Ɛ́ ɩ̃ yere na kʋ̀rɛ fʋ, fʋ ɩ n Pɩɛr, a pɛr lɛ kɛ́ kʋsɩɛr, ɛ́ a kʋsɩɛr ŋa zu n'a ɩ̃ na ŋmãa a ɩ̃ Lãw-yir, ɛ́ a kũu kpɛnʋ bʋʋrɛ za kʋ̃ tʋ̃ɔ́ ɩ ʋ bom za ɩ.
Ɛcɛ, mãa wa ɩ mɛ̃ ɩ̃ kɔwrɛ na a, fʋ na bãw nɩ a lɛ a na sɛw kɛ́ fʋ ɩrɛ a Naaŋmɩn yir pʋɔ na ɩ a Naaŋmɩn na vʋʋrɛ a Lãw-yir a, a Lãw-yir ŋa na ɩ a yel-mɩŋa kpul ɛ́ tɩɛ a yel-mɩŋa tɛr a.
Lɛ so a tɩ fɛr k'ʋʋ ŋmɛ̃ taa nɩ a ʋ yɛbr a yele za pʋɔ, ɩ bàwr-maal-kara na tɛr su-ɓaarʋ ɛ́ bɛ lɛbr pùor a Naaŋmɩn tome tob pʋɔ a, tʋ̃ɔ́ mɩ́ ír a nɩbɛ yel-bebe bɛr.
Yɛbr kɩrɩta-nɩbɛ ɛ, a Naaŋmɩn so nyɩ, ʋl na bʋɔlɩ nyɩ a. A na ɩ lɛ a, nyɩ jɩ́rɛ a Yeezu na ɩ a naaŋmɩn-sàw-deb tɩ na hiere a nɩ-tona nɩ abàwr-maal-kara a.
A bàwr-maal-kara tɔr za n'ɩ à ŋà a na tɩ fɛr kɛ́ tɩ tɛr a: ʋ ɩ n sõw, ʋ bɛ tɛr sãwna ɩ, ʋ vɩɛl'ɩ ʋ za. Bɛ bʋ́r ʋ na ʋ bɛ pʋɔ a yel-bebe dem pʋɔ ɩ, ɛ́ zɛw ʋ k'ʋ do gãw a salom.
A ƴɛ̀rʋ tɩ na ƴɛ̀rɛ a ƴɛ̀r-zu-kpɛ̃ɛ sɩrɩ n'ɩ à ŋà: a bàwr-maal-kara ŋa tɔ n'ʋ tɩ tɛr, ʋl na zɩ̃ a Naaŋmɩn na ɩ kpɛ̃ɛ kpɛ̃ɛ za a naalʋ-dà-kɔw dʋrʋ lowr a saa-zu a.
