Neemi 9:8 - A SƐB-SÕW

⁸ Fʋ nyɛ̃ na ʋ tu b, lɛ so fʋ maal'ɩ ʋ wõ-taa: fʋ yel'a kɛ́ fʋ na kʋ̀ ʋ nɩ a Kanãa tẽw dem tẽw, a Hititɩ mɩnɛ, a Amoritɩ mɩnɛ nɩ a Perizitɩ mɩnɛ ten, a Zebi tẽw dem tẽw nɩ a Gɩrgasitɩ mɩnɛ tẽw, ʋlɛ nɩ a ʋ bʋʋrɛ. Fʋ tu n a lɛ fʋ na yel a, fʋ na ŋmɛ̃ fʋ ŋmɛ̃a ƴãw.

Neemi 9:8 ပူးပေါင်းရင်းမြစ်များ

Yele-za-pɛr-tib 12:7

A Sore tɩ ɩ na a Abram nyɛ̃ ʋ, ʋʋ yel ʋ: «A fʋ bʋʋrɛ nɛbɛ ɩ̃ na kʋ̀ a tẽw ŋa.» A Abram tɩ mɛ n bàwr-maal-kuur a Sore ƴãw, a be a Sore na tɩ ɩ ʋ nyɛ̃ ʋ a.

Yele-za-pɛr-tib 15:6

A Abram tɩ sàw na de a Sore, lɛ so a Sore tɩ sàw kʋ̀ ʋ k'ʋʋ ɩ n nɩ-mɩŋa.

Yele-za-pɛr-tib 22:12

A Sore malkɩ lɛb yel ʋ: «Taa zɛwr nũu tʋɔr'ɩ a bie ɩ, taa ɩrɛ ʋ bom za ɩ. Ɩ̃ pãa bãwnɩ a nɩ ƴɛrɛŋa kɛ́ fʋ zɔrɛ mɛ̃ na, fʋ na bɛ sɩb mɛ̃ a fʋ bidɛb-been a.»

2 Samɩɛl 22:31

A Naaŋmɩn ɩ n sɔr-wule na vɩɛl ʋ za a, a ʋ ƴɛ̀rʋ bɛ tɛr bʋnʋ ɛ. Bɛlɩ dem za na mɩ́ zɔ kpɛ a ʋ naayir a, ʋ ɩ na mɛ̃ zɛbr-kur-pãgala na mɩ́ piw bɛ a.

1 Bibie za yel-manɩ 1:14

ɛ́ ʋlɛ n'ɩ a nɩ-bʋʋrɛ bɛ ŋa sãàkʋm-kʋra: a Zebizitɩ mɩnɛ, a Amoritɩ mɩnɛ, a Gɩrgasitɩ mɩnɛ,

1 Bibie za yel-manɩ 16:16

A wõ-taa ʋ na maal'ɩ a Abraham a n'ʋ, a pɔb ʋ na pɔ a Ɩzaakɩ zie a n'ʋ.

Ɛsɩdɩrasɩ 9:15

Sore e, Ɩsɩrayɛl Naaŋmɩn i, fʋ ɩ n su-ɓaarʋ sob, a dɩ̃a a, fʋ sàw na tɩ mɩnɛ cãà vʋʋrɛ. Bʋ̃ʋ n'ʋ vɛ̃, tɩmɛ n'ɩ bɛ ŋa tuo a tɩ sãwna àr'ɩ a fʋ niŋé, ɛcɛ nɩr bɛ tɛr k'ʋʋ àr a fʋ niŋé a yele wa ŋmɛ̃ à à ŋá a ɩ.»

Neemi 9:33

Fʋ tu n mɩnʋ nɩ yel-mɩŋa, a yele za na ta tɩ a pʋɔ, ɛ́ tɩɩm maalɩ faa.

Sɛb-sõw yielu 116:5

A Sore zɔrɛ nɩ nɩbaalʋ, ɛ́ ɩ nɩ-mɩŋa. A tɩ Naaŋmɩn ɩ n su-baalʋ sob.

Eziptɩ tẽw yib 3:17

ɛ́ yel: Ɩ̃ na ír nyɩ nɩ a Eziptɩ tẽw wʋ̀ʋr pʋɔ cen nɩ a Kanãa tẽw dem tẽw, a Hititɩ mɩnɛ, a Amoritɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ tẽw, tẽw bʋ̀rʋ nɩ sɩwr na gbɔlɛ a.”

Eziptɩ tẽw yib 3:8

Lɛ so ɩ̃ siw wa k'ɩ̃ɩ wa faa bɛ a Eziptɩ tẽw dem nuru pʋɔ, ɛ́ ɩ bɛ yi a tẽw ŋa pʋɔ cen tẽw na vɩɛl ɛ́ yɛlmɛ a pʋɔ, tẽw bʋ̀rʋ nɩ sɩwr na gbɔlɛ a, tẽw a Kanãa tẽw dem, a Hititɩ mɩnɛ, a Amoritɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ na kpɩɛr a.

Ezekɩɛl 33:24

«A fʋ̃ʋ nɩsaal bie, bɛrɛ wone! A nɩbɛ na be a Ɩsɩrayɛl tẽw tẽ-bɛrɛ bɛ na sãw bɛr a pʋɔ a yere na: “A Abraham tɩ ɩ n ʋ yõ, ɛcɛ ʋlɛ n'ʋ tɩ so a tẽw za. Tɩɩm na yãwmɛ a, tɩmɛ nɛbɛ a sɛw kɛ́ tɩ so a tẽw a ƴɛrɛŋa.”

Sɔr-nɛ́ɛ 13:29

A Amalesitɩ mɩnɛ kpɩɛr'ɩ a Negɛɛvʋ vuo pʋɔ. A Hititɩ mɩnɛ, a Zebi tẽw dem nɩ a Amoritɩ mɩnɛ be n a tan vuo pʋɔ, ɛ́ a Kanãa tẽw dem kpɩɛr a Mediterane kʋ̃ɔ-kpɛ̃ɛ nʋɔr nɩ a Zurdɛ̃ man nʋɔr.»

Sɔr-nɛ́ɛ 23:19

Naaŋmɩn bɛ ɩ nɩsaal na ŋmarɛ ziri ɛ, nɩsaal bie a tɩɛrʋ na mɩ́ lɩɛbɛ a bɛ n'ʋ ɛ. Ʋ na tʋ̃ɔ́ na yel ɛ́ bɛ ɩ ɛ? Ʋ na tʋ̃ɔ́ na ƴɛ̀r ƴɛ̀rʋ ɛ́ bɛ tu ɛ?

Nɩ-toni 13:22

A Naaŋmɩn na wa zawrɩ a Sawul bɛr a, ʋ ír'ɩ Daviir kʋ̀ bɛ ʋ ɩ a bɛ nãà, ʋʋ dɩ a ʋ dãsɩɛ yel: “Ɩ̃ nyɛ̃ nɩ a Zese bidɛb Daviir, a ɩ̃ yã nɩr'ʋ, ʋ na maal'ɩ a ɩ̃ pʋ-tɩɛrʋ za.”

Wulu-ayi-sob 26:3

Ʋ na cen na tɩ páw a bàwr-maalɛ na so a tome a ʋlɩ bibir nɛ a, ɛ́ yel ʋ à ŋá: «Ɩ̃ yere nɩ a dɩ̃a, a Sore fʋ Naaŋmɩn niŋé, k'ɩ̃ɩ ta n a tẽw ʋl a Sore na yel a tɩ sãàkʋm-kore zie k'ʋʋ na kʋ̀ tɩ na a.»

Wulu-ayi-sob 32:4

A Sore ɩ n pì-kpɛ̃w. A ʋ tome vɩɛl'ɩ a za. Lɛ za ʋ na yel a mɩ́ tu n yel-mɩŋa, a tɩ Naaŋmɩn ŋmɛ̃ n ʋ ŋmɛ̃a, ʋ bɛ ɩrɛ faa towtow ɛ, nɩ-mɩŋa nɩ nɩ-dẽdẽ n'ʋ kʋralɛ.

Wulu-ayi-sob 7:1

A Sore nyɩ Naaŋmɩn na ɩ na nyɩ kpɛ a tẽw nyɩ na na so a pʋɔ. Ʋ na diw nɩ nɩ-bʋʋr-yaga a nyɩ niŋé, nɩ-bʋʋrɛ ayopõi na yãwmɛ zuo nyɩ, ɛ́ tɛr fãw zuo nyɩ a: a Hititɩ mɩnɛ, a Gɩrgasitɩ mɩnɛ, a Amoritɩ mɩnɛ, a Kanãa tẽw dem, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ.

Wulu-ayi-sob 9:5

ɛ́ nyɩ tʋ̃ɔ́ de a bɛ tẽw. Nyɩ na ɩ nɩ-mɩn a bɛ n'a ɩ, bɩɩ a nyɩ tɩɛrʋ na vɩɛl a ƴãw bɛ n'a ɩ. A Sore na diw nɩ a nɩ-bʋʋrɛ bɛ ŋa, a bɛ ɩb na bɛ vɩɛl a ƴãw, nɩ a lɛ ʋ na pɔ yel kʋ̀ a nyɩ sãàkʋm-kore Abraham, Ɩzaakɩ nɩ Zakɔb a, tub ƴãw.

Títɩ̀ 1:2

kɛ́ bɛ tɩɛrɛ a nyɔ-vʋʋrʋ na be kʋralɛ a. A Naaŋmɩn na bɛ ŋmarɛ ziri a tɩ ƴãw nɩ nʋɔr k'ʋʋ na kʋ̀ bɛ nɩ a nyɔ-vʋʋrʋ ŋa, ɛ́ a dɩta-pɛ-yome za wa bãw be.

Ebre 11:17

A sàw-deb zũú n'a a Abraham tɩ maal'ɩ a Ɩzaakɩ bàwr, a lɛ a Naaŋmɩn na tɩ bãw kɛ́ ɩ ʋ kaa a. A ʋ bi-been n'ʋ ʋ tɩ maalɛ nɩ a bàwr, ʋl Naaŋmɩn na tɩ ƴãw a nʋɔr kʋ̀,

Ebre 6:18

A na ɩ à ŋá a, yele ayi na bɛ tɛr lɩɛbʋ a pʋɔ, Naaŋmɩn na kʋ̃ tʋ̃ɔ́ ŋmãa ziri a, alɛ n'a kʋ̀rɛ tɩ sõwfʋ kpɛ̃ɛ a tɩɩm na zɔ sɔwlɩ a ʋ zie a. Lɛ n'a tɩ na tʋ̃ɔ́ nyɔw a tɩɛrʋ tɩ na ƴãw a Naaŋmɩn ƴãw a kpɛ̃w za, a tɩɛrʋ ŋa bɛ na kʋ̀rɛ tɩ a.

Zozue 11:23

A Zozue tɩ zɛb'a de a tẽw za, a tu a lɛ za a Sore na tɩ yel kʋ̀ a Moyiir a, ɛ́ de ʋ põ kʋ̀ a Ɩsɩrayɛl dɔwlʋ, ʋ ɩ a bɛ sób. Lɛ n'a a Ɩsɩrayɛl nɩbɛ tɩ pɩ̃ɛnɩ nɩ a zɛbr.

Zozue 11:3

A Kanãa tẽw dem tɩ be n a saa-pɛrɩ́ nɩ a mʋ̃tɔ̃w-kpɛb-lowr, a Amoritɩ mɩnɛ, a Hititɩ mɩnɛ, a Perizitɩ mɩnɛ nɩ a Zebi tẽw dem tɩ be n a tan vuo lowr, ɛ́ a Hivitɩ mɩnɛ be a Misɩpa lowr, a Hɛrmɔ̃ tãw sɩɛmɩ́.

Zozue 23:14

Mãa kule na mɛ̃ tẽw zu bom za na tɔlɛ a. Ɛcɛ nyɩɩm a, nyɩ sàw nɩ nyɩ tɩɛrʋ za, nɩ nyɩ sɩ́ɛ za, k'aa ƴɛ̀r-vɩɛlɩ al za a Sore nyɩ Naaŋmɩn na tɩ ƴɛ̀r a nyɩ ƴãw a, been bɛ cɛ bɛ tu a ʋ tub ɛ. A za tu na tɩ ɓɩɩlɩ.

Zozue 9:1

A Aɩ tẽw sãw-bɛrʋ yele tɩ lo n a Zurdɛ̃ mʋ̃tɔ̃w-kpɛb-lowr voru za na-mɩnɛ za tobe pʋɔ: a tan vuo, a Ba-Peyi nɩ a zi-tɩ̃tal ʋl na lanɩ a Mediterane kʋ̃ɔ-kpɛ̃ɛ tɩ tɔ a Libã a. Lɛ n'a a Hititɩ mɩnɛ, a Amoritɩ mɩnɛ, a Kanãa tẽw dem, a Perizitɩ mɩnɛ, a Hivitɩ mɩnɛ nɩ a Zebi tẽw dem

1 Zã 1:9

Ɛcɛ tɩmɛ wa yere a tɩ yel-bebe kʋ̀rɛ a Naaŋmɩn a, ʋ ŋmɛ̃ n ʋ ŋmɛ̃a ɛ́ ɩ nɩ-mɩŋa, ʋ na dɩ n a tɩ yel-bebe suur kʋ̀ tɩ ɛ́ pɛ́w a tɩ yel-faar za dɛwr bɛr.