Yesaya 54:11 - BAIBLO ALOO NGMAMI KLƆUKLƆU Ɔ

¹¹ Yawɛ ke, “Yerusalem, ma nɛ na amanehlu, mo nɛ nɔ ko piɛ we o he nɛ e wo mo bua. Ma ngɔ tɛhi nɛ a he jua wa kɛ fia o sisi tomi ɔ ekohu.

Yesaya 54:11 ပူးပေါင်းရင်းမြစ်များ

Yeremia 30:17

Nyɛ he nyɛli tsɛɔ nyɛ ke nihi nɛ a fie mɛ; a deɔ ke, ‘Zion nɛ be huɛ.’ Se kɛ̃, ma ha nɛ nyɛ ma na he wami ekohu; ma tsa nyɛ pa amɛ. Imi, Yawɛ lɛ i de.”

Ni Tsumi 14:22

A wo nihi nɛ he ye ɔ he wami, konɛ a hemi kɛ yemi mi nɛ wa. A tsɔɔ mɛ hulɔ kaa, “E sa kaa waa gblee amanehlu babauu mi kɛ sɛ Mawu matsɛ yemi ɔ mi.”

Kronika I, 29:2

Níhi nɛ a kɛ maa ma ye Mawu ɔ we ɔ, i bɔ mɔde bua nya: sika tsu, sika hiɔ, akɔblee, dade, tso, tɛhi nɛ a he jua wa, tɛhi nɛ kpɛɔ, tɛhi nɛ a kɛ maa níhi a mi, kɛ tɛhi nɛ a he jua wa kpa komɛ.

Yohane 16:33

I de nyɛ ní nɛ ɔmɛ, konɛ nyɛɛ kɛ mi nɛ hi si, konɛ nyɛ na he jɔmi. Benɛ nyɛ ngɛ je ɔ mi ɔ, haomi maa ba nyɛ nɔ; se nyɛ tsui nɛ nɔ nyɛ mi, ejakaa i ye je ɔ nɔ kunimi.”

Ezekiel 10:1

Benɛ ma hyɛ ɔ, nɔ́ ko kaa matsɛ sɛ ba je kpo ngɛ nɔ́ mluguduu ɔ nɔ ngɛ kerub ɔmɛ a yi mi. Sɛ ɔ ngɛ kaa tɛ kpakpa nɛ hɛɛ bluu su.

Yesaya 54:6

Israel, o ngɛ kaa yo nɛ e huno je e he, yo nɛ a je he ngɛ yihe mi, nɛ e ngɛ kɔmɔ yee wawɛɛ. Se Yawɛ, o Mawu ɔ ngɛ mo tsɛe kɛ ba e ngɔ ekohu, nɛ e ngɛ dee ke,

Yesaya 51:21

Lɔ ɔ he ɔ, Yerusalem, o bimɛ ɔmɛ a ní pee mɔbɔ, nɛ a ngɛ si tataae kaa nihi nɛ tɔ dã.

Yesaya 49:14

Se bɔ nɛ Yerusalem ngɛ dee ji, “Yawɛ ngmɛɛ ye he ngɔ fɔ si! E hɛ po je ye nɔ.”

Yesaya 28:16

Lɔ ɔ he ɔ, nɔ́ nɛ Nyɔmtsɛ Yawɛ ngɛ dee ji nɛ ɔ nɛ: “I ngɛ sisi tomi ko nɛ he wa nɛ maa si kpɛii fiae ngɛ Zion; nɛ i ngɔ kɔ nya tɛ agbo ko kɛ ma mi. Nɔ́ nɛ a ngma ngɛ nɔ ji nɛ ɔ nɛ: ‘Nɔ nɛ heɔ yeɔ ɔ, e toɔ e tsui si.’

Yesaya 14:32

Mɛni heto wa ma ha tsɔli ɔmɛ nɛ je Filistia kɛ ba a? Wa ma de mɛ ke Yawɛ to Zion sisi saminya, nɛ e ma a nɛ ngɛ amanehlu nae ɔ, a tue mi maa jɔ mɛ ngɛ lejɛ ɔ.

La 34:19

Nɔ nɛ peeɔ nɔ́ nɛ da a, haomi babauu baa e nɔ; se Yawɛ jeɔ lɛ kɛ jeɔ lɛ tsuo mi.

Efesobi 2:20

Sisi tomi nɛ a fia nyɛ ngɔ ma nɔ ji sɛ gbi ɔ nɛ bɔfo ɔmɛ, kɛ gbali ɔmɛ fiɛ ɔ; nɛ Kristo Yesu nitsɛ ngɛ kaa tsu ɔ kɔ nya tɛ.

Mateo 8:24

Tlukaa a, wo nɔ kɔɔhiɔ nɛ nya wa ba hia, nɛ oslɔke bɔni kumi kɛ ngɛ lɛ ɔ mi woe. Se Yesu lɛɛ e hwɔ mahe.

Ezekiel 1:26

Ke o hyɛ ɔ, nɔ́ ko kaa matsɛ sɛ nɛ hɛɛ tɛ bluu su ngɛ nɔ́ mluguduu ɔ nɔ́, nɛ nɔ́ ko nɛ ngɛ kaa nɔmlɔ hii si ngɛ matsɛ sɛ ɔ nɔ.

Kɔmɔ Yemi 1:21

“Bu ye kɛmɛmi ɔ tue; nɔ ko be nɛ maa jɔɔ ye bua. Haomi nɛ ba ye nɔ nɛ ɔ, ye he nyɛli ɔmɛ tsuo nu he, nɛ a bua jɔ kaa o ha sane nɛ ɔ ba ye nɔ. Ligbi nɛ o to ha he nyɛli ɔmɛ ɔ, ha nɛ e ba esɔ, konɛ mɛ hu a pee kaa bɔ nɛ i ngɛ nɛ ɔ.

Yesaya 51:23

O he nyɛli nɛ haoɔ mo, nihi nɛ ha o hwɔɔ si ngɛ zugba mi, nɛ a naa o nɔ kaa a naa gbɛjegbɛ nɔ ɔ, mɛ a dɛ mi ma ngɔ kplu ɔ kɛ wo.”

Lahi 5:14

Sika tsu gahi nɛ tɛ kpakpahi hɔɔ si ngɛ a mi ngɛ e kɔnihi a he. E nɔmlɔ tso ngɛ kaa suɔ wu nɛ a kɛ tɛ kpakpahi nɛ hɛɛ bluu su hɔɔ si ngɛ a mi.

Matsɛmɛ I, 5:17

Ngɛ Matsɛ Salomo fami nya a, a gba tɛ kpakpa nguanguahi nɛ a he jua wa kɛ ba fia sisi tomi ha Mawu we ɔ.

Mose V, 31:17

Ke e ba mi ja a, ye mi mi ma fu. I ma kua mɛ, nɛ a hɛ mi ma kpata. Haomihi nɛ ngɛ gbeyegbeye maa ba a nɔ, nɛ lɔ ɔ loko a ma kpa si kaa ní nɛ ɔmɛ ngɛ a nɔ bae, ejakaa imi a Mawu ɔ, i kua mɛ.

Mose II, 24:10

nɛ a na Israel Mawu ɔ. Ngɛ e nane si ɔ, a na nɔ́ ko kaa kpoku nɛ e mi tɛ̃ heii kaa hiɔwe, kaa nɔ́ nɛ tɛ nɛ a tsɛɛ safiro ɔ nɛ a kɛ pee lɛ.

Mose II, 3:7

Kɛkɛ nɛ Yawɛ de ke, “Amanehlu nɛ ye ma a ngɛ nae ngɛ Egipt ɔ, i na; nɛ ya nɛ a ngɛ foe kɛ ngɛ balɔ tsɛe ɔ hu i nu. Niinɛ, i le a nɔ́ nami ɔ tsuo.

Mose II, 3:2

Benɛ e ba lejɛ ɔ, Yawɛ bɔfo ko ba je e he kpo tsɔɔ lɛ kaa la lilɛ nɛ ngɛ tsoe ngɛ mio tso ko mi. Benɛ e ke e hyɛɛ ɔ, e na kaa mio tso ɔ ngɛ tsoe, se e sɛ̃.

Mose II, 2:23

Jeha komɛ a se ɔ, Egipt matsɛ ɔ ba gbo. Se Israel bi ɔmɛ lɛɛ kɛmɛmi kɛkɛ a ngɛ kɛmɛe ngɛ a nyɔguɛ yemi ɔ mi. A fa kue ha Mawu, nɛ Mawu hu nu a gbi.

Yesaya 60:15

“A be mo kuae, nɛ a be mo nyɛe hu kaa sa be ko nɛ o pee ma doku nɛ nɔ ko gui lejɛ ɔ. Ma wo o nɔ gojoo, nɛ o he maa pee fɛu. O maa pee he nɛ bua jɔmi maa hi daa.

Hiob 28:16

E he jua a, sika tsu, loo juetli kpakpa po sui nya.

Yesaya 44:28

I deɔ Sirus ke, ‘Mo ji nɔ nɛ maa ye ye ma a nɔ ha mi; nɔ́ nɛ i suɔ ɔ, lɔ ɔ sɔuu o maa pee. O ma fa ke a ma Yerusalem ekohu, nɛ́ a to Yawɛ we ɔ sisi.’ ”

Yesaya 54:12

Ma ngɔ tɛ nɛ he jua wa nɛ a tsɛɛ rubi tɛ kɛ ma gbogbo ɔmɛ a yi mi ngɛ saflɛ ɔmɛ a nɔ. Ma ngɔ tɛ nɛ kpɛɔ kaa la, nɛ a tsɛɛ karbunkle tɛ ɔ kɛ pee agbo ɔmɛ. Gbogbo nɛ bɔle mo ɔ, tɛ nɛ he jua wa sɔuu ma ngɔ kɛ fia.

Mika 7:11

Nyɛ Yerusalem bi, be ma nɛ a maa fia gbogbo kɛ wo nyɛ ma a he ekohu. Jamɛ a be ɔ, a maa hɛ nyɛ huzu ɔ mi kɛ maa ya se tsitsaa.

Matsɛmɛ I, 6:30

Zugba a nitsɛ po a kɛ sika tsu ha hɛ mi.

Kronika II, 3:6

Matsɛ ɔ kɛ tɛ saminyawiiwi nɛ he jua wa dla Yawɛ we ɔ he. Sika tsu ɔ lɛɛ Parvaim zugba a nɔ a ná kɛ je.