Yesaya 40:31 - BAIBLO ALOO NGMAMI KLƆUKLƆU Ɔ

³¹ Se ni nɛmɛ nɛ ngɔɔ a hɛ ngɔ fɔɔ Yawɛ nɔ ɔ, a naa he wami he kaa kɔle nɛ ngɛ tee; a tuɔ fo, nɛ pɔ tɔɛ mɛ, a nyɛɛɔ, nɛ a gbɔjɔɔ we.

Yesaya 40:31 ပူးပေါင်းရင်းမြစ်များ

2 Korintobi 4:16

Enɛ ɔ he ɔ, wa kɔni mi jɔ̃ we gblegbleegble. E ngɛ mi kaa wa nɔmlɔ tso ɔ ngɛ puɛe bɔɔbɔɔbɔɔ mohu, se mumi mi ɔ, wa ngɛ wae daa ligbi.

La 103:5

E haa mi ní kpakpahi babauu, nɛ daa nɛ ɔ, i naa he wami he kaa kɔle.

Hebribi 12:1

Amlɔ nɛ ɔ, nyɛɛ hyɛ nimli kpekpemi nitsɛnitsɛ kaa bɔku nɛ tsu a hemi kɛ yemi he ní nɛ bɔle wɔ kɛ kpe. Lɔ ɔ he ɔ, níhi tsuo nɛ tsiɔ wɔ blɔ, titli ɔ, yayami peemi nɛ gblaa wɔ se ɔ, nyɛ ha waa ngmɛɛ he, konɛ waa kɛ hɛ mi miami nɛ tu fo nɛ fɔɔ si ngɛ wa hɛ mi ɔ.

Galatabi 6:9

Lɔ ɔ he ɔ, wa ko ha nɛ kpakpa peemi nɛ gbe wa nya; ejakaa ke wa kɔni mi wui nyu ɔ, ní kpami be ɔ, wa ma na he se.

Romabi 8:25

Se ke wa ngɛ nɔ́ ko blɔ hyɛe, nɛ wa ngɔ wa hɛ kɛ fɔ nɔ kaa wa nine maa su nɔ ɔ, wa toɔ wa tsui si.

Yesaya 30:18

Se kɛ̃ ɔ, Yawɛ ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yawɛ nɔ ɔ, a naa bua jɔmi.

La 84:7

Pɔ tɔɛ mɛ; mohu ɔ, a naa he wami he, nɛ a nyɛɛɔ kɛ ya suu Mawu hɛ mi tɔɔ ngɛ Zion.

La 37:34

Ngɔɔ o hɛ ngɔ fɔ Yawɛ nɔ, nɛ o ye e mlaa amɛ a nɔ; nɛ e ma ha nɛ o nine maa su zugba a nɔ. Ke a ngɛ yayami peeli a hɛ mi kpatae ɔ, o hɛngmɛ kɛkɛ o kɛ maa hyɛ mɛ.

Luka 18:1

Jehanɛ ɔ, Yesu kɛ mɛ tu munyu ngɛ abɛ gbi mi kɛ tsɔɔ kaa e sa kaa a sɔle daa nɛ a kɔni mi kó wo nyu.

Yesaya 25:9

Ke e ba mi ja a, nɔ tsuaa nɔ ma de ke, “Wa Mawu ji nɛ ɔ nɛ! Wa ngɔ wa hɛ ngɔ fɔ e nɔ, nɛ e kpɔ wɔ. Lɛ ji Yawɛ. Akɛnɛ wa ngɔ wa hɛ ngɔ fɔ e nɔ nɛ́ e he wa yi wami he je ɔ, wa bua jɔ wa he, nɛ wa ngɛ nyae.”

La 138:3

Ligbi ɔ nɛ i tsɛ mo ɔ, o he nɔ. O wo mi kã, nɛ ye nɔ gbagba te.

La 25:5

Tsɔɔ mi nɛ ma hi si ngɛ o we anɔkuale ɔ nya, ejakaa mo Mawu ɔ ji ye yi wami helɔ. Daa nɛ ɔ, o nɔ lɛ i ngɔɔ ye hɛ kɛ fɔɔ.

La 25:3

Nihi nɛ ngɔ a hɛ kɛ fɔ o nɔ ɔ, ko ha nɛ zo nɛ gbe mɛ. Ha nɛ nimli yayamihi, kɛ yakayaka nimli mohu a hɛ mi nɛ pue si.

Mose II, 19:4

“Nyɛ nitsɛmɛ nyɛ na nɔ́ nɛ i pee Egipt bi ɔmɛ, kɛ bɔ nɛ i kɛ he wami je nyɛ kɛ je Egipt kaa nɔ́ nɛ kɔle pɛli nɔ nɛ nyɛ hii si ngɛ, nɛ i ngɔ nyɛ kɛ ba imi nitsɛ ye ngɔ.

Hebribi 12:3

Nyɛ susu si nɛ yayami peeli te ngɔ wo lɛ ɔ, kɛ bɔ nɛ e to e tsui si kɛ na nɔ́ wawɛɛ ɔ he, konɛ pɔ ko tɔ nyɛ, nɛ nyɛ kɔni mi ba jɔ̃.

Hiob 17:9

Se bɔ tsuaa bɔ nɛ pee ɔ, dalɔ hii e blɔ nɔ kɛ̃. Nɔmlɔ nɛ yayami ko be e he ɔ, e naa he wami he ekohu.

La 40:1

I to ye tsui si kɛ hyɛ blɔ kaa Yawɛ ma ba piɛ ye he lo. Niinɛ, e bu mi tue, nɛ e nu ye kue fami ɔ.

Kpojemi 2:3

O toɔ tsui si; o naa amanehlu ngɛ ye he nɛ pɔ tɔɛ mo.

La 25:21

I ngɔ ye hɛ kɛ fɔ o nɔ, nɛ́ o bu ye he. Ha nɛ ye he nɛ tsɔ, nɛ ma ye anɔkuale kɛ pi si.

La 123:2

O nɛ, bɔ nɛ tsɔli hyɛɛ a nyɔmtsɛ blɔ, nɛ mawayo hu hyɛɛ e wenyɛ blɔ ɔ, ja nɔuu wɔ hu wa ngɛ Yawɛ, wa Mawu ɔ blɔ hyɛe kɛ yaa su be nɛ e maa na wɔ mɔbɔ.

Zakaria 10:12

Ma ha ye ma a he wami he; nɛ a maa nyɛɛ ngɛ ye biɛ mi.” Yawɛ lɛ de.

2 Korintobi 4:1

Akɛnɛ Mawu naa mɔbɔ he je ɔ, e ha wɔ ní tsumi nɛ ɔ ke wa tsu. Lɔ ɔ he ɔ, wa kɔni mi jɔ̃ we.

Yesaya 8:17

Yawɛ ngɔ e hɛ mi ngɔ laa e ma a, se imi lɛɛ i heɔ yeɔ, nɛ i ngɔ ye hɛ ngɔ fɔ e nɔ.

La 92:13

A ngɛ kaa tsohi nɛ a du ngɛ Yawɛ we ɔ, tsohi nɛ bɔ ngɛ wa Mawu ɔ kue ɔmɛ a mi.

1 Tesalonikabi 1:10

Mawu Bi Yesu ɔ nɛ Mawu tle lɛ si kɛ je gbeje ɔ, a tsɔɔ kaa nyɛ ngɛ lɛ blɔ hyɛe kaa e maa je hiɔwe kɛ ba ekohu. Lɛ ji nɔ nɛ ma je wɔ kɛ je tue gblami nɛ ma a mi.

Manyadali 16:28

Kɛkɛ nɛ Samson fa kue ha Yawɛ ke, “Yawɛ Nyɔmtsɛ, i kpa mo pɛɛ, mo kai mi jehanɛ. Mawu lee, mo ha mi ye he wami ɔ si kake nɛ ɔ pɛ, konɛ ma ye ye he lue ngɛ Filisti bi ɔmɛ a nɔ, ngɛ ye hɛngmɛ enyɔ ɔmɛ a he.”

La 92:1

Yawɛ, e hi kaa a na mo si. E hi kaa a la kɛ je mo, Hiɔwe No ɔ o yi.

Lahi 8:5

Mɛnɔ nɛ je nga kplanaa a nɔ kɛ ma, nɛ e kɛ e nine la e suɔlɔ mi kikɛ nɛ ɔ? Imi nɛ i ba tsɛ̃ɛ̃ mo ngɛ tso nɛ yiblii ngɔɔ saminya a sisi, he nɛ o nyɛ nu kɔɔmi nɛ e fɔ mo ngɛ ɔ.

Kpojemi 4:7

Kekleekle nɔ́ ɔ ngɛ kaa jata, nɛ nɔ́ nɛ ji enyɔ ɔ ngɛ kaa na ku. Hɛ kalɔ nɛ ji etɛ ɔ hɛ mi ngɛ kaa adesa hɛ mi, nɛ nɔ nɛ ji eywiɛ ɔ lɛɛ e ngɛ kaa kɔle nɛ te kɛ bee.

Kpojemi 12:14

Se a ha yo ɔ kɔle nguaa a pɛli enyɔ ɔmɛ, konɛ e kɛ tu fo kɛ ya e hi he ɔ ngɛ nga a nɔ. A maa hyɛ e nɔ ngɛ lejɛ ɔ jeha etɛ kɛ fa, nɛ sinɔ nguaa a nine be e nɔ sue.

Mose V, 32:11

Bɔ nɛ kɔle buu e tsu he, nɛ e tee kɛ bɔleɔ e bimɛ, nɛ e bliɔ e pɛli mi, nɛ e ngɔɔ e bimɛ ngɔ fɔɔ nɔ kɛ tee kɛ yaa hiɔwe ɔ, ja Yawɛ hɛɛ Israel.

Yesaya 41:1

Mawu ke, “Nyɛ, wo nya mahi, nyɛɛ pee dii, nɛ nyɛɛ bu mi tue! Nyɛ dla nyɛ he saminya, konɛ waa hyɛ sane ɔ mi! Nyɛɛ hɛ nyɛ kɛ ba, konɛ nyɛ ba je nyɛ nya, nɛ waa hyɛ nɔ nɛ nɔ́ da.

Yesaya 64:4

Kɛ je blema lokoo ɔ, nɔ ko nui hyɛ, nɛ nɔ ko hu nɛ kaa o se ɔ, mawu kpa ko ngɛ nɛ peeɔ nɔ́ haa nihi nɛ ngɔɔ a hɛ ngɔ fɔɔ e nɔ ɔ!

Yeremia 48:15

A kpata Moab zugba a, kɛ ma amɛ tsuo a hɛ mi; a gbe Moab nihewi kpakpa amɛ tsuo. Imi matsɛ ɔ, Yawɛ Tabohiatsɛ ɔ, imi lɛ i de.

Mose V, 33:25

Á ma a ma amɛ a nya dade agbohi, konɛ a na he wami daa.”

Yoshua 14:11

se i ngɛ he wami saminya. Bɔ nɛ i ngɛ be nɛ Mose tsɔ mi ɔ, jã kɛ̃ i ngɛ mwɔnɛ ɔ. I ngɛ he wami kɛ mwɔɔ nɛ ma nyɛ kɛ ya ta, loo ma kɛ tsu nɔ́ tsuaa nɔ́.

La 20:9

Yawɛ, mo he matsɛ ɔ yi wami; ke wa tsɛ mo ɔ, bu wɔ tue.

La 84:8

Yawɛ Tabohiatsɛ Mawu, bu ye kue fami ɔ tue! Yakob Mawu, moo bu mi tue koo!

Abɛ Womi 30:19

Kɔle nɛ ngɛ tee ngɛ kɔɔhiɔ mi kɛ bee; sinɔ nɛ ngɛ si sããe ngɛ tɛ sa nɔ, lɛ nɛ ngɛ nyɛɛe ngɛ wo nɔ, kɛ nyumu kɛ yo a bɔmi.

Yesaya 30:15

Nyɔmtsɛ Yawɛ, Israel Mawu klɔuklɔu ɔ ngɛ ma a dee ke, “Nyɛɛ kpale kɛ ba, nɛ nyɛɛ ngɔ nyɛ hɛ ngɔ fɔ ye nɔ kpoo. Ja jã loko nyɛ he maa wa, nɛ nyɛ ma na wami.” Se nyɛ kplɛɛ we kaa nyɛ maa pee ja!