Yeremia 30:16 - BAIBLO ALOO NGMAMI KLƆUKLƆU Ɔ

¹⁶ Se jehanɛ lɛɛ, nihi tsuo nɛ kpataa nyɛ hɛ mi ɔ, a ma kpata mɛ hu a hɛ mi. A maa nuu nyɛ he nyɛli ɔmɛ tsuo pɛpɛɛpɛ kɛ ho ma se ya. Nihi tsuo nɛ waa nyɛ yi mi ɔ, a maa wa mɛ hu yi mi. Ni nɛmɛ nɛ haa nyɛ níhi ɔ, a maa ha mɛ hu a níhi.

Yeremia 30:16 ပူးပေါင်းရင်းမြစ်များ

La 129:5

Nihi tsuo nɛ sume Zion ɔ, zo nɛ gbe mɛ nɛ a kpale a se!

Mose II, 23:22

Se ke o bu lɛ tue kɛ pi si, nɛ o pee nɔ́ tsuaa nɔ́ nɛ i fa mo ke o pee ɔ, lɛɛ i kɛ o he nyɛli ɔmɛ, kɛ o futsɛmɛ ɔmɛ tsuo maa to ní.

Abɛ Womi 22:23

Yawɛ nitsɛ maa ye jamɛatsɛmɛ ɔmɛ a sane ha mɛ. Ke nɔ ko wo a susuma he gbeye ɔ, Yawɛ maa wo lɛ hu e susuma he gbeye ja nɔuu.

Yesaya 14:2

Je ma amɛ maa ngɔ Israel bi ɔmɛ kɛ ba zugba nɛ Yawɛ ha mɛ ɔ nɔ ekohu, nɛ a ma ba sɔmɔ mɛ kaa nyɔguɛhi. Nihi nɛ nuu Israel nyɔguɛ sa a, jehanɛ lɛɛ Israel hu maa ye a nɔ.

Yesaya 33:1

Musu tloo he nyɛli ɔmɛ! A fia ojo nɛ a sisi nihi; se mɛɛ lɛɛ nɔ ko fiɛ mɛ ojo, nɛ nɔ ko sisi we mɛ hulɔ. A we ojo fiami, kɛ nɔ sisimi ɔ se maa po kɛ̃, nɛ mɛ nitsɛmɛ hu a maa fia mɛ ojo, nɛ a maa sisi mɛ.

Yesaya 54:15

Ke nɔ ko ba tua mo ɔ, pi imi nɛ i tsɔ lɛ; nɔ tsuaa nɔ nɛ ma ba tua mo ɔ, jamɛ a nɔ ɔ be mo nyɛe.

Yesaya 54:17

Se ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko; jehanɛ hu, nɔ tsuaa nɔ nɛ kɛ mo ma na sane ɔ, a maa bu lɛ fɔ. Ma bu ye tsɔli ɔmɛ a he, nɛ ma ha a maa ye kunimi.” Yawɛ lɛ de.

Yeremia 10:25

Je ma amɛ nɛ li mo ɔ, o mi mi nɛ fu mɛ; ni nɛmɛ nɛ ja we mo ɔ, gbla a tue. A gbe o ma mi bi nɛ ji Yakob nina a; a kpata wa hɛ mi pɛsɛpɛsɛ, nɛ a pee wa zugba a kaa nga kplanaa nɔ.

Yeremia 12:14

Yawɛ ke, “Israel huza nɔ bi nɛ a kpata zugba nɛ i ngɔ kɛ ha ye ma Israel ɔ hɛ mi ɔ, i ngɛ nɔ́ ko nɛ ma de ngɛ a he. Ma je jamɛ a yiwutsotsɛmɛ ɔmɛ kɛ je a zugba amɛ a nɔ kaa bɔ nɛ a hiaa tso kɛ e sipoku ɔ, nɛ ma kpɔ̃ Yuda kɛ je a dɛ mi.

Yeremia 2:3

Jamɛ a be ɔ mi ɔ, imi nitsɛ ye nihi nɛ i hla ji nyɛ Israel bi; ye weto ní klɔuklɔu ji nyɛ. Nihi tsuo nɛ pee nyɛ yayami ɔ, i ngɔ haomi kɛ gbla a tue. Imi, Yawɛ lɛ i de.”

Yeremia 25:12

Jeha nyingmi kpaago ɔ se ɔ, ma gbla Babilonia matsɛ ɔ, kɛ ma a tue ngɛ a ní yayami ɔmɛ a he. Ma kpata Babilonia zugba a hɛ mi pɛsɛpɛsɛ kɛ ya neneene.

Yeremia 30:15

Nyɛ ko tu nyɛ plaami ɔmɛ a he munyu hu; tsa ba ko be ha nyɛ. I gbla nyɛ tue kikɛ nɛ ɔ, ejakaa nyɛ pee yayami nguanguahi babauu.

Yeremia 50:28

Ni komɛ tu fo kɛ je Babilonia kɛ ba Yerusalem nɛ a ba bɔ ma a amaniɛ bɔ nɛ Yawɛ ye e he lue ngɛ nɔ́ nɛ Babilonia bi ɔmɛ pee lɛ Yawɛ e we ɔ he.

Yeremia 8:16

Wa he nyɛli ɔmɛ ba sɛ Dan ma a mi momo. Wa ngɛ a okpɔngɔ ɔmɛ a he nue nɛ a ngɛ a gugwɔ mi flie ngɛ lejɛ ɔ. Ke okpɔngɔ ɔmɛ ngɛ pɛe kikɛ nɛ ɔ, kɛkɛ zugba a tsuo ngɛ mimiɛe. Wa he nyɛli ɔmɛ ba konɛ a ba kpata zugba a hɛ mi, kɛ nɔ́ tsuaa nɔ́ nɛ ngɛ zugba a nɔ, wa ma a, kɛ ma mi bi ɔmɛ tsuo.”

Kɔmɔ Yemi 1:21

“Bu ye kɛmɛmi ɔ tue; nɔ ko be nɛ maa jɔɔ ye bua. Haomi nɛ ba ye nɔ nɛ ɔ, ye he nyɛli ɔmɛ tsuo nu he, nɛ a bua jɔ kaa o ha sane nɛ ɔ ba ye nɔ. Ligbi nɛ o to ha he nyɛli ɔmɛ ɔ, ha nɛ e ba esɔ, konɛ mɛ hu a pee kaa bɔ nɛ i ngɛ nɛ ɔ.

Kɔmɔ Yemi 1:22

“Yayami tsuo nɛ a pee ɔ, hyɛ nɛ o kɛ mɛ nɛ to ní ngɛ he kaa bɔ nɛ o pee imi hu ngɛ ye yayami ɔmɛ tsuo a he ɔ. Ye kɛmɛmi ɔ nya ba wa tsɔ, nɛ ye he wami ta.”

Ezekiel 29:6

Kɛkɛ ɔ, Egipt ma a tsuo maa le kaa imi ji Yawɛ.” Yawɛ ke, “Egipt ngɛ kaa gla nɛ Israel kɛ pee dɛma tso.

Ezekiel 35:5

“O kɛ Israel bi ɔmɛ yi saasaa. Benɛ a pee yayami nɛ a ngɛ a tue gblae, nɛ a ngɛ amanehlu nae ɔ, o kɛ klaate gbe mɛ.

Yoel 3:8

Ma ha a maa jua nyɛ binyumu ɔmɛ, kɛ nyɛ biyi ɔmɛ kɛ ha Yuda bi ɔmɛ; nɛ mɛ hu a ma ya jua mɛ kɛ ha Sabea bi ɔmɛ ngɛ ma se tsitsaa. Imi, Yawɛ lɛ i de.

Mika 4:11

Je mahi babauu ba bua ngɔ wo nyɛ he konɛ a tua nyɛ. A ke, “Ja wa kpata Yerusalem hɛ mi! Wa maa na kɛ wa hɛngmɛ kaa ma nɛ ɔ pee ma doku!”

Mika 7:10

Wa he nyɛli ɔmɛ maa na nɔ́ nɛ ɔ, nɛ zo maa gbe mɛ. Mɛ lɛ a ye wa he fɛu nɛ a bi wɔ ke, “Jije Yawɛ, nyɛ Mawu ɔ ngɛ?” Wa maa na kaa a ye a nɔ kunimi, nɛ a naa a nɔ kaa mɔsɔ ngɛ gbɛjegbɛ nɔ.

Nahum 1:8

E kpataa e he nyɛli ɔmɛ a hɛ mi pɛsɛpɛsɛ kaa bɔ nɛ pa nguaa nɛ ngɛ bee kɛ fo kpataa níhi a hɛ mi ɔ; e gbeɔ nihi nɛ tee si woɔ lɛ ɔ.

Habakuk 2:16

Jehanɛ lɛɛ o be ɔ su nee! A be o hɛ mi nyami woe hu, se mohu a ma pue o hɛ mi si. Mo nitsɛ o maa tɔ dã, nɛ o maa tataa si. Yawɛ ma ha nɛ mo nitsɛ o yayami nɛ o pee ɔ maa gbla o tue; a be o hɛ mi nyami woe; o hɛ mi si mohu a ma pue.

Zefania 2:8

Yawɛ Tabohiatsɛ ɔ ke, “Jɛmi nɛ Moab bi ɔmɛ kɛ Amon bi ɔmɛ ngɛ ye ma a jɛe, ahlua nɛ a ngɛ mɛ bɔe, kɛ a he nɔ nɛ a ngɛ woe nɛ a ngɛ dee ke a ma kpɔ a zugba a, i nu.

Zakaria 1:14

Bɔfo ɔ de mi ke ma fiɛ nɔ́ nɛ Yawɛ Tabohiatsɛ ɔ de ɔ ke, “Yerusalem, ye ma klɔuklɔu Zion ɔ, i suɔ e sane saminya, nɛ e he nɔ́ dɔɔ mi.

Zakaria 1:15

Se mahi nɛ a he mi jɔ mɛ, nɛ a tue mi hu jɔ mɛ ɔ, ye mi mi fu mɛ wawɛɛ nitsɛ. Ejakaa imi lɛɛ be bɔɔ ko kɛkɛ ye mi mi fu ye ma a, se jamɛ a ma kpa amɛ lɛɛ a ha ye ma a nɔ́ nami ɔ ngɛ nɔ yae mohu.

Zakaria 12:2

“Hyɛ, ma ha Yerusalem maa pee kaa kplu kɛ e mi duɔ ha je ma amɛ tsuo nɛ bɔle lɛ ɔ. Ke he nyɛli ba sá Yerusalem yi ɔ, a ma sá Yuda zugba a hu yi ja nɔuu.

Zakaria 14:2

Yawɛ ma bua je ma amɛ tsuo a nya kɛ ba tua Yerusalem. A maa ngɔ ma a; a maa ha ní ngɛ we ɔmɛ a mi, nɛ a maa pee yi ɔmɛ basabasa. A maa nuu ma a mi dlami enyɔ mi kake kɛ ho ma se ya; se ni nɛmɛ nɛ maa piɛ ngɛ Yerusalem ɔ, a be a hɛ mi kpatae.

Zakaria 2:12

Jehanɛ, Yawɛ maa ngɔ Yuda kaa e nɔ́ nɛ he hia saminya ngɛ e zugba klɔuklɔu ɔ nɔ, nɛ Yerusalem maa pee ma nɛ e suɔ pe kulaa ekohu.

Zakaria 2:8

Nyɛ he jua wa ha mi saminya; lɔ ɔ he ɔ, nɔ nɛ maa ta nyɛ he ɔ, i be lɛ kplɛɛe.” Enɛ ɔ he je ɔ, Yawɛ Tabohiatsɛ ɔ tsɔ mi ke ma ba de je ma amɛ nɛ ba ha e ma a ní ɔ ke,

Mose V, 30:7

Yawɛ, nyɛ Mawu ɔ ma ha gbiɛmi nɛ ɔmɛ tsuo maa ba nyɛ he nyɛli nɛ sume nyɛ, nɛ a waa nyɛ yi mi ɔ a nɔ.

Kpojemi 13:10

Ke a to ke a nu nɔ ko nyɔguɛ ɔ, ja a nu lɛ nyɔguɛ. Ke nɔ ko kɛ klaate gbe nɔ ɔ, ja a kɛ klaate gbe lɛ. Enɛ ɔ tsɔɔ kaa e hia kaa Mawu we bi nɛ to a tsui si, nɛ a pɛtɛ a hemi kɛ yemi ɔ he wawɛɛ.”

Samuel I, 17:53

Benɛ Israel bi ɔmɛ kpale ngɛ Filisti bi ɔmɛ a se kɛ ba a, a ba ha ní ngɛ Filisti bi ɔmɛ a ta a mi.