Yesaya 57:15 - BAIBLO ALOO NGMAMI KLƆUKLƆU Ɔ

¹⁵ “Imi ji Mawu klɔuklɔu nɛ hii hiɔwe kɛ yaa neneene ɔ nɛ. I hii he klɔuklɔu ngɛ hiɔwe lokoo; se nɔ nɛ baa e he si ngɛ e mumi mi, nɛ e tsui mi tsɔ ɔ, i kɛ lɛ hiɔ si; i woɔ e mumi kã, konɛ e ngɔ e hɛ ngɔ fɔ ye nɔ, nɛ e na wami he.

Yesaya 57:15 ပူးပေါင်းရင်းမြစ်များ

La 34:18

Nihi nɛ a kɔni mi jɔ̃, kɛ nihi nɛ a be hɛ nɔ kami ɔ, Yawɛ hii a kasa nya, konɛ e wo mɛ he wami.

La 138:6

Yawɛ ngɛ hiɔwe lokoo mohu, se nɔ nɛ baa e he si ɔ, e hɛ hii e nɔ; nɔ nɛ woɔ e he nɔ ɔ lɛɛ e he sane ko pi Yawɛ sane.

La 147:3

Ni nɛmɛ nɛ a tsui ku ɔ, e ngɛ mɛ tsae, nɛ e ngɛ a pa amɛ a nɔ fie.

Mose II, 15:11

“Yawɛ lee, mɛnɔ ngɛ kaa mo? Mɛnɔ ngɛ kaa mo ngɛ mawu ɔmɛ a kpɛti? O je agbo; o he ngɛ gbeye; mo, mo nyakpɛ ní peelɔ.

Daniel 4:34

Matsɛ Nebukadnezar de ke, “Jeha kpaago ɔ se ɔ, i wo ye yi nɔ nɛ i hyɛ hiɔwe, kɛkɛ nɛ ye juɛmi ɔ kpale kɛ ba ekohu. I je Mawu nɛ ngɛ hiɔwe lokoo ɔ yi, nɛ i wo nɔ nɛ ngɛ kɛ yaa neneene ɔ hɛ mi nyami. “E maa ye tsɛ kɛ maa ya neneene; nɛ e matsɛ yemi ɔ maa hi si daa.

Yesaya 52:13

Yawɛ ke, “Ye tsɔlɔ ɔ maa ye manye ngɛ e ní tsumi mi; a ma wo e nɔ gojoo, nɛ a maa wo e hɛ mi nyami babauu!

Yesaya 40:28

Anɛ o li lo? Anɛ o nui lolo lo? Yawɛ ji Mawu nɛ ngɛ daa kɛ daa; lɛ ji nɔ nɛ bɔ je ɔ tsuo. Pɔ tɔɛ lɛ, nɛ e gbɔjɔɔ we. Bɔ nɛ e juɛmi mi kuɔ ha a, nɔ ko nɔ ko be nyɛe maa nu sisi.

Mose V, 33:27

Mawu nɛ ngɛ kɛ yaa neneene ɔ ji nyɛ wesa he. Lɛ ji nɔ nɛ baa nyɛ yi daa. Lɛ ji nɔ nɛ fie nyɛ he nyɛli ɔmɛ ngɛ nyɛ hɛ mi, nɛ e de nyɛ ke nyɛ kpata mɛ tsuo a hɛ mi ɔ nɛ.

La 90:2

Benɛ o na we nɛ o bɔ yo ɔmɛ; benɛ o na we nɛ o bɔ je ɔ, mo ji Mawu nɛ ngɛ kɛ je neneene kɛ yaa si neneene.

Yakobo 4:6

Se mɔbɔ nɛ Mawu naa wɔ ɔ nya wa kulaa pe lɔ ɔ po. Kaa bɔ nɛ ngmami ɔ deɔ ɔ, “Nihi nɛ woɔ a he nɔ ɔ, Mawu baa mɛ si; se ni nɛmɛ nɛ baa a he si ɔ lɛɛ e dlooɔ mɛ.”

La 83:18

konɛ a le kaa mo Yawɛ, mo nɔ kake too lɛ o ngɛ he wami pe nɔ tsuaa nɔ ngɛ je ɔ mi tsuo.

Kronika II, 34:27

nɛ o tsake o tsui, nɛ o ba o he si ngɛ ye hɛ mi. Benɛ o nu bɔ nɛ i to nɛ ma gbla Yerusalem, kɛ Yerusalem ma mi bi ɔmɛ a tue ha a, o hía o he tade ɔmɛ, nɛ o wo ya. I nu o kue fami ɔ.

La 51:17

Bɔ nɛ saa mo Mawu o hɛ mi ji he piami. Ke nɔ ko pia e he, nɛ e tsake e tsui ɔ, o kua we lɛ.

1 Timoteo 1:17

Mawu kake too, Neneene Matsɛ, nɔ nɛ ngɛ daa nɛ a nɛ lɛ ɔ, a je e yi, nɛ a wo e hɛ mi nyami kɛ ya neneene! Amen.

Romabi 1:20

Kɛ je be nɛ Mawu bɔ je ɔ, e he wami nɛ ngɛ daa, kɛ e su nɛ ji níhi nɛ a nɛ́ kɛ hɛngmɛ ɔ jeɔ kpo paa ngɛ e nibɔ ní ɔmɛ a mi, nɛ adesa naa. Lɔ ɔ he ɔ, a be nya jemi ko kulaa.

La 93:2

Yawɛ, o matsɛ sɛ ɔ ngɛ kɛ je blema lokoo; mo nitsɛ hu o ngɛ kɛ je neneene.

Kpojemi 3:7

“Bɔfo ɔ nɛ ngɛ asafo ɔ nya ngɛ Filadelfia a, ngmaa womi nɛ ɔ ya ha lɛ ke, “Sɛ gbi nɛ je nɔ klɔuklɔu nɛ yeɔ anɔkuale ɔ ngɔ ji nɛ ɔ nɛ. Lɛ nɛ e hɛɛ David safe ɔ nɛ. Ke e bli sinya a, nɔ ko nɔ ko be nyɛe ma nga; nɛ ke e nga a, nɔ ko nɔ ko be nyɛe ma bli.

Luka 1:49

ejakaa Mawu Ope ɔ pee ní nguanguahi ha mi. E biɛ ngɛ klɔuklɔu.

Kpojemi 15:4

Nyɔmtsɛ, nihi tsuo maa wo o hɛ mi nyami! Nihi tsuo ma de ke o kle; ejakaa mo pɛ ji nɔ klɔuklɔu. Nihi tsuo nɛ ngɛ je ɔ mi ɔ maa ba nɛ a ma ba ja mo; ejakaa dami sane nɛ o ngɛ yee ɔ, nɔ tsuaa nɔ na paa!”

Yeremia 10:10

Se mo Yawɛ, Mawu nitsɛnitsɛ ji mo; mo ji Mawu hɛ kalɔ ɔ nɛ; neneene matsɛ ji mo. Ke o mi mi fu ɔ, zugba mimiɛɔ, nɛ je ma amɛ nyɛ we nya dami.

1 Petro 5:5

Ja nɔuu, nyɛ nihewi ɔmɛ hu, nyɛɛ ba nyɛ he si ha nikɔtɔma amɛ. Nyɛ tsuo pɛpɛɛpɛ nyɛ sɔmɔ nyɛ sibi kɛ he si bami. Ejakaa ngmami ɔ ke, “Nihi nɛ woɔ a he nɔ ɔ, Mawu kɛ mɛ toɔ ní; se nihi nɛ baa a he si ɔ, Mawu dlooɔ mɛ.”

1 Timoteo 6:16

Lɛ nɔ kake pɛ ji nɔ nɛ ngɛ daa nɛ e be gboe gblegbleegble; nɛ la nɛ nɔ ko nɔ ko be nyɛe maa hɛ lɛ kɛ su he ɔ bɔle lɛ kɛ kpe. Nɔmlɔ adesa ko adesa ko nɛ́ lɛ hyɛ, nɛ adesa ko be nyɛe maa na lɛ hulɔ. A je e yi daa; e maa ye tsɛ kɛ maa ya neneene! Amen.

Mika 5:2

Yawɛ ke, “Mo Betlehem Efrata, Yuda ma amɛ a kpɛti nyafii kake kɛkɛ ji mo; se ma ha nɔ ko maa je o mi ba ye matsɛ ngɛ Israel ma a tsuo nɔ. Matsɛ nɛ ɔ weku kpa ngɛ kɛ je blema be ɔ mi tɔɔ.” Yawɛ lɛ de.

Yesaya 6:3

A ti nɔ tsuaa nɔ ngɛ e sibi dee boboobo ke, “Klɔuklɔu, klɔuklɔu, klɔuklɔu! Yawɛ Tabohiatsɛ ɔ ngɛ klɔuklɔu! E hɛ mi nyami ɔ hyi je ɔ tsuo.”

Abɛ Womi 8:23

Blema lokoo, benɛ a na we nɛ a bɔ je ɔ, imi lɛ a bɔ kekleekle.

La 123:1

Yawɛ mo i wo ye yi nɔ kɛ ngɛ hyɛe; mo nɛ́ o hii si ngɛ o matsɛ sɛ ɔ nɔ ngɛ hiɔwe ɔ, mo i ngɛ hyɛe ɔ nɛ!

La 115:3

Wa Mawu ɔ, hiɔwe e ngɛ; nɔ́ tsuaa nɔ́ nɛ e suɔ ɔ, lɔ ɔ e peeɔ.

La 97:9

Yawɛ, je ɔ tsuo nɔ yelɔ ji mo; o kle; mawu ko mawu ko kɛ mo sɔɛ.

Hiob 6:10

Jinɛ ma hlu kɛ bua jɔmi, nɛ i be haomi ɔ nitsɛ po he nue. Mawu Nɔ Klɔuklɔu ɔ mlaa amɛ ɔ, i tɔ̃ we a nɔ hyɛ.

Samuel I, 2:2

Nɔ ko be nɛ ngɛ klɔuklɔu kaa Yawɛ. E se ɔ, nɔ ko be. Ee, Mawu se ɔ, wesa he kpa ko be.

Kpojemi 4:8

Hɛ kali eywiɛ ɔmɛ a ti nɔ tsuaa nɔ ngɛ pɛli ekpa, nɛ a mi mi je kɛ kpo nɔ je tsuo hɛngmɛ sɔuu. Nɛ nyɔ kɛ pia tsuo ɔ, a hii lae nɛ a kpa we ke, “Klɔuklɔu, klɔuklɔu, klɔuklɔu ji Nyɔmtsɛ Mawu Ope, nɔ nɛ ngɛ sa a, nɛ e ngɛ amlɔ nɛ ɔ, nɛ́ e maa ba a.”

Hebribi 9:14

Ke enɛ ɔmɛ ngɛ mi niinɛ ɔ, lɛɛ Kristo muɔ nɛ e gu Mumi Klɔuklɔu nɛ ngɛ daa a nɔ nɛ e kɛ pue si ɔ tsu ní kulaa pe jã. Bɔ ɔ nɛ Kristo nɛ sé ko be e he ɔ ngɔ e he kɛ sã, nɛ e gbo ngɛ wa he ɔ ma ha nɛ wa ma je wa hɛ kɛ je kusumihi nɛ a he be se nami ɔ a he, nɛ wa ma sɔmɔ Mawu hɛ kalɔ ɔ.

2 Korintobi 7:6

Se benɛ Tito ba a, Mawu, nɔ nɛ woɔ nihi nɛ a nine mi jɔ̃ he wami ɔ ha nɛ wa nɔ gbagba te.

Luka 4:18

“Nyɔmtsɛ ɔ Mumi ɔ ngɛ ye nɔ; Nyɔmtsɛ ɔ hla mi ke ma ngɔ sane kpakpa a ba ha nihi nɛ a ni ngɛ mɔbɔ. E tsɔ mi ke ma ba fiɛ ke, ‘Nyɛ nyɔguɛhi, nyɛ ye nyɛ he oo nyɛ ye nyɛ he! Hɛ yuyuili, nyɛ maa hyɛ nɔ́ oo nyɛ maa hyɛ nɔ!’ E tsɔ mi ke ma ba kpɔ nihi nɛ a ngɛ mɛ yi mi wae ɔ,

Mateo 6:9

Lɔ ɔ he ɔ, nyɛɛ sɔle kaa kikɛ nɛ ɔ: ‘Wa Tsɛ nɛ ngɛ hiɔwe; O biɛ ɔ he nɛ tsɔ.

Zakaria 2:13

Nyɛ tsuo nyɛɛ pee dii ngɛ Yawɛ hɛ mi; ejakaa e je e hi he klɔuklɔu ɔ kɛ ma.

La 111:9

E ha e ma a ye a he, nɛ e kɛ mɛ so somi nɛ ngɛ daa. E he tsɔ, nɛ e he ngɛ gbeye!

La 99:3

Nihi tsuo ma je e biɛ kpetekpleenyɛ ɔ yi; a ma je e biɛ nɛ he ngɛ gbeye ɔ yi. E ngɛ klɔuklɔu!

2 Korintobi 1:4

E woɔ wa bua ngɛ haomihi tsuo a mi. Kɛkɛ ɔ, ke haomi ba ni kpahi a nɔ ɔ, bua womi nɛ wɔ nitsɛmɛ wa na kɛ je Mawu dɛ mi ɔ, wa ma nyɛ kɛ wo mɛ hu bua.

Ezekiel 16:63

Ma ngɔ o he yayami ɔmɛ tsuo kɛ pa mo; se kɛ̃ ɔ, o ma kai yayami ɔmɛ, nɛ zo maa gbe mo kpɔtɔɔ. Ma ngɔ tɔmi ɔmɛ tsuo kɛ pa mo, nɛ e maa pee mo nyakpɛ; o be nyɛe maa pa o nya mi tete po ngɛ zo ní nɛ o tsu ɔ he.” Nyɔmtsɛ Yawɛ lɛ de.

Ezekiel 9:4

E de lɛ ke, “Yaa kpa si kɛ gu Yerusalem ma a mi tsuo. Nihi nɛ ngɛ haoe, nɛ a ngɛ kɔmɔ yee ngɛ ní hiemi níhi nɛ a ngɛ pee ɔ a he ɔ, pee okadi ngɛ a hɛ nya.”

2 Korintobi 2:7

Jehanɛ lɛɛ nyɛɛ ngɔ e he yayami kɛ pa lɛ, nɛ nyɛɛ wo lɛ bua, konɛ e ko ba ye kɔmɔ tsɔ, nɛ e kɔni mi ba jɔ̃.

Ni Tsumi 3:14

Nyɛɛ lɛɛ nyɛ kua nɔ klɔuklɔu ɔ nɛ dami sane pɛ e yeɔ ɔ, nɛ nyɛ kpa pɛɛ ke a ngmɛɛ awi yelɔ mohu he ngɔ ha nyɛ.

Daniel 4:17

Mawu bɔfo ɔmɛ nɛ a nɔ tsɔ, nɛ a hɛngmɛhi ngɛ si poe ɔ, bɔ nɛ a de ji nɛ ɔ nɛ. Lɔ ɔ he ɔ, nihi tsuo pɛpɛɛpɛ nɛ a na nɛ a le kaa Mawu nɛ ngɛ hiɔwe lokoo ɔ ngɛ he wami ngɛ nimli adesahi a matsɛ yemi nɔ, nɛ e ngɔɔ kɛ haa nɔ tsuaa nɔ nɛ e suɔ, nɔmlɔ ngua jio, nɔmlɔ wayo jio.’

Yesaya 6:1

Jeha a nɛ Matsɛ Uzia gbo ɔ, i na Nyɔmtsɛ ɔ nɛ hii si ngɛ e matsɛ sɛ gojoo ko nɔ. E tade klɔii ɔ nya wuyaa a hyi Yawɛ we ɔ tsuo.

Matsɛmɛ I, 8:27

“Se anɛ mo Mawu, o ma nyɛ maa hi zugba a nɔ niinɛ lo? Mo nɛ hiɔwe, kɛ hiɔwe se lokoo po kpi mo ɔ, kɛ maa pee kɛɛ nɛ we nɛ i po nɛ ɔ maa kpe mo?

Mose I, 21:33

Enɛ ɔ se ɔ, Abraham du tso ngua ko ngɛ Beersheba, nɛ e ja Yawɛ Mawu nɛ ngɛ daa a ngɛ lejɛ ɔ.

Mose II, 15:18

Yawɛ maa ye matsɛ kɛ maa ya neneene.”

La 138:7

Ke i ngɛ amanehlu mi ɔ, mo lɛ o jeɔ mi kɛ jeɔ mi. Ke ye he nyɛli kɛ abofu ba na mi ɔ, o kɛ mɛ kpee, nɛ o kɛ o he wami kpetekpleenyɛ ɔ heɔ ye yi wami.

Abɛ Womi 16:19

E hi kaa o maa pee o he humi nɛ a na mo ngɛ ohiatsɛmɛ a kpɛti, pe nɔ́ nɛ a maa na mo nɛ o kɛ he nɔ woli ngɛ ní nɛ a ha dlae.

Yesaya 33:5

Yawɛ kle! E ngɛ he wami ngɛ nɔ́ tsuaa nɔ́ nɔ. E ma ha a maa ye dami sane sɔuu; anɔkuale pɛ a maa tu ngɛ Yerusalem be tsuaa be,

Daniel 2:11

Nɔ́ nɛ nɛnɛ ngɛ bie ɔ, nɔ́ ɔ he wa wawɛɛ nitsɛ. Nɔ ko nɔ ko be nyɛe maa pee ha mo, ja mawu ɔmɛ pɛ. Nɛ mawu ɔmɛ hu tsa pi a hi he ji nimli adesahi a kpɛti.”

Yoel 2:13

Nyɛ ha nɛ e hao nyɛ ngɛ nyɛ tsui mi; se pi kaa nyɛ ma hía nyɛ tadehi ngɛ nyɛ he kɛkɛ.” Nyɛɛ kpale kɛ ba Yawɛ, nyɛ Mawu ɔ ngɔ, ejakaa e mi mi jɔ, nɛ e naa mɔbɔ; e toɔ e tsui si; e yeɔ e siwo nɔ; e mi mi fu we mla, se mohu e kɛ nɔ́ paa.

Mika 6:8

Dɛbi! Yawɛ tsɔɔ wɔ nɔ́ nɛ hi. Nɔ́ nɛ e ngɛ hlae ngɛ wa dɛ kɛkɛ ji kaa waa ye dami sane, nɛ waa na mɔbɔ, nɛ waa ba wa he si ha wa Mawu ɔ.

Zakaria 9:9

Zion, nyá oo, nyá! Yerusalem, mo he ose! Hyɛ, o matsɛ ɔ ma! E ma kɛ agbo jemi kɛ kunimi yemi. E ba e he si, nɛ e hi teji okpɔngɔ nɔ; ee, e hi teji okpɔngɔ bi nɔ.

Mose II, 15:13

O kɛ o suɔmi nɛ tsakee we ɔ kpaka ma nɛ o kpɔ ɔ; nɛ o kɛ o he wami tsɔɔ mɛ blɔ kɛ ba o zugba klɔuklɔu ɔ nɔ.

Mose II, 40:34

Kɛkɛ nɛ bɔku ɔ ba ha kpe he bo tsu ɔ nɔ, nɛ Yawɛ hɛ mi nyami hyi lejɛ ɔ.

Mose II, 40:35

Enɛ ɔ he je ɔ, Mose nyɛ we nɛ e sɛ kpe he bo tsu ɔ mi.

Hiob 22:29

Nɔ nɛ woɔ e he nɔ ɔ, Mawu baa lɛ si, se nɔ nɛ baa e he si ɔ, Mawu heɔ e yi wami.

La 34:19

Nɔ nɛ peeɔ nɔ́ nɛ da a, haomi babauu baa e nɔ; se Yawɛ jeɔ lɛ kɛ jeɔ lɛ tsuo mi.

La 51:19

Lɔ ɔ loko o bua maa jɔ bɔhi nɛ sa a he; sami bɔ ɔ, o bua maa jɔ he; a maa sã na kuhi ngɛ o bɔ sami la tɛ ɔ nɔ.

Yesaya 18:4

Ejakaa Yawɛ de mi ke, “Bɔ nɛ ngma kpami be mi je mi dɔɔ la nyɔ mi nɛ bɔ́ nɛɛ ɔ, loo bɔ nɛ ke pu tso ngmangmaangma nɛ je mi dɔɔ la, nɛ́ kɔɔhiɔ mi peeɔ kom ɔ, ja ma pee dii ngɛ hiɔwe kɛ hyɛ.

Yesaya 63:15

Yawɛ, moo hyɛ wɔ kɛ je hiɔwe ngɛ o hi he klɔuklɔu he nɛ hɛ mi nyami bɔle mo ngɛ ɔ. O hɛdɔ, kɛ o he wami kpetekpleenyɛ ɔ, jije e ngɛ? O tsui mi sami, kɛ suɔmi babauu ɔ hu a se po.

Kɔmɔ Yemi 3:41

Nyɛ ha nɛ wa wo wa nine nɔ nɛ waa fa kue kɛ je wa tsui mi tɔɔ kɛ ha Mawu nɛ ngɛ hiɔwe ɔ ke,