Zakaria 1:6 - BAIBLO ALOO NGMAMI KLƆUKLƆU Ɔ

⁶ Mlaahi nɛ i wo nyɛ nɛmɛ ɔmɛ, kɛ kɔkɔ nɛ i bɔ mɛ kɛ gu ye tsɔli nɛ ji gbali ɔmɛ a nɔ ɔ, tse a na mi nɔ́! Kɛkɛ nɛ jehanɛ a tsake a tsui, nɛ a de ke, Yawɛ Tabohiatsɛ ɔ gbla a tue bɔ nɛ sa mɛ ngɛ a ní peemi ɔmɛ a he kaa bɔ nɛ e to e yi mi ke e ma pee ɔ.”

Zakaria 1:6 ပူးပေါင်းရင်းမြစ်များ

Matsɛmɛ II, 15:12

Lɔ ɔ he ɔ, si nɛ Yawɛ wo Matsɛ Yehu ɔ ba mi. Yawɛ de lɛ ke, “O bimɛ maa ye matsɛ ngɛ Israel kɛ yaa si yi nɔ nɛ ji eywiɛ ɔ.”

Hiob 6:29

Lɔ ɔ he ɔ, i kpa nyɛ pɛɛ, nyɛ ko susu nɔ́ yayami ha mi kɛ ya tsitsaa. Nyɛ ko bu mi fɔ; i yeɔ nguɔ.

Yesaya 21:17

Kedar kɛ̃ɛ̃ tsɛ̃li ji kã peeli pe kulaa nɛ a le, se a ti nihi bɔɔ pɛ nɛ maa piɛ. Imi Yawɛ, Israel Mawu ɔ lɛ i de.”

Yesaya 44:26

Ke i tsɔ ye tsɔlɔ ke e ya je ye yi mi tomi kpo kɛ tsɔɔ ɔ, munyu nɛ e tuɔ ɔ, i maa nɔ mi, nɛ gbami ɔmɛ tsuo baa mi pɛpɛɛpɛ. I ngɛ Yerusalem dee ke, nihi ma ba hi ma a mi ekohu; a maa ma Yuda ma amɛ ekohu, nɛ nimli ma ba hi a mi. A maa to jamɛ a ma amɛ si ekohu ngɛ ma doku ɔmɛ a nane mi.

Yesaya 55:1

Yawɛ ke, “Kuuwi, nyɛ nihi tsuo nɛ kuma ngɛ nyɛ yee, nyu babaaba ngɛ hiɛ ɔ ha nyɛ! Nyɛ nihi nɛ nyɛ be sika hu, nyɛɛ ba; nyɛ ba he niye ní nɛ nyɛɛ ye! Nyɛɛ ba nyɛ ba he dã, kɛ na nyɔ nyu e hia we sika; a jua we!

Yesaya 55:11

Munyuhi nɛ i tuɔ ɔ, ja a maa pee. Munyu tsuaa munyu nɛ jeɔ ye nya a, nɔ́ nɛ i ke e pee ɔ, ja e pee loko e maa kpale kɛ ba. Nɔ́ tsuaa nɔ́ nɛ i to ke e ba mi ɔ maa ba mi kokooko.

Yeremia 23:20

Yawɛ mi mi fumi nɛ nya wa wawɛɛ nɛ ɔ se be poe kɛ yaa si e maa pee nɔ́ tsuaa nɔ́ nɛ e to ke e maa pee ɔ kɛ gbe nya. Be komɛ a se loko e ma a maa nu nɔ́ nɛ ɔ sisi saminya.”

Yeremia 26:15

Se nyɛ na nɛ nyɛɛ le ɔ kaa ke nyɛ gbe mi ɔ, nyɛ pue nɔ nɛ pee we nɔ́ ko ɔ muɔ si, nɛ musu maa tloo nyɛɛ kɛ ma nɛ ɔ, kɛ ma mi bi ɔmɛ tsuo. Ejakaa Yawɛ nitsɛ lɛ tsɔ mi nyɛ ngɔ ke ma ba tu munyu nɛ ɔmɛ tsuo kɛ tsɔɔ nyɛ.”

Yeremia 28:17

Nɛ gbalɔ Hanania gbo jamɛ a jeha a mi nɔuu, ngɛ nyɔhiɔ nɛ ji kpaago ɔ mi.

Yeremia 32:24

“Babilonia bi ɔmɛ fia kpoku kɛ wo ma a he konɛ a ngɔ ma a; amlɔ nɛ ɔ, a tua ma a. Ta, hwɔ, kɛ gbenɔ hiɔ ma ha nɛ a maa ngɔ ma a. O maa na kaa níhi nɛ o de ɔ tsuo ba mi.

Yeremia 36:28

ma kɛ̃ womi kpo kpa, konɛ níhi tsuo nɛ i ngma kɛ wo kekle womi kpo ɔ mi ɔ, ma ngma kɛ wo enɛ ɔ hu mi.

Yeremia 39:16

ke ma ya de Ebedmelek, Etiopia no ɔ ke bɔ nɛ lɛ Yawɛ Tabohiatsɛ, Israel Mawu ɔ, de ji nɛ ɔ nɛ: “Kaa bɔ nɛ i de to ɔ, ma ha nɛ haomi maa ba ma nɛ ɔ nɔ, se pi nɔ́ kpakpa. Nɛ ke nɔ́ nɛ ɔ ba a, o maa na paa kɛ o hɛngmɛ.

Yeremia 4:4

Somi nɛ nyɛɛ kɛ imi Yawɛ, nyɛ so ɔ, nyɛɛ ye nɔ, nɛ nyɛɛ ngɔ nyɛ he kɛ ha mi, nyɛ Yuda ma, kɛ Yerusalem bi. Ke nyɛ pee we ja a, ye mi mi ma fu nyɛ ngɛ nyɛ ní yayami ɔmɛ a he. Nɛ ke ye mi mi fu ɔ, nɔ ko be nyɛe maa jɔɔ he.”

Yeremia 44:2

Yawɛ Tabohiatsɛ, Israel Mawu ɔ ke, “Nyɛ nitsɛmɛ nyɛ na bɔ nɛ i kpata Yerusalem, kɛ Yuda ma kpa amɛ a hɛ mi. Amlɔ nɛ ɔ, ma amɛ pee ma dokuhi nɛ nɔ ko nɔ ko be a mi,

Yeremia 44:28

Se nyɛ ti nihi bɔɔ ko kɛ̃ a he maa je mi, nɛ a maa kpale kɛ je Egipt zugba a nɔ kɛ ya Yuda zugba a nɔ. Jamɛ a be ɔ loko nihi nɛ a yi na wami ɔ maa le kaa imi lɛ ye munyu ba mi, aloo mɛ.

Yeremia 44:29

Imi Yawɛ, ma to nyɛ okadi kaa ma gbla nyɛ tue ngɛ hiɛmɛ nɛ ɔ; nɛ lɔ ɔ nyɛɛ kɛ maa na kaa si ko nɛ i wo kaa ma kpata nyɛ hɛ mi ɔ maa ba mi niinɛ.

Yeremia 44:6

Enɛ ɔ he je ɔ, ye mi mi la nɛ nya wa a puɛ ní ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ kaa bɔ nɛ la sãã nɔ́ ɔ. Nɛ ma amɛ a hɛ mi kpata, nɛ a pee ma dokuhi kaa bɔ nɛ a ngɛ mwɔnɛ ɔ.

Kɔmɔ Yemi 1:18

“Yawɛ nɔ́ da. Ejakaa imi lɛ i tsɔ atuã, nɛ i bui e munyu ɔ; se kɛ̃ ɔ, nyɛ nihi tsuo nyɛɛ bu mi tue, konɛ amanehlu nɛ ba ye nɔ nɛ ɔ, nyɛɛ na. A nuu ye nihewi ɔmɛ, kɛ yihewi ɔmɛ nyɔguɛ kɛ ho.

Kɔmɔ Yemi 2:17

Nɔ́ ko nɛ Yawɛ de ke e maa pee ɔ, amlɔ nɛ ɔ, e pee. Yawɛ kpata wa hɛ mi pɛsɛpɛsɛ kaa bɔ nɛ e de to be ko ke e maa pee ɔ. E ha nɛ wa he nyɛli ɔmɛ ye wa nɔ, nɛ a bua jɔ a he kaa wa hɛ mi kpata.

Kɔmɔ Yemi 3:42

“Wa tɔ̃; wa tsɔ atuã, lɔ ɔ he nɛ mo Yawɛ, o kɛ wa yayami ɔmɛ pɛ wɔ ɔ nɛ.

Ezekiel 20:43

Kɛkɛ ɔ, ngɛ lejɛ ɔ, nyɛ ma kai nyɛ blɔ yaya amɛ, kɛ nyɛ ní peemi ní ɔmɛ tsuo nɛ nyɛ kɛ ble nyɛ he ɔ. Nyɛ nitsɛmɛ nyɛ he maa nyɛɛ nyɛ ngɛ nyɛ ní hiemi ní ɔmɛ tsuo nɛ nyɛ pee ɔ a he.

Ezekiel 37:11

Nyɔmtsɛ Yawɛ de mi ke, “Nɔmlɔ adesa, Israel ma a tsuo ngɛ kaa wu nɛ ɔmɛ. A ngɛ dee ke a gbli kadokado, nɛ a be hɛ nɔ kami ko kulaa; a kpata a hɛ mi pɛsɛpɛsɛ.

Daniel 4:28

Ní nɛ ɔmɛ tsuo ba Matsɛ Nebukadnezar nɔ.

Hosea 5:9

Tue gblami be ɔ su ta, nɛ a ma kpata Israel hɛ mi pɛsɛpɛsɛ. Ee, Israel ma, nɔ́ nɛ maa ba nyɛ nɔ ji nɛ ɔ nɛ.

Hosea 9:15

Yawɛ ke, “Israel ma a je a yayami peemi ɔ tsuo sisi ngɛ Gilgal, nɛ lejɛ ɔ a he bɔni mi tai peemi kɛ je. Yi wu tso níhi nɛ a pee ɔ a he ɔ, ma fie mɛ kɛ je zugba a nɔ. I be mɛ suɔe hu; Israel ma nimeli ɔmɛ tsuo tsɔ ye hɛ mi atuã.

Amos 9:10

Se ye ma mi bi ɔmɛ a kpɛti yayami peeli nɛ deɔ ke, ‘Mawu be hae nɛ nɔ́ yayami ko maa ba wa nɔ’ ɔ, mɛɛ lɛɛ a ma gbo ngɛ ta nga nɔ.”

Zakaria 1:7

Matsɛ Darius tsɛ yemi be ɔ jeha enyɔne ɔ, nyɔhiɔ nyɔngma kɛ kakene nɛ a tsɛɛ Shebat ɔ we ligbi nyingmi enyɔ kɛ eywiɛne ɔ, Yawɛ ha imi Zakaria, Berekia bi ɔ sɛ gbi kɛ gu nina ko mi.

Malaki 3:18

Jamɛ a be ɔ mi ɔ, ye ma a maa na slɔɔto nɛ ngɛ dalɔ kɛ yayami peelɔ a kpɛti; nyɛ maa na slɔɔto nɛ ngɛ nɔmlɔ nɛ sɔmɔɔ mi, kɛ nɔ nɛ sɔmɔ we mi ɔ a kpɛti.” Yawɛ Tabohiatsɛ ɔ lɛ de.

Mose IV, 23:19

Mawu ɔ, pi nɔmlɔ ji lɛ nɛ e ngɔɔ nya, pi nɔmlɔ ji lɛ nɛ e tsakeɔ e yi mi tomi. Anɛ ke e de nɔ́ ko ɔ, e pee we lo? Aloo e woɔ si nɛ e yi nɔ lo?

Mose IV, 32:23

Se ke nyɛ yi nyɛ si womi ɔ nɔ ɔ, lɛɛ nyɛ na nɛ nyɛɛ le kaa nyɛ pee yayami kɛ si Yawɛ; nɛ bɔ tsuaa bɔ nɛ pee ɔ, nyɛ ma na nyɛ yayami ɔ he tue gblami.

Mose IV, 33:56

Ke e ba mi ja a, lɛɛ bɔ nɛ i to ke ma pee mɛ ɔ, ma pee nyɛ hu ja nɔuu.”

Mateo 24:35

Hiɔwe kɛ zugba maa be kɛ ho, se ye munyu ɔmɛ lɛɛ a be bee kɛ ho gblegbleegble.

Mose V, 28:15

“Se ke nyɛ bui Yawɛ, nyɛ Mawu ɔ gbi tue, nɛ nyɛ yi e fami ɔmɛ, kɛ e mlaa amɛ tsuo nɛ i ngɛ nyɛ woe mwɔnɛ ɔ a nɔ pɛpɛɛpɛ ɔ, gbiɛmi nɛ ɔmɛ tsuo maa ba nyɛ nɔ.

Mose V, 28:2

Nyɛɛ bu Yawɛ, nyɛ Mawu ɔ gbi tue, konɛ gbaami nɛ ɔmɛ nɛ a pee nyɛ nɔ́.

Mose V, 28:20

“Ke nyɛ kua Yawɛ, nɛ nyɛ ya pee yayami ɔ, lɔ ɔ lɛɛ e kɛ gbiɛmi nɛ ɔmɛ maa ba nyɛ nɔ: nyɛ ma didaa; nyɛ maa pee basaa, nɛ nyɛ maa bɔ ahlua ngɛ nɔ́ tsuaa nɔ́ nɛ nyɛ ma tsu mi. E ma tsa nɔ ja kɛ yaa si nyɛ hɛ mi ma kpata tlukaa.

Mose V, 28:45

“Haomi nɛ ɔmɛ tsuo maa ba nyɛ nɔ, nɛ e ma tsa nɔ jã kɛ̃ kɛ yaa su be nɛ nyɛ hɛ mi ma kpata pɛsɛpɛsɛ; ejakaa nyɛ bui Yawɛ, nyɛ Mawu ɔ gbi tue, nɛ nyɛ yi e mlaa amɛ tsuo nɛ i wo nyɛ ɔ a nɔ.

1 Tesalonikabi 5:4

Se nyɛmimɛ, nyɛɛ lɛɛ pi diblii mi nɛ nyɛ ngɛ nɛ ligbi ɔ ma ba ti nyɛ si kaa julɔ.