Zakaria 2:13 - BAIBLO ALOO NGMAMI KLƆUKLƆU Ɔ

¹³ Nyɛ tsuo nyɛɛ pee dii ngɛ Yawɛ hɛ mi; ejakaa e je e hi he klɔuklɔu ɔ kɛ ma.

Zakaria 2:13 ပူးပေါင်းရင်းမြစ်များ

Habakuk 2:20

Yawɛ ngɛ e we klɔuklɔu ɔ; nɔ tsuaa nɔ nɛ ngɛ je ɔ mi ɔ, e pee dii ngɛ e hɛ mi.

Zefania 1:7

Ligbi ɔ nɛ Yawɛ maa gbla ma a tue ɔ su ta. Lɔ ɔ he ɔ, nyɛɛ pee dii ngɛ e hɛ mi. Yawɛ miɔ nɛ e maa gu Yuda he nyɛli ɔmɛ a nɔ nɛ e kɛ kpata Yuda ma a hɛ mi, kaa bɔ nɛ a gbeɔ lohwehi kɛ sãã bɔ ɔ.

La 68:5

Awusahi a tsɛ, kɛ yalɔyihi a he bulɔ ɔ, lɛ ji Mawu nɛ ngɛ e he klɔuklɔu ɔ nɛ.

Zefania 3:8

Yawɛ ke, “Lɔ ɔ he ɔ, nyɛɛ mlɛ keii kɛ yaa si ligbi ɔ nɛ ma te si nɛ ma po je ma amɛ a nya. I to ye yi mi kaa ma bua je ma amɛ, kɛ nɔ yemi he ɔmɛ a nya, nɛ ma je ye mi mi la nɛ nya wa a kpo kɛ tsɔɔ mɛ. Ejakaa ye mi mi la nɛ ɔ ma kpata je ɔ tsuo hɛ mi.

La 78:65

Kɛkɛ nɛ Nyɔmtsɛ ɔ te si pam kaa nɔ ko nɛ je mahe mi, aloo oblai nɛ nu dã, nɛ ngɛ huhui kpae.

Romabi 9:20

Se mo nɔmlɔ adesa, mɛnɔ ji mo nɛ o ma de Mawu ke nɔ́ nɛ e de ɔ dɛ? Anɛ buɛ ma de nɔ nɛ puɛ lɛ ɔ ke, “Mɛni he je o puɛ mi kaa kikɛ nɛ ɔ?”

Yesaya 51:9

Yawɛ, moo te si nɛ o piɛ wa he! Ngɔɔ o he wami ɔ kɛ he wa yi wami kaa bɔ nɛ o pee blema a. Pi mo nɛ o gbɔ Rahab, wo mi lo nguaa a nɔ́, nɛ o poo e mi kpokukpoku ɔ lo?

La 46:10

Mawu ke, “Nyɛɛ pee dii, nɛ nyɛ na nyɛɛ le kaa imi ji Mawu ɔ nɛ. Je ma amɛ tsuo a kpɛti ɔ, nɔ ko nɔ ko be nɛ kɛ mi sɔ. Je ɔ mi hu nɔ ko pi mi.”

La 11:4

Yawɛ ngɛ e we klɔuklɔu ɔ; e matsɛ sɛ ɔ, hiɔwe lɛ e ngɛ. E hɛngmɛ ngɛ nimli adesahi hyɛe ngɛ he tsuaa he; e le níhi nɛ a ngɛ pee.

Mose V, 26:15

Moo je o hi he klɔuklɔu ngɛ hiɔwe ɔ nɛ o hyɛ, nɛ o gbaa o ma Israel. Moo gbaa zugba nɛ hi, nɛ baa ní saminya, nɛ o ngɔ ha wɔ nɛ ɔ nɔ kaa bɔ nɛ o wo wa nɛmɛ ɔmɛ si ɔ.’

Romabi 3:19

Jehanɛ ɔ, wa le kaa níhi tsuo nɛ ngɛ mlaa a mi ɔ, nihi nɛ yeɔ mlaa a nɔ ɔ a he nɛ e kɔɔ. Lɛɛ nɔ ko nɔ ko be nya jemi; je ɔ tsuo yeɔ fɔ ngɛ Mawu hɛ mi.

Yeremia 25:30

“Lɔ ɔ he ɔ, Yeremia, nɔ́ tsuaa nɔ́ nɛ i de mo ɔ, gbaa kɛ tsɔɔ nimli nɛ ɔmɛ. De mɛ ke, ‘Yawɛ ma huã kɛ je hiɔwe lokoo. E ma wo gbi kɛ je e hi he klɔuklɔu ɔ. E maa huã, nɛ e ma he ose wawɛɛ kɛ wo e ma a kaa bɔ nɛ wai ngali kpaa huhui ɔ. Nihi tsuo nɛ ngɛ zugba a nɔ maa nu nɔ́ nɛ ɔ,

Yesaya 63:15

Yawɛ, moo hyɛ wɔ kɛ je hiɔwe ngɛ o hi he klɔuklɔu he nɛ hɛ mi nyami bɔle mo ngɛ ɔ. O hɛdɔ, kɛ o he wami kpetekpleenyɛ ɔ, jije e ngɛ? O tsui mi sami, kɛ suɔmi babauu ɔ hu a se po.

Yesaya 57:15

“Imi ji Mawu klɔuklɔu nɛ hii hiɔwe kɛ yaa neneene ɔ nɛ. I hii he klɔuklɔu ngɛ hiɔwe lokoo; se nɔ nɛ baa e he si ngɛ e mumi mi, nɛ e tsui mi tsɔ ɔ, i kɛ lɛ hiɔ si; i woɔ e mumi kã, konɛ e ngɔ e hɛ ngɔ fɔ ye nɔ, nɛ e na wami he.

Yesaya 57:5

Nyɛ nɛ nyɛ he mi akɔnɔ teɔ si, nɛ́ nyɛɛ kɛ bɔɔ ajuama ngɛ tso nguanguahi nɛ bɔ kusuu a sisi. Nyɛ ngɔɔ nyɛ bimɛ kɛ sãã bɔ ngɛ tɛ puɔhi a mi ngɛ kɔ̃ ɔmɛ a mi.

Kronika II, 30:27

Nyagbe ɔ, osɔfo ɔmɛ, kɛ Levi bi ɔmɛ te si nɛ a ba Yawɛ gbaami kɛ pue ma a nɔ. Mawu nu a kue fami ɔmɛ ngɛ e hi he ɔ ngɛ hiɔwe, nɛ e bu mɛ tue.

Yesaya 41:1

Mawu ke, “Nyɛ, wo nya mahi, nyɛɛ pee dii, nɛ nyɛɛ bu mi tue! Nyɛ dla nyɛ he saminya, konɛ waa hyɛ sane ɔ mi! Nyɛɛ hɛ nyɛ kɛ ba, konɛ nyɛ ba je nyɛ nya, nɛ waa hyɛ nɔ nɛ nɔ́ da.

Mose V, 18:21

“O ma bi o he ke, ‘Kɛ ma pee kɛ le kaa gbalɔ ko sɛ gbi ji Yawɛ ngɔ kɛɛ?’

Mose V, 18:22

Ke gbalɔ ko gba ngɛ Yawɛ biɛ mi, nɛ nɔ́ nɛ e de ɔ bɛ mi ɔ, sɛ gbi ɔ ji Yawɛ ngɔ. Jamɛ a gbalɔ ɔ nitsɛ e nya mi munyu ji lɔ ɔ nɛ; koo ye lɛ gbeye.

Yesaya 14:2

Je ma amɛ maa ngɔ Israel bi ɔmɛ kɛ ba zugba nɛ Yawɛ ha mɛ ɔ nɔ ekohu, nɛ a ma ba sɔmɔ mɛ kaa nyɔguɛhi. Nihi nɛ nuu Israel nyɔguɛ sa a, jehanɛ lɛɛ Israel hu maa ye a nɔ.

Yesaya 19:16

Be ma nɛ Egipt bi ɔmɛ maa pee a he fɔ̃li kaa yihi. Ke a na kaa Yawɛ Tabohiatsɛ ɔ miɔ nɛ e kɛ e he wami ɔ maa gbla a tue ɔ, a he ma bɔni domi blibliibli.

Zefania 2:9

Lɔ ɔ he ɔ, ligbi abɔ nɛ imi, Yawɛ Israel Mawu ɔ, ye hɛ ngɛ ɔ, i ngɛ kita kae ke ja a kpata Moab kɛ Amon ma amɛ a hɛ mi kaa bɔ nɛ a pee Sodom kɛ Gomora a. Moab kɛ Amon maa pee ma dokuhi; ma amɛ a mi maa hɛ kɛ hu, nɛ zugba a maa pee kaa nɔ́ nɛ a kɛ ngo pue lejɛ ɔ. Ye ma mi bi ɔmɛ nɛ a yi ma na wami ɔ maa ha a níhi, nɛ a maa ngɔ a zugba a.”

Zakaria 4:9

“Zerubabel nɛ fia Mawu we nɛ ɔ sisi tomi ɔ, lɛ nɔuu nɛ maa ma tsu ɔ kɛ gbe nya. Ke nɔ́ nɛ ɔ ba mi pɛ ye ma a maa le kaa imi Yawɛ Tabohiatsɛ ɔ nitsɛ nɛ i tsɔ mo a ngɔ.

Zakaria 6:15

Nihi nɛ ngɛ se lokoo maa ba nɛ a ba piɛ nyɛ he kɛ ma Yawɛ we ɔ. Kɛkɛ ɔ, nyɛ maa le kaa Yawɛ Tabohiatsɛ ɔ nitsɛ nɛ tsɔ mi nyɛ ngɔ. Ke nyɛ maa bu Yawɛ, nyɛ Mawu ɔ tue anɔkuale mi ɔ, lɛɛ ní nɛ ɔmɛ tsuo maa ba mi.