Zakaria 7:14 - BAIBLO ALOO NGMAMI KLƆUKLƆU Ɔ

¹⁴ I gbɛ mɛ ngɔ fĩa je mahi nɛ a li nɔ kaa nɔ́ nɛ lasiogblee lɛ muɔ mɛ; nɛ a si zugba a ngɔ fɔ si, nɛ nɔ ko bi ngɛ lejɛ ɔ. Nɛ zugba kpakpa nɛ ɔ ba pee ma doku.”

Zakaria 7:14 ပူးပေါင်းရင်းမြစ်များ

Kronika II, 36:21

Lɔ ɔ he ɔ, nɔ́ nɛ Yawɛ de to kɛ gu gbalɔ Yeremia nɔ ɔ ba mi. Yawɛ lɛ de ke, “Zugba a maa fɔ si jeha nyingmi kpaago, konɛ Hejɔɔmi ligbi ɔmɛ nɛ a yi ɔ, a kɛ tsɔ.”

La 58:9

Loko a hɛ maa ba a he nɔ ɔ, a poo mɛ ngɔ pue he kaa nga. Mawu maa ngɔ e mi mi la a kɛ bɛɛ mɛ kɛ ho be mi nɛ a ngɛ hɛ ngmengmle.

Yesaya 17:13

Je ma amɛ hia kɛ ma kaa wo oslɔke; se Mawu ku a nya la, nɛ a kpale a se kɛ yaa kaa bunyuku nɛ ngɛ tee puu ngɛ yoku he, loo kaa dwɔmi nɛ ahumi ngɔ kɛ yaa.

Yesaya 21:1

Sɛ gbi nɛ kɔɔ Babilonia he ji nɛ ɔ nɛ. Kaa bɔ nɛ lasiogblee bee huu ngɛ leneyi je nga kplanaa a nɔ kɛ puɛɔ ní ɔ, jã kɛ̃ hɛ mi kpatami maa je zugba ko nɛ nɔ ngɛ gbeye nɔ kɛ ba.

Yesaya 60:15

“A be mo kuae, nɛ a be mo nyɛe hu kaa sa be ko nɛ o pee ma doku nɛ nɔ ko gui lejɛ ɔ. Ma wo o nɔ gojoo, nɛ o he maa pee fɛu. O maa pee he nɛ bua jɔmi maa hi daa.

Yesaya 66:15

Yawɛ maa nyɛɛ la mi kɛ ba. E maa hi ta zugba lɛ nɛ ngɛ kaa lasiogblee mi kɛ ba, nɛ e ma ba kpata e he nyɛli ɔmɛ a hɛ mi.

Yeremia 12:10

Ma nɔ yeli babauu ba puɛ ye wai ngmɔ ɔ; a ba naa ye ngmɔ ɔ nɔ, nɛ ye zugba saminyayoo ɔ plɛ pee nga kplanaa.

Yeremia 23:19

Nyɛɛ hyɛ! Yawɛ mi mi fumi ɔ ngɛ kaa ahumi. E ngɛ kaa lasiogblee nɛ maa fia vuguvugu kɛ bɔle yayami peeli a yi he.

Yeremia 30:23

Yawɛ we abofu ngɛ kaa ahumi; e ngɛ kaa kɔɔhiɔ nɛ nya wa. E maa fia vuguvugu kɛ be ngɛ yiwutsotsɛmɛ a yi nɔ. Yawɛ we abofu ɔ se be poe kɛ yaa si e maa gbe níhi tsuo nɛ e to ke e maa pee ɔ nya. Pee se kulaa loko e ma a maa nu nɔ́ nɛ ɔ sisi saminya.

Yeremia 36:19

Kɛkɛ nɛ ma nimeli ɔmɛ de Baruk ke, “Yaa nɛ o ya laa o he, o kɛ Yeremia tsuo. Nyɛ ko ha nɛ nɔ ko nɛ le he nɛ nyɛ ngɛ.”

Yeremia 44:6

Enɛ ɔ he je ɔ, ye mi mi la nɛ nya wa a puɛ ní ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ kaa bɔ nɛ la sãã nɔ́ ɔ. Nɛ ma amɛ a hɛ mi kpata, nɛ a pee ma dokuhi kaa bɔ nɛ a ngɛ mwɔnɛ ɔ.

Yeremia 5:15

Nyɛ Israel bi, Yawɛ ha nɛ je ma ko je tsitsaa kɛ ma nɛ e ba tua nyɛ. Blema ma ji ma nɛ ɔ nɛ, nɛ ma mi bi ɔmɛ a he wa wawɛɛ nitsɛ. Nimli nɛ ɔmɛ a gbi ɔ, nyɛ li; ke a tu munyu hu nyɛ be sisi nue.

Yeremia 52:30

jehanɛ, benɛ Nebukadnezar ye jeha nyingmi enyɔ kɛ etɛ ngɛ matsɛ sɛ ɔ nɔ ɔ, e tatsɛ Nebuzaradan ba ngɔ Yuda bi 745 nyɔguɛ kɛ ho. Ni ɔmɛ tsuo a hiɛmi ji 4,600.

Ezekiel 12:19

De ma a tsuo ke sɛ gbi nɛ Nyɔmtsɛ Yawɛ kɛ ha mɛ Yerusalem bi nɛ a ngɛ Yuda zugba nɔ kɛ mwɔɔ ji, a he maa do bibliibli kɛ ye abolo, nɛ a kɛ he hiami, kɛ tsui yemi maa nu nyu. A ma kpata a zugba a nɔ bi ɔmɛ tsuo a hɛ mi pɛsɛpɛsɛ; ejakaa ma amɛ a mi bi ɔmɛ tsuo a yi mi wa.

Ezekiel 22:15

Ma tsɛ̃ o yi se kɛ ya je ma amɛ a mi, nɛ ma gbɛ mo ngɔ fĩa zugba a nɔ tsuo. Kɛkɛ ɔ, ní yayamihi nɛ o peeɔ kɛ woɔ o he mu ɔ, ma ha o ma kpa peemi.

Ezekiel 5:10

Bɔ nɛ e maa ba ji kaa fɔli ngɛ Yerusalem maa ye mɛ nitsɛmɛ a bimɛ, nɛ bimɛ ɔmɛ hu maa ye a fɔli. Ma gbla o tue wawɛɛ; nɛ nihi nɛ a yi ma na wami ɔ, ma gbɛ mɛ ngɔ fĩa je ɔ mi tsuo.

Daniel 8:9

Koli nyafii ko puɛ kɛ je koli eywiɛ ɔmɛ a ti kake mi. E he wami ɔ ya su leneyi je, kɛ beleku je, kɛ zugba a nɛ a wo he si ɔ nɔ.

Hosea 9:17

Ye Mawu ɔ ma kua e ma a; ejakaa a bui lɛ tue. A maa wo lalaalo ngɛ je ma amɛ a kpɛti.

Yoel 2:3

A maa ye nɔ́ tsuaa nɔ́ pɛsɛpɛsɛ kaa bɔ nɛ la sãã nɔ́ ɔ. Ngɛ a hɛ kpɛ ɔ, zugba a maa hi kaa Eden ngmɔ ɔ mi pɛ; a se je ɔ maa pee zugba kplanaa. A be nɔ́ ko nɔ́ ko piɛe.

Mose III, 26:22

Ma ngmɛɛ pu mi lohwe dikali a he ngɔ pue nyɛ nɔ, nɛ a maa gbe nyɛ bimɛ; a ma kpata nyɛ we mi lohwehi a hɛ mi, nɛ ma ha nyɛ nɔ ma gbɔ, nɛ nimli be hiɛe ngɛ blɔ ɔmɛ a nɔ hu.

Mose III, 26:33

Ma ha ta maa nyɛɛ nyɛ se, nɛ ma gbɛ nyɛ ngɔ fĩa je ma amɛ tsuo a mi. Nyɛ maa je zugba a nɔ, nɛ ma amɛ ma plɛ ma dokuhi.

Amos 1:14

Ma mɛ Raba gbogbo ɔmɛ, kɛ mɔ ɔmɛ a he la. A ma he ose hoo ta hwumi ligbi ɔ, nɛ ta a ma puɛ ní kaa lasiogblee.

Nahum 1:3

Yawɛ mi mi fu we mla, se kɛ̃ ɔ, e we abofu nya wa wawɛɛ nitsɛ; e ngmɛ́ blɔ nɛ nɔ tɔli yeɔ a he kɔkɔɔkɔ. Yawɛ jeɔ e he wami kpo ngɛ lasiogblee kɛ ahumi mi; nɛ bɔku ngɛ kaa e nane se bunyuku!

Habakuk 3:14

Benɛ he nyɛli ɔmɛ hia ta kɛ ma puu kaa ahumi, konɛ a ba gbɛ wɔ ngɔ fĩa, nɛ e pee mɛ kaa peepee ta wa he, nɛ balɔ ko be, lɔ ɔ a nine gbe wɔ ɔ, o tsɛ o kɛ̃ɛ̃ mi bi ɔmɛ kɛ ya na a tatsɛ nɔkɔtɔma a.

Zefania 3:6

Yawɛ ke, “I kpata je mahi a hɛ mi; i ku a mɔ nguangua amɛ ngɔ pue si. Ma amɛ pee ma dokuhi; gbɛjegbɛ ɔmɛ fɔɔ si gu, nɛ nɔ ko nɔ ko be a nɔ.

Zakaria 2:6

Yawɛ de e ma a ke, “I gbɛ nyɛ fĩa je kɔ nya eywiɛ ɔmɛ tsuo. Se jehanɛ lɛɛ nyɛ nihi nɛ a nuu kɛ ho ma se ya, esɔ nɛ nyɛɛ tu fo kɛ je Babilonia kɛ ba Yerusalem.

Zakaria 8:1

Yawɛ Tabohiatsɛ ɔ ha Zakaria sɛ gbi nɛ ɔ ke,

Zakaria 9:14

Yawɛ ma kple a nɔ; e ma tsɛ̃ e kɛ̃ɛ̃ mi bi ɔmɛ kaa oslabai nɛ ngɛ gbae. Nyɔmtsɛ Yawɛ ma ha titimati maa pɛ, nɛ e maa nyɛɛ ngɛ lasiogblee mi kɛ maa je leneyi je kɛ ba.

Mose V, 28:33

Nyɛ zugba a nɔ niba ní nɛ nyɛ gbo he dengme ɔ hu, je ma ko nɛ nyɛ li ma ba ye lɛ tsuo; nyɛ be nɔ́ kpakpa ko nae, se a maa wa nyɛ yi mi, nɛ a maa pee nyɛ posoo kaa zugba zu.

Mose V, 28:49

Yawɛ ma ha je ma ko nɛ nyɛ nui a gbi maa je zugba a nyagbe he ɔmɛ nɛ a kɛ nyɛ ba hwu. A ma ba tua nyɛ tlukaa kaa bɔ nɛ kɔle gblɔɔ nɔ́ ɔ.

Mose V, 28:64

“Yawɛ maa gbɛ nyɛ ngɔ fĩa je ma amɛ tsuo a mi, kɛ maa je je ɔ nyagbe he kake kɛ maa ya nyagbe he kake, nɛ lejɛ ɔ nyɛ ma sɔmɔ mawuhi nɛ a kɛ tso kɛ tɛ pee, mawuhi nɛ nyɛ, loo nyɛ nɛmɛ ja we hyɛ.

Mose V, 4:27

Yawɛ maa gbɛ nyɛ ngɔ fĩa je ma kpa amɛ a mi, nɛ nyɛ ti nihi bɔɔ pɛ nɛ a yi ma na wami.