1 Timote 2:8 - A SƐB-SÕW

⁸ Lɛ so ɩ̃ bɔbr kɛ́ a ziir za, a dɛbr mɩ́ zɛw nũ-vɩɛlɩ cɔw a salom ɛ́ puore, ɛ́ bɛr a suur nɩ a taw-taa.

1 Timote 2:8 ပူးပေါင်းရင်းမြစ်များ

1 Na-mɩnɛ 3:11

A Naaŋmɩn tɩ sɔw nɩ a nãà à ŋá: «Fʋ bɛ zɛlɩ nyɔ-vʋʋr-wogo ɩ, bɛ zɛlɩ a tɛra ɩ, bɛ zɛlɩ a fʋ dɔ̃ dem kũu ɛ. Fʋ zɛlɩ na kɛ́ fʋ bãw a yele jielu vla, tʋ̃ɔ́ kaarɛ a nɩbɛ zie nɩ mɩnʋ. À ŋá na n'a fʋ zɛlɩ a,

A Zɔb sɛbɛ 16:17

Ɛcɛ a ɩ̃ nuru bɛ tɩ tõ po-to-fãw tome ɩ ɛ́ a ɩ̃ puoru tɩ vɩɛl ʋ za.

Sɛb-sõw yielu 134:2

Nyɩ zɛw a nyɩ nuru cɔw a zi-sõw, ɛ́ puori a Sore yãanɩ.

Sɛb-sõw yielu 141:2

A ɩ̃ puoru, a do wa a fʋ zie, mɛ̃ a tɩ-suur-zɔ̃-na-nyùur-vla-vla-a zʋ̀ʋ́r a, ɛ́ a ɩ̃ zɛlʋ ɩ mɛ̃ a zaanʋɔra bàwr a.

Sɛb-sõw yielu 24:4

— Sob nɛ nuru na bɛ tõ tõ-faar ɛ́ a pʋɔ ɩ parpar a n'ʋ, sob nɛ na bɛ tu bʋ̃-zawlɛ pùor ɛ́ bɛ pɔ pɔ-ziri a n'ʋ.

Sɛb-sõw yielu 26:6

Ɩ̃ na pɛ́w nɩ a ɩ̃ nuru, a wul ɩ̃ na bɛ tɛr sãwna a, ɛ́ ɩ̃ na cen na viiri koli a fʋ bàwr-maal-kuur, Sore e,

Sɛb-sõw yielu 28:2

Mɩ́ bɛr wõ m a lɛn daar ɩ̃ na mɩ́ zɛlɛ fʋ yãayãa a, a lɛn daar ɩ̃ na mɩ́ kone bʋɔlɛ fʋ a, a lɛn daar ɩ̃ na mɩ́ zɛw a nuru cɔw a fʋ zi-sõw-za-zi-sõw a.

Sɛb-sõw yielu 35:13

Bɛ na mɩ́ tɩ ɩ bàalbɛ a, ɩ̃ mɩ́ tɩ wul'ɩ a ɩ̃ pʋ-sãwna, ɩ̃ mɩ́ tɩ tɛr'ɩ mʋta-tuo dɔwrɛ nɩ ɩ̃ tʋɔra, ɛ́ a ɩ̃ puoru tɩɛrʋ waar a ɩ̃ zie kʋralɛ.

Sɛb-sõw yielu 63:4

a fʋ nɔ̃wfʋ sɩrɩ na sa a nyɔ-vʋʋrʋ. Ɩ̃ na danɛ fʋ na.

Sɛb-sõw yielu 66:18

Mãa tɩ ɩ mɛ̃ ɩ̃ tɛr'ɩ pʋ-tɩɛr-faa a, a Sore kʋ̃ʋ bɛr wõ m ɛ.

Zʋkpaɩ 15:8

A Sore bɛ nɔnɛ a nɩ-faar bagɛ towtow ɛ, ɛcɛ ʋ mɩ́ pɛlɩ nɩ pʋɔ de a nɩ-dẽdẽ mɩnɛ puoru.

Zʋkpaɩ 21:27

A nɩ-faar bàwr ɩ n bʋ̃-faa faa, bɛ na baa mɩ́ maalɩ ʋ nɩ tɩ́ɛrʋ na bɛ vɩɛl a.

Ɩzayi 1:15

Nyɩ na mɩ́ wa yɛ́r a nuru a puoru ƴãw a, ɩ̃ mɩ́ pàw nɩ a ɩ̃ mimie. Nyɩmɛ saa nɔnɛ nyɩɩm puore suwle taa, ɩ̃ bɛ bɛrɛ wone ɩ: a nyɩ nuru ɩ n zɩ̃ɩ tɛwr.

Matie 21:21

A Yeezu tɩ sɔw bɛ na: «Yel-mɩŋa sɩza, ɩ̃ yere na kʋ̀rɛ nyɩ: bibir kãw nyɩmɛ wa tɛr a naaŋmɩn-sàwfʋ ɛ́ bɛ bʋ́nɛ a, à à ŋá ɩ̃ na ɩ a kãkã-tɩɛ a, lɛ tɛwr bɛ n'a nyɩ na mɩ́ tʋ̃ɔ́ ɩ ɛ, ɛcɛ nyɩmɛ mɩ̀ saa mɩ́ yel a tãw ŋa: “Ìr a ka tɩ lo a kʋ̃ɔ-kpɛ̃ɛ pʋɔ a”, a na tu n a lɛ.

Matie 5:44

Ɛcɛ mãa yere na kʋ̀rɛ nyɩ: nyɩ nɔnɛ a nyɩ dɔ̃ dem, ɛ́ puore kʋ̀rɛ a bɛlɩ dem na dɔwrɛ nyɩ a.

Matie 6:12

Dɩ a tɩ sãwna suur kʋ̀ tɩ, mɛ̃ a lɛ a tɩɩm tɛɛ za na mɩ́ dɩ suur kʋ̀ a bɛlɩ dem na sãw tɩ a.

Luka 23:34

A Yeezu tɩ yel'a: «Ɩ̃ Sãà a, dɩ suur kʋ̀ bɛ: bʋ̃ʋ n'ʋ vɛ̃, bɛ bɛ bãw ʋlɩ bom nɛ bɛ na ɩrɛ a ɩ.» Al pùorí, bɛ tɩ gba n a ʋ kparɩ põ.

Luka 24:50

Al pùorí, a Yeezu tɩ tɛr bɛ na tɩ ta n Betani lowr, zɛw a nuru maal'ɩ bɛ.

Zã 4:21

A Yeezu sɔw yel: «Pɔw i, sàw a lɛ ɩ̃ na yere kʋ̀rɛ fʋ a, a daar tarɛ na, nyɩ na kʋ̃ mɩ́ cãà do a tãw ŋa zu, bɩɩ cen a Zerizalɛm tɩ puori a Naaŋmɩn Sãà a ɩ.

Nɩ-toni 10:2

Ʋlɛ nɩ a ʋ yir dem za tɩ zɔrɛ na ɛ́ ƴãwnɛ a Naaŋmɩn. Ʋ tɩ sõwne nɩ a Zifʋ mɩnɛ nɩ-kɔmɛ bɛ dɩ vuo ɩ, ɛ́ puore a Naaŋmɩn kʋralɛ.

Nɩ-toni 10:31

ɛ́ yel mɛ̃: “Kɔrnɛɩ i, Naaŋmɩn wõ n a fʋ puoru, ʋ bɛ yiiri a fʋ nɩ-kɔmɛ sõwfʋ bɛr ɛ.

Nɩ-toni 10:4

A Kɔrnɛɩ tɩ jɩ́r ʋ nɩ gbẽgbẽ, ɛ́ dɛ̃bɩ̃ɛ nyɔw ʋ, ʋ sɔw: «Ɛ́ bʋnʋ, Sore e?» A malkɩ tɩ lɛb yel ʋ: «Naaŋmɩn nyɛ̃ nɩ a lɛ fʋ na sõwne a nɩbɛ a, ʋ sàw na de a fʋ puoru, ʋ bɛ yiiri fʋ bɛr ɛ.

Nɩ-toni 21:5

Tɩ na tɩ kpɛ a be tɩ ta a bibie ayopõi a, tɩ lɛb'a lo a sɔ́r. Tɩ na tɩ cere a, bɛ za, tɩ lãwnɩ a pɔwbɛ nɩ a bibiir, tɩ bɩɛlɩ tɩ na tɩ yi n a tẽw pʋɔ. Tɩ na tɩ ta a kʋ̃ɔ-kpɛ̃ɛ nʋɔr a, tɩ gbĩ n dume lãw puori.

Nɩ-toni 7:60

Al pùorí, ʋ tɩ gbĩ n dume ɛ́ yel kpɛ̃w za: «Sore e, taa dier a yel-bier ŋa dɔwlɛ a bɛ zu ɛ.» Ʋ na tɩ yel à ŋá baar'a, ʋ gur'ɩ a kũu gʋ̃ɔ.

1 Korɛ̃tɩ 1:2

Nyɩɩm na ɩ a Naaŋmɩn Lãw-yir be a Korɛ̃tɩ a, nyɩɩm na páw a sonu lãwnɩ a Kɩrɩta Yeezu a, nyɩɩm bɛ na bʋɔlɛ nɩ-son lãwnɩ a bɛlɩ dem za na bʋɔlɛ a tɩ Sore Yeezu Kɩrɩta yúor zie nɛ za bɛ na be a, ʋl na ɩ a tɩɩm nɩ a bɛl za Sore a, nyɩ za nɛbɛ ɩ̃ sɛbr.

1 Korɛ̃tɩ 7:7

Ɩ̃ bɔbr'a k'aa nɩbɛ za nãá ŋmɛ̃ mɛ̃ a mãa a, ɛcɛ a Naaŋmɩn mɩ́ kʋ̀ n ŋa za a ʋ maalʋ: ŋa mɩ́ páw nɩ maalʋ ŋa, ŋa páw maalʋ ŋa.

2 Korɛ̃tɩ 2:14

Naaŋmɩn so yãanɩ! A Kɩrɩta ƴãw a, ʋ mɩ́ ƴãw na tɩ pʋɔ a ʋ zɛb-tʋ̃ɔ́fʋ nɩbɛ pʋɔ kʋralɛ, ɛ́ a tɩɩm zũú, ʋ ɩ bɛ bãw a Kɩrɩta ziir za mɛ̃ parfɛ̃ a nyũu na yi pàw a ziir za a.

Filib 1:12

Yɛbr i, ɩ̃ bɔbr'a kɛ́ nyɩ bãwnɩ a: a yele za na ta m a nɩ̃ɛ na ɩ a Yel-nʋ̃ɔ̀ hieri tɔl nidaa.

1 Tesalonikɩ 1:8

Bʋ̃ʋ n'ʋ vɛ̃, a Masedʋan nɩ a Akayi ten tɛwr bɛ n'a a Sore ƴɛ̀rʋ yi a nyɩ zie ɛ́ hieri tɩ tɔ ɩ, a nyɩ naaŋmɩn-sàw-deb yele ta n a ziir za, a dɛ bɛ lɛb tɛr tɩ na ƴɛ̀rɛ a ƴɛ̀rʋ ɛ.

1 Timote 5:14

A na ɩ à ŋá a, ɩ̃ bɔbr'a kɛ́ a pɔw-kɔ-pɔ́lɛ́ mɩ́ lɛb kul sɩrbɛ dɔw bibiir, kɛ́ bɛ kaarɛ a bɛ yir zie, a tɩ dɔ̃ dem ta tʋ̃ɔ́ nyɛ̃ yel-faa kãw za yel ɛ.

Títɩ̀ 3:8

A ƴɛ̀rʋ ŋa ɩ n sɩza. Ɩ̃ bɔbr'a kɛ́ fʋ ƴɛ̀r gb'a a yaga a yele á ŋá ƴãw, k'aa bɛlɩ dem za na sàw de a Naaŋmɩn a, bɛ ƴãw fãw ɩrɛ vla dɔwlɛ a bɛ ɩ-vɩɛlɩ pʋɔ. À ŋá n'a vɩɛl ɛ́ tɛr yel-ɩra a nɩsaalbɛ zie.

Ebre 10:22

A na ɩ lɛ a, nyɩ ɩ tɩ taw pɩɛlɩ a Naaŋmɩn nɩ soci-dẽdẽ nɩ a tɩ sàw-deb za, ɛ́ tɛr socie na vɩɛl bɛ cãà tɛr sãwna za tɩɛrʋ a, nɩ ƴã-gamɛ bɛ na pɛ́w nɩ kʋ̃ɔ vla walwal a.

Zakɩ 4:8

Nyɩ taw pɩɛlɩ a Naaŋmɩn, ʋʋ na taw na pɩɛlɩ nyɩ. Nyɩ pɛ́w a nyɩ nuru, nyɩɩm yel-bebe dem bɛ ŋan i. Nyɩ maalɩ a nyɩ socie a vɩɛl, nyɩɩm nɩbɛ a tɩɛrʋ na põ a!

1 Pɩɛr 3:7

Lɛ mɩ̀ n'a, a nyɩɩm sɩrbɛ, nyɩ lãw kpɩɛr'ɩ a nyɩ pɔwbɛ, ɛ́ bãwnɩ a bɛ na bɛ tɛr fãw a. Nyɩ ƴãwnɛ bɛ, nyɩɩm nɩ a bɛl nɛbɛ lãw a gbã-dɩ-bom na ɩ a nyɔ-vʋʋrʋ a Naaŋmɩn na kʋ̀ nyɩ a. Nyɩ ɩrɛ a lɛ kɛ̀ bom za ta piw a nyɩ puoru ɛ.