Yeremia 32:37 - BAIBLO ALOO NGMAMI KLƆUKLƆU Ɔ

³⁷ Ma bua ma a nya kɛ je zugbahi a nɔ hehi nɛ i fie mɛ kɛ ho, benɛ ye mi mi fu mɛ ɔ, nɛ ma ngɔ mɛ kɛ ba hiɛmɛ nɛ ɔ ekohu nɛ a ba hi si ngɛ he jɔmi mi.

Yeremia 32:37 ပူးပေါင်းရင်းမြစ်များ

Yeremia 23:3

Ye ma nɛ piɛ ɔ, ma bua a nya kɛ maa je zugbahi a nɔ hehi nɛ i fie mɛ kɛ ho ɔ, nɛ i kɛ mɛ maa ba mɛ nitsɛmɛ a zugba a nɔ ekohu. A ma fɔ, nɛ a he maa hiɛ babauu.

Yeremia 23:6

E yi nɔ ɔ, a ma he Yuda yi wami, nɛ tue mi jɔmi maa ba Israel. A ma tsɛ lɛ ke ‘Yawɛ ji wa yi wami hemi.’ ”

Ezekiel 11:17

“De mɛ ke bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ. Ma bua a nya kɛ maa je je ma amɛ a mi hehi nɛ a gbɛ mɛ kɛ fĩa a tsuo kɛ maa ba; nɛ ma ngɔ Israel zugba a ngɔ ha mɛ ekohu.

Yeremia 33:16

E yi nɔ ɔ, a ma he Yuda yi wami, nɛ tue mi jɔmi maa ba Israel. Nɛ biɛ nɛ a kɛ ma tsɛ lɛ ji, ‘Yawɛ ji wa dami.’

La 106:47

Yawɛ wa Mawu! Mo kpɔ wɔ kɛ je je ma amɛ a dɛ mi, nɛ o kpale wɔ kɛ ba ekohu, konɛ waa na mo si, nɛ wa je o biɛ klɔuklɔu ɔ yi.

Zakaria 14:11

Nimli maa kpale ba hi Yerusalem, ejakaa gbiɛmi nɛ a gbiɛ mɛ ɔ se maa po. Tue mi jɔmi maa ba Yerusalem.

Hosea 1:11

Yuda bi, kɛ Israel bi ma ba pee kake; a maa hla nɔ kake nɛ da a nya, nɛ a maa hi si ngɛ he jɔmi mi ngɛ zugba a nɔ. Niinɛ, Yezreel ma ba plɔke.

Yeremia 23:8

Mohu ɔ, a kɛ ye biɛ ma ka kita kaa Mawu hɛ kalɔ nɛ jé Israel nina a kɛ je ma se zugbahi a nɔ, omleyi je zugba a, kɛ hehi tsuo nɛ i fie mɛ kɛ ho ɔ kɛ ba. Nɛ a ma ba hi mɛ nitsɛmɛ a zugba a nɔ.”

Zakaria 3:10

Jamɛ a be ɔ, nyɛ maa kpee nyɛ sibi kɛ ba nyɛ wai ngmɔ ɔmɛ a mi, kɛ nyɛ ngmɔkɔ tso ɔmɛ a sisi. Yawɛ lɛ de.”

Zefania 3:20

Be ma! Ma ngɔ nihi nɛ gbɛ fĩa a kɛ maa ba we ekohu. Ma ha nɛ nyɛ ma he biɛ ngɛ je ɔ mi tsuo; je ma amɛ ma je nyɛ yi, nɛ nyɛ ma na ní babauu ekohu.” Yawɛ lɛ de.

Yoel 3:20

Ma ye ni ɔmɛ nɛ a gbe yaka a a he lue; i be blɔ ngmɛe nɛ nɔ tɔli nɛ ɔmɛ nɛ a ye a he. Jehanɛ, nimli maa hi Yuda kɛ Yerusalem daa kɛ daa; nɛ Imi, Yawɛ nitsɛ ma hi Zion yo ɔ nɔ.”

Hosea 3:5

Se pee se ɔ, Israel bi ɔmɛ maa kpale kɛ ba a ma a mi ekohu; a ma ba hla Yawɛ, a Mawu ɔ, kɛ David nɛ ji matsɛ ɔ nina se blɔ ekohu. Jamɛ a be ɔ, a maa ye Yawɛ gbeye, nɛ a ma na nike ní kpakpahi kɛ je e dɛ mi.

Yeremia 33:7

Ma ha nɛ Yuda kɛ Yerusalem ma na a he ekohu, nɛ ma to mɛ si kaa kekle ko ɔ.

Yeremia 31:10

Yawɛ ke, “Nyɛ je mahi, nyɛɛ bu mi tue nɛ nyɛɛ fiɛ ye munyu ɔmɛ ngɛ wo kpɔ ɔmɛ a nɔ tsitsaa lokoo ke, ‘Nɔ nɛ gbɛ Israel ma a ngɔ fĩa a, lɛ nɔuu e ma bua a nya ekohu, nɛ e maa hyɛ a nɔ kaa bɔ nɛ to hyɛlɔ hyɛɛ e tohi ɔ.’

Yeremia 30:18

Yawɛ ke, “Ma kpale ye ma a kɛ ba a zugba a nɔ ekohu, nɛ ma na we puɔ nya tsuaa we puɔ nya mɔbɔ. A maa ma Yerusalem ekohu ngɛ kpo ɔ nɔ, nɛ matsɛ we ɔ maa ma si ngɛ e ma he.

Yeremia 29:14

nyɛ maa na mi, nɛ ma ngɔ nyɛ kɛ ba nyɛ zugba a nɔ ekohu. Je mahi, kɛ hehi tsuo nɛ i fie nyɛ kɛ ho ɔ, ma bua nyɛ nya kɛ je lejɛ ɔmɛ, nɛ ma kpale nyɛ kɛ ba hiɛmɛ nɛ ɔ nɛ i ha nɛ a nuu nyɛ kɛ je ɔ ekohu. Imi, Yawɛ lɛ i de.’

Ezekiel 36:24

Ma je nyɛ kɛ je je ma amɛ a kpɛti. Ma bua nyɛ nya kɛ je he tsuaa he kɛ ba nyɛ nitsɛmɛ nyɛ zugba a nɔ ekohu.

Yeremia 16:14

Yawɛ ke, “Be ma nɛ nihi kɛ ye biɛ be kita kae hu kaa Mawu hɛ kalɔ ɔ nɛ jé Israel ma a kɛ je Egipt zugba a nɔ.

Yeremia 16:15

Mohu ɔ, a kɛ ye biɛ ma ka kita kaa Mawu hɛ kalɔ ɔ nɛ kpale Israel bi ɔmɛ nɛ a gbɛ fĩa a kɛ je omleyi je zugba kpahi a nɔ kɛ ba we ekohu. Lejɛ ɔmɛ ji hehi nɛ i fie mɛ kɛ ho ɔ nɛ. Ma ngɔ mɛ kɛ ba mɛ nitsɛmɛ a zugba a nɛ i ha a nɛmɛ ɔmɛ ɔ nɔ ekohu. Imi, Yawɛ le i de.”

Yeremia 21:5

Imi nitsɛ i kɛ nyɛ maa hwu kɛ ye he wami tsuo, kɛ mi mi la nɛ nya wa wawɛɛ nitsɛ.

Yeremia 24:6

Ma bu a he, nɛ ma kpale mɛ kɛ ba zugba nɛ ɔ nɔ ekohu. I be hae nɛ a na nɔ, se mohu ma piɛ a he. I be a hɛ mi kpatae, se mohu ma to mɛ si kaa bɔ nɛ a duɔ tso ɔ.

Yeremia 32:15

Yawɛ Tabohiatsɛ, Israel Mawu ɔ de ke nihi ma ba he wehi, zugbahi, kɛ wai ngmɔhi ngɛ zugba nɛ ɔ nɔ ekohu.”

Ezekiel 28:25

Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma kpale ye ma Israel kɛ je je ma amɛ a kpɛti he nɛ i gbɛ mɛ kɛ fĩa a, nɛ je ma amɛ tsuo maa le kaa nɔ klɔuklɔu ji mi. Israel ma a ma ba hi mɛ nitsɛmɛ a zugba nɛ i ngɔ ha ye tsɔlɔ Yakob ɔ nɔ.

Yeremia 12:14

Yawɛ ke, “Israel huza nɔ bi nɛ a kpata zugba nɛ i ngɔ kɛ ha ye ma Israel ɔ hɛ mi ɔ, i ngɛ nɔ́ ko nɛ ma de ngɛ a he. Ma je jamɛ a yiwutsotsɛmɛ ɔmɛ kɛ je a zugba amɛ a nɔ kaa bɔ nɛ a hiaa tso kɛ e sipoku ɔ, nɛ ma kpɔ̃ Yuda kɛ je a dɛ mi.

Ezekiel 20:34

Ma je nyɛ kɛ je je ma amɛ a kpɛti. Ma bua nyɛ nya kɛ je hehi tsuo nɛ a gbɛ nyɛ ngɔ fĩa a. Ye he wami kpetekpleenyɛ ɔ, kɛ abofu nguaa ma ngɔ kɛ tsu nɔ́ nɛ ɔ.

Ezekiel 28:26

A maa hi si ngɛ tue mi jɔmi, kɛ he jɔmi mi. A maa ma tsuhi, nɛ a ma hu wai ngmɔhi. Nihi tsuo nɛ pue Israel hɛ mi si ɔ, ma gbla a tue, nɛ Israel ma na he jɔmi, kɛ tue mi jɔmi kulaa. Lɔ ɔ loko a ma na maa le kaa imi ji Yawɛ, a Mawu ɔ nɛ.”