Yesaya 1:11 - BAIBLO ALOO NGMAMI KLƆUKLƆU Ɔ

¹¹ Yawɛ ke, “Bɔ ɔmɛ tsuo nɛ nyɛ ngɔɔ kɛ ba haa mi ɔ, anɛ nyɛ susuɔ kaa i suɔ lo? To ɔmɛ nɛ nyɛ kɛ ba sãã bɔ, kɛ lohwe kpakpa amɛ a zɔ ɔ hiɛ tsɔ ha mi. Na kuhi, kɛ jijɔhi, kɛ akpakpohi a muɔ ba ti mi.

Yesaya 1:11 ပူးပေါင်းရင်းမြစ်များ

Amos 5:21

Yawɛ ke, “Kusumihi nɛ nyɛ peeɔ, kɛ gua pɔtɛɛhi nɛ nyɛ bɔɔ ngɛ nyɛ nyami ligbi ɔmɛ a nɔ, nɛ nyɛɛ kɛ woɔ ye hɛ mi nyami ɔ, i hiee, nɛ i na we a he bua jɔmi.

Samuel I, 15:22

Samuel bi ke, “Anɛ Yawɛ nyaa sami bɔ, kɛ bɔ kpahi a he pe e munyu ɔ tue bumi lo? O nɛ, tue bumi hi pe bɔ sami, nɛ munyu ngɔmi hi pe jijɔhi a zɔ.

Yeremia 6:20

Tsopa kɛ e he via nɛ a kɛ jeɔ Sheba kɛ ba haa mi ɔ, mɛni ma pee he? Nu he via nɛ a kɛ jeɔ ma se lokoo kɛ ba haa mi ɔ, i hla we. I be a sami bɔ ɔmɛ ngɔe; bɔ kpa amɛ hu i sume.

Yesaya 66:3

“Ma mi bi ɔmɛ peeɔ nɔ́ nɛ mɛ nitsɛmɛ a suɔ. E si we mɛ kpu kaa a maa ngɔ na, loo nɔmlɔ adesa kɛ sã bɔ. Slɔɔto ko be mi ke a ngɔ to kɛ sã bɔ, loo a ku gbe kuɛ kɛ pee. Slɔɔto be mi ke a ngɔ ngma kɛ ba sã niye ní bɔ, aloo a ngɔ kpotoo muɔ kɛ ba. Tsopa kɛ e he via a ngɛ sãe jio, amaga nɛ a ngɛ jae jio, slɔɔto ko kulaa be mi ha mɛ. Musu ní nɛ ɔmɛ a he a nyaa.

Mika 6:7

Anɛ Yawɛ ma na bua jɔmi, ke i ba ha lɛ agbosu akpehi, loo nu nɛ hiɛ babauu kaa pa nɛ ngɛ bee lo? Anɛ ma ngɔ ye kekleekle bi ba ha lɛ kɛ wo ye yayami ɔmɛ a he hiɔ lo?

Malaki 1:10

Yawɛ Tabohiatsɛ ɔ ke, “I ná nɛ nyɛ ti nɔ ko ya nga ye we klɔuklɔu ɔ nya, bɔ nɛ pee nɛ nyɛ ko ya slɛ la ngɛ ye bɔ sami la tɛ ɔ nɔ yaka gu hu. I be nyɛ he bua jɔmi; nyɛ nike ní ɔmɛ hu, i be ngɔe.

Abɛ Womi 15:8

Yayami peelɔ bɔ sami ɔ, Yawɛ sume kulaa; se ke nɔmlɔ kpakpa fa kue ɔ, e naa he bua jɔmi.

La 50:8

Bɔhi, kɛ sami bɔhi nɛ nyɛ kɛ baa ye hɛ mi ɔ, pi lɔ ɔmɛ a he nɛ i ngɛ nyɛ hɛ mi kae ngɛ.

Abɛ Womi 21:27

Yayami peelɔ bɔ ɔ, Yawɛ sume kulaa, hluu nɛ a de ke yi mi tomi yayami piɛ bɔ ɔ he.

Mateo 9:13

Nyɛɛ ya nɛ nyɛ ya hla ngmami nɛ ɔ sisi: ‘Mɔbɔ nami i ngɛ hlae, se pi bɔ sami!’ I bɛ nɛ ma ba tsɛ nihi nɛ peeɔ nɔ́ nɛ da, se mohu yayami peeli.”

La 51:16

O hla we bɔhi, jinɛ ma ngɔ kɛ ba; sami bɔ hu, o sume.

Yeremia 7:21

“Ye ma, nyɛ sãã bɔ ɔmɛ ekomɛ ngɛ bɔ sami la tɛ ɔ nɔ kɛ ya siɔ a nglaa, nɛ ekomɛ lɛɛ nyɛ ngɛ he blɔ nɛ nyɛ yeɔ. Se nɔ́ nɛ imi Tabohiatsɛ Israel Mawu ɔ, i ngɛ nyɛ dee ji kaa nyɛ ma nyɛ maa ye lɛ tsuo faa.

Mateo 22:4

E kpale tsɔ ni kpahi ke a ya de nihi nɛ a kpee ɔ ke, ‘I gbe niye ní ɔ nya. A gbe na, kɛ lohwe kpakpahi nɛ wo zɔ; a gbe nɔ́ tsuaa nɔ́ nya. Nyɛɛ ba yo kpeemi okplɔɔ ɔ he koo!’

La 40:6

O hla we bɔ, nɛ o hla we nike ní hulɔ. O bi we ke a sã sami bɔ, loo yayami pami bɔ ha mo. Mohu ɔ, o bli ye tue, konɛ ma nu o gbi.

Abɛ Womi 21:3

Pee nɔ́ nɛ sa, kɛ nɔ́ nɛ da; lɔ ɔ saa Yawɛ hɛ mi pe nɔ nɛ a maa sã bɔ ha lɛ.

Yesaya 58:2

A deɔ ke a jaa mi daa kɛ tsɔɔ kaa a ngɛ hlae nɛ a le ye suɔmi nya ní, nɛ a ye ye mlaa amɛ a nɔ. A deɔ hu ke a ngɛ hlae nɛ ma wo mɛ mlaa kpakpahi, nɛ a suɔ kaa a ma ja mi.”

Hosea 6:6

Nɔ́ nɛ i ngɛ hlae ngɛ nyɛ dɛ kɛkɛ ji suɔmi nɛ ngɛ daa; pi bɔ sami. Ma suɔ kaa nyɛɛ le imi Mawu ɔ mohu, pe kaa nyɛ maa sã sami bɔ kɛ sa ye hɛ mi!

Amos 5:22

Nyɛ sami bɔ ɔmɛ, kɛ niye ní bɔ ɔmɛ ɔ, i be ngɔe. Lohwehi nɛ nyɛ je blɔ lɛ mɛ nɛ a wo zɔ nɛ nyɛ maa ngɔ kɛ ba sã tue mi jɔmi bɔ ha mi ɔ, i be hee.

Hagai 2:14

Kɛkɛ nɛ Hagai de ke, “Yawɛ ke jã pɛpɛɛpɛ kikɛmɛ a ma nɛ ɔ kɛ e mi bi ngɛ ngɛ ye hɛ mi. Lɔ ɔ he ɔ, nɔ́ tsuaa nɔ́ nɛ a peeɔ, kɛ nihi tsuo nɛ a kɛ ba sãã bɔ ngɛ ye bɔ sami la tɛ ɔ nɔ ɔ, a ble lɛ momo.”

Zakaria 7:5

“Bi ni ɔmɛ tsuo, kɛ osɔfo ɔmɛ ke, nɛ a ha hwɔ daa nyɔhiɔ enuɔne ɔ, kɛ kpaanyɔne ɔ jeha nyingmi kpaago ɔ, imi a ha hwɔ ha lo?

Hosea 8:13

A gbeɔ lohwehi kɛ sãã bɔ kɛ haa mi, nɛ lo ɔ nɛ a kɛ ba sã bɔ ɔ lɛɛ mɛ nitsɛmɛ a yeɔ. Se imi Yawɛ, ye bua jɔɛ a he. Ma kai a he yayami ɔmɛ, nɛ ma gbla a tue kokooko ngɛ he; ma kpale mɛ kɛ ho Egipt ya!

Amos 4:5

Ke nyɛɛ kɛ abolo ma Mawu si nami ɔ, nyɛ peeɔ yayami! Jehanɛ, ke nyɛ je nyɛ tsui mi faa, nɛ nyɛ ngɔ bɔ kpa komɛ kɛ ma po, nyɛ suɔ kaa nyɛɛ fĩa! Israel ma, nɔ́ nɛ nyɛ suɔ peemi ji nɛ ɔ nɛ. Nyɛɛ ya nɔ nɛ nyɛɛ pee!