Yesaya 1:23 - BAIBLO ALOO NGMAMI KLƆUKLƆU Ɔ

²³ Atuã tsɔli ji o ganɔ ɔmɛ, nɛ juli ji o huɛmɛ; be tsuaa be ɔ, nike ní, kɛ nyɔ mi ní a ngɛ hee. A yi awusahi a sane ha we mɛ ngɛ sane yemi he, nɛ a bui yalɔyihi hu a sane tue.

Yesaya 1:23 ပူးပေါင်းရင်းမြစ်များ

Kronika II, 36:14

Jehanɛ se hu, Yuda ma nimeli ɔmɛ, osɔfo ɔmɛ, kɛ ma a tsuo pee yayami kɛ si Yawɛ. A ya sɔmɔ je ma amɛ nɛ bɔle mɛ ɔ a mawu ɔmɛ, nɛ a kɛ nɔ́ nɛ ɔ ble Yawɛ we ɔ nɛ lɛ Yawɛ ɔ nitsɛ pee klɔuklɔu ngɛ Yerusalem ɔ.

Mose II, 23:8

Ko he nyɔ mi ní; ejakaa nyɔ mi ní hemi yuɔ tsɔli a hɛngmɛ, nɛ a plɛɔ dali a sane hɛ mi ngɔ buɔ si.

Abɛ Womi 17:23

Yiwutsotsɛ heɔ nyɔ mi ní ngɛ laami mi nɛ́ e kɛ plɛ dami sane hɛ mi ngɔ bu si.

Abɛ Womi 29:24

Nɔ nɛ kɛ julɔ ya dlaa ju ní ɔ, e he mi jɔɛ lɛ kɔkɔɔkɔ; e nuɔ kita nɛ a ka ngɛ nɔ́ ɔ he, se e peeɔ kɔ̃, konɛ a ko nu nɔ́ ko kɛ je e nya.

Yesaya 1:17

nɛ nyɛɛ kase kpakpa peemi. Nyɛɛ ye dami sane; nihi nɛ a ngɛ mɛ yi mi wae ɔ, nyɛɛ ye a sane ha mɛ; nyɛ ha awusahi a blɔ nya níhi, nɛ nyɛɛ ye yalɔyihi a sane ha mɛ.”

Yesaya 1:18

Yawɛ ke, “Jehanɛ, nyɛɛ ba nɛ wɔ tsuo wa susu he. Ke nyɛ he yayami ɔ tsu kaa mɛni po, ma ha e ma hiɛ futaa kaa snoo, loo jijɔ he bwɔmi.

Yesaya 1:22

Yerusalem, mo nɛ be ko ɔ, o he jua wa kaa sika hiɔ ɔ, jehanɛ lɛɛ, o he be se nami ko kulaa; sa a, o ngɛ kaa dã kpakpa; se jehanɛ lɛɛ, o ngɛ kaa dã nɛ a tsa mi nyu.

Yesaya 28:14

Jehanɛ, nyɛ he nɔ woli nɛ nyɛ ngɛ ma nɛ ɔ nɔ yee ngɛ Yerusalem hiɛmɛ nɛ ɔ, nyɛɛ bu nɔ́ nɛ Yawɛ ngɛ dee ɔ tue.

Yesaya 3:14

Yawɛ kɛ ma nimeli, kɛ ganɔ ɔmɛ lɛ na sane ɔ nɛ. Munyu nɛ e kɛ ba po a nya ji nɛ ɔ nɛ: “Nyɛ kpata wai ngmɔ ɔmɛ a hɛ mi, nɛ níhi nɛ nyɛ kpɔ ngɛ ohiatsɛmɛ a dɛ ɔ, nyɛ ngɔ kɛ to nyɛ wehi a mi.

Yesaya 30:1

Yawɛ ke, “Musu tloo Yuda ma nimeli ɔmɛ, ejakaa a kua mi. A toɔ gahi, nɛ a peeɔ níhi ngɛ mɛ nitsɛmɛ a dɛ he. A kɛ nihi soɔ nɛ pi ye suɔmi nya. Bɔ nɛ a peeɔ kɛ tĩaa yayami ngɔ haa a he ji nɛ ɔ nɛ.

Yesaya 33:15

Ee, nɔ nɛ peeɔ nɔ́ nɛ da, nɛ e tuɔ anɔkuale, nɔ nɛ sume kaa e maa ye nɔ ko awi nɛ e kɛ na ní, nɛ e he we nyɔ mi ní hulɔ, nɔ nɛ tsiɔ e tue nɛ e ko nu muɔ si puemi sane ko, nɛ e kɛ e hɛngmɛ hyɛ we nɔ́ yaya a, e yi ma na wami.

Yesaya 5:23

Nyɛ heɔ nyɔ mi ní ngɛ nihi nɛ ye fɔ a dɛ nɛ nyɛ ngmɛɔ a he; se nihi nɛ yi fɔ mohu lɛɛ nyɛ yi a sane ha we mɛ.

Yesaya 65:2

Se ma a tsɛ we mi. Daa nɛ ɔ, i pee klaalo nɛ ma he ye ma a atuu; ma nɛ kplii a tsui, nɛ a peeɔ nɔ́ nɛ dɛ, kɛ mɛ nitsɛmɛ a suɔmi nya ní ji mɛ.

Yeremia 22:17

Se moo lɛɛ o susumi pɛ ji bɔ nɛ o maa pee kɛ sisi nihi nɛ o kpɔ a níhi yaka. O pueɔ nihi nɛ pee we nɔ́ ko a muɔ si; o yeɔ o ma a amimi, nɛ o waa mɛ yi mi. Yawɛ lɛ de.

Yeremia 32:32

ejakaa Yuda ma a, kɛ Yerusalem bi ɔmɛ, a matsɛmɛ ɔmɛ, ma nimeli ɔmɛ, osɔfo ɔmɛ, kɛ gbali ɔmɛ pee yayamihi babauu nɛ a kɛ wo ye mi mi la.

Yeremia 4:17

A ma sá Yerusalem ma a yi kɛ kpe kaa bɔ nɛ buli buɔ zugba he ɔ; ejakaa ma mi bi ɔmɛ tsɔ Yawɛ hɛ mi atuã. Yawɛ lɛ de.

Yeremia 5:5

Ma ya nimli ngua amɛ a ngɔ, nɛ i kɛ mɛ ma ya tu munyu. Niinɛ, mɛɛ lɛɛ a le nɔ́ nɛ Yawɛ, a Mawu ɔ ngɛ hlae nɛ a pee.” Se ni nɛ ɔmɛ hu ngɛ kaa nimli gu ɔmɛ kɛ̃; mɛ hu a tsɔ Yawɛ hɛ mi atuã, nɛ a bui lɛ fɛɛ.

Yeremia 5:6

Enɛ ɔ he je ɔ, jata maa je pu mi kɛ ba gbe mɛ; ogbetee maa je nga nɔ kɛ ba tsɔtslɔɔ a mi dukuduku, nɛ ngatsɛ ma ba wo ka ngɛ a ma amɛ a mi. Nɔ tsuaa nɔ nɛ maa je kpo ɔ, a ma tsɔtslɔɔ lɛ; ejakaa a pee yayamihi fuu, nɛ a tsɔ Mawu hɛ mi atuã si abɔ.

Ezekiel 12:2

E ke, “Nɔmlɔ adesa, nimli nɛ a tue wa a kpɛti o ngɛ ɔ nɛ. A ngɛ hɛngmɛ, se a hyɛ we nɔ́; a ngɛ tue hulɔ, se a nui nɔ́; ejakaa atuã tsɔli ji mɛ.

Ezekiel 22:27

Ganɔ ɔmɛ ngɛ kaa ogbeteehi nɛ ngɛ a de lo mi tsɔtslɔɔe. A gbeɔ nɔ, bɔ nɛ pee nɛ a na ní yaka.

Hosea 4:18

Ke Israel bi ya tɔ dã kikɛ nɛ ɔ, a bɔɔ ajuama, nɛ a bua jɔɔ. Zo níhi a he a nyaa, pi níhi nɛ maa wo a hɛ mi nyami.

Hosea 5:10

Yawɛ ke, “Ye mi mi wo la, ejakaa Yuda ma nimeli ɔmɛ ya tua Israel ma a, nɛ a kpɔ zugba ngɛ a dɛ. Enɛ ɔ he je ɔ, ma ngɔ ye abofu ɔ kɛ kple a nɔ kaa bɔ nɛ ke pa hia nɛ e puɛɔ ní ɔ.

Hosea 9:15

Yawɛ ke, “Israel ma a je a yayami peemi ɔ tsuo sisi ngɛ Gilgal, nɛ lejɛ ɔ a he bɔni mi tai peemi kɛ je. Yi wu tso níhi nɛ a pee ɔ a he ɔ, ma fie mɛ kɛ je zugba a nɔ. I be mɛ suɔe hu; Israel ma nimeli ɔmɛ tsuo tsɔ ye hɛ mi atuã.

Mika 3:11

Ma nimeli ɔmɛ heɔ nyɔ mi ní loko a buá sane he; osɔfo ɔmɛ heɔ hiɔwo loko a tsɔɔ mlaa a sisi; gbali ɔmɛ heɔ sika loko a gbaa. Se mɛ tsuo a buɔ Mawu kua pɛɛ nɛ a deɔ ke, “Yawɛ kɛ wɔ ngɛ; nɔ́ ko nɔ ko be wɔ pee!”

Mika 3:9

Nyɛ Israel ma nɔ yeli! Nyɛ nihi nɛ nyɛ yi dami sane, nɛ nyɛ plɛɔ dami sane hɛ mi ngɔ buɔ si! Nyɛɛ bu mi tue!

Mika 6:12

Niatsɛmɛ nɛ ngɛ nyɛ kpɛti ɔ sisiɔ ohiatsɛmɛ ɔmɛ, nɛ nyɛ tsuo pɛpɛɛpɛ ɔ, lakpatsɛmɛ ji nyɛ.

Mika 7:3

Mɛ tsuo pɛpɛɛpɛ a he sɔɔ kɛ yayami peemi. Ma ní tsuli kɛ kojoli heɔ nyɔ mi ní. Niatsɛmɛ ɔmɛ heɔ mɛ kɛ sika. A tsɔɔ mɛ yi wu tso níhi nɛ a suɔ kaa a pee ha mɛ, nɛ a peeɔ kɛ haa mɛ.

Zakaria 7:10

Yalɔyihi, awusahi, nibwɔhi, kɛ nihi nɛ e fi mɛ ɔ, nyɛ ko wa mɛ yi mi. Jehanɛ hu, nyɛ ko to nyɛ sibi a he ga yaya.’

Malaki 3:5

Yawɛ Tabohiatsɛ ɔ ke, “Ma ba nyɛ ngɔ nɛ ma ba kojo, nɛ ma gbla nimli nɛ ɔmɛ a tue amlɔ: kunya yeli, gba puɛli, lakpa odase yeli, nihi nɛ sisiɔ ní tsuli nɛ a wui mɛ hiɔ susui, kɛ ni nɛmɛ nɛ waa yalɔyihi, awusahi, kɛ nibwɔhi yi mi. Ee, ma gbla nɔ tsuaa nɔ nɛ bui mi ɔ tue.” Yawɛ Tabohiatsɛ ɔ lɛ de.

Mose IV, 22:7

Moab ma nimeli ɔmɛ, kɛ Midian ma nimeli ɔmɛ pue nɔ kɛ ho Balaam ngɔ ya. A hɛɛ sika nɛ a kɛ maa wo nɔ gbiɛmi ɔ he hiɔ ngɛ a dɛ, nɛ benɛ a ya su ɔ, a ngɔ Balak sɛ gbi ɔ ngɔ ha Balaam.

Mateo 21:13

nɛ e de mɛ ke, “A ngma ngɛ ngmami ɔmɛ a mi ke, Mawu de ke, ‘A ma tsɛ ye we ɔ sɔlemi we.’ Se nyɛɛ lɛɛ nyɛ ngɔ kɛ pee ojo fiali a laami he!”

Marko 11:17

E tsɔɔ ni ɔmɛ ke, “A ngma ke, ‘Ye we ɔ, a ma tsɛ lɛ je ɔ tsuo sɔlemi we’. Se nyɛɛ lɛɛ nyɛɛ kɛ pee ojo fiali a laami he!”

Luka 19:46

E de mɛ ke, “A ngma ke, Mawu ke, ‘A ma tsɛ ye we ɔ ke he nɛ a faa kue ha mi ngɛ!’ Se nyɛɛ lɛɛ nyɛ ngɔ kɛ pee ojo fiali a laami he!”

Luka 24:27

Jehanɛ ɔ, Yesu tsɔɔ mɛ níhi tsuo nɛ ngmami ɔmɛ de ngɛ lɛ nitsɛ e he ɔ a sisi; e je sisi kɛ je Mose womi ɔmɛ, kɛ gbali ɔmɛ tsuo a ni ɔmɛ a nɔ.

Mose V, 16:19

A ko ye tue kpɛkpɛɛ sane; nɛ a ko hyɛ nɔ hɛ mi. A ko he nyɔ mi ní; ejakaa nyɔ mi ní hemi yuɔ ní leli po a hɛngmɛ, nɛ e haa a plɛɔ munyu hɛ mi buɔ si.

Yakobo 1:27

Bɔ nɛ nɔ ko ma ja Mawu nɛ maa sa Tsɛ Mawu ɔ nitsɛ hɛ mi ji nɛ ɔ nɛ: awusahi kɛ yalɔyihi nɛ e fi mɛ ɔ, e hyɛ a nɔ. Jehanɛ e hyɛ lɛ nitsɛ e he nɔ saminya, konɛ je mi akɔnɔ yaya ko tɔtɔ e nane.

Samuel I, 8:3

Mɛɛ a be kaa a tsɛ ɔ; mɛɛ a ya di sika se, nɛ a heɔ nyɔ mi ní, nɛ a plɛɔ sane hɛ mi ngɔ buɔ si.