A ʋ yúor tɩ yi n a Siiri tẽw za, ɛ́ bɛ tɩ tɛr nɩbɛ, bàal-pɛ-bʋʋrɛ za nɩ wʋlɛ bʋʋrɛ za na tɩ fɛrɛ a, wa n a ʋ zie: kɔ̃tɔ̃-ìrbɛ, kũkũ-lorbɛ nɩ gbɛɛ. A Yeezu tɩ sanɩ bɛ na.
Ɛcɛ ʋ tɩ yire na wa báarɛ ɛ́ nyɔw a yel ŋa hieri, ŋmɛ yaarɩ a ziir za. A na tɩ ɩ lɛ a, a Yeezu bɛ mɩ́ lɛb tɩ tʋ̃ɔ́ kpɛ tẽ-kpɛ̃ɛ kãw za pʋɔ cãàmɩ́ ɛ. Ʋ mɩ́ tɩ be n a wɛja pʋɔ, ɛ́ a nɩbɛ yire a ziir za waar a ʋ zie.
A nãà Erɔdɩ tɩ wõ na bɛ manɛ a Yeezu yele, a ʋ yúor na tɩ yi a ziir za a ƴãw. Nɩbɛ bɛ mɩnɛ tɩ yere na: «Zã-Bati n'ʋ lɛb yi a kũuni pʋɔ, alɛ so a nɔ-ɓãa-yele maalʋ fãw ʋ na tɛr a.»
A nãà ŋa zie ɩ̃ na ɓãá ƴãw ƴɛ̀rɛ a, ʋ wõ n a yele á ŋá, ɩ̃ɩ bãwnɩ a na been kãw za na bɛ sɔwlɩ a ʋ zie a, bʋ̃ʋ n'ʋ vɛ̃, gõgon kãw pʋɔ bɛ n'a a yele á ŋá ɩ ɛ.
