀r-bie á ŋá: “A Sore, ʋ maalɩ fʋ, Sɩyɔ̃ tãli-sõw i, fʋ na ɩ zie a faafʋ na kpɩɛr a!”

Zeremi 32:37

Ɩ̃ tɩ nyɛ̃ nɩ nɩ a ʋ nɩbɛ suur faa faa. Lɛ n'a ɩ̃ tɩ diw bɛ yaarɩ ziir za, tẽ-yaga pʋɔ. Ɛcɛ, ɩ̃ na lɛb'a ɓã bɛ taa, ɩ̃ na lɛb'a tɛr bɛ wa n a ka, wa ɩ bɛ ɓãa ƴãw kpɩɛr.

Zeremi 33:15

A daar ʋl wa ta a, ɩ̃ na ɩ na a Daviir bi-mɩŋa dɔw. Ʋ na ɩ na bɛ ɩrɛ a lɛ-na-tu-sɔr ɛ́ tu mɩnʋ a, a tẽw pʋɔ.

Zeremi 33:16

A lɛn daar a, a Zuda naalʋ-tẽw na nyɛ̃ nɩ faafʋ, ɛ́ a nɩbɛ na kpɩɛr a Zerizalɛm tẽw pʋɔ a, na vʋʋrɛ na ɛ́ bom bɛ damnɛ bɛ ɩ. Nyɛ̃ a lɛ bɛ na na bʋɔlɛ ʋ a: “A Sore n'ɩ a tɩ mɩnʋ.”»

Ezekɩɛl 21:27

A pĩi ʋl na wul a Zerizalɛm a lo n a ʋ dʋrʋ-lowr. Ʋ na lɔb'ɩ zɛbr cɛlsɩ ƴãw bɛ cen tɩ kʋ a nɩbɛ a be. Ʋ na bin nɩ zɛbr bome a tẽ-kpɛ̃ɛ dɩ̃dɛɛ ƴãw. Ʋ na mɛ n zɛbr dacine ɛ́ wɛr bɔwrɩ.

Ezekɩɛl 28:26

Bɛ na vʋʋrɛ nɩ a be nɩ ƴã-ɓaarʋ, bɛ na mɛ n yie ɛ́ sɛl divɛ̃ tɩɩr. Bɛ na vʋʋrɛ nɩ nɩ ƴã-ɓaarʋ, bʋ̃ʋ n'ʋ vɛ̃, ɩ̃ na dɔwr'ɩ a bɛ kpɛ-pɩɛl dem za nãà wa ɩ bɛ la a. Lɛ n'a bɛ na bãw kɛ́ mãa n'ɩ a Sore, a bɛ Naaŋmɩn.»

Ezekɩɛl 38:14

A fʋ̃ʋ nɩsaal bie, ƴɛ̀r naaŋmɩn-ƴɛ̀r-manɛ ƴɛ̀rʋ a ɩ̃ yúor ƴãw kʋ̀ a Gɔgɩ: À ŋá n'a a Sore Naaŋmɩn ƴɛ̀rɛ: A lɛn daar a ɩ̃ nɩ-bʋʋrɛ Ɩsɩrayɛl nãà wa vʋʋrɛ nɩ ƴã-ɓaarʋ a, fʋ na ìr'a lo a sɔ́r.

Ezekɩɛl 48:35

A dacine na na viiri koli a tẽ-kpɛ̃ɛ a wowr za na ɩ n mɛtɩr tùr-piwaɩ (9 000). A na dɛ tĩ a ʋlɩ bibir nɛ a, bɛ na bʋɔlɛ nɩ a tẽ-kpɛ̃ɛ kɛ́: “A-Sore-be-n-ka.”»

A naaŋmɩn-ƴèr-manɛ Oze sɛbɛ 1:7

Ɛcɛ a Zuda yir nɩbɛ a, ɩ̃ na nɔnɛ bɛ na. A mãa Sore bɛ Naaŋmɩn, ɩ̃ na faa bɛ na, ɛ́ a bɛ faafʋ ƴãw a, ɩ̃ kʋ̃ tɛr tam nɩ zɛbr-sɔ-kpɛ̃ɛ yel-ɩra ɩ, ɩ̃ kʋ̃ tɛr zɛbr nɩ wie nɩ wi-zɔmnbɛ yel-ɩra ɩ.»

A naaŋmɩn-ƴèr-manɛ Oze sɛbɛ 2:18

«A ʋlɩ bibir nɛ a, a Sore n'ʋ yere, ʋ na bʋɔlɛ mɛ̃ nɩ: “Ɩ̃ sɩr”, ʋ kʋ̃ cãà bʋɔlɛ mɛ̃: “Ɩ̃ Báàl, ɩ̃ zu-sob ɛ.”

Abɩdɩasɩ 1:17

Lɛ n'a a nɩbɛ na cɩ̃ɛ a na nyɛ̃ sɔwlʋ zie a Sɩyɔ̃ tãw na na lɛb lɩɛbɩ tã-sõw a zu. A Zakɔb bʋʋrɛ na lɛb'a de a bɛ tẽw, a bɛlɩ dem na tɩ faa ʋ a zie.

Abɩdɩasɩ 1:21

Bɛ na zɛb'a tʋ̃ɔ́, ɛ́ do a Sɩyɔ̃ tãw zu, ɛ́ a be n'a bɛ na tɩ dɩrɛ naalʋ a Edɔm tẽw zu. A Sore na ɩ n nãà!

Sofoni 3:13

A Ɩsɩrayɛl nɩbɛ na cɛ a kʋ̃ cãà ɩrɛ ɩ-faar ɛ, bɛ kʋ̃ cãà ŋmarɛ ziri ɛ. Bɛlʋ ƴɛ̀rʋ kʋ̃ lɛb yi a bɛ nɛ̃ɛ́ ɩ. Bɛ na mɩ́ ɓãá nɩ ƴãw dɩrɛ ɛ́ gúre, ɛ́ nɩr bɛ damnɛ bɛ ɩ.»

Zakari 10:6

Ɩ̃ na ɩ na a Zuda nɩbɛ tɛr fãw, ɩ̃ na faa nɩ a Ɩsɩrayɛl nɩbɛ. Ɩ̃ na lɛb'a tɛr bɛ wa n a bɛ tẽw, ɛ́ wul bɛ a ɩ̃ nɔ̃wfʋ, mɛ̃ ɩ̃ bɛ dãw jɛ bɛ bɛr towtow a. Ɩ̃ ɩ n a Sore bɛ Naaŋmɩn, ɩ̃ɩ na sàw na de a bɛ puoru.

Zakari 3:10

A bibir ŋa wa vɩɛ a, nyɩ na bʋɔlɛ nɩ taa wa zɩnɛ a nyɩ divɛ̃ tɩɩr nɩ a nyɩ kãkã-tɩɩr ɓaarʋ́, a mãa, a Sore, a Kpɛnʋ-za-sob'ʋ yel.»

Ʋrɔm 3:22

Naaŋmɩn mɩ́ ɩ na a nɩsaalbɛ ɩ nɩ-mɩn a ʋ niŋé, a Yeezu Kɩrɩta bɛ na mɩ́ sàw de a zũú. A bɛlɩ dem za na sàw de a Kɩrɩta a ƴãw n'a ʋ mɩ́ ɩ a lɛ, bʋ̃ʋ n'ʋ vɛ̃, ʋ bɛ owre ɩ:

1 Korɛ̃tɩ 1:30

A Naaŋmɩn n'ʋ so nyɩ lãw nɩ a Kɩrɩta Yeezu, ʋl a Naaŋmɩn na ɩ ʋ lɩɛbɩ a tɩ yã-bãwfʋ, a tɩ mɩnʋ, a tɩ sonu, nɩ a tɩ faafʋ a.

2 Korɛ̃tɩ 5:21

A Kɩrɩta bɛ tɩ tɛr yel-bier ɛ, ɛ́ a Naaŋmɩn tuo ʋ a tɩ yel-bier, kɛ́ tɩ tʋ̃ɔ́ lãw nɩ ʋ lɩɛbɩ nɩ-mɩn a Naaŋmɩn niŋé.

Filib 3:9

A ʋl ɩ̃ na lãw nɩ a ƴãw n'a a Naaŋmɩn na nyɛ̃ m ɩ̃ ɩ nɩ-mɩŋa. A mɩnʋ ŋa bɛ yi mãa zie ɩ, ʋ bɛ yi Naaŋmɩn wulu sàwfʋ pʋɔ ɩ, ʋ yi n a Kɩrɩta ɩ̃ na sàw de a zie. Mɩnʋ na yi Naaŋmɩn zie a n'ʋ, ɛ́ a ʋ pɛr sʋ̃ɔ́ a naaŋmɩn-sàwfʋ pʋɔ.