Neemi 12:27 - A SƐB-SÕW

²⁷ A Zerizalɛm dacĩ-kpɛ̃ɛ na tɩ lɛb mɛ baar'a, bɛ tɩ ƴãw na a levitɩ mɩnɛ yi a ziir al za bɛ na kpɩɛr a, wa a Zerizalɛm. Bɛ tɩ maal'ɩ cuw na ɩrɛ nʋ̃ɔ̀ yaga a, tɛr'ɩ danʋ yielu bɛ na ŋmɩɛr sɛ̃sɛgɛ, korijom, nɩ pɛ̀nɛ́ ƴãwn a.

Neemi 12:27 ပူးပေါင်းရင်းမြစ်များ

2 Samɩɛl 6:12

Bɛ tɩ wa na wa yel a nãà Daviir à ŋá: «A Sore maal'ɩ a Ovɛdɩ-Edɔm yir, nɩ a ʋ bome za, a Naaŋmɩn wõ-taa daga ƴãw.» Lɛ n'a a Daviir tɩ cen tɩ ɓáw a Naaŋmɩn wõ-taa daga, a Ovɛdɩ-Edɔm yir, bɛ cɔrɩ ŋmɩɛr'ɩ nʋ̃ɔ̀ cɛlsɩ dúor'ɩ a Daviir Tẽ-kpɛ̃ɛ́.

1 Na-mɩnɛ 8:63

A Salomɔ̃ tɩ kʋ n nĩi tùr-lɩzɛr'ɩ ayi (22 000), píir nɩ bʋʋr tùr-lɩz'a ayʋɔb (120 000) maal'ɩ lãw-taa bagɛ. À à ŋá n'a bɛ tɩ de a Ŋmɩn-yir-kpɛ̃ɛ kʋ̀ a Sore.

1 Bibie za yel-manɩ 13:8

A Daviir nɩ a Ɩsɩrayɛl nɩbɛ za tɩ ƴawr'a nɩ a bɛ fãw za a Naaŋmɩn niŋé, yiele ŋmɩɛr'ɩ korijom, pɛ́nɛ̀, gãgaɩ, sɛ̃sɛgɛ, pɛblɛ nɩ wɩɩr.

1 Bibie za yel-manɩ 15:12

Ʋ tɩ yel bɛ na: «Nyɩɩm n'ɩ a levitɩ mɩnɛ yie nɩ-bɛrɛ, nyɩ so a nyɩ dɛwr bɛr, nyɩɩm nɩ a nyɩ yie dem, ɛ́ cen tɩ ɓáw a Sore, a Ɩsɩrayɛl Naaŋmɩn wõ-taa daga wa n a zie ʋl ɩ̃ na cɔbrɩ a ʋ ƴãw a.

1 Bibie za yel-manɩ 15:16

A Daviir tɩ yel'ɩ a levitɩ mɩnɛ nɩ-bɛrɛ kɛ́ bɛ kaa ír a bɛlɩ dem na na ɩ a yiel-yielbɛ a bɛ pʋɔ a. Yielu bʋ̃-ŋmɩɛrɩ á ŋá n'a bɛ na mɩ́ ŋmɩɛr kpɛ̃w kpɛ̃w za wul a bɛ nʋ̃ɔ̀: pɛ̀nɛ́, korijom, sɛ̃sɛgɛ.

1 Bibie za yel-manɩ 15:28

A Ɩsɩrayɛl nɩbɛ za tɩ bɩɛlɛ nɩ a Sore wõ-taa daga dúor'ɩ a Zerizalɛm, lɔbr'ɩ nʋ̃ɔ̀ cɛlsɩ, pɛblɛ nɩ wɩɩr nɩ ɩ́lɛ́, ŋmɩɛr'ɩ sɛ̃sɛgɛ nɩ pɛ̀nɛ́ nɩ korijom.

1 Bibie za yel-manɩ 15:4

Ʋ mɩ̀ tɩ bʋɔl'ɩ a Aarɔ̃ bʋʋrɛ nɩ a levitɩ mɩnɛ ɓã taa.

1 Bibie za yel-manɩ 16:42

Heman nɩ Yedutun tɩ kaarɛ nɩ a wɩɩr nɩ a sɛ̃sɛgɛ zie, lãwnɩ a bʋ̃-ŋmɩɛrɩ al bɛ na mɩ́ ŋmɩɛr yiele nɩ a yiel-son a. Yedutun bidɛbr tɩ ɩ n dɩ̃dɔ-gùrbɛ.

1 Bibie za yel-manɩ 16:5

Asafʋ n'ʋ tɩ ɩ a bɛ nɩ-kpɛ̃ɛ, ɛ́ Zekarɩa tu a ʋ zu. A pùorí, Azɩɛl, Semiramɔtɩ, Yehɩɛl, Matitɩa, Eliyaavʋ, Benayahu, Ovɛdɩ-Edɔm nɩ Yeyɩɛl tɩ ŋmɩɛr'ɩ pɛ̀nɛ́ nɩ korijom ɛ́ Asafʋ wɔwrɛ sɛ̃sɛgɛ.

1 Bibie za yel-manɩ 23:5

túr anaar (4 000) ɩ dɩ̃dɔ-gùrbɛ, ɛ́ a túr anaar (4 000) bɛl na cɛ a tɛr a yielu bome al ʋ na tɩ ƴãw bɛ maalɩ a Sore danʋ ƴãw a, danɛ nɩ a Sore.

1 Bibie za yel-manɩ 26:31

Yeriya tɩ n'ɩ a Ebrɔ̃ dɔwlʋ nɩ-kpɛ̃ɛ. A Daviir naalʋ-dɩb yome lɩz'a ayi daar, bɛ tɩ bɔ n a lɛ a dɔwfʋ na ɩ a yir ŋa pʋɔ a, ɛ́ bɛ tɩ nyɛ̃ nɩ nɩ-tɩbr tɩbr Yazɛɛr tẽw na be Galaadɩ a, bɛ ɩ a yir ŋa nɩbɛ.

2 Bibie za yel-manɩ 29:25

A nãà tɩ ƴãw na bɛ ƴãw a levitɩ mɩnɛ a Sore yir-kpɛ̃ɛ pʋɔ, bɛ tɛr sɛ̃sɛgɛ, pɛ̀nɛ́ nɩ korijom, mɛ̃ a lɛ a Daviir nɩ a nãà ƴɛ̀r-manbɛ Gadɩ nɩ Natan na tɩ yel a. A Sore n'ʋ tɩ sɩrɩ ƴãw a ʋ ƴɛ̀r-manbɛ yel a lɛ.

2 Bibie za yel-manɩ 29:30

Al pùorí, a nãà Ezekɩasɩ nɩ a nɩ-bɛrɛ tɩ yel'ɩ a levitɩ mɩnɛ kɛ́ bɛ danɩ a Sore nɩ a yielu al a Daviir nɩ a naaŋmɩn-ƴɛ̀r-manɛ Asafʋ na tɩ maalɩ a. Lɛ n'a a levitɩ mɩnɛ tɩ yieli nɩ nʋ̃ɔ̀, al pùorí bɛ gbĩ dume ɛ́ gũu tɩ tɔ tẽw.

2 Bibie za yel-manɩ 5:13

A wɩ-pɛblɛ nɩ a yiel-yielbɛ tɩ lãw nɩ taa vla vla maal yiele mɛ̃ kɔkɔr-been a, yiele danɛ nɩ a Sore: «Nyɩ danɛ a Sore, a ʋ vɩɛlʋ ƴãw, a ʋ nɔ̃wfʋ na be kʋralɛ a ƴãw.» A yielu ŋa mɩ́ ìr'a do lãwnɩ a wɩɩr, a sɛ̃sɛgɛ nɩ a yielu bome al na cɛ a, zũzuwr mɩ́ paal'ɩ a Ŋmɩn-yir-kpɛ̃ɛ.

2 Bibie za yel-manɩ 7:6

A bàwr-maalbɛ tɩ be n a bɛ tome zie. A levitɩ mɩnɛ tɩ tɛr'ɩ a Sore yielu bome a nãà Daviir na tɩ maalɩ a Sore danʋ ƴãw a. Bɛ mɩ́ tɩ danɛ nɩ a Sore yere nɩ a ƴɛ̀r-bie á ŋá a Daviir na tɩ kʋ̀ bɛ a: «A ʋ nɔ̃wfʋ be n kʋralɛ.» A bàwr-maalbɛ tɩ àr'a tori bɛ, pɛblɛ wɩɩr, ɛ́ a nɩbɛ za tɩ àr saaƴẽwn.

Ɛsɩdɩrasɩ 6:16

A Zifʋ mɩnɛ, a bàwr-maalbɛ, a levitɩ mɩnɛ nɩ a nɩbɛ bɛl na tɩ yi a diw-cenu zie lɛb wa a, tɩ maal'ɩ cuw de a yir kʋ̀ a Naaŋmɩn nɩ nʋ̃ɔ̀.

Neemi 11:20

A Ɩsɩrayɛl nɩbɛ bɛl na cɛ a, a bàwr-maalbɛ nɩ a levitɩ mɩnɛ, tɩ kpɩɛr'ɩ a Zuda tẽw tẽ-bɛrɛ al na cɛ a pʋɔ, ŋa za a ʋ zi-sóra pʋɔ.

Neemi 12:43

A nɩbɛ tɩ maal'ɩ bagɛ yaga a ʋlɩ bibir nɛ, ɛ́ nʋ̃ɔ̀ ɩrɛ. Bʋ̃ʋ n'ʋ vɛ̃, a Naaŋmɩn tɩ paal'ɩ a ʋ nɩ-bʋʋrɛ nɩ nʋ̃ɔ̀ yaga. A Zerizalɛm tẽw pʋɔ a, nʋ̃ɔ̀ tɩ ɩrɛ nɩ a pɔwbɛ nɩ a bibiir bɛ cɩɩrɛ ɩrɛ gɔmɛ, a cuw gɔmɛ tɩ yire a zi-zãána.

Neemi 8:17

A bɛlɩ dem za na tɩ ɓã taa a be a, a bɛl na tɩ yi a diw-cenu zie lɛb wa a, tɩ maal'ɩ sɛwr kpɩɛr. A tɩ ɩrɛ nɩ nʋ̃ɔ̀ yaga za, bʋ̃ʋ n'ʋ vɛ̃, a Nun bidɛb Zozue daar za n'a a Ɩsɩrayɛl nɩbɛ bɛ lɛb tɩ maalɩ a cuw ŋa ɩ.

Sɛb-sõw yielu 149:3

Bɛ íre a ʋ yúor ƴawr'ɩ! Bɛ ŋmɩɛr a kʋɔr nɩ a korijom yiele nɩ a ʋ ƴãw!

Sɛb-sõw yielu 30:1

Sɛb-sõw yielu. Ŋmɩn-yir-kpɛ̃ɛ maalʋ yielu na ɩ a Daviir yielu pʋɔ yielu kãw a.

Wulu-ayi-sob 16:11

Nyɩ na mɩ́ cen nɩ a zie ʋl a Sore na na kaa ír, k'ʋʋ mɩ́ wul k'aa be n'a ʋ be a. A be a, nʋ̃ɔ̀ na mɩ́ ɩrɛ nyɩ na, lãwnɩ a nyɩ bidɛbr nɩ a nyɩ pɔwyaar, a nyɩ tõ-tõ-bi-dɛbr nɩ a nyɩ tõ-tõ-bi-pɔwbɛ, lãwnɩ a levitɩ mɩnɛ na be a nyɩ tẽ-bɛrɛ pʋɔ a, nɩ a nʋʋrɩ na kpɩɛr a nyɩ zie a, a bi-kpebe nɩ a pɔw-kɔbɛ na kpɩɛr a nyɩ sɔgɔ a.

Wulu-ayi-sob 20:5

Al pùorí, a sojarɩ nɩ-bɛrɛ na so a sojarɩ íru a na yel bɛ na: «Nɩr be n a nyɩ pʋɔ, ŋmãa yir-paala ɛ́ bɛ kpɛ ʋ sɛr ɛ? Ʋ lɛb kul. Alɛ bɛ ɩ lɛ, ʋ nãà mab'a kpi a zɛbr zie ɛ́ nɩ-yũo kpɛ a yir.

Filib 4:4

Nyɩ cɩlɛ kʋralɛ nyɩ na lãw nɩ a Sore a, ɩ̃ lɛb'a yere: nyɩ cɩlɛ.

Yel-wula 5:8

A Pele na tɩ dier a sɛbɛ wa báarɛ a, a bʋ̃-vʋʋrɩ anaar nɩ a nɩ-kore lɩzɛr'ɩ anaar tɩ lo na gbĩ dume a ʋ niŋé. Ŋa za mɩ́ tɩ tɛr'ɩ korijom nɩ salm-zɩɛ koli-nyúuri, a paalɩ tɩ-suur-zɔ̃-na-nyùur-vla-vla-a ɛ́ ɩ a Naaŋmɩn nɩ-bʋʋrɛ puoru a.