Yesaya 26:7 - BAIBLO ALOO NGMAMI KLƆUKLƆU Ɔ

⁷ Nihi nɛ peeɔ nɔ́ kpakpa a, a blɔ da tlɔmɔɔ; mo lɛ o ha a blɔ da ja a nɛ.

Yesaya 26:7 ပူးပေါင်းရင်းမြစ်များ

Efesobi 2:10

Mawu nitsɛ lɛ pee wɔ bɔ nɛ wa ngɛ nɛ ɔ. E ha waa kɛ Kristo Yesu ba nu huɛ, bɔ nɛ pee nɛ waa ngɔ wa wami be ɔ tsuo kɛ pee nihi kpakpa. E to blɔ nya nɛ ɔ blema lokoo konɛ waa nyɛɛ ngɛ nya.

1 Yohane 3:7

Ye bimɛ tsɔwi, nyɛ ko ha nɛ nɔ ko nɛ sisi nyɛ! Nɔ tsuaa nɔ nɛ peeɔ nɔ́ nɛ da a, dalɔ ji lɛ kaa bɔ nɛ Kristo hu dalɔ ji lɛ ɔ.

2 Korintobi 1:12

Nɔ́ kake nɛ wa fĩaa ngɔ fɔɔ nɔ, nɛ wa he nile hu yeɔ he odase ji kaa wa baa wa je mi saminya ngɛ he tsuaa he, titli ngɛ waa kɛ nyɛ wa bɔmi mi kaa bɔ nɛ Mawu ngɛ hlae ɔ. Wa yeɔ anɔkuale nɛ mu ko mu ko be wa he. Pi wɔ nitsɛmɛ wa nile nɛ waa kɛ peeɔ enɛ ɔ, se mohu Mawu dloomi ɔ nya.

Yesaya 42:16

“Ma ngɔ ye hɛ yuyuili ɔmɛ kɛ gu hehi nɛ a nyɛɛ we hyɛ. Ma ha a diblii ɔ ma plɛ pee la; nɛ ma ha zugba nɛ nɔ ngɛ googagooga a nɔ maa sɔ tɛtlɛɛ ha mɛ. Níhi nɛ i ngɛ si woe kaa ma pee ji nɛ ɔmɛ nɛ; ma ha a maa ba mi pɛpɛɛpɛ.

1 Yohane 3:10

Slɔɔto titli nɛ ngɛ Mawu bimɛ, kɛ Abosiami bimɛ a kpɛti ji nɛ ɔ nɛ. Nɔ tsuaa nɔ nɛ pee we nɔ́ nɛ da, aloo nɔ nɛ sume e nyɛmi ɔ, pi Mawu bi ji lɛ.

Abɛ Womi 20:7

Bimɛ nɛ a tsɛ yeɔ anɔkuale, nɛ e peeɔ nɔ́ nɛ da a, a gbaa mɛ.

La 11:7

Ejakaa Yawɛ ɔ, dalɔ ji lɛ; e suɔ kaa a pee níhi nɛ da. Dali maa na e hɛ mi.

1 Korintobi 4:5

Lɔ ɔ he ɔ, nyɛ ko kojo nɔ ko loko be ɔ nɛ su. Nyɛɛ mlɛ kɛ yaa si Nyɔmtsɛ ɔ maa ba. Ke e ba a, e ma je diblii mi níhi, kɛ tsui mi ní yayahi nɛ a kɛ laa a tsuo kpo. Jamɛ a be ɔ, nɔ tsuaa nɔ ma na yi jemi nɛ sa lɛ ɔ kɛ je Mawu dɛ mi.

Yesaya 35:8

A maa je gbɛjegbɛ ko ngɛ lejɛ ɔ, nɛ a ma tsɛ lɛ ke “Blɔ klɔuklɔu.” Yayami peelɔ ko yayami peelɔ ko be nyɛe ngɛ jamɛ a blɔ ɔ nɔ gblegbleegble; nɛ blɔ hialɔ kuasia ko be tlae kɛ ba blɔ nɛ ɔ nɔ.

La 1:6

Ejakaa Yawɛ buu dali a he, se yayami peeli lɛɛ a hɛ mi ma kpata.

Hiob 31:6

Mawu nɛ́ ngmɛ mi ngɛ sɛni nɛ da nɔ, nɛ e maa na kaa i pee we yayami ko.

Kronika I, 29:17

Ye Mawu, i le kaa moo lɛɛ o hyɛɛ nɔ tsui mi nɛ o kɛ leɔ ni nɛmɛ nɛ hi, ejakaa o naa ni kpakpahi a he bua jɔmi. I ngɔ ní nɛ ɔmɛ tsuo ngɔ ke mo kɛ je ye tsui mi faa, nɛ i na kaa o ma nɛ ba pue si ngɛ hiɛmɛ nɛ ɔ, mɛ hu a je a tsui mi faa ba ke mo ní.

Zefania 3:5

Se Yawɛ ngɛ ma a mi; lɛɛ dalɔ ji lɛ; e pee we nɔ́ nɛ dɛ. Daa ligbi ɔ, e yeɔ dami sane. Se kɛ ɔ, yayami peeli ɔmɛ yaa nɔ nɛ a peeɔ yayami, nɛ nɔ́ nɛ ɔ pee we mɛ zo.

La 11:4

Yawɛ ngɛ e we klɔuklɔu ɔ; e matsɛ sɛ ɔ, hiɔwe lɛ e ngɛ. E hɛngmɛ ngɛ nimli adesahi hyɛe ngɛ he tsuaa he; e le níhi nɛ a ngɛ pee.

La 25:4

Yawɛ, tsɔɔ mi o blɔ ɔmɛ; Yawɛ, ha nɛ ma le o blɔ ɔmɛ.

La 25:5

Tsɔɔ mi nɛ ma hi si ngɛ o we anɔkuale ɔ nya, ejakaa mo Mawu ɔ ji ye yi wami helɔ. Daa nɛ ɔ, o nɔ lɛ i ngɔɔ ye hɛ kɛ fɔɔ.

La 27:11

Yawɛ, tsɔɔ mi nɔ́ nɛ o ngɛ hlae nɛ ma pee, nɛ o kpaka mi kɛ gu blɔ nɛ da nɔ, ejakaa i ngɛ he nyɛli babauu.

Abɛ Womi 4:18

Blɔ nɛ dali nyɛɛɔ nɔ ɔ ngɛ kaa mɔtu pu la nɛ ngɛ kpɛe hluu kɛ yaa si piani.

Yesaya 52:12

Jehanɛ lɛɛ e hia we kaa nyɛ maa ye esɔ kɛ hia blɔ; nyɛ be fo tue kɛ je. Ejakaa Yawɛ, Israel Mawu ɔ maa nyɛɛ nyɛ hɛ mi ngɛ he tsuaa he nɛ nyɛ yaa a, nɛ e maa bu nyɛ he.

Yesaya 57:2

Nihi nɛ baa a je mi saminya, nɛ a peeɔ nɔ́ nɛ da a, ke a gbo ɔ, a naa tue mi jɔmi, kɛ he jɔmi.

Yeremia 10:23

Yawɛ, i le kaa nɔmlɔ adesa ko be he wami ngɛ lɛ nitsɛ e wami nɔ. Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.

Hosea 14:9

Mɛnɔ ji ní lelɔ? Ha nɛ e nu ní nɛ ɔmɛ a sisi. Mɛnɔ lɛ nuɔ nɔ́ sisi? Ha nɛ e yɔse. Ejakaa Yawɛ blɔ ɔmɛ da tlɔmɔɔ, nɛ nihi nɛ peeɔ nɔ́ nɛ da a nyɛɛɔ nɔ tɛɛ. Se yayami peeli lɛɛ a tɛɔ nɔ́, nɛ a nɔɔ si.

La 5:9

Ejakaa ye he nyɛli ɔmɛ tu we anɔkuale; yayami hyi a tsui mi tɔ. A tuɔ munyu dɔkɔdɔkɔ, se lɛ tsuo kɛ gbenɔ ba a.

Abɛ Womi 3:6

Nɔ́ tsuaa nɔ́ mi ɔ, mo kai Yawɛ, nɛ e maa tsɔɔ mo blɔ nɛ da.

Abɛ Womi 11:5

Nɔ nɛ pee we nɔ́ ko nɛ dɛ ɔ, anɔkuale nɛ e yeɔ he je ɔ, e je mi si himi daa lɛ. Se yiwutsotsɛ lɛɛ lɛ nitsɛ e ní yayamihi lɛ ma kpata e hɛ mi.

Abɛ Womi 21:8

Nɔ nɛ yeɔ fɔ ɔ, e blɔ ngɛ gɔdɔgɔdɔ, se nɔ nɛ tsui mi tsɔ ɔ, e subai hi.

Yesaya 30:18

Se kɛ̃ ɔ, Yawɛ ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yawɛ nɔ ɔ, a naa bua jɔmi.