3 A Sore ɩ n zɛ-zɛbrɛ, a ʋ yúor'ɩ a Sore!
— Ãa n'ɩ a na-kpɛ̃ɛ ŋa? — A Sore n'ʋ, a fãw sob nɩ a gãdaa, a Sore na ɩ a zɛbr gãdaa a.
Fʋ pɔ̀l'a zuo a nɩbɛ za, a ƴɛ̀rʋ a, fʋ bãw a na. A sãá na, a Naaŋmɩn na maalɩ fʋ dɩ̃a nɩ bio a.
A bɛ yúor, ʋ sãw, dɛ̃bɩ̃ɛ, a ɩrɛ bɛ kʋralɛ! Vĩ, a nyɔw bɛ bɛ kpi!
A Sore na lɩɛrɩ nyɩ na zɛb, nyɩ bɛ damnɛ damnʋ za ɩ.»
Ʋ tɩ ɩ na a bɛ zɛbr-torkori gbɛ́ɛ kʋ̃ lɛb tʋ̃ɔ́ lɩɛbɩ ɛ, a dãanʋ ɩ kpɛ̃w. Lɛ n'a a Eziptɩ tẽw nɩbɛ tɩ yel: «Nyɩ ɩ tɩ zɔ zãá nɩ a Ɩsɩrayɛl nɩbɛ, bʋ̃ʋ n'ʋ vɛ̃, a Sore n'ʋ lãw nɩ bɛ zɛbr'ɩ tɩ!»
A Moyiir tɩ yel'ɩ a Naaŋmɩn: «Nyɛ̃, ɩ̃ na cen nɩ a Ɩsɩrayɛl nɩbɛ zie tɩ yel bɛ: “A nyɩ sãàkʋm-kore Naaŋmɩn tõ m'ɩ a nyɩ zie.” Bɛlɛ wa sowre mɛ̃: “A ʋ yúor dɩ na kɛ́ bo?” Ɩ̃ sɔw kɛ́ bʋnʋ kʋ̀ bɛ?»
A Naaŋmɩn tɩ yel'ɩ a Moyiir: «“Ɩ̃ Ɩ N A SOB NƐ Ɩ̃ NA Ɩ A.” Nyɛ̃ a lɛ fʋ na na tɩ yel kʋ̀ a Ɩsɩrayɛl nɩbɛ a: “Ɩ̃ BE NA tõ m'ɩ a nyɩ zie”.»
Al pùorí fʋ yel ƴãw pʋɔ: “A Sore n'ʋ tõ m a nyɩ zie, a nyɩ sãàkʋm-kore Naaŋmɩn, a Abraham Naaŋmɩn, Ɩzaakɩ Naaŋmɩn nɩ Zakɔb Naaŋmɩn.” A ɩ̃ yúor'ɩ á ŋà kʋralɛ, ʋlɛ n'ʋ a nɩbɛ na dɔwr lɩɛrɛ taa a na mɩ́ bʋɔlɛ puore nɩ mɛ̃.
A Sore waar'a mɛ̃ soja-gãdaa a, mɛ̃ zɛbr-nɩr na tʋlɛ a zɛbr ƴãw a. Ʋ ŋmɩɛr'ɩ a zɛbr cɛl, ʋ ɩrɛ nɩ gɔmɛ, ʋ ɩrɛ nɩ gãda-ɩb a ʋ dɔ̃ dem zie.
Mãa n'ɩ a Sore, a ɩ̃ yúor'ɩ lɛ. Ɩ̃ bɛ kʋ̀rɛ a ɩ̃ yúor-vɩɛlʋ-danʋ nɩ-yũo ɩ. Ɩ̃ bɛ bɛrɛ a danʋ ɩ̃ na so a kʋ̀rɛ tɩbɛ ɩ.
À ŋá n'a a sob nɛ na mɩ́ maalɩ a yele a, na mɩ́ cɔbrɩ a, ɛ́ ɩ a be a, yere. A Sore n'ʋ, a ʋ yúor'ɩ lɛ.
