Yoshua 11:2 - BAIBLO ALOO NGMAMI KLƆUKLƆU Ɔ

² kɛ matsɛmɛ ɔmɛ nɛ ngɛ yo ɔmɛ a nɔ ngɛ omleyi je, kɛ Yordan kɔ̃ ɔ mi ngɛ Galilea wo ɔ leneyi je, kɛ nga kpataa a nɔ, kɛ ni nɛmɛ nɛ ngɛ wo ɔ nya ngɛ Dor kasa nya a.

Yoshua 11:2 ပူးပေါင်းရင်းမြစ်များ

Matsɛmɛ I, 15:20

Benhadad kplɛɛ Asa munyu ɔ nɔ, nɛ e tsɔ e tatsɛmɛ ɔmɛ nɛ a ya tua Israel ma amɛ. A ngɔ Iyon, Dan, Abel Bet Maaka, Kinerot, kɛ Naftali zugba amɛ tsuo.

Matsɛmɛ I, 4:11

Benabinadab nɛ ngɔ Salomo biyo nɛ a tsɛɛ Tafat ɔ, e nɔ́ mi ji Dor tsuo.

Mose IV, 34:11

Kɛ je Shefam ɔ, huzu ɔ ma kple si kɛ ya Ribla, ngɛ Ain beleku je, nɛ e maa nyɛɛ ja hluu kɛ ya pi Kineret wo ɔ nya, ngɛ beleku je.

Luka 1:39

E kɛ we nɛ Maria dla e he, nɛ e pue nɔ esɔ kɛ ho ma ko mi ya ngɛ Yudea yo nɔ zugba a mi.

Luka 5:1

Ligbi ko ɔ, benɛ Yesu daa si ngɛ Genesaret taku ɔ nya a, nihi fuu ba pue e nɔ nɛ a bu Mawu munyu ɔ tue.

Yoshua 10:40

Yoshua ye zugba a tsuo nɔ: yo nɔ zugba a, leneyi je zugba a, nga nɔ zugba a, kɛ kɔ̃ mi zugba a, kɛ a matsɛmɛ ɔmɛ tsuo pɛpɛɛpɛ. E kpata nɔ tsuaa nɔ hɛ mi, nɛ nɔ kake po píɛ. Bɔ nɛ Yawɛ, Israel Mawu ɔ fa ke a pee ji nɛ ɔ nɛ.

Yoshua 10:6

Gibeon bi ɔmɛ tsɔ kɛ ba Yoshua ngɔ ngɛ ma sito he ɔ ngɛ Gilgal, ba de lɛ ke, “Wa kpa mo pɛɛ, koo ngmɛɛ wa he; ba esɔesɔ nɛ o ba piɛ wa he. Ba kpɔ wɔ! Amor bi ɔmɛ a matsɛmɛ ɔmɛ bua a ta amɛ a nya kɛ je yo ɔmɛ a nɔ ba tua wɔ!”

Yoshua 11:16

Yoshua ngɔ zugba a tsuo: yo nɔ kɛ kɔ̃ mi zugba a ngɛ leneyi je kɛ omleyi je tsuo, Goshen zugba a, Yordan kɔ̃ ɔ, kɛ Israel yo ɔmɛ kɛ a he nga kplanaa a.

Yoshua 11:21

Jamɛ a be ɔ mi ɔ, Yoshua ya kpata oblaihi a nina komɛ a hɛ mi. A tsɛɛ mɛ ke Anak bi. Nimli nɛ ɔmɛ hii Hebron, Debir, Anab, Yuda, kɛ Israel yo ɔmɛ tsuo a nɔ. Yoshua kpata ni ɔmɛ kɛ a ma amɛ tsuo a hɛ mi pɛsɛpɛsɛ.

Yoshua 12:23

Dor ngɛ wo ɔ nya, Goyim ngɛ Galilea,

Yoshua 12:3

E nɔ yemi he ɔmɛ ekomɛ hu ji nɛ ɔmɛ nɛ: Yordan kɔ̃ ɔ, kɛ je Galilea wo ɔ nya ngɛ omleyi je kɛ ya su Bet Yeshimot ngɛ Ngo wo ɔ beleku je hluu kɛ ya su Pisga yo ɔ sisi.

Yoshua 13:27

Ngɛ Yordan kɔ̃ ɔ mi ɔ, mahi nɛ ngɛ lejɛ ɔ ji Bet Haram, Betnimra, Sukot, Safon, kɛ Heshbon nɛ ji Matsɛ Sihon nɔ yemi he nɛ piɛ ɔ. Bonyoku je huzu ɔ je Yordan pa a nya kɛ ya su Galilea wo ɔ nya tɔɔ ngɛ omleyi je.

Yoshua 17:11

A ha Manase ma nɛ ɔmɛ hulɔ kaa a weto ní ngɛ Isakar bi ɔmɛ kɛ Asher bi ɔmɛ a zugba a mi. Mɛ ji Bet Shan, Ibleam, Dor, Endor, Taanak, Megido, kɛ kɔpehi nɛ bɔle mɛ ɔ.

Manyadali 1:27

Manase bi ɔmɛ fie we nihi nɛ ngɛ Bet Shan, Taanak, Dor, Ibleam, kɛ Megido ma amɛ, kɛ kɔpehi nɛ ngɛ a kasa nya a a mi ɔ. Kanaan bi nɛ ɔmɛ fi si nɛ a tlɔ zugba a nɔ.