Yesaya 5:29 - BAIBLO ALOO NGMAMI KLƆUKLƆU Ɔ

²⁹ Ta buli ɔmɛ hwɔ hoo kaa jatahi nɛ a gbe lohwe ko nɛ a ngɛ huãe ngɛ he, nɛ a kɛ yaa he nɛ nɔ ko nɔ ko be nyɛe ma kpɔ ngɛ a dɛ.

Yesaya 5:29 ပူးပေါင်းရင်းမြစ်များ

Zakaria 11:3

Nyɛɛ bu tue! To hyɛli ɔmɛ ngɛ awe nyae, ejakaa a hɛ mi nyami ɔ ta. Jata amɛ ngɛ huãe, ejakaa a kpata hue ɔ nɛ ngɛ Yordan pa a nya a hɛ mi.

Mika 5:8

Israel bi nɛ maa piɛ ngɛ je ma amɛ a kpɛti ɔ, a he ma ba wa kaa jata ngɛ pu mi lohwehi, loo we mi lohwehi a kpɛti. Ke e sɛ a kpɛti kikɛ nɛ ɔ, e maa naa a nɔ, nɛ e ma tsɔtslɔɔ a mi nɛ nɔ ko be nyɛe ma kpɔ mɛ.

Yesaya 42:22

Se amlɔ nɛ ɔ, a fia e ma a ojo, nɛ a nuu ni ɔmɛ kɛ ya wo tsu. A kpɔ a níhi ngɛ a dɛ, nɛ a ha a níhi; nɛ nɔ ko nɔ ko bɛ nɛ e ba je ngmlaa ha mɛ.

Zefania 3:3

Tsɔli ɔmɛ ngɛ kaa jatahi nɛ ngɛ huãe. Kojoli ɔmɛ hu ngɛ kaa ogbeteehi nɛ hwɔ gbe mɛ; gbɔkuɛ ɔ, a yeɔ ní tsuatsuaatsua, nɛ ke je na a, a si we nɔ́ ko nɔ́ ko.

Amos 3:8

Ke jata ngɛ huãe ɔ, mɛnɔ lɛ e tsui pui? Ke Yawɛ ngɛ munyu tue ɔ, mɛnɔ ma kua ke e be e sɛ gbi ɔ fiɛe? Nɔ ko nɔ ko be!

Hosea 11:10

“Ke i huã kikɛ nɛ ɔ kaa jata a, ye ma a maa nyɛɛ ye se. A he maa sɔ kɛ maa je bonyoku je kɛ ba.

Yeremia 51:38

Babilonia bi ɔmɛ tsuo maa hi huãe kaa jata; a maa hi pɛe kaa jata bimɛ.

Yeremia 50:17

Bɔ nɛ Yawɛ de ji nɛ ɔ nɛ: “Israel bi ngɛ kaa tohi nɛ jatahi fie mɛ, nɛ a gbɛ mɛ ngɔ fĩa. Kekleekle ɔ, Asiria matsɛ ba tua mɛ, nɛ e ye mɛ; lɔ ɔ se ɔ, Babilonia matsɛ, Nebukadnezar ba kpe a wuhi.

Yeremia 49:19

Kaa bɔ nɛ jata hiaa kpo vlai kɛ jeɔ pu mi ngɛ Yordan pa a he kɛ baa lohwehi a ní yemi he ɔ, ja ma ba tlukaa, nɛ ma ba fie Edom bi ɔmɛ kɛ je a zugba a nɔ kɛ fo. Kɛkɛ ɔ, hɛ mi nyɛɛlɔ ɔ nɛ ma hla a, lɛ ji nɔ nɛ maa ye ma a nɔ. Mɛnɔ lɛ e kɛ mi sɔ? Mɛnɔ ma nyɛ nɛ e kɛ mi maa to ní? Te nɔ yelɔ nɛ ma nyɛ ye hɛ mi maa da nɛɛ?

Yeremia 4:7

Je ma amɛ a hɛ mi kpatalɔ ɔ ma kaa jata nɛ hia kpo kɛ je e laami he. E ma nɛ e ba kpata Yuda zugba a hɛ mi. Yuda ma amɛ maa pee ma dokuhi, nɛ nɔ ko nɔ ko be a mi hie hu.

Yesaya 31:4

Yawɛ de mi ke, “Bɔ nɛ to hyɛli kɛ a ngmlaa babauu nyɛ we nɛ a fieɔ jata kɛ jee e de lo he ɔ, ja pɛpɛɛpɛ nɛ nɔ́ ko nɔ́ ko be nyɛe maa tsi imi, Yawɛ Tabohiatsɛ ɔ ye nya kaa ma bu Zion yo ɔ he.

Yesaya 10:6

I tsɔ Asiria bi ɔmɛ ke a ya tua ma ko nɛ li Mawu, ma nɛ wo ye mi mi la a. I tsɔ mɛ ke a ya ha ní, nɛ a kpɔ níhi pani nya; nɛ a naa ni ɔmɛ a nɔ kaa mɔsɔ ngɛ blɔ mi.”

La 50:22

“Nyɛ nihi tsuo nɛ nyɛ hɛ je imi Mawu, ye nɔ ɔ, nyɛ susu nɔ́ nɛ ɔ he saminya. Ke pi ja a, ma tsɔtslɔɔ nyɛ, nɛ nɔ ko nɔ ko be nɛ ma kpɔ nyɛ.

Mose IV, 24:9

E bua e he nya, nɛ e buu si kaa jata ku; Ee e buu si kaa jata yo. Mɛnɔ ma nyɛ maa tsɛɛ lɛ? Nɔ tsuaa nɔ nɛ gbaa mo ɔ, a maa gbaa lɛ; Nɔ tsuaa nɔ nɛ gbiɛɛ mo ɔ, a maa gbiɛ lɛ.”

Mose I, 49:9

Yuda ngɛ kaa jata nɛ ya ye de lo nɛ e kpale ba ba buu si, ngɛ e he jɔɔe; mɛnɔ ma nyɛ maa tsɛ̃ɛ̃ lɛ?

Yesaya 35:9

Jata ko be lejɛ ɔ hie, lohwe awi yelɔ ko hu be jamɛ a blɔ ɔ nɔ nyɛɛe. Nihi nɛ Yawɛ he a yi wami ɔ, mɛ a maa nyɛɛ jamɛ a blɔ ɔ nɔ.

Yesaya 47:15

Nihi tsuo nɛ o gbo a he dengme ɔ, se nɛ o ma na ngɛ a he ji nɛ ɔ nɛ; nihi nɛ kɛ mo ye jua kɛ je o jokuɛwi a si ɔ, mɛ tsuo a maa ngmɛɛ o he; nɔ tsuaa nɔ ma wo lɛ nitsɛ e blɔ, nɛ nɔ ko nɔ ko be piɛe nɛ ma he o yi wami.”

Nahum 2:11

Jehanɛ, ma nɛ ngɛ kaa jatahi a hi he ɔ, jije e ngɛ? Ma nɛ a haa jata bihi ní ngɛ mi ɔ, jije e ngɛ? He nɛ jata ku, kɛ jata yo ngɔɔ a bihi kɛ yaa, konɛ nɔ́ ko kó sa a he ɔ, jije e ngɛ?

Yeremia 2:15

A ngɛ huãe kɛ ngɛ lɛ woe kaa jatahi; a pee e zugba a kaa nga kplanaa nɔ; e ma amɛ plɛ pee ma dokuhi, nɛ nɔ ko nɔ ko be ma amɛ a mi hu.