Yesaya 49:1 - BAIBLO ALOO NGMAMI KLƆUKLƆU Ɔ

¹ Nyɛ wo nya mahi, nyɛɛ bu tue, Nyɛ je mahi nɛ nyɛ ngɛ se lokoo, nyɛ ta tue! Yawɛ hla mi loko a fɔ mi. Benɛ i ngɛ ye nyɛ mi mi lokoo nɛ e wo ye biɛ ta.

Yesaya 49:1 ပူးပေါင်းရင်းမြစ်များ

Yeremia 1:5

“Loko i puɛ mo kɛ wo muklii mi ɔ, jamɛ a be ɔ mi ɔ, i le mo momo. Benɛ a na we nɛ a fɔ mo ɔ, jamɛ a be ɔ mi ɔ, i hla mo ngɔ to momo nɛ́ o ba gba kɛ tsɔɔ je ma amɛ.”

Galatabi 1:15

Se, mamoo benɛ a na we nɛ a fɔ mi ɔ, jamɛ a be ɔ mi tɔɔ nɛ Mawu gu e dloomi ɔ nɔ nɛ e hla mi. Nɛ benɛ e to e yi mi kaa

Yesaya 44:2

Imi ji Yawɛ nɛ bɔ mo ɔ nɛ; kɛ je be nɛ a fɔ mo kɛ ba su amlɔ nɛ ɔ, imi lɛ i baa o yi. Koo ye gbeye, ye tsɔlɔ ji mo, ye ma nɛ i hla nɛ i suɔ mo.

Yesaya 49:5

Loko a fɔ mi ɔ, Yawɛ nitsɛ hla mi, nɛ e pee mi e tsɔlɔ, konɛ ma ya kpale e ma a kɛ ba e ngɔ; ma kpale Israel ma a nɛ gbɛ fĩa a kɛ ba ha lɛ. Yawɛ woɔ ye hɛ mi nyami, lɛ ji nɔ nɛ haa mi he wami.

Luka 1:31

Hyɛ, o ma na mi, nɛ o ma fɔ binyumu, nɛ o maa wo lɛ biɛ ke Yesu.

1 Petro 1:20

Mawu hla lɛ momo loko a to je ɔ sisi, nɛ a je lɛ kpo ngɛ nyagbe be nɛ ɔmɛ a mi ngɛ nyɛ he.

Luka 1:15

E ma ba pee nɔmlɔ nguaa ngɛ Nyɔmtsɛ ɔ hɛ mi. E be wai, loo dã nɛ nya wa nue. Ke a fɔ lɛ pɛ Mumi Klɔuklɔu ɔ maa ba e nɔ,

Hebribi 12:25

Lɔ ɔ he ɔ, nɔ nɛ kɛ nyɛ ngɛ munyu tue ɔ, nyɛɛ bu lɛ tue. Nihi nɛ bui nɔ nɛ bɔ mɛ kɔkɔ ngɛ zugba a nɔ tue ɔ, a yi a he. Nɛ wɔɔ lɛɛ ke nɔ nɛ je hiɔwe ɔ kɛ wɔ ngɛ munyu tue nɛ wa bui lɛ tue ɔ, kɛ wa maa pee kɛ ye wa he kɛɛ?

Yohane 10:36

Lɛɛ imi nɛ Tsɛ ɔ hla mi, nɛ e tsɔ mi je ɔ mi ɔ, kɛ peeɔ kɛɛ nɛ ke i de ke Mawu Bi ji mi nɛ́ nyɛ deɔ ke i bɔ musu ɔ?

Zefania 2:11

Yawɛ hɛ maa dɔ kɛ wo mɛ. Yawɛ ma kpata wɔ ɔmɛ tsuo a hɛ mi ngɛ zugba a nɔ, nɛ je ma amɛ, wo kpo ɔ, kɛ zugbahi nɛ wo bɔle mɛ ɔ tsuo ma ja lɛ, nɔ tsuaa nɔ ngɛ lɛ nitsɛ e zugba nɔ.

Yesaya 60:9

Spania lɛhi nɛ a nyɛɛ hɛ mi kɛ je tsitsaa wo se zugbahi a nɔ kɛ ma a nɛ. A ngɔ bimɛ kɛ ma we. A hɛɛ sika tsu, kɛ sika hiɔ kɛ ma, konɛ a kɛ ba ha Israel Mawu klɔuklɔu ɔ, nɛ a kɛ wo Yawɛ hɛ mi nyami. Ejakaa e wó e ma a nɔ gojoo ngɛ je ma amɛ tsuo a hɛ mi.

Yesaya 57:19

Nihi nɛ a ngɛ kpo nya, kɛ tsitsaa tsuo ma na tue mi jɔmi. Ma tsa ye ma a.

Yesaya 55:3

“Ye ma, nyɛ ta tue, nɛ nyɛɛ ba ye ngɔ; nyɛɛ ba ye ngɔ, konɛ nyɛ yi nɛ na wami. I kɛ nyɛ maa so somi ko nɛ maa hi si kɛ maa ya neneene; nɛ gbaami nɛ i wo David si ke ma ha e nina a, ma kɛ ha nyɛ.

Yesaya 46:3

“Nyɛ ye ma a mi nihi tsuo, Yakob nina nɛ nyɛ ngɛ wami mi kɛ mwɔɔ, nyɛɛ bu mi tue. Imi ji nɔ nɛ baa nyɛ yi kɛ je nyɛ fɔmi be tɔɔ.

Yesaya 44:24

Yawɛ, o yi wami helɔ, kɛ o bɔlɔ ɔ ngɛ dee ke, “Imi ji Yawɛ, nihi tsuo kulaa a bɔlɔ ɔ nɛ. Imi nɔ kake too lɛ i bli hiɔwe mi, nɛ i ha zugba a fɔɔ si gbajaa. Mɛnɔ ke e nine ngɛ mi?

Efesobi 2:17

Lɔ ɔ he ɔ, Kristo ba nɛ e ba fiɛ sane kpakpa a nɛ haa nɔ he jɔmi ɔ ngɔ tsɔɔ nihi tsuo. E fiɛ ngɔ tsɔɔ nyɛ ma je li nɛ sa a nyɛɛ kɛ Mawu kpɛti kɛ ɔ, kɛ Yuda bi nɛ mɛɛ lɛɛ a ngɛ e kasa nya haa a.

Yesaya 51:5

Ma ba esɔesɔ, konɛ ma ba he a yi wami. Ye kunimi yemi be ɔ su ta. Imi nitsɛ ma ye je ma amɛ a nɔ. Wo nya zugba amɛ ngɛ mi mlɛe, a ngɔ a hɛ ngɔ fɔ ye nɔ kɛ ngɛ mi blɔ hyɛe kaa ma ba he a yi wami.

Yesaya 45:22

“Nyɛ nimli tsuo ngɛ je ɔ mi, nyɛɛ kpale kɛ ba ye ngɔ jehanɛ, konɛ a he nyɛ yi wami! Ejakaa imi nɔ kake too ji Mawu; Mawu kpa ko be.

Yesaya 42:12

Nyɛ ha nihi nɛ ngɛ zugbahi a nɔ ngɛ tsitsaa lokoo ɔ nɛ a wo Yawɛ hɛ mi nyami!

Yesaya 41:1

Mawu ke, “Nyɛ, wo nya mahi, nyɛɛ pee dii, nɛ nyɛɛ bu mi tue! Nyɛ dla nyɛ he saminya, konɛ waa hyɛ sane ɔ mi! Nyɛɛ hɛ nyɛ kɛ ba, konɛ nyɛ ba je nyɛ nya, nɛ waa hyɛ nɔ nɛ nɔ́ da.

Yesaya 9:6

Ejakaa a fɔ bi ha wɔ! A ha wɔ binyumuyo! Lɛ nɛ e ma ba ye wa nɔ. A ma tsɛ lɛ ke, “Nyakpɛ ga wolɔ,” “Mawu he walɔ,” “Tsɛ nɛ ngɛ kɛ yaa neneene,” “Ganɔ nɛ yi nɔ jɔ.”

Yesaya 66:19

Jamɛ a be ɔ loko a maa le kaa imi lɛ i ngɛ a tue gblae. “Se ma he a ti ni komɛ a yi wami, nɛ ma tsɔ mɛ kɛ maa ya je ma amɛ a ngɔ, kɛ zugbahi a nɔ ngɛ tsitsaa lokoo, he nɛ a nui ye we agbo jemi, kɛ ye he wami kpetekpleenyɛ ɔ he ngɛ lolo. Ma tsɔ mɛ Spania, Libia, Lidia he nɛ kɛ̃ɛ̃ tsɛ̃li kpakpahi ngɛ ɔ, Tubal, kɛ Hela. A ma ya fiɛ ngɛ je ma nɛ ɔmɛ a mi ke Mawu kpetekpleenyɛ ji mi.

Yesaya 7:14

Yoo, i nu. Nyɔmtsɛ ɔ nitsɛ ma ha nyɛ okadi ko; yiheyo ko maa ngɔ hɔ, nɛ e ma fɔ binyumu, nɛ e maa wo lɛ biɛ ke, ‘Yimanuel’.

La 22:10

Kɛ je be mi nɛ maa fɔ mi tɔɔ lɛ i ngɔ ye hɛ ngɔ fɔ o nɔ. Mo nɔ kake too ji ye Mawu.

Yesaya 11:11

Jamɛ a ligbi ɔ, Nyɔmtsɛ ɔ ma tsu ní kɛ he wami; e maa kpale e ma mi bi ɔmɛ nɛ piɛ ngɛ zugba nɛ ɔmɛ a nɔ ɔ kɛ maa ba we ekohu. A maa je Asiria, Egipt, Patros, Sudan, Elam, Babilonia, Hamat, kɛ mahi nɛ ngɛ wo nya a kɛ ba.

Yesaya 24:15

nɛ nihi nɛ ngɛ beleku je ma je e yi. Nihi nɛ ngɛ wo nya je ɔ hu ma je Yawɛ, Israel Mawu ɔ yi.

Yesaya 33:13

Nyɛ nihi nɛ ngɛ lokoo, kɛ ni nɛmɛ nɛ ngɛ kpo nya tsuo, nyɛ ta tue nɛ nyɛɛ nu nɔ́ nɛ i pee ɔ he, konɛ nyɛɛ na kaa ye he wa.”

Yesaya 45:3

Ma je juetli kpo ha mo kɛ je diblii mi, kɛ je hehi nɛ a ngɔ mɛ ngɔ laa ngɛ ɔ, konɛ o na nɛ o le kaa imi Yawɛ, Israel Mawu ɔ, i le mo, nɛ i kɛ o biɛ tsɛɔ mo.

Yesaya 49:12

Ee, ye ma a maa je tsitsaa kɛ maa ba, a maa je omleyi je kɛ bonyoku je, nɛ a maa je Aswan tɔɔ ngɛ leneyi je kɛ maa ba.”

Yesaya 52:13

Yawɛ ke, “Ye tsɔlɔ ɔ maa ye manye ngɛ e ní tsumi mi; a ma wo e nɔ gojoo, nɛ a maa wo e hɛ mi nyami babauu!