Yesaya 66:14 - BAIBLO ALOO NGMAMI KLƆUKLƆU Ɔ

¹⁴ Ke enɛ ɔ ba mi ɔ, nyɛ ma na bua jɔmi. Nyɛ ma na he wami he. Lɔ ɔ loko nyɛ maa le kaa imi Yawɛ ɔ, nihi nɛ buɔ mi tue ɔ, i piɛɔ a he, nɛ i kɛ abofu gblaa ye he nyɛli a tue.”

Yesaya 66:14 ပူးပေါင်းရင်းမြစ်များ

Ezra 8:18

Mawu dloomi nya a, a ha wɔ Sherebia, nyumu ko nɛ hɛ mi ka si. E je Mahli we puɔ nya. E tsɛ ji Levi, nɛ e nɛ̃ biɛ ji Israel. E kɛ e binyumuhi, kɛ e nyɛminyumuhi nɛ piɛ e he kɛ ba a, a yibɔ ji nyɔngma kɛ kpaanyɔ.

Ezra 8:22

Kaa pe i ya bi matsɛ ɔ ke e ha wɔ ta buli nɛ hi okpɔngɔhi a nɔ nɛ a bu wa he kɛ je he nyɛli a dɛ mi ngɛ blɔ ɔ nɔ ɔ, jinɛ e ko pee mi zo; ejakaa i ha nɛ e nu sisi momo kaa nɔ tsuaa nɔ nɛ ngɔɔ e hɛ ngɔ fɔɔ wa Mawu ɔ nɔ ɔ, e gbaa lɛ; se nɔ tsuaa nɔ nɛ kuaa lɛ wa Mawu ɔ, lɛ hu e bua jɔɛ jamɛatsɛ he; e gblaa nɔ ɔ tue wawɛɛ mohu.

Ezra 8:31

Kekleekle nyɔhiɔ ɔ we ligbi nyɔngma kɛ enyɔ ɔ, wa je Ahava pa a nya, nɛ wa pue nɔ kɛ yaa Yerusalem. Wa Mawu ɔ piɛ wa he, nɛ he nyɛli, kɛ nihi nɛ wo wɔ ká tsuo nyɛ we nɛ a pee wɔ nɔ́ ko.

La 107:42

Nihi nɛ peeɔ nɔ nɛ da a naa nɔ́ nɛ ɔ, nɛ a bua jɔɔ he; se yayami peeli lɛɛ a maa a nya.

Abɛ Womi 17:22

Ke nɔ ko bua jɔ e he be tsuaa be ɔ, e ngɛ kaa tsopa nɛ haa nɔ he wami. Se daa nɛ ke nɔ pee vii ɔ, e ngɛ lɛ nitsɛ e he gbee.

Abɛ Womi 3:8

Ke o pee ja a, e ngɛ kaa tsopa kpakpa nɛ ma tsa mo, nɛ ma ha o he mi maa jɔ mo.

Yesaya 10:5

Bɔ nɛ Yawɛ de ji nɛ ɔ nɛ: “Asiria, o ngɛ kaa to tsɔmi tso ko nɛ i kɛ gblaa nihi nɛ woɔ ye mi mi la a a tue.

Yesaya 13:5

A je tsitsaa je mi nyagbe he ɔmɛ tsuo kɛ ma. Yawɛ kɛ e mi mi fumi ɔ ma kpata zugba a tsuo hɛ mi.

Yesaya 26:19

Wa ma mi nihi nɛ gbo ɔ ma na wami ekohu! A gbogboe ɔmɛ maa te si. Nihi nɛ hwɔɔ si ngɛ zu mi ɔ, mɛ tsuo a maa te si, nɛ a ma la kɛ bua jɔmi. Kaa bɔ nɛ bɔ́ nyu ngleinglei haa zugba a peeɔ ehe ekohu ɔ, ja Yawɛ maa ngɔ wami he ngɔ wo nihi nɛ gbo momo ɔ a mi.

Yesaya 26:20

Ye ma, nyɛ ya sɛ nyɛ we ɔmɛ a mi, nɛ nyɛɛ ngmɛ sinya amɛ a mi ngɔ wo nyɛ yi. Nyɛɛ laa nyɛ he be kpiti ko kɛ yaa si Mawu mi mi fumi ɔ nya maa be.

Yesaya 30:27

Yawɛ biɛ ngɛ pɛe ngɛ tsitsaa kɛ ma. E mi mi fu wawɛɛ nitsɛ kaa la su ku kpii nɛ ngɛ si tee. Munyuhi nɛ ngɛ e nya mi jee ɔ, abofu sɔuu kaa la nɛ puɛɔ ní.

Yesaya 33:20

Hyɛ, Zion, ma nɛ wa yeɔ wa nyami ligbi ɔmɛ ngɛ mi ɔ ji nɛ ɔ nɛ! Yerusalem, ma nɛ tue mi jɔmi ngɛ mi ɔ ji nɛ ɔ nɛ! Yerusalem ngɛ kaa bo tsu nɛ maa si nɛ be si nɔe gblegbleegble. Tso plɛɛkohi nɛ a ka kɛ wo zu mi ɔ ekoeko be hiae; tangme kpa amɛ hu be tsɔe.

Yesaya 34:2

Yawɛ mi mi fu je ma amɛ tsuo, nɛ e hɛ dɔ kɛ wo ta buli ɔmɛ tsuo. E gbiɛ mɛ, nɛ e ngɔ mɛ ngɔ ha ke a gbe mɛ.

Yesaya 35:2

Niinɛ mɔmɔ babauu maa puɛ ngɛ nɔ, nɛ e kɛ bua jɔmi ma he ose ngɛ mɔmɔ ɔmɛ a he; e maa pee fɛu kaa Lebanon yo ɔmɛ a nɔ; e maa ba ní kaa Karmel kɛ Sharon zugba a. Nɔ tsuaa nɔ maa na Yawɛ hɛ mi nyami, kɛ wa Mawu ɔ we agboje, kɛ e he wami ɔ.

Yesaya 41:20

Mahi tsuo maa na nyakpɛ nɔ́ nɛ ɔ, nɛ a maa le kaa imi Yawɛ, Israel Nɔ Klɔuklɔu ɔ nɛ i tsu nɔ́ nɛ ɔ nɛ.”

Yesaya 42:13

Yawɛ hia kpo kaa ta bulɔ; e hia kpo kaa ta bulɔ nɛ hɛ dɔ. E ngɛ ngmlaa kpae. E ngɛ ose hee kɛ ngɛ e he nyɛli ɔmɛ woe kaa e kɛ mɛ maa to ní.

Yesaya 58:11

Imi Yawɛ nitsɛ, ma tsɔɔ nyɛ blɔ daa, nɛ ma ha nyɛ maa ye ní kpakpahi nɛ nyɛ maa tɔ daa. Ma ha nyɛ ma na nɔmlɔ tso he wami saminya. Nyɛ maa pee kaa abɔɔ kɛ e mi nyu babauu, loo kaa pa ko nɛ nyu tɛ mi gblegbleegble.

Yesaya 59:18

E maa gbla a tue kaa bɔ nɛ a pee ɔ pɛpɛɛpɛ kɛ to nane mi; nɛ ni nɛmɛ nɛ ngɛ ma se tsitsaa po be a he yee.

Yesaya 66:5

Nyɛ ni nɛmɛ nɛ nyɛ yeɔ Yawɛ gbeye, nɛ nyɛ buɔ lɛ, nyɛ ta tue, “Akɛnɛ nyɛ yeɔ mi anɔkuale ɔ, nyɛ ma mi bi ɔmɛ ekomɛ nyɛɔ nyɛ, nɛ a kɛ nyɛ pee we nɔ́ ko nɔ́ ko, se nyɛ he fɛu mohu a yeɔ. A deɔ ke, ‘Yawɛ nɛ je e he wami kpo nɛ e he nyɛ yi wami, konɛ waa na bɔ nɛ nyɛ ma nya ha.’ Se mɛ nitsɛmɛ a hɛ mi si mohu a ma pue!

Zakaria 10:7

Israel bi a he maa wa kaa ta buli, a bua maa jɔ kaa nihi nɛ ngɛ wai nue. A nina maa na nɔ́ nɛ ɔ, nɛ a ma nya nɔ́ nɛ imi Yawɛ, i pee ha mɛ ɔ he.

Malaki 3:18

Jamɛ a be ɔ mi ɔ, ye ma a maa na slɔɔto nɛ ngɛ dalɔ kɛ yayami peelɔ a kpɛti; nyɛ maa na slɔɔto nɛ ngɛ nɔmlɔ nɛ sɔmɔɔ mi, kɛ nɔ nɛ sɔmɔ we mi ɔ a kpɛti.” Yawɛ Tabohiatsɛ ɔ lɛ de.

Yohane 16:22

Jã nɔuu, nyɛ hu amlɔ nɛ ɔ, nyɛ ngɛ kɔmɔ yee, se ma na nyɛ ekohu. Nyɛ tsui maa nɔ nyɛ mi, nɛ nyɛ bua jɔmi ɔ, nɔ ko be hee ngɛ nyɛ dɛ.

Hebribi 10:27

Mohu ɔ, waa kɛ gbeye yemi nɛ hyɛ kojomi nɛ ma a, kɛ la gegeege nɛ ma kpata nihi nɛ teɔ si kɛ siɔ Mawu a hɛ mi ɔ blɔ.