Yesaya 61:7 - BAIBLO ALOO NGMAMI KLƆUKLƆU Ɔ

⁷ Zo nɛ gbe nyɛ, kɛ nyɛ hɛ mi nɛ pue si ɔ, lɛ tsuo nya maa be. Nyɛ maa hi nyɛ nitsɛmɛ nyɛ zugba nɔ jehanɛ; nyɛ ma na ní babauu nitsɛ pe sa a, nɛ nyɛ bua maa jɔ kɛ maa ya neneene.

Yesaya 61:7 ပူးပေါင်းရင်းမြစ်များ

Hiob 42:10

Jehanɛ, benɛ Hiob fa kue ha Yawɛ ngɛ e huɛmɛ etɛ ɔmɛ a he se ɔ, Yawɛ wo lɛ ní ekohu. Níhi tsuo nɛ Hiob hi sa a, Yawɛ bɔ he totoe enyɔɔnyɔ kɛ ha lɛ.

Zakaria 9:12

Nyɛ nihi nɛ a nuu nyɛ nyɔguɛ, jehanɛ lɛɛ nyɛ ngɛ hɛ kɛ nɔ fɔmi. Nyɛɛ kpale kɛ ba nyɛ mɔ ɔ mi. I ngɛ dee jehanɛ ke yayami tsuo nɛ a pee nyɛ ɔ, nyɛ ma na gbaami kɛ bɔ he totoe enyɔ.

Yesaya 40:2

Nyɛɛ wo Yerusalem ma a bua. Nyɛ de nɛ a nu kaa jehanɛ lɛɛ a nɔ́ nami babauu ɔ se po, nɛ a ngɔ a he yayami ɔmɛ ngɔ pa mɛ. I gbla a tue saminya ngɛ a tɔmi ɔmɛ tsuo a he.”

La 16:11

O maa tsɔɔ mi blɔ ɔ nɛ yaa wami mi ɔ. Lejɛ ɔ, ngɛ o hɛ mi ɔ, ma na bua jɔmi nitsɛnitsɛ, bua jɔmi nɛ se be poe kɛ maa ya neneene.

Matsɛmɛ II, 2:9

Benɛ a po pa a, Eliya bi Elisha ke, “Mɛni o suɔ nɛ ma pee ha mo loko a ba ngɔ mi kɛ je o he?” Elisha he nɔ ke, “I kpa mo pɛɛ, ha mi o mumi he wami ɔ totoe enyɔ.”

Yesaya 51:11

Nihi nɛ mo Yawɛ, o kpɔ mɛ ɔ, a kɛ bua jɔmi ma la kɛ ba Yerusalem. A bua maa jɔ kɛ maa ya neneene; aywilɛho kɛ kɔmɔ yemi tsuo se maa po.

2 Korintobi 4:17

Amanehlu nɛ nya wa, nɛ se be kɛe kulaa nɛ ɔ ma ha wa hɛ mi maa ba nyami babauu kɛ be nɔ kɛ maa ya neneene.

Yesaya 35:10

A maa kpale kɛ ba Yerusalem; a ma la nɛ a ma hwɔ lele. A be kɔmɔ kɛ aywilɛho yee gblegbleegble hu. A bua maa jɔ kɛ maa ya neneene.

Mateo 25:46

Lɔ ɔ he ɔ, nimli nɛ ɔmɛ maa ya neneene he hiami mi; se dali ɔmɛ lɛɛ a maa ya neneene wami mi.”

2 Tesalonikabi 2:16

Wa Nyɔmtsɛ Yesu Kristo nitsɛ, kɛ wa Tsɛ Mawu, nɔ nɛ suɔ wɔ kikɛ nɛ ɔ, nɛ e gu e dloomi ɔ nɔ, nɛ e wo wɔ he wami, nɛ e ha wɔ hɛ kɛ nɔ fɔmi nɛ nya wa a,

Mose V, 21:17

E ha e bi nɔkɔtɔma ɔ nɔ́ nɛ e ma ha e bi kaketsɛ ɔ totoe enyɔ. Ejakaa bi nɔkɔtɔma nɛ ɔ ji nyumu ɔ kekleekle binyumu nɛ a fɔ ha lɛ.

La 126:5

Nihi nɛ du ní kɛ vo nyu ɔ ma kpa ní kɛ bua jɔmi.

Yesaya 54:4

Koo ye gbeye, ejakaa zo be mo gbee! O tsui ko po, ejakaa a be o hɛ mi si puee hu. Zo ní nɛ o tsu ngɛ o yihe be mi ɔ, o hɛ maa je nɔ, nɛ si nɛ o hi mɔbɔmɔbɔ kaa yalɔyo ɔ, o be kaie hu.

Yesaya 60:21

O ma mi bi ɔmɛ tsuo maa pee nɔ́ nɛ da. A maa hi zugba a nɔ kɛ maa ya neneene. Imi lɛ i to mɛ si. Imi lɛ i pee mɛ jã, konɛ a kɛ wo ye hɛ mi nyami.

Yesaya 65:13

Lɔ ɔ he ɔ, imi Nyɔmtsɛ Yawɛ, i ngɛ dee ke, ni nɛmɛ nɛ buɔ mi tue, nɛ a jaa mi ɔ, a ma ná ní babauu maa ye, se nyɛɛ lɛɛ hwɔ maa gbe nyɛ; ye sɔmɔli ɔmɛ ma na nyu maa nu, se nyɛɛ lɛɛ kuma maa gbe nyɛ; ye sɔmɔli ɔmɛ ma nya, se nyɛɛ lɛɛ zo maa gbe nyɛ.

Zakaria 8:12

Ma ha tue mi jɔmi maa ba zugba a tsuo nɔ. Hiɔmi maa nɛ; zugba a maa ba ní, nɛ wai tso ɔmɛ maa wo yiblii. Ma ngɔ ní nɛ ɔmɛ tsuo kɛ ha nihi nɛ maa piɛ ngɛ zugba a nɔ.

Yesaya 60:15

“A be mo kuae, nɛ a be mo nyɛe hu kaa sa be ko nɛ o pee ma doku nɛ nɔ ko gui lejɛ ɔ. Ma wo o nɔ gojoo, nɛ o he maa pee fɛu. O maa pee he nɛ bua jɔmi maa hi daa.

Zefania 3:19

Be ma! Ma gbla nihi nɛ waa nyɛ yi mi ɔ a tue; ma he akpaketsɛmɛ ɔmɛ tsuo a yi wami, nɛ ma kpale nihi nɛ a nuu nyɔguɛ ɔ kɛ ba we ekohu. Ma tsake a zo ɔ kɛ pee hɛ mi nyami, nɛ je ɔ tsuo ma je a yi.