Yesaya 3:24 - BAIBLO ALOO NGMAMI KLƆUKLƆU Ɔ

²⁴ Nu je via be hae nɛ a he maa je via hu, a he maa je fu mohu; tangme kpa titlii a kɛ maa fi a mlɛ mi, pi mlɛ mi fimi nɔ́ saminyawiiwi ɔmɛ hu; yi nɛ a hɔɔ saminyayoo ɔ maa pee kpalokpalo; a heha ní kpakpa amɛ ma plɛ pee tako piɛ; a he fɛu ɔ ma plɛ pee zo ha mɛ!

Yesaya 3:24 ပူးပေါင်းရင်းမြစ်များ

Ezekiel 27:31

A sɛ a yi kpalokpalo; a ha kpekpe ya bo kɛ ngɛ aywilɛho yee; a ngɛ ya nyɛe wawɛɛ ha mo.

Kɔmɔ Yemi 2:10

Yerusalem nimeli ɔmɛ hii si dii ngɛ zugba. A ngɔ bunyuku ngɔ pue a yi mi, nɛ a ha kpekpe ya bo kɛ tsɔɔ kaa a pia a he. Yihewi ɔmɛ ngɔ a hɛ mi kɛ bu si.

Mika 1:16

Yuda bi, nyɛ sã nyɛ yi nɔ, nɛ nyɛɛ ye kɔmɔ ha nyɛ bimɛ nɛ nyɛ suɔ mɛ ɔ. Nyɛ ngmla nyɛ yi kaa okpokuhi, ejakaa a ma ba ngɔ nyɛ bimɛ ɔmɛ nyɔguɛ kɛ je nyɛ he.

Yesaya 22:12

Jamɛ a ligbi ɔ, Nyɔmtsɛ Yawɛ Tabohiatsɛ ɔ tsɛ ke nyɛ fo ya nɛ nyɛɛ ye kɔmɔ; nyɛɛ sɛ nyɛ yi kpalokpalo, nɛ nyɛɛ ha kpekpe ya bo,

Yesaya 15:3

A bu kpekpe ya bo kɛ nyɛɛ gbɛjegbɛ ɔmɛ a nɔ, nɛ a wo yana ngɛ ma kpe he ɔmɛ kɛ a tsu ɔmɛ a yi mi.

1 Petro 3:3

Nyɛ ko ngɔ níhi kaa yi gbɔmi, loo sika tsu ní womi, loo bo nɛ ngɛ fɛu bumi kɛ dla nyɛ he.

Amos 8:10

Jehanɛ se hu, be mi nɛ nyɛ ngɛ ní yee, nɛ nyɛ ngɛ nyae ɔ, ma ha nɛ nyɛ ma bɔni kɔmɔ yemi jamɛ a be ɔ mi nɔuu; ma tsake nyɛ bua jɔmi la amɛ kɛ pee kɔmɔ yemi lahi. Ma ha nɛ nyɛ ma sã nyɛ yi nɔ, nɛ nyɛ ma bu kpekpe ya bo. Ma ha nɛ nyɛ maa ye kɔmɔ kaa nɔ ko nɛ e bi kake too pɛ ɔ gbo; nɔ tsuaa nɔ maa pee mɔbɔmɔbɔ jamɛ a ligbi ɔ.

Ester 2:12

Bɔ nɛ a peeɔ kɛ dlaa yi ɔmɛ a he nɛ a he peeɔ fɛu ji nɛ ɔ nɛ: a pɔɔ mɛ nu, nɛ a kpaa mɛ mimɛ nyɔhiɔ ekpa; nɛ a pɔɔ mɛ nu kɛ e he via nyɔhiɔ ekpa ekohu; lɛ tsuo peeɔ jeha kake. Lɔ ɔ se ɔ, a toɔ be ha yihewi ɔmɛ, nɛ a kɛ mɛ yaa Matsɛ Ahasuerus ngɔ kakaaka.

Mose III, 26:16

lɛɛ ma ngɔ amanehlu gbeyegbeye nɛ ɔmɛ kɛ gbla nyɛ tue: hiɔ nɛ be tsa ba, kɛ asla nɛ puɛɔ nɔ hɛngmɛ, nɛ haa nɔ peeɔ hiɔtsɛ kulaa. Nyɛ ma du ní, se nɔ́ kpakpa ko be mi jee; ejakaa nyɛ he nyɛli maa ye nyɛ nɔ, nɛ mɛ mohu a ma ba ye ní ɔmɛ nɛ nyɛ du ɔ.

Kpojemi 18:9

Je nɛ ɔ mi matsɛmɛ ɔmɛ nɛ a kɛ Babilon bɔ ajuama, nɛ a fiɛ a yi nɔ ɔ, ke be nɛ a sã ma a, nɛ a na la su ku nɛ ngɛ jee ɔ, a maa wo yana, nɛ a ma nya awe ha ma a.

Kpojemi 16:9

Pu la nɛ nya wa a sãã mɛ saminya, nɛ a tu musu bɔmi munyuhi kɛ si Mawu, nɔ nɛ ngɛ he wami ngɛ kikɛmɛ a haomi nɛ ɔmɛ a nɔ ɔ. Se a tsakee we a tsui, konɛ a wo Mawu hɛ mi nyami.

Kpojemi 11:3

Ye we odase yeli enyɔ ɔmɛ ma bu kpekpe ya bo; nɛ ma ha a maa gba ligbi akpe kɛ e nya lafa enyɔ kɛ nyingmi ekpa.”

Yoel 1:8

Nyɛ nya awe kaa bɔ nɛ yomiyo nyɛɛ ya kɛ haa nyumu nɛ na we nɛ e kpee lɛ loko e gbo ɔ.

Ezekiel 7:18

A ma bu kpekpe ya bo; sawale maa nu mɛ. A ma sã mɛ tsuo a yi nɔ ha mɛ, nɛ zo maa gbe mɛ kpɔtɔɔ.

Yeremia 48:37

A ti nɔ tsuaa nɔ sã e yi nɔ kpalokpalo, nɛ e sɛ kpɛni. Mɛ tsuo a poo a kɔnihi a he, nɛ a ngɔ kpekpe kɛ muɔ a mlɛ mi.

Yeremia 6:26

Yawɛ de e ma a ke, “Nyɛ bu kpekpe ya bo, nɛ nyɛɛ ngɔ nyɛ he kɛ wuwlua si ngɛ la zu mi. Nyɛɛ wo yana nɛ nyɛɛ ye kɔmɔ kaa a yeɔ kɔmɔ kɛ haa bi kake too nɛ gbo, ejakaa ta a nɛ ma nyɛ hɛ mi kpatami ɔ ma ba tua nyɛ tlukaa.

Yeremia 4:8

Enɛ ɔ he je ɔ, nyɛ bu kpekpe ya bo; nyɛɛ wo yana nɛ nyɛ nya awe, ejakaa Yawɛ mi mi fumi nɛ nya wa a ji Yuda nɔ lolo.

Yesaya 57:9

Nyɛ ngɔɔ nu, kɛ nu kɛ e he via fuu kɛ hiaa blɔ kɛ ya jaa mawu ɔ nɛ a tsɛɛ Molek ɔ. Bɔ nɛ pee nɛ nyɛ na mawu kpahi nɛ nyɛ ja a, nyɛ tsɔɔ nihi kɛ yaa ma se tsitsaa lokoo, kɛ yaa gbeje tete po.

Abɛ Womi 31:24

Yo ɔ kpɛɔ kploba tade nɛ e juaa; e juaa mi mi fimi níhi hu kɛ haa je juali.

Abɛ Womi 7:17

I kɛ tsopa kɛ e he via nɛ ɔmɛ wo sa a mi: mimɛ, aloe, kɛ sinamon.

Hiob 16:15

I kpɛ kpekpe ngɔ ha ye he, nɛ i hii si ngɛ zugba kɛ ngɛ kɔmɔ yee.

Mose V, 32:24

Hwɔ kɛ aslã maa gbe mɛ, nɛ hiɔhi nɛ ngɛ gbeyegbeye ma kpata a hɛ mi. Ma ha nga mi lohwe awi yeli ma ba tua mɛ, nɛ sinɔ duɔtsɛmɛ maa kɔɔ mɛ.

Mose V, 28:22

Yawɛ ma ha hiɔ nɛ sãã nɔ kaa gugue hiɔ maa ba; e ma ha nɛ aslã kɛ fuumi hiɔ maa ba. Jehanɛ, nyu hwɔ maa ye, pu maa tso, nɛ je mi maa dɔ la wawɛɛ; kɛkɛ ɔ, nyɛ ngmɔ mi níhi a hɛ mi ma kpata. Haomi nɛ ɔmɛ be tae kɛ yaa si nyɛ gbenɔ be.

Yeremia 49:3

Nyɛ Heshbon bi, nyɛɛ wo yana, ejakaa a kpata Ai hɛ mi. Raba yihi, nyɛ nya awe! Nyɛ bu kpekpe ya bo, nɛ nyɛɛ ye kɔmɔ. Nyɛɛ hi fo tue kɛ hi bee basaa kɛkɛ. Nyɛ mawu ɔ nɛ a tsɛɛ lɛ Milkom ɔ, a ma ba ngɔ lɛ kɛ ho ma se ya, kɛ e we osɔfo ɔmɛ, kɛ ganɔ ɔmɛ.

Yesaya 4:4

Nyɔmtsɛ ɔ kɛ e he wami maa kojo Zion biyi ɔmɛ, nɛ e maa tsu ma a he. E ma fɔ mu níhi, kɛ muɔ nɛ pue si ngɛ Yerusalem ɔ tsuo.

Yesaya 3:23

kploba heha ní ɔmɛ, mele duku ɔmɛ, yi duku ɔmɛ, kɛ hɛ mi hami nɔ́ gagaa amɛ tsuo ɔ, Nyɔmtsɛ ɔ ma je ngɛ a he.

Yesaya 15:2

Dibon bi ɔmɛ kuɔ yo ɔ, nɛ a ya wo yana ngɛ a jami he ɔmɛ. Moab bi ɔmɛ wo yana kɛ nyɛ ya ha Nebo kɛ Medeba. A sɛ a yi, kɛ a kpɛni tsuo kɛ ye kɔmɔ.