Zakɩ 1:25 - A SƐB-SÕW

²⁵ Ɛcɛ sob nɛ na mɩ́ ƴãw fãw jɛl a Naaŋmɩn wulu na vɩɛl ʋ za ɛ́ mɩ́ ɩ tɩ so tɩ tʋɔra, ɛ́ mɩ́ tu a wulu ŋa pùor vla a, ʋ bɛ mɩ́ bɛr wõ a bɛr-wob tɛwr ɛ́ lɛb yiiri bɛr a pùorí ɛ, ʋ mɩ́ tu n a pùor. A sob ŋa na nyɛ̃ nɩ nʋ̃ɔ̀ a ʋ yele za pʋɔ.

Zakɩ 1:25 ပူးပေါင်းရင်းမြစ်များ

Sɛb-sõw yielu 106:3

Zu-nʋ̃ɔ̀ dem'ɩ a bɛlɩ dem na mɩ́ ɩrɛ a lɛ-na-tu-sɔr-a, ɛ́ tuur a mɩnʋ pùor kʋralɛ a!

Sɛb-sõw yielu 119:32

A fʋ nɛ-ƴãwnɩ sɔ́r zu n'a ɩ̃ zɔrɛ, fʋ na ɩ a ɩ̃ yã ʋ yuo a ƴãw.

Sɛb-sõw yielu 119:45

Ɩ̃ na ɓãá nɩ ƴãw cere, ɩ̃ na bɔbr a fʋ tub a na fɛr kɛ́ bɛ tuur a ƴãw.

Zʋkpaɩ 14:15

Nɩr na bɛ bãw bom za a mɩ́ sàw nɩ a lɛ za bɛ na yere kʋ̀rɛ ʋ a, ɛcɛ nɩr na bãw maal-ɩb a bãw nɩ a ʋ gbɛ́ɛ binu zie.

Ɩzayi 8:20

nyɩ na sɔw na: «A wulu nɩ a Sore ƴɛ̀rʋ lɛb-deb'a fɛrɛ.» Nɩr bɛ wa ƴɛ̀r à à ŋá a, ʋ kʋ̃ nyɛ̃ a zi-wɛl-paala ɩ.

Luka 11:28

Ɛcɛ a Yeezu ʋl tɩ sɔw ʋ na: «Zu-nʋ̃ɔ̀ dem nɩ̃ɛ n'ɩ a bɛlɩ dem na mɩ́ wõ a Naaŋmɩn ƴɛ̀rʋ, ɛ́ de tɛr a!»

Zã 13:17

Nyɩ na bãw à à ŋá a, zu-nʋ̃ɔ̀ dem n'ɩ nyɩ nyɩmɛ wa tuur a.

Zã 8:36

A na ɩ à ŋá a, alɛ wa ɩ a Bie n'ʋ íre nyɩ bɛrɛ a gbãgbaalʋ pʋɔ a, nyɩ na sɩrɩ na so nyɩ tʋɔra.

Nɩ-toni 13:43

A nɩbɛ na wa yaarɩ baar'a, Zifʋ nɩbɛ yaga nɩ nɩ-yaga na tɩ tu a bɛ Naaŋmɩn sɔ́r a, tɩ tu n a Pol nɩ a Banabasɩ pùor. A bɛ ƴɛ̀rʋ pʋɔ a, a Pol nɩ a Banabasɩ tɩ yere na kʋ̀rɛ bɛ kɛ́ bɛ ƴãw fãw tɛr a Naaŋmɩn maalʋ vla.

Nɩ-toni 2:42

Bɛ za tɩ ƴãw nɩ fãw tuur a nɩ-toni wulu kʋralɛ, ɛ́ lãw pone a dipɛ̃, ɛ́ lãw puore mɩ̀.

Nɩ-toni 26:22

Ɩ̃ bãwnɩ a na, Naaŋmɩn gù mɛ̃ nɩ a lɛn daar za wa tɩ tɔ a dɩ̃a, alɛ so ɩ̃ cãà dɩrɛ a dãsɩɛ a bibiir nɩ a nɩ-bɛrɛ zie. A naaŋmɩn-ƴɛ̀r-manbɛ nɩ a Moyiir tɩ dãw na hieri yel a yele na waar na ta a, ɩ̃ bɛ yere bom za dɔwlɛ a bɛ ƴɛ̀rʋ zu ɛ.

Ʋrɔm 11:22

A na ɩ à ŋá a, jɩ́r nyɛ̃ a lɛ a Naaŋmɩn vɩɛlʋ na ɩ a, nɩ a Naaŋmɩn na bɛ tɛr dɩ̃ɛnʋ a: ʋ bɛ tɛr dɩ̃ɛnʋ a bɛlɩ dem na lo a zie ɩ, ɛ́ tɛr a ʋ vɩɛlʋ ɩb a fʋ zie. Ɛcɛ a fɛr'a fʋ cãà ɩrɛ ƴãwn a vɩɛlʋ ŋa ƴãw, alɛ bɛ ɩ lɛ, bɛ mɩ́ na cɛ b'a ŋmãa bɛr mɛ̃ wule a.

Ʋrɔm 2:13

Bɛlɩ dem na mɩ́ bɛrɛ wone a Wulu bɛr-wob tɛwr a, bɛlɛ bɛ nɛbɛ mɩ́ páw a mɩnʋ a Naaŋmɩn zie ɩ, bɛlɩ dem na mɩ́ dier a Wulu a, bɛlɛ nɛbɛ na páw a mɩnʋ.

Ʋrɔm 7:12

A na ɩ à ŋá a, a Naaŋmɩn wulu ɩ n sõw ɛ́ a nɔ-ƴãwna ɩ sõw, tu sɔ́r ɛ́ vɩɛl.

Ʋrɔm 8:15

A Vʋʋrʋ nyɩ na páw a, ʋ bɛ ƴãwnɛ nyɩ gbãgbaar ɩb tɩɛrʋ nyɩ na lɛb maal zɔrɛ dɛ̃bɩ̃ɛ ɩ, Vʋʋrʋ Sõw na mɩ́ ɩ nyɩ lɩɛbɩ Naaŋmɩn bibiir a n'ʋ. Ʋlɛ n'ʋ tɩ mɩ́ lãw nɩ cɩɩrɛ bʋɔlɛ a Naaŋmɩn kɛ́: «Aba, ɩ̃ Sãà a!»

Ʋrɔm 8:2

Bʋ̃ʋ n'ʋ vɛ̃, a Vʋʋrʋ Sõw wulu na tɩrɛ a nyɔ-vʋʋrʋ a Yeezu Kɩrɩta ƴãw a, ʋ ír fʋ na bɛr a yel-bier nɩ a kũu wulu pʋɔ, fʋ so fʋ tʋɔra.

1 Korɛ̃tɩ 15:58

A na ɩ lɛ a, ɩ̃ yɛb-nɔnɩ i, nyɩ ƴãw fãw kpɛmɛ, ɛ́ taa bãwnɛ damnʋ ɛ. Nyɩ kɛrɛ kʋralɛ a Sore tome pʋɔ, ɛ́ bãwnɩ a kɛ́ nyɩ bɛ hanɛ lãwnɛ nɩ a Sore zawla ɩ.

2 Korɛ̃tɩ 13:5

A nyɩɩm tɛɛ za, nyɩ ɩ nyɩ tʋɔra kaa, nyɩ jɛl nyɩ mɩŋa nyɛ̃, nyɩmɛ wa be a naaŋmɩn-sàw-deb pʋɔ a. Nyɩ nyɛ̃ na bãw kɛ́ a Yeezu Kɩrɩta be n a nyɩ sɔgɔ, lɛ bɛ n'a ɩ? Bɩɩ nyɩ jɛl'ɩ a nyɩ tʋɔra kaa nyɛ̃ nyɩ sãw?

Galasi 2:4

yɛb-bɛlɛbɛlɛ bɛ mɩnɛ kãw na saa tɩ kpɛ jɛr a tɩ pʋɔ, ɛ́ bɔbr kɛ́ bɛ ŋmãa ʋ a yʋ̀ɔr a. A nɩbɛ bɛ ŋa tɩ sɔwl'a kpɛ a tɩ pʋɔ, kɛ́ bɛ piwre a só-tɩ-tʋɔra tɩ na páw a Yeezu Kɩrɩta zie a, ɛ́ lɛb tɛr tɩ tɩ ƴãw a Naaŋmɩn wulu sàwfʋ gbãgbaalʋ pʋɔ.

Galasi 5:1

A Kɩrɩta ír tɩ na bɛr a gbãgbaalʋ pʋɔ, kɛ́ tɩ sɩrɩ so tɩ tʋɔra. A na ɩ à ŋá a, nyɩ ƴãw fãw ta lɛb de a gbãgba-mie ɩ.

Galasi 6:2

Nyɩ tuore taa tuor, lɛ n'a nyɩ na sàw a Kɩrɩta Wulu.

Kɔlɔsɩ 1:23

Ɛcɛ a fɛr'a kɛ́ a nyɩ naaŋmɩn-sàwfʋ ɩ nyɩ kpɛmɛ, bà gbɛ́r àr, ta sàw bom za taw nyɩ zãá nɩ a nyɩ tɩɛrʋ ʋl nyɩ na tɛr a ɩ, a lɛn daar za nyɩ na tɩ wõ a Yel-nʋ̃ɔ̀ a. A Yel-nʋ̃ɔ̀ ŋa hier'a ta bʋ̃-íra za a tẽw zu, ɛ́ a mãa Pol, ɩ̃ lɩɛb'ɩ a Yel-nʋ̃ɔ̀ ŋa tõ-tone.

1 Timote 2:15

Ɛcɛ ʋlɛ wa dɔw bibiir a, ʋ na nyɛ̃ nɩ faafʋ, ʋlɛ wa sɩrɩ sàw be a naaŋmɩn-sàw-deb pʋɔ, a nɔ̃wfʋ nɩ a sonu pʋɔ nɩ tʋɔra-siwru a.

1 Timote 4:16

Gù fʋ tʋɔra vla ɛ́ mɩ̀ gù a fʋ wulu vla. Su zu a al ƴãw. Fʋ̃ʋ wa sɩrɩ ɩrɛ à à ŋá a, fʋ na faa nɩ fʋ mɩŋa lãwnɩ a bɛlɩ dem na bɛrɛ wone a fʋ wulu a.

Ebre 12:15

Nyɩ gù vla nɩr za taa gùre pùor cɔwr a Naaŋmɩn maalʋ ɛ, nɩr za taa wa ɩ mɛ̃ tɩ-nyɩwr-tuo na bule sãwnɛ nɩ-yaga bɛrɛ a ɩ.

Zakɩ 2:12

Nyɩ mɩ́ ƴɛ̀rɛ ɛ́ ɩrɛ mɛ̃ nɩbɛ a nʋɔr na waar'ɩ só-fʋ-tʋɔra a na na dɩ n ƴɛ̀rʋ a.

1 Pɩɛr 2:16

Nyɩ vʋʋrɛ mɛ̃ nɩbɛ na so bɛ tʋɔra a, ɛcɛ nyɩ ta de a só-nyɩ-tʋɔra pàw nɩ a nyɩ po-to-ɩb ɛ, nyɩ ɩrɛ mɛ̃ Naaŋmɩn tõ-tõ-biir a.

1 Zã 2:24

A na ɩ à ŋá a, nyɩ maal tɛr a ƴɛ̀rʋ nyɩ na wõ a pɛr-tib daar za a. A ʋlɩ bom nɛ nyɩ na wõ a pɛr-tib daar za wa be a nyɩ zie a, a nyɩɩm mɩ̀, nyɩ na lãw nɩ nɩ a Bie nɩ a Sãà.

Yel-wula 14:13

Al pùorí, ɩ̃ tɩ wõ n kɔkɔr a salom zu ʋ yere a ɩ̃ zie: «Sɛb yel: “Zu-nʋ̃ɔ̀ dem'ɩ a bɛl na tĩ kpiir a ƴɛrɛŋa ɛ́ lãw nɩ a Sore a!” A Naaŋmɩn Vʋʋrʋ yere na: “Sɩza n'a, bɛ na tʋ̃ɔ́ na pɩ̃ɛnɛ nɩ a bɛ bàlʋ bɛ na nyɛ̃ a, bʋ̃ʋ n'ʋ vɛ̃, a bɛ tome sã-ya tuur bɛ na.”»

Yel-wula 22:14

Zu-nʋ̃ɔ̀ dem'ɩ a bɛlɩ dem na pɛ́wr a bɛ kparɩ, kɛ́ bɛ tʋ̃ɔ́ tɛr sɔ́r dɩ a nyɔ-vʋʋrʋ tɩɛ wɔmɛ, ɛ́ tu a dɩ̃dɛɛ ƴãw kpɛ a tẽw pʋɔ a.

1 Samɩɛl 12:14

Nyɩmɛ wa ƴãwnɛ ɛ́ tone a Sore nyɩ Naaŋmɩn a, nyɩmɛ wa sàwr a ʋ nʋɔr, nyɩmɛ bɛ wa zawrɛ a ʋ nɛ́ɛ tub a, nyɩmɛ wa tuur ʋ a, nyɩɩm nɩ a nyɩ nãà a, yel za na vɩɛl'ɩ a nyɩ zie.