Matie 15:28 - A SƐB-SÕW

²⁸ A lɛ n'a a Yeezu tɩ sɔw ʋ: «Pɔw i, a fʋ naaŋmɩn-sàwfʋ ɩ n kpɛ̃ɛ! A tu a lɛ fʋ na bɔbr a!» Ɛ́ a tɛm nɛ pʋɔ, a ʋ pɔwyale tɩ sanɩ na.

Matie 15:28 ပူးပေါင်းရင်းမြစ်များ

A Zɔb sɛbɛ 13:15

A bɛ tɛr vɛb ɛ, a Naaŋmɩn na kʋ m a, ɩ̃ bɛ cãà tɩɛrɛ bom za ɩ. Ɛcɛ ɩ̃ na ƴɛ̀r'a wul a ɩ̃ yel-mɩŋa a ʋ niŋé.

A Zɔb sɛbɛ 23:10

Ɛcɛ ʋ bãw nɩ a sɔ́r ʋl ɩ̃ na tuur a: ʋ ƴãw mɛ̃ nɩ kpɩɛrʋ pʋɔ, ɛcɛ ɩ̃ na yi na nyɩwrɛ mɛ̃ salm-zɩɛ bɛ na zuw ír a.

Sɛb-sõw yielu 145:19

A bɛlɩ dem na zɔrɛ ʋ a, ʋ mɩ́ maal'ɩ a lɛ bɛ na bɔbr a, ʋ mɩ́ wõ n a cɛl bɛ na lɔb a, ɛ́ faa bɛ.

A Lãw-mʋɔlɛ 3:32

Ʋlɛ saa mɩ́ dɔwrɩ a nɩr a, ʋ mɩ́ cãà na ɩ nɔ̃wfʋ tɛwr, bʋ̃ʋ n'ʋ vɛ̃, a ʋ nɔ̃wfʋ ɩ n kpɛ̃ɛ.

Matie 14:31

A Yeezu tɩ tur'ɩ nũu daadaalɛ nyɔw ʋ, ɛ́ yel: «Naaŋmɩn-sàwfʋ pʋrɩ sob ŋa, bʋ̃ʋ n'ʋ so fʋ bʋnɩ?»

Matie 15:27

A pɔw lɛb yel ʋ: «Yel-mɩŋa n'a, Sore e, ɛcɛ a bali mɩ́ tuure nɩ a nɩbɛ na so a a bʋ̃-dɩ-ŋmaarɛ na lore a dɩrɛ.»

Matie 8:10

A Yeezu na tɩ wõ a ƴɛ̀r-bie á ŋá a, ʋ nyɔw nɩ nʋɔr, ɛ́ yel a bɛlɩ dem na tɩ tuur ʋ a: «Yel-mɩŋa sɩza, ɩ̃ yere na kʋ̀rɛ nyɩ: ɩ̃ bɛ nyɛ̃ a naaŋmɩn-sàwfʋ ŋa tɔ nɩr kãw za zie a Ɩsɩrayɛl tẽw pʋɔ ɩ.

Matie 8:13

Al pùorí, a Yeezu tɩ yel'ɩ a sojarɩ kʋba nɩ-kpɛ̃ɛ: «Kule! A tu a fʋ zie mɛ̃ a lɛ fʋ na sàw de a!» Ɛ́ a pɛr nɛ pʋɔ, a ʋ tõ-tõ-bie tɩ sanɩ na.

Matie 9:22

Ɛcɛ a Yeezu na tɩ lɩɛbɩ nyɛ̃ ʋ a, ʋ yel ʋ na: «Ɩ̃ pɔwyaa a, ta zɔrɛ dɛ̃bɩ̃ɛ ɩ, a fʋ naaŋmɩn-sàwfʋ faa fʋ na.» Ɛ́ a pɛr nɛ pʋɔ a, a pɔw bàalʋ tɩ sanɩ na.

Markɩ 5:34

Ɛcɛ a Yeezu tɩ yel ʋ na: «Ɩ̃ pɔwyaa a, a fʋ naaŋmɩn-sàw-deb faa fʋ na: cere nɩ ƴã-ɓaarʋ ɛ́ a fʋ bàalʋ baarɩ.»

Luka 17:5

A nɩ-toni tɩ yel'ɩ a Sore: «Ɩ a tɩ naaŋmɩn-sàw-deb ʋ bɛrmɛ dɔwlɩ.»

Luka 7:50

Ɛcɛ a Yeezu tɩ yel'ɩ a pɔw: «A fʋ naaŋmɩn-sàwfʋ faa fʋ na, cere nɩ ƴã-ɓaarʋ.»

Luka 7:9

A Yeezu na tɩ wõ a ƴɛ̀r-bie á ŋá a, ʋ nɔ̃w nɩ a sojarɩ kʋba nɩ-kpɛ̃ɛ nɛ yele, ʋʋ tɩ lɩɛb'a yel a zu-sɛbla na tuur ʋ a: «Mãa n'ʋ yere kʋ̀rɛ nyɩ, a Ɩsɩrayɛl bʋʋrɛ nɩbɛ tɛɛ za pʋɔ a, ɩ̃ bɛ nyɛ̃ a naaŋmɩn-sàwfʋ ŋa tɔ ɩ.»

2 Tesalonikɩ 1:3

Yɛbr i, a fɛr'a kɛ́ tɩ mɩ́ puore a Naaŋmɩn yãanɩ kʋralɛ a nyɩ ƴãw. Ɛ́ a mɩ̀ sɛw na kɛ́ tɩ ɩrɛ a lɛ, bʋ̃ʋ n'ʋ vɛ̃, a nyɩ naaŋmɩn-sàw-deb kɛrɛ na dɔwlɛ bɛ dɩ vuo ɩ, ɛ́ a nɔ̃wfʋ nyɩ na nɔnɛ taa a kɛrɛ dɔwlɛ a nyɩ za been been zie.

1 Samɩɛl 2:30

A na ɩ à ŋá a, a mãa Sore, a Ɩsɩrayɛl Naaŋmɩn, à ŋá n'a ɩ̃ yere kʋ̀rɛ fʋ: ɩ̃ tɩ yel'a k'aa fʋ yir nɩbɛ nɩ a fʋ dɔwlʋ nɩbɛ mɔ̃ mɩ̀ na ɩ n a ɩ̃ bàwr-maalbɛ kʋralɛ. Ɛcɛ ƴɛrɛŋa a, mãa n'ʋ yere: lɛ bɛ cãà n'a ɩ. Bʋ̃ʋ n'ʋ vɛ̃, ɩ̃ ƴãwnɛ nɩ bɛlɩ dem na ƴãwnɛ mɛ̃ a, ɛ́ bɛlɩ dem na bɛ ƴãwnɛ mɛ̃ a, bɛ mɩ̀ kʋ̃ nyɛ̃ ƴãwfʋ ɛ.