Yeremia 6:19 - BAIBLO ALOO NGMAMI KLƆUKLƆU Ɔ

¹⁹ Je ɔ, bu tue! Ma ngɔ haomi kɛ ba ma nɛ ɔ nɔ kaa yayamihi nɛ mɛ nitsɛmɛ a pee ɔ he tue gblami. Ejakaa a bui ye munyu ɔmɛ tue, nɛ ye mlaa a hu a yi nɔ.

Yeremia 6:19 ပူးပေါင်းရင်းမြစ်များ

Abɛ Womi 15:26

Yiwutsotsɛmɛ a yi mi susumi ɔ, Yawɛ sume; se nihi nɛ a tsui mi tsɔ ɔ, a munyu saa e hɛ mi.

Abɛ Womi 28:9

Nɔ nɛ sume kaa e yeɔ mlaa nɔ ɔ, ke e fa kue ha Mawu po, e bɔ musu.

Yesaya 1:2

Yawɛ ke, “Hiɔwe kɛ zugba, nyɛɛ bu nɔ́ nɛ i ngɛ dee ɔ tue! Jokuɛwi nɛ i tsɔse nɛ a wa a te si ngɔ si mi.

Yesaya 5:24

Lɔ ɔ he ɔ, Israel hɛ mi ma ba kpata pɛsɛpɛsɛ kaa bɔ nɛ la sãã hu kɛ nga gbigbli ɔ. Nɔ́ nɛ ɔ maa ba a nɔ, ejakaa a kua Yawɛ Tabohiatsɛ ɔ mlaa amɛ. A yi Israel Mawu klɔuklɔu ɔ mlaa amɛ a nɔ.

Yesaya 59:7

Be tsuaa be ɔ, yayami he ga sɔuu nyɛ toɔ. Nɔ nɛ ko ye bemi ɔ, nyɛ he sɔɔ kɛ pueɔ e muɔ si yaka. He tsuaa he nɛ nyɛ gu ɔ, nɔ́ puɛmi, kɛ nɔ́ hɛ mi kpatami sɔuu nyɛ siɔ ngɛ nyɛ se;

Yesaya 66:18

I le níhi nɛ a ngɛ susue, kɛ níhi nɛ a ngɛ pee. Be ma nɛ ma bua je ma amɛ tsuo, kɛ gbi slɔɔtoslɔɔto ɔmɛ tsuo a nya. Ke a ba a, a ma ba na ye hɛ mi nyami ɔ.

Yeremia 11:11

Lɔ ɔ he ɔ, imi Yawɛ, i ngɛ mɛ dee ke, ma ha nɛ haomi maa ba a nɔ nɛ a he be mi jee. Ke a fa kue ha mi po, i be mɛ tue bue.

Yeremia 15:6

Nyɛ kua mi; nyɛ plɛ nyɛ se kɛ wo mi. Enɛ ɔ he je ɔ, imi hu i wo ye nine nɔ ngɛ nyɛ nɔ, nɛ i kpata nyɛ hɛ mi. Ejakaa bɔ nɛ i ngɔɔ nyɛ he kɛ kee nyɛ daa nɛ ɔ, pɔ ba tɔ mi jehanɛ.

Yeremia 17:10

Imi Yawɛ, i hlaa nimli a juɛmi, nɛ i kaa a tsui. I woɔ nɔ tsuaa nɔ hiɔ ngɛ e ní peepee, kɛ e je mi babɛ he.”

Yeremia 19:15

“Bɔ nɛ Yawɛ Tabohiatsɛ, Israel Mawu ɔ de ji nɛ ɔ nɛ: ‘Kaa bɔ nɛ i de to ɔ, i kɛ haomi nɛ nya wa maa ba ma nɛ ɔ, kɛ mahi tsuo nɛ bɔle lɛ ɔ a nɔ. Ma pee nɔ́ nɛ ɔ, ejakaa nyɛ tue wa, nɛ nyɛ nui ye munyu ɔmɛ.’ ”

Yeremia 19:3

Yawɛ ke ma de ke, “Yuda matsɛmɛ, kɛ Yerusalem ma mi bi, nyɛɛ bu nɔ́ nɛ imi Yawɛ Tabohiatsɛ, Israel Mawu ɔ, i ngɛ dee ɔ tue. I kɛ haomi nɛ nya wa maa ba hiɛmɛ nɛ ɔ, nɛ nɔ tsuaa nɔ nɛ maa nu he ɔ, e he mi maa po.

Yeremia 21:14

Se imi lɛɛ ma gbla o tue ngɛ nɔ́ nɛ o pee ɔ he. Ma mɛ o matsɛ we ɔ he la, nɛ la a maa sa nɔ́ tsuaa nɔ́ kɛ bɔle si. Imi, Yawɛ lɛ i de.”

Yeremia 22:29

Zugba lee, zugba! Bu Yawɛ munyu ɔ tue!

Yeremia 29:19

Ní nɛ ɔmɛ maa ba a nɔ, ejakaa sɛ gbi ɔ nɛ i haa mɛ be tsuaa be kɛ guu ye tsɔli gbali ɔmɛ a nɔ ɔ, a bui fɛɛ. A sume kaa a maa nu kɛ a tue po.

Yeremia 4:14

Yerusalem, mo fɔ ní yayami ɔmɛ kɛ je o tsui mi, nɛ a he o yi wami. Kɛ yaa si mɛni be lɛ o maa hi ní yayamihi a he susue?

Yeremia 4:16

A ma nɛ a ba ha nɛ je ma amɛ nɛ a le, nɛ Yerusalem hu nɛ e nu kaa he nyɛli komɛ je ma se tsitsaa kɛ ma nɛ a ba sá ma a yi. He nyɛli nɛ ɔmɛ ma he ose kɛ wo Yuda ma amɛ a he.

Yeremia 4:4

Somi nɛ nyɛɛ kɛ imi Yawɛ, nyɛ so ɔ, nyɛɛ ye nɔ, nɛ nyɛɛ ngɔ nyɛ he kɛ ha mi, nyɛ Yuda ma, kɛ Yerusalem bi. Ke nyɛ pee we ja a, ye mi mi ma fu nyɛ ngɛ nyɛ ní yayami ɔmɛ a he. Nɛ ke ye mi mi fu ɔ, nɔ ko be nyɛe maa jɔɔ he.”

Yeremia 49:37

Ma ha nɛ Elam bi ɔmɛ maa ye a he nyɛli ɔmɛ, kɛ nihi nɛ ngɛ mɛ hlae nɛ a gbe ɔ gbeye. Ye mi mi ma fu Elam bi ɔmɛ wawɛɛ nitsɛ. Ma kpata a hɛ mi, nɛ ma ha nɛ ta ma ba na mɛ. Ma pee nɔ́ nɛ ɔ hluu kɛ yaa si ma kpata a hɛ mi pɛsɛpɛsɛ.

Yeremia 6:10

I he nɔ ke, “Ke i kɛ mɛ tu munyu nɛ i ka a hɛ mi ɔ, mɛnɔ maa bu mi tue? Ni ɔmɛ a tue wa, nɛ a sume kaa a maa bu o munyu ɔ tue. Ke o ha mi sɛ gbi nɛ i ya de mɛ ɔ, pe a muɔɔ mi; a nya we he.

Yeremia 6:18

Lɔ ɔ he ɔ, Yawɛ de ke, “Nyɛ je ma amɛ, nyɛɛ bu tue nɛ nyɛɛ nu sane nɛ maa ba ye ma a nɔ.

Yeremia 8:5

Ye ma! Mɛni he je mɔ lɛ nyɛ je ye se, nɛ nyɛ sume kaa nyɛ maa kpale kɛ ba a? Mɛni he je nyɛɛ kɛ nyɛ he ha sisimi ní hi kikɛ nɛ ɔ, nɛ nyɛ sume kaa nyɛ maa kpale kɛ ba ye ngɔ ɔ?

Yeremia 8:9

Zo gbe nyɛ ní leli ɔmɛ; bibi gbe mɛ, nɛ a pa li nɔ́ nɛ nɔ nɛ a ngɛ hu. A kua ye munyu ɔ, lɛɛ mɛni ji ní ɔ nɛ a le ɔ mɔ?

Daniel 9:11

Israel ma a tsuo tɔ o mlaa amɛ, nɛ a bui o gbi tue. Wa pee yayami kɛ si mo, nɛ lɔ ɔ he nɛ o ngɔ gbiɛmi ɔmɛ nɛ a ngma ngɛ o tsɔlɔ Mose mlaa womi ɔ mi ɔ kɛ ba wa nɔ ɔ nɛ.

Hosea 10:13

Yayami nɛ nyɛ du ɔ, e yiblii nɛ nyɛ kpa. Lakpa amɛ nɛ nyɛ ye ɔ, a mi nɔ́ nyɛ ngɛ nae ɔ nɛ. “Nyɛ ngɔ nyɛ hɛ ngɔ fɔ nyɛ ta zugba lɛhi, kɛ nyɛ ta buli babauu ɔ a nɔ.

Hosea 4:6

Ye ma a hɛ mi ma kpata, ejakaa a li nɔ. Ee, nyɛ osɔfo ɔmɛ, nyɛ kua nile, lɔ ɔ he ɔ, imi hu ma kua nyɛ. Akɛnɛ nyɛ hɛ je ye mlaa amɛ a nɔ he je ɔ, imi hu ye hɛ maa je nyɛ binyumu ɔmɛ a nɔ.

Amos 2:4

Yawɛ ke, “Yuda ma mi bi ɔmɛ pee yayamihi nɔtonɔto babauu. A yi imi Yawɛ, ye mlaa amɛ a nɔ fɛɛ. Yaka mawuhi nɛ a nɛmɛ ɔmɛ sɔmɔ ɔ, jamɛ a mawu ɔmɛ nɔuu a se lɛ a ya nyɛɛ. Enɛ ɔ he je ɔ, ja i gbla a tue kokooko.

Mika 1:2

Nyɛ je mahi tsuo, nyɛɛ bu tue; nyɛ nihi tsuo nɛ ngɛ je ɔ mi, nyɛɛ bu tue! Nyɔmtsɛ Mawu po nyɛ nya. Nyɛɛ bu tue! E ngɛ munyu tue kɛ je e we klɔuklɔu ɔ.

Mika 6:2

Nyɛ yohi, nyɛɛ bu munyuhi nɛ Yawɛ kɛ ngɛ e ma a nya poe ɔ tue! Nyɛ zugba a sisi tomihi nɛ nyɛ ngɛ daa, nyɛ ta tue! Yawɛ kɛ e ma, Israel na, nɛ e maa jaje e sane ɔ.

Yohane 12:48

Nɔ tsuaa nɔ nɛ kua mi, nɛ e ngɔɛ munyu nɛ i fiɛ ɔ hulɔ ɔ, nɔ ko ngɛ nɛ maa kojo lɛ. Nyagbe ligbi ɔ, munyu ɔmɛ nɛ i tu ɔ maa kojo lɛ.

Ni Tsumi 8:22

Pia o he mohu ngɛ nɔ́ yayami nɛ o susu ɔ he, nɛ o kpa Nyɔmtsɛ ɔ pɛɛ kaa alini a maa ngɔ yayami nɛ o susu ɔ ngɔ pa mo lo.

Mose V, 30:19

Lɔ ɔ he ɔ, i ngɔ wami kɛ gbenɔ kɛ ngɛ nyɛ hɛ mi fɔe; i ngɔ Mawu gbaami kɛ gbiɛmi hu kɛ ngɛ nyɛ hɛ mi fɔe; nɛ i ngɛ hiɔwe kɛ zugba odase tsɛe ngɛ nɔ́ nɛ nyɛ maa hla a he. Nyɛɛ ngɔ wami.

Mose V, 32:1

“Hiɔwe kɛ zugba lee, nyɛ ba bu mi tue; nyɛ ba bu nɔ́ nɛ i ngɛ dee ɔ tue saminya.

Mose V, 4:26

I tsɛ hiɔwe kɛ zugba odase kaa ke nyɛ bui mi tue ɔ, nyɛ hɛ mi ma kpata ngɛ zugba a nɔ. Lɛɛ zugba a nɛ nyɛ yaa ngɔ ngɛ Yordan pa a se ɔ, nyɛ se be kɛe ngɛ nɔ. A ma kpata nyɛ hɛ mi pɛsɛpɛsɛ.

Samuel I, 15:23

Atuã tsɔmi ɔ, e ji yayami; e ngɛ kaa klaami, nɛ tue wami hu ngɛ kaa wɔ jami. Akɛnɛ o bui Yawɛ fami ɔ tue he je ɔ, lɛ hu e kua mo kaa matsɛ.”

Samuel I, 15:26

Se Samuel de Saul ke, “I kɛ mo be yae; o bui Yawɛ fami ɔ tue, lɔ ɔ he ɔ, lɛ hu e kua mo kaa matsɛ ngɛ Israel.”