Yeremia 4:27 - BAIBLO ALOO NGMAMI KLƆUKLƆU Ɔ

²⁷ (Yawɛ de ke zugba a tsuo hɛ mi ma kpata mohu lɛɛ, se kɛ̃ ɔ, bɔɔ ko maa piɛ nɛ he maa je mi.)

Yeremia 4:27 ပူးပေါင်းရင်းမြစ်များ

Yeremia 46:28

Ye ma, nyɛ tsui ko po, ejakaa i kɛ nyɛ ngɛ. Je ma amɛ, hehi nɛ i fie nyɛ kɛ ho ɔ, ma kpata mɛ tsuo a hɛ mi; se nyɛɛ lɛɛ i be nyɛ hɛ mi kpatae. Se kɛ̃ ɔ, i be hae nɛ nyɛɛ ye nyɛ he kulaa; ma gbla nyɛ tue bɔ nɛ sa kɛkɛ. Imi, Yawɛ lɛ i de.”

Yeremia 5:18

Yawɛ ke, “Se jamɛ a be ɔ mi po, i be ye ma a hɛ mi kpatae pɛsɛpɛsɛ.

Yeremia 5:10

Ma tsɔ he nyɛli nɛ a ya poo ye ma mi bi ɔmɛ a wai tso ɔmɛ ngɔ pue si, se i be hae nɛ a kpata a hɛ mi pɛsɛpɛsɛ. Ma ha nɛ a kplɔ tso kɔni ɔmɛ, ejakaa pi imi Yawɛ, ye níhi ji mɛ.

Yeremia 30:11

Ma ba nyɛ ngɔ nɛ ma ba kpɔ nyɛ. Je ma amɛ nɛ i fie nyɛ kɛ ya a ngɔ ɔ, ma kpata mɛ tsuo a hɛ mi pɛsɛpɛsɛ; se nyɛɛ lɛɛ i be nyɛ hɛ mi kpatae kɛ pi si. I be hae nɛ nyɛɛ ye nyɛ he kulaa; se kɛ̃ ɔ, ma gbla nyɛ tue bɔ nɛ sa. Imi, Yawɛ lɛ i de.”

Ezekiel 11:13

Benɛ i ngɛ gbae kɛ mwɔɔ ɔ, Benaya binyumu Pelatia tsɔ nɔ si, nɛ e gbo. I kpla si, nɛ i ngɔ ye hɛ mi ngɔ bu si, nɛ i kpa ngmlaa ke, “Ao, Nyɔmtsɛ Yawɛ, e ko ba mi ja! Anɛ Israel bi bɔɔ pɛ nɛ piɛ ɔ, o ma kpata mɛ tsuo a hɛ mi pɛsɛpɛsɛ lo?”

Mose III, 26:44

Se kɛ̃ ɔ, be mi nɛ a ngɛ a he nyɛli ɔmɛ a zugba nɔ kɛ mwɔɔ ɔ po, i be mɛ kuae, nɛ i be a hɛ mi kpatae pɛsɛpɛsɛ, bɔ nɛ pee nɛ somi nɛ i kɛ mɛ so ɔ se ko po. Imi ji Yawɛ, a Mawu ɔ nɛ.

Ezekiel 33:28

Ma ha zugba a nɔ tsuo maa pee pasaa kulaa, kɛkɛ ɔ, zugba a mi he wami nɛ a ngɔ a hɛ kɛ fɔ nɔ ɔ se maa po. Yo ɔmɛ a nɔ maa je gu; lejɛ ɔmɛ maa pee gbeye, nɛ nɔ ko nɔ ko be lejɛ ɔmɛ gue hu.

Ezekiel 6:14

Niinɛ, ma wo ye nine nɔ ngɛ a nɔ, nɛ ma kpata zugba a hɛ mi bɔ nɛ nɔ ko nɔ ko be nɔ nyɛe maa hi. Kɛ je leneyi je nga kplanaa a nɔ kɛ ya su Ribla ma a he ngɛ omleyi je, hehi nɛ Israel bi ɔmɛ hii ɔ, ma kpata lejɛ ɔmɛ tsuo a hɛ mi. Kɛkɛ ɔ, a ma na maa le kaa imi ji Yawɛ.”

Yeremia 18:16

A ha nɛ a zugba a pee gbeyegbeye kaa nɔ́ ko nɛ a maa hie daa. Nɔ tsuaa nɔ nɛ ma ba be ngɛ lejɛ ɔ, e he mi maa po, nɛ e ma mimiɛ e yi.

Yeremia 7:34

Zugba a ma plɛ pee nga kplanaa. Ma ha nɛ nyami, bua jɔmi, kɛ ayɛflo he ní peemi hoo ɔ se maa po ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ.

Yeremia 4:7

Je ma amɛ a hɛ mi kpatalɔ ɔ ma kaa jata nɛ hia kpo kɛ je e laami he. E ma nɛ e ba kpata Yuda zugba a hɛ mi. Yuda ma amɛ maa pee ma dokuhi, nɛ nɔ ko nɔ ko be a mi hie hu.

Yesaya 24:1

Yawɛ ma kpata zugba a hɛ mi, nɛ zugba a maa fɔ si gu. E ma plɛ zugba a hɛ mi bu si, nɛ nihi nɛ ngɛ nɔ ɔ, e maa gbɛ mɛ ngɔ fĩa.

Kronika II, 36:21

Lɔ ɔ he ɔ, nɔ́ nɛ Yawɛ de to kɛ gu gbalɔ Yeremia nɔ ɔ ba mi. Yawɛ lɛ de ke, “Zugba a maa fɔ si jeha nyingmi kpaago, konɛ Hejɔɔmi ligbi ɔmɛ nɛ a yi ɔ, a kɛ tsɔ.”

Nehemia 9:31

O kua we mɛ; o na mɛ mɔbɔ, nɛ o kpataa we a hɛ mi hulɔ. Ejakaa Mawu mɔbɔ nalɔ kɛ dloolɔ ji mo!

Yeremia 4:20

Haomi ɔmɛ ba nɔtonɔto kɛ ya si zugba a tsuo hɛ mi kpata. A hule wa bo tsu ɔmɛ ngɔ pue si tlukaa, nɛ a hía bo ɔmɛ a mi dukuduku.

Yeremia 9:11

Yawɛ ke, “Ma pee Yerusalem ma doku, kɛ nga mi gbehi a hi he. Yuda ma amɛ maa pee ma dokuhi, nɛ nɔ ko nɔ ko be a mi hie.”

Yeremia 25:11

Zugba nɛ ɔ tsuo hɛ mi ma kpata pɛsɛpɛsɛ, nɛ je ma nɛ ɔmɛ ma sɔmɔ Babilonia matsɛ ɔ jeha nyingmi kpaago.

Yeremia 44:6

Enɛ ɔ he je ɔ, ye mi mi la nɛ nya wa a puɛ ní ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ kaa bɔ nɛ la sãã nɔ́ ɔ. Nɛ ma amɛ a hɛ mi kpata, nɛ a pee ma dokuhi kaa bɔ nɛ a ngɛ mwɔnɛ ɔ.

Ezekiel 20:17

“Se kɛ̃ ɔ, i na mɛ mɔbɔ; i kpataa we a hɛ mi pɛsɛpɛsɛ ngɛ nga a nɔ.

Mose III, 26:31

Ma kpata nyɛ ma nguangua amɛ a hɛ mi kɛ yaa si a ma plɛ pee ma dokuhi. Nyɛ jami he ɔmɛ hu ma puɛ mɛ, nɛ i be nyɛ bɔ ɔmɛ hee hu.

Yesaya 17:6

Nihi bɔɔ pɛ nɛ a yi ma na wami. Israel maa pee kaa oliv tso nɛ a kplɔ e nɔ yiblii tsuo: yiti je ɔ, yiblii enyɔ loo etɛ kɛkɛ lɛ maa hi tso kɔni ɔmɛ a he; sisi ɔ hu eywiɛ, loo enuɔ kɛkɛ. Imi Yawɛ, Israel Mawu ɔ lɛ i de.”

Kɔmɔ Yemi 2:7

Nyɔmtsɛ ɔ sume e bɔ sami la tɛ ɔ hu, nɛ e kua sɔlemi we ɔ. E ha he nyɛli ku mɔ ɔmɛ kɛ pue si. A hwɔ lele ngɛ Yawɛ we ɔ mi kaa bɔ nɛ wa peeɔ ke wa ngɛ nyami ligbi yee ɔ.

Zefania 1:18

Ligbi ɔ nɛ Yawɛ ma je e mi mi fumi ɔ kpo ɔ, nɔ́ ko nɔ́ ko be nyɛe ma he ma a yi wami: sika hiɔ jio, sika tsu jio. E kɛ e mi mi fumi ɔ ma kpata je ɔ tsuo hɛ mi kaa bɔ nɛ la sãã nɔ́ ɔ. E maa gbe níhi tsuo ngɛ je ɔ mi si kake too.