Zakari 12:10 - A SƐB-SÕW

¹⁰ Ɩ̃ na ƴãw nɩ a Daviir bʋʋrɛ nɩ a Zerizalɛm tẽw dem tɩɛrʋ na vɩɛl a, nɩ puoru tɩɛrʋ. Bɛ na jɩ́rɛ nɩ a ɩ̃ lowr, a sob nɛ bɛ na cɔ̀r col a ƴãw. Bɛ na kõ ʋ na, mɛ̃ bidɛb-been na kpi bɛ kone a, bɛ na kõ ʋ na mɛ̃ bi-dãw-dɔwra na bɛ cãà be a.

Zakari 12:10 ပူးပေါင်းရင်းမြစ်များ

Yel-wula 1:7

Nyɛ̃, ʋ be n a zũzuge pʋɔ waar, nɩsaal za na nyɛ̃ ʋ na, lãwnɩ a bɛlɩ dem na cɔ̀r ʋ col a. A tẽw zu yie dɔwlʋ za na kone nɩ a ʋ kuor. Sɩza n'a. Amɛn.

Ezekɩɛl 39:29

Ɩ̃ na kʋ̀ n a ɩ̃ Vʋʋrʋ a Ɩsɩrayɛl nɩ-bʋʋrɛ, ɛ́ kʋ̃ lɛb ŋmɛlɩ kpaar cɔw bɛ towtow ɛ. A mãa Sore Naaŋmɩn n'ʋ yere.»

Zeremi 6:26

«Ɩ̃ nɩ-bʋʋrɛ ɛ, nyɩ su vʋɔrɩ kparɩ, nyɩ bile a tanɛ pʋɔ! Nyɩ tĩ a kuor maalʋ mɛ̃ bidɛb-been ƴãw a. Nyɩ kõ lãwnɩ tʋlʋtʋlʋ, bʋ̃ʋ n'ʋ vɛ̃, a dɔ̃ sob na sãwnɛ bom za a, na ùr'a ta a nyɩ ƴãw.»

Nɩ-toni 2:33

A Naaŋmɩn dʋrʋ zɛw ʋ na ʋ do. Lɛ so ʋ páw a Vʋʋrʋ Sõw a Naaŋmɩn na ƴãw nʋɔr k'ʋʋ na tɩr'a a. Ʋlɛ n'ʋ ɩ a Vʋʋrʋ Sõw siw põ yaarɩ a tɩ zu, ɛ́ alɛ n'a nyɩ nyɛrɛ ɛ́ wone.

Efɛɛzɩ 6:18

Nyɩ puore zɛlɛ à á ŋá za a Naaŋmɩn zie. A Vʋʋrʋ Sõw, ʋ sõwne nyɩ nyɩ puore kʋralɛ. A lɛ ƴãw a, nyɩ bɛr gʋ̃ɔ ɛ́ taa lɛbr pùor ɛ. Nyɩ puore kʋ̀rɛ a Naaŋmɩn nɩ-bʋʋrɛ za.

Ʋrɔm 8:26

Lɛ mɩ̀ n'a, a Vʋʋrʋ Sõw mɩ́ wa na wa sõw a tɩ bãbàalʋ. Bʋ̃ʋ n'ʋ vɛ̃, tɩ bɛ bãw a puoru vla k'a sɛw ɛ, a Vʋʋrʋ Sõw mɩŋa n'ʋ mɩ́ puore kʋ̀rɛ tɩ nɩ zɛlʋ puoru na bɛ tɛr manʋ a.

Ʋrɔm 8:15

A Vʋʋrʋ nyɩ na páw a, ʋ bɛ ƴãwnɛ nyɩ gbãgbaar ɩb tɩɛrʋ nyɩ na lɛb maal zɔrɛ dɛ̃bɩ̃ɛ ɩ, Vʋʋrʋ Sõw na mɩ́ ɩ nyɩ lɩɛbɩ Naaŋmɩn bibiir a n'ʋ. Ʋlɛ n'ʋ tɩ mɩ́ lãw nɩ cɩɩrɛ bʋɔlɛ a Naaŋmɩn kɛ́: «Aba, ɩ̃ Sãà a!»

Matie 24:30

Lɛ n'a a Nɩsaal Bie bãwfʋ na sãá a salom zu. Lɛ n'a a tẽw zu nɩ-bʋʋrɛ za na kone. Bɛ na nyɛ̃ nɩ a Nɩsaal Bie ʋ be a zũzuge pʋɔ waar nɩ fãw na bɛ tɛr vuo a, nɩ yúor-vɩɛlʋ-danʋ.

Amɔsɩ 8:10

Ɩ̃ na ɩ na a nyɩ cuwr lɩɛbɩ kuor, a nyɩ yielu za na lɩɛb'ɩ wahala cɛlsɩ. Ɩ̃ na ƴãw na a nɩbɛ za sɛ vʋɔrɩ a sɩɛmɩ́, ɛ́ fɔr a bɛ zuru mɛ̃ bi-been kuor daar a. À á ŋá za baarʋ na ɩ na mɛ̃ kpɩɛrʋ bibir a.

Ebre 12:2

Tɩ tori niwn jɩ́rɛ a Yeezu na ɩ a tɩ sàw-deb tib zie nɩ a nʋɔr kʋb zie a. Ʋ bɛr'ɩ a nʋ̃ɔ̀ ʋ na tɩ so a, ɛ́ bɛ zɔ vĩ ɛ, ɛ́ sàw kpi a da-gara zu. Ƴɛrɛŋa a, ʋ zɩ̃ n a Naaŋmɩn naalʋ-dà-kɔw dʋrʋ lowr.

Nɩ-toni 11:15

Ɩ̃ tɩ tine nɩ a ƴɛ̀rʋ wa báarɛ, a Vʋʋrʋ Sõw siw a bɛ zu, mɛ̃ a lɛ ʋ na tɩ siw a tɩ zu a pɛr-tib daar a.

Nɩ-toni 10:45

A kɩrɩta-biir bɛl na ɩ a Zifʋ bʋʋrɛ nɩbɛ ɛ́ bɩɛlɩ a Pɩɛr wa n a, nɔ-ɓãa tɩ nyɔw bɛ nɩ yaga, a nɩ-bʋʋr-yoru mɩ̀ na tɩ páw a Vʋʋrʋ Sõw a ƴãw.

Nɩ-toni 2:17

“À ŋá n'a a Naaŋmɩn ƴɛ̀rɛ: a bibi-pɛ-baarɩ wa vɩɛ a, ɩ̃ na ƴãw nɩ a ɩ̃ Vʋʋrʋ nɩsaal za. A nyɩ bidɛbr nɩ a nyɩ pɔwyaar na lɩɛb'ɩ naaŋmɩn-ƴɛ̀r-manbɛ, a nyɩ pɔlbili na nyɛrɛ nɩ bʋ̃-nyɛrɩ, zánʋ na waar'ɩ a nyɩ dɛb-nyamɛ,

Zeremi 50:4

A Sore yere na: a lɛn daar a, a Ɩsɩrayɛl nɩbɛ nɩ a Zuda nɩbɛ na lãw na waar, bɛ na kone na cere nɩ, bɔbr'ɩ mɛ̃, a mãa, bɛ Naaŋmɩn.

Zeremi 31:9

Bɛ kone na lɔbr'ɩ nɩbaal-nuru tarɛ nɩ, ɩ̃ɩ bɩɛlɛ bɛ. Ɩ̃ na tɛr bɛ na cen nɩ bàrʋ na paalɩ kʋ̃ɔ a zie. Ɩ̃ na tu n bɛ nɩ sɔ́r na man taa ʋ za bɛ kʋ̃ʋ tʋ̃ɔ́ ŋmɛ gbɛ́r lo a. Bʋ̃ʋ n'ʋ vɛ̃, ɩ̃ ɩ n sãà a Ɩsɩrayɛl zie, ɛ́ a Efarayim ɩ a ɩ̃ bidɛb-dãw.»

Ɩzayi 32:15

Bibir kãw, a Sore na cir'ɩ a ʋ Vʋʋrʋ ƴãw a tɩ zu. Lɛ n'a a wɛja-kpalɛ na lɩɛbɩ tɩ-wɔnɩ zaadɛ̃, ɛ́ a tɩ-wɔnɩ zaadɛ̃ lɩɛbɩ tuw.

A sɛb-tʋɔla a Zid na sɛb kʋ̀ a Naaŋmɩn nɩ-bʋʋrɛ a 1:20

Ɛcɛ, nyɩɩm ɩ̃ bá mɩnɛ ɛ, nyɩ cãà de a nyɩ nyɔ-vʋʋrʋ tu n a nyɩ naaŋmɩn-sàw-deb na ɩ sõw yaga za a. Nyɩ puore nɩ a Vʋʋrʋ Sõw fãw.

Nɩ-toni 2:37

Bɛ na tɩ wõ a lɛ a, a tɩ dam bɛ nɩ yaga, bɛ yel a Pɩɛr nɩ a nɩ-toni ŋmãa bɛl na cɛ a: «Yɛbr i, bʋ̃ʋ n'ʋ tɩ na ɩ?»

Zʋkpaɩ 1:23

Nyɩ bɛrɛ wone a gɔ́b ɩ̃ na gɔnɛ nyɩ a. Lɛ n'a ɩ̃ na bɛr a ɩ̃ vʋʋrʋ ʋ siw a nyɩ zu ɩ kɛ̀ nyɩ bãw a ɩ̃ ƴɛ̀rʋ.

Sɛb-sõw yielu 51:12

Naaŋmɩn i, ír socir parpar ƴãw mɛ̃, ɛ́ kʋ̀ m tɩɛr-paala na kpɛmɛ a.

Matie 26:75

A Pɩɛr tɩ lɛb'a tɩɛrɩ bãwnɩ a ƴɛ̀rʋ ŋa a Yeezu na tɩ ƴɛ̀r kʋ̀ ʋ a: «Nʋra kʋ̃ kõ sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.» Ʋ tɩ yi na tɩ kõ cir mʋta-zɩ̃ɩ.

Zã 1:29

A dãw-bio daarɩ́, a Zã tɩ nyɛ̃ nɩ a Yeezu na waar a ʋ zie a, ɛ́ tɩ yel: «Nyɩ nyɛ̃ a Naaŋmɩn pele na íre a tẽ-daa yel-bier bɛrɛ a.

Zʋkpaɩ 4:3

A mãa mɩ̀ a, ɩ̃ mɩ̀ tɩ ɩ n bi-vla a ɩ̃ sãà zie. A ɩ̃ mã tɩ nɔ̃w mɛ̃ nɩ yaga za mɛ̃ bi-been tẽtẽ a.

Ɩzayi 45:22

Nyɩɩm na wɩɛr tɩ kpɩɛr a tẽw baarʋ zie a, nyɩ lɩɛbɩ cɔw mɛ̃, ɛ́ nyɩ na nyɛ̃ nɩ a faafʋ. Bʋ̃ʋ n'ʋ vɛ̃, mãa n'ɩ a Naaŋmɩn, kãw bɛ lɛb ka be ɩ.

Zeremi 31:19

Sɩza, tɩ cen na zãá nɩ fʋ, ɛcɛ ƴɛrɛŋa a, tɩ ciire nɩ a tɩ sãwna. Fʋ ɩ na tɩ bãw a tɩ sãwna pɛr, ɛ́ ƴɛrɛŋa a, tɩ wore a na. A tɩ yúor sãw na ɛ́ vĩ nyɔw tɩ. Tɩ bɛ ɩ vla a tɩ pɔ̀lʋ daarɩ́ ɛ, a lɛb lo a tɩ zu.”»

Ezekɩɛl 20:43

A be a, nyɩ na lɛb'a tɩɛrɩ a nyɩ koro za nyɔ-vʋʋrʋ nɩ a nyɩ ɩb za na ƴãw nyɩ a dɛwr pʋɔ a. A faa al za nyɩ na maalɩ a zũú, kɔkɔrʋ na lɛb'a ŋmɛlɩ ɩrɛ nyɩ.

Ezekɩɛl 37:14

Ɩ̃ na ƴãw nyɩ nɩ a ɩ̃ Vʋʋrʋ ɛ́ nyɩ na vʋʋrɛ na. Ɩ̃ na ƴãw nyɩ nɩ a nyɩ tẽw. Lɛ n'a nyɩ na bãw k'aa mãa Sore a, ɩ̃ mɩ́ ƴɛ̀r'a ɛ́ tu a lɛ ɩ̃ na yel a. A mãa Sore Naaŋmɩn n'ʋ yere.»

Zakari 13:9

Ɩ̃ na ɩ n a bɛl na na cãà vʋʋrɛ a, bɛ tu yi a vũumí, ɩ̃ na ɩ na bɛ vɩɛl, mɛ̃ a lɛ bɛ na mɩ́ ɩ a salm-pla ʋ vɩɛl a. Ɩ̃ na ɩ bɛ na kaa bãw a bɛ ŋmɛ̃a, mɛ̃ a lɛ bɛ na mɩ́ ɩ salm-zɩɛ kaa a. Lɛ n'a bɛ na puore mɛ̃, ɩ̃ɩ na mɩ́ sàw nɩ a bɛ puoru. Ɩ̃ na mɩ́ yel bɛ na: “Ɩ̃ nɩ-bʋʋrɛ n'ɩ nyɩ”, ɛ́ a bɛl yel mɛ̃: “Sore e, fʋ̃ʋ n'ɩ a tɩ Naaŋmɩn.”»

Yele-za-pɛr-tib 45:1

A Zuzɛb tɩ nyɔw nɩ ʋ mɩŋa guu a nɩbɛ za na tɩ àr a ʋ zie a niŋé, ɛ́ ƴãw bɛ yi. A bɛ kãw za bɛ tɩ ka be, a lɛn daar ʋ na ɩ a ʋ yɛbr bãw ʋ a ɩ.

Yele-za-pɛr-tib 45:2

Ɛcɛ ʋ tɩ kõ na a yi yaga, a Eziptɩ nɩbɛ tɩ wõ a, ɛ́ a yel ta a Faarawɔ̃ nãà yir.

Sɔr-nɛ́ɛ 21:9

A Moyiir tɩ maal'ɩ waab nɩ kur-zɩɛ, ƴãw dàa ƴãw. Lɛ n'a, waab na mɩ́ tɩ dʋ̃ nɩr, ʋ jɩ́r a kur-zɩɛ waab kaa a, ʋ mɩ́ tɩ baa na.

1 Samɩɛl 7:2

A Sore wõ-taa daga bɛ na tɩ bin a Kɩrɩyatɩ-Yeyarim a, a tɩ kɔwr'a, tarɛ yome lɩzɛr, ɛ́ a Ɩsɩrayɛl nɩbɛ za wa ìr bɔbr tuotuo kɛ́ bɛ lɛb taw pɩɛlɩ a Sore.