Yohane 8:41 - BAIBLO ALOO NGMAMI KLƆUKLƆU Ɔ

⁴¹ Níhi nɛ nyɛ tsɛ peeɔ ɔ, lɔ ɔmɛ ngɛ peeɔ ɔ nɛ.” A he nɔ ke, “Wɔɔ lɛɛ pi ajuama mi bimɛ ji wɔ. Wa ngɛ tsɛ kake. Wa tsɛ ji Mawu.”

Somi He Ɔ

⁴¹ Nyɛɛ lɛɛ, nyɛ tsɛ ni tsumihi nyɛ tsuɔ.” Kɛkɛ nɛ a de lɛ ke: “Wɔɔ lɛɛ, a fɔ we wɔ ngɛ ajuama bɔmi mi; tsɛ kake wa ngɛ, lɛ ji Mawu.”

Yohane 8:41 ပူးပေါင်းရင်းမြစ်များ

Yesaya 64:8

Se kɛ ɔ, Yawɛ, mo ji wa tsɛ. Wa ngɛ kaa zu, nɛ moo lɛɛ o ngɛ kaa buɛ puɛlɔ; mo lɛ o bɔ wɔ.

Yohane 8:44

Nyɛ tsɛ nɛ fɔ nyɛ ji Abosiami; nɛ nyɛ suɔ kaa nyɛ maa pee e suɔmi nya ní. Kɛ je sisije ɔ, nɔ gbelɔ ji lɛ, nɛ e kɛ anɔkuale yi gblegbleegble, ejakaa anɔkuale be e mi. Ke e ye lakpa a, e tsɔɔ bɔ nɛ e su ngɛ, ejakaa lakpatsɛ kpanaku ji lɛ.

Yohane 8:38

Imi lɛɛ níhi nɛ Tsaatsɛ tsɔɔ mi ɔ, lɔ ɔmɛ i deɔ; se nyɛɛ lɛɛ níhi nɛ nyɛ tsɛ ɔ de nyɛ ɔ, lɔ ɔmɛ nyɛ peeɔ.”

Yesaya 63:16

Mo ji wa tsɛ. Wa nɛmɛ Abraham, kɛ Yakob li wɔ, se mo Yawɛ, wa tsɛ, mo ji wa kpɔlɔ kɛ je blema lokoo.

Malaki 2:11

Si nɛ Yuda bi ɔmɛ wo Mawu ɔ, a yi nɔ; mohu ɔ, a tsu musu ní ngɛ Yerusalem, kɛ zugba a tsuo nɔ. A ble Yawɛ we ɔ nɛ e suɔ saminya a. Nyumu ɔmɛ ngɔ yihi nɛ jaa ma se mawuhi.

Malaki 1:6

Bɔ nɛ Yawɛ Tabohiatsɛ ɔ ngɛ osɔfo ɔmɛ dee ji nɛ ɔ nɛ: “Bi buu e tsɛ, nɛ tsɔlɔ hu buu e nyɔmtsɛ. Ke tsɛ ji mi ɔ, mɛni he je nyɛ bui mi mɔ? Nɛ ke nyɔmtsɛ ji mi ɔ, mɛni he je nyɛ yi mi gbeye? Nyɛ gbeɔ ye he guɛ, se kɛ̃ ɔ, nyɛ biɔ ke, ‘Kɛ wa plɛ kɛ gbe o he guɛ kɛɛ?’

Yeremia 31:20

“Israel, mo ji ye bi nɛ i suɔ saminya; mo ji bi nɛ i suɔ pe bimɛ ɔmɛ tsuo. Be tsuaa be nɛ ma de nɔ́ ko kɛ si mo ɔ, ja i kɛ suɔmi kai mo kɛ̃. Ye hɛ jaa ngɛ o he, lɔ ɔ he ɔ, ma na mo mɔbɔ kɛ̃.

Yeremia 3:19

Yawɛ ke, “Israel, jinɛ i susu kaa e maa pee fɛu ke i ngɔ mo ba piɛ ye bimɛ ɔmɛ a he ngɛ hiɛ ɔ. I to nɛ ma ha mo zugba saminyayoo ko, zugba nɛ ngɛ fɛu pe kulaa ngɛ je ɔ mi. I hyɛ blɔ kaa o ma tsɛ mi ke ‘Tsaatsɛ’, nɛ i susu kaa o pa be ye hɛ mi atuã tsɔe hu.

Mose V, 32:6

Bɔ nɛ sa kaa nyɛ peeɔ Yawɛ ji nɛ ɔ lo, ma kuasia nɛ be juɛmi? Lɛ ji nyɛ tsɛ kɛ nyɛ bɔlɔ; lɛ nɛ e ha nyɛ pee e ma.

Mose V, 14:1

“Yawɛ, nyɛ Mawu ɔ ma ji nyɛ. Lɔ ɔ he ɔ, ke nɔ ko gbo nɛ nyɛ ngɛ ya nyɛe ɔ, nyɛ ko poo nyɛ he ha, nɛ nyɛ ko je nyɛ hɛ nya kaa bɔ nɛ je ma kpa amɛ peeɔ ɔ.

Mose II, 4:22

Bɔ nɛ o ma de Farao ɔ ji, Yawɛ ke, ‘Israel ɔ, ye binyumu ji lɛ; ee ye bitɛte ji lɛ!

Hosea 1:2

Kekleekle nɛ Yawɛ kɛ Israel tu munyu kɛ gu Hosea nɔ ɔ, e de Hosea ke, “Yaa nɛ o ya ngɔ yo; yo ɔ maa pee e he yakayaka nɔmlɔ, nɛ e bimɛ maa hi kaa lɛ pɛ. Ja pɛpɛɛpɛ ye ma a pee ɔ nɛ; ye ma a kua mi; a yi mi anɔkuale.”

1 Yohane 3:12

Wa ko pee kaa bɔ nɛ Kain pee ɔ; ejakaa Abosiami mumi ngɛ e mi, nɛ e gbe lɛ nitsɛ e nyɛmi Habel. Mɛni he je Kain gbe e nyɛmi ɔ? Ejakaa níhi nɛ e tsu ɔ, ní ɔmɛ dɛ, se e nyɛmi ɔ lɛɛ níhi nɛ e tsu ɔ da.