Malasɩ 3:3 - A SƐB-SÕW

³ Ʋ na zɩ̃ na nyɩl a salm-pla ír a dɛwr bɛr ʋ vɩɛl. A bàwr-maalbɛ na ɩ a Levi bʋʋrɛ a, ʋ na cɔbrɩ bɛ na bɛ vɩɛl, ʋ na ɩ na bɛ vɩɛl, mɛ̃ a lɛ bɛ na mɩ́ ɩ salm-zɩɛ nɩ salm-pla a vɩɛl a. Lɛ n'a bɛ na tʋ̃ɔ́ mɩ́ kʋ̀ de-kʋ̀b bome a Sore, mɛ̃ a lɛ a na tu sɔ́r a.

Malasɩ 3:3 ပူးပေါင်းရင်းမြစ်များ

Sɛb-sõw yielu 116:17

Ɩ̃ na maal'ɩ barka bàwr kʋ̀ b, ɩ̃ɩ na bʋɔl'ɩ a Sore yúor.

Sɛb-sõw yielu 4:5

Nyɩmɛ wa nyɛ̃ suur a, a ta ɩ nyɩ tɛr sãwna ɩ, nyɩ mɩ́ tɩɛrɩ a nyɩ bʋ̃-gana pʋɔ, ɛ́ ɩ gbili. Tɛw-àrʋ

Sɛb-sõw yielu 4:6

Nyɩ maalɛ a bagɛ al na sɛw taa nɩ a, ɛ́ mɩ́ ƴãw a nyɩ tɩɛrʋ a Sore ƴãw.

Sɛb-sõw yielu 50:14

Nɩ̃ɛ ɩ a fʋ barka puoru ɩ bàwr fʋ maalɩ kʋ̀ m, a mãa fʋ Naaŋmɩn, ír a nɛ́ɛ fʋ na kõ a ɩ̃ zie a, mãa na ɩ Naaŋmɩn-na-do-saa-bɛ-pɩɛl-a.

Sɛb-sõw yielu 50:23

Sob nɛ barka puoru na ɩ bàwr ʋ maalɛ kʋ̀rɛ mɛ̃ a, ʋlɛ n'ʋ ƴãwnɛ mɛ̃. Sob nɛ ɩb na vɩɛl a, ɩ̃ na ɩ na k'ʋ nyɛ̃ mãa na n'ɩ a Faarɛ a.

Sɛb-sõw yielu 51:19

A bàwr a Naaŋmɩn ƴãw a, ʋlɛ n'ɩ tɩɛrʋ a sãwna kpɩɛrʋ na dĩ a, Naaŋmɩn i, fʋ bɛ jewre nɩr na kone a ʋ sãwna, ɛ́ siwre ʋ tʋɔra a ɩ.

Sɛb-sõw yielu 66:10

Naaŋmɩn i, fʋ ɩ tɩ na kaa, mɛ̃ a lɛ bɛ na mɩ́ zuw ír a salm-pla dɛwr bɛr ʋ vɩɛl a, fʋ ɩ na tɩ wõ tuo vɩɛl.

Zʋkpaɩ 17:3

Vũu n'a bɛ mɩ́ ɩ n a salm-zɩɛ nɩ a salm-pla kaa bãw a vɩɛlʋ, ɛcɛ a Sore n'ʋ mɩ́ ɩ a socie kaa bãw a vɩɛlʋ.

Zʋkpaɩ 25:4

Ír a salm-pla dɛwr bɛr, ɛ́ a salm-zɩɛ-bʋ̃-vɩɛlɩ-bãw-maalɛ na maal'ɩ bʋ̃-vla.

Ɩzayi 1:25

Zerizalɛm i, ɩ̃ na lɩɛb'ɩ a fʋ ƴãw: ɩ̃ na ɩ na fʋ lɛb vɩɛl, mɛ̃ zɩ̃ɛ n'a ɩ̃ ɩ n a, ɩ̃ na ɩ n a fʋ dɛwr za a yi.

Ɩzayi 48:10

Ɩ̃ ɩ na nyɩ lɛb vɩɛl, ɛ́ a bɛ ɩ a vũu na mɩ́ ɩ a salm-pla ʋ vɩɛl a pʋɔ n'a ɩ, kpɩɛrʋ vũu pʋɔ n'a.

Ɩzayi 61:6

Ɛcɛ a nyɩɩm a, bɛ na bʋɔlɛ nyɩ nɩ “Sore bàwr-maalbɛ.” A nyɩ yúor na dɩ n “Sore tɩ Naaŋmɩn tõ-tõ-biir.” Nyɩ na dɩ n a nɩ-bʋʋr-yoru na-bome, ɛ́ nyɩ na íre nɩ yúor nɩ a bɛ tɛra.

Zeremi 9:7

A nɩbɛ bɛ ŋa zɛl ɩ na mɛ̃ pĩi-zɛl na kʋrɛ a. Ziri n'a yire a bɛ nɛ̃ɛ́. Nʋɔr'ʋ bɛ mɩ́ ƴɛ̀rɛ nɩ ƴã-ɓaarʋ ƴɛ̀r-bie kʋ̀rɛ a bɛ tɔ, ɛcɛ a bɛ pʋ̃ɔmɩ za bɛ ƴãwnɛ ʋ bɛra.

Ezekɩɛl 20:38

Ɩ̃ na diw nɩ a bɛl na gaarɩ ɛ́ bɛ sàw a ɩ̃ nʋɔr a, a nyɩ pʋɔ. Ɩ̃ na ɩ na bɛ yi a ten al bɛ na kpɩɛr a, ɛcɛ bɛ kʋ̃ cen a Ɩsɩrayɛl tẽw pʋɔ ɩ. Lɛ n'a nyɩ na bãw kɛ́ mãa n'ɩ a Sore.

A naaŋmɩn-ƴèr-manɛ Oze sɛbɛ 14:2

Ɩsɩrayɛl i, lɛb wa a Sore fʋ Naaŋmɩn zie. Bʋ̃ʋ n'ʋ vɛ̃, a fʋ sãwna n'a ɩ fʋ ŋmɛ gbɛ́r lo.

Zakari 13:9

Ɩ̃ na ɩ n a bɛl na na cãà vʋʋrɛ a, bɛ tu yi a vũumí, ɩ̃ na ɩ na bɛ vɩɛl, mɛ̃ a lɛ bɛ na mɩ́ ɩ a salm-pla ʋ vɩɛl a. Ɩ̃ na ɩ bɛ na kaa bãw a bɛ ŋmɛ̃a, mɛ̃ a lɛ bɛ na mɩ́ ɩ salm-zɩɛ kaa a. Lɛ n'a bɛ na puore mɛ̃, ɩ̃ɩ na mɩ́ sàw nɩ a bɛ puoru. Ɩ̃ na mɩ́ yel bɛ na: “Ɩ̃ nɩ-bʋʋrɛ n'ɩ nyɩ”, ɛ́ a bɛl yel mɛ̃: “Sore e, fʋ̃ʋ n'ɩ a tɩ Naaŋmɩn.”»

Sɔr-nɛ́ɛ 8:6

«Ír a levitɩ mɩnɛ a Ɩsɩrayɛl nɩbɛ pʋɔ, tʋ̃ɔ́ so a bɛ dɛwr bɛr bɛ.

Luka 3:16

Lɛ n'a a Zã tɩ yel kʋ̀ bɛ za: «Kʋ̃ɔ n'a mãa kʋ̀rɛ nɩ nyɩ a suob, ɛcɛ nɩr be n a ɩ̃ pùor waar, kpɛmɛ zuo mɛ̃, ɩ̃ mɩ̀ bɛ sɛwnɩ na cɛ̀r a ʋ nafawr bʋ̃-'leni ɛ. Ʋl a, Vʋʋrʋ Sõw nɩ vũu pʋɔ n'a ʋ na kʋ̀ nyɩ a suob.

Ʋrɔm 12:1

A na ɩ à ŋá a, yɛbr i, ɩ̃ zɛlɛ nyɩ na a Naaŋmɩn su-ɓaarʋ zũú, kɛ́ nyɩ mɩ́ de nyɩ tʋɔra kʋ̀ a Naaŋmɩn mɛ̃ bàwr-maal-bʋ̃-vʋbɛ na ɩ son ɛ́ nʋmɛ a ʋ zie a: lɛ n'ɩ a nyɩ Naaŋmɩn puoru na ɩ sɩza a.

Ʋrɔm 15:16

k'ɩ̃ɩ ɩ a Yeezu Kɩrɩta tõ-tõ-bie a nɩ-bʋʋr-yoru ƴãw. Tõ-sõw n'ʋ ɩ̃ tone hiere a Naaŋmɩn Yel-nʋ̃ɔ̀, k'aa nɩ-bʋʋr-yoru lɩɛbɩ bàwr-maal-bom na nʋmɛ a Naaŋmɩn zie a, bàwr-maal-bom Vʋʋrʋ Sõw na ɩ k'ʋ ɩ sõw a.

Filib 2:17

Ɛ́ alɛ mɩ̀ saa na fɛr a ɩ̃ zɩ̃ɩ cir mɛ̃ de-kʋ̀b-bom, ƴãw pʋɔ a bàwr a nyɩ naaŋmɩn-sàw-deb na maalɛ kʋ̀rɛ a Naaŋmɩn a ƴãw a, ɩ̃ cɩlɛ na, ɛ́ cɩlɛ lãwnɩ a nyɩ za.

Filib 4:18

Mɔ̃ mɩ̀, ɩ̃ tɛr'ɩ bom za a na sɛw k'ɩ̃ɩ tɛr a, ɛ́ tɛr dɔwlɩ mɩ̀. Bom bɛ cɛ m ɛ, ɩ̃ na páw a bom ʋl nyɩ na kʋ̀ a Epafoditɩ k'ʋʋ wa kʋ̀ m a. A ɩ na mɛ̃ parfɛ̃ na nyùur vla vla a, ɛ́ ɩ bàwr na nʋmɛ a Naaŋmɩn zie ʋ sàw de a.

2 Timote 4:6

Mãa a, bɛ maal'ɩ mɛ̃ nɩ a bàwr baarɩ, a ɩ̃ kulu daar ta na.

Títɩ̀ 2:14

Ʋ de nɩ ʋ tʋɔra tɩr a tɩɩm ƴãw, k'ʋʋ faa tɩ a faalʋ za pʋɔ, ɛ́ ɩ tɩ lɩɛbɩ nɩ-bʋʋrɛ na vɩɛl ɛ́ ʋl yõ so a, nɩ-bʋʋrɛ na tʋlɛ a ɩ-vɩɛlɩ maalʋ ƴãw a.

Ebre 12:10

A tɩ sãà mɩnɛ mɩ́ tɩ kpãà tɩ nɩ blãlɛ ƴãw, mɛ̃ a lɛ bɛ na mɩ́ tɩ nyɛ̃ a sɛw taa nɩ a. Ɛcɛ a Naaŋmɩn ʋl a, a tɩ vla ƴãw n'a ʋ mɩ́ kpãànɛ tɩ, kɛ́ tɩ tʋ̃ɔ́ pʋɔ a ʋ sonu pʋɔ.

1 Pɩɛr 1:7

A kpɩɛrʋ á ŋá na ɩ na kɛ̀ bɛ bãw a lɛ a nyɩ naaŋmɩn-sàwfʋ vɩɛlʋ na ŋmɛ̃ a, a nyɩ naaŋmɩn-sàwfʋ ŋa na zuo a salm-zɩɛ na mɩ́ wɛ a, ɛ́ bɛ mɩ́ ƴãw vũumí ɩ kaa bãw a vɩɛlʋ a. A nyɩ naaŋmɩn-sàwfʋ bɛ na ɩ kaa nyɛ̃ ʋ vɩɛl a na ɩ na nyɩ nyɛ̃ danʋ, nɩ yúor-vɩɛlʋ-danʋ nɩ ƴãwfʋ, a lɛn daar a Yeezu Kɩrɩta nãà wa lɛb wa wul ʋ tʋɔra a,

1 Pɩɛr 2:5

A nyɩɩm mɩ̀, nyɩ ɩ mɛ̃ kʋsɛ-mimie bɛ na ŋmaarɛ nɩ yir Vʋʋrʋ Sõw na kpɩɛr a. Nyɩ ɩ Naaŋmɩn bàwr-maal-son maalɛ tɩɛrʋ bàwr a Naaŋmɩn na na tʋ̃ɔ́ sàw de a Yeezu Kɩrɩta zũú a.

1 Pɩɛr 2:9

Ɛcɛ nyɩɩm a, nyɩ ɩ n «Nɩ-bʋʋrɛ bɛ na kaa ír a, Nãà bàwr-maalbɛ, nɩ-son bʋʋrɛ, nɩbɛ Naaŋmɩn na ya de a», kɛ́ nyɩ manɛ a ʋ tõ-vɩɛlɩ, ʋl na bʋɔlɩ nyɩ a lige pʋɔ yi wa n a ʋ cãà na bɛ tɛr tɔ a pʋɔ a.

Yel-wula 1:6

Ʋ ɩ na tɩ ɩ na-mɩnɛ nɩ-bʋʋrɛ, bàwr-maalbɛ a Naaŋmɩn ʋ Sãà ƴãw. Ʋlɛ so yúor-vɩɛlʋ-danʋ nɩ kpɛnʋ a yome yome za. Amɛn.

Yel-wula 3:18

Ɩ̃ wule fʋ nɩ yã a: dà salm-zɩɛ a ɩ̃ zie tʋ̃ɔ́ sɩrɩ kpɛ naalʋ, salm-zɩɛ bɛ na zuw ír a dɛwr bɛr a. Dà kpar-pɛlɛ su pàw fʋ tʋɔra, a fʋ ƴã-gan zawla na ɩrɛ vĩ a ta cãà sãá ɩ. Mɩ̀ dà mimie tɩ̃ɩ sanɩ nɩ a fʋ mimie kɛ́ fʋ tʋ̃ɔ́ nyɛrɛ.

Yel-wula 5:10

Fʋ ɩ na bɛ ɩ na-mɩnɛ nɩ-bʋʋrɛ nɩ bàwr-maalbɛ a tɩ Naaŋmɩn ƴãw, ɛ́ bɛ na dɩrɛ nɩ naalʋ a tẽw zu.»