Yeremia 26:3 - BAIBLO ALOO NGMAMI KLƆUKLƆU Ɔ

³ Alini a maa bu tue nɛ a maa kpale kɛ je a blɔ yayami ɔmɛ a nɔ. Ke a pee ja a, lɛɛ yi mi nɛ i to kaa ma gbla a tue ngɛ a ní yayami ɔmɛ a he ɔ, ma tsake jamɛ a yi mi tomi ɔ.”

Yeremia 26:3 ပူးပေါင်းရင်းမြစ်များ

Matsɛmɛ I, 21:27

Benɛ Ahab nu munyu nɛ ɔmɛ ɔ, e hía e tade ɔmɛ, nɛ e bu kpekpe ya bo. E ha hwɔ, nɛ e kɛ kpekpe ya bo ɔ hwɔɔ si; nɛ ke e ngɛ nyɛɛe ɔ, e peeɔ kaa nɔ ko nɛ e nini je e nɔ.

Matsɛmɛ I, 21:29

“O na bɔ nɛ Ahab ba e he si ha mi ɔ? Akɛnɛ e pee nɔ́ nɛ ɔ he je ɔ, i be hae nɛ haomi ɔ nɛ ba e nɔ ngɛ e wami be mi; e binyumu ɔ yi nɔ nɛ ma ngɔ haomi kɛ ba Ahab we ɔ nɔ!”

Yeremia 26:13

Lɔ ɔ he ɔ, nyɛ dla nyɛ blɔ ɔmɛ; nyɛ kpa yayami peemi, nɛ nyɛɛ bu Yawɛ, nyɛ Mawu ɔ tue. Ke nyɛ pee ja a, lɛɛ yi mi nɛ e to kaa e maa gbla nyɛ tue ngɛ nyɛ ní yayami ɔmɛ a he ɔ, e ma tsake jamɛ a yi mi tomi ɔ.

Yeremia 26:19

Nɛ Mika de nɔ́ nɛ ɔ, anɛ Yuda matsɛ, Hezekia kɛ ma a tsuo gbe lɛ lo? Dɛbi! Nɔ́ nɛ Hezekia pee mohu ji kaa e ye Yawɛ gbeye, nɛ e hla e se blɔ. Enɛ ɔ he je ɔ, yi mi nɛ Yawɛ to kaa e kɛ amanehlu maa ba ma a nɔ ɔ, Yawɛ tsake jamɛ a yi mi tomi ɔ. Amlɔ nɛ ɔ, wɔɔ lɛɛ wa ngɛ hlae nɛ waa kɛ amanehlu agbo nɛ ba wɔ nitsɛmɛ wa nɔ.”

Yeremia 36:3

Eko piɔ Yuda bi ɔmɛ maa nu kaa i to ye yi mi kaa ma kpata a hɛ mi, nɛ a maa kpale kɛ je a blɔ yayami ɔmɛ a nɔ. Ke a pee ja a, ma ngɔ a tɔmi ɔmɛ, kɛ a he yayami ɔmɛ kɛ pa mɛ.”

Yeremia 36:7

Alini a maa fa kue ha Yawɛ nɛ a maa kpale kɛ je a blɔ yayami ɔmɛ a nɔ; ejakaa abofu nɛ Yawɛ kɛ tu munyu kɛ si ma nɛ ɔ nya wa wawɛɛ nitsɛ.”

Ezekiel 12:3

“Lɔ ɔ he ɔ, mo nɔmlɔ adesa, bua blɔ hiami níhi a nya, nɛ o hia blɔ piani katakata, konɛ ni ɔmɛ nɛ a na mo kaa nɔ ko nɛ ngɛ blɔ hiae kɛ yaa ma se. Eko ɔ, atuã tsɔli nɛ ɔmɛ ma kɔ se kaa o kɛ nɔ́ nɛ o ngɛ pee nɛ ɔ ngɛ tsɔɔe kaa atuã tsɔli ji mɛ.

Ezekiel 18:21

“Ke yayami peelɔ kpa yayami peemi, nɛ e yeɔ ye mlaa a nɔ, nɛ e peeɔ nɔ́ nɛ da a, e be gboe; niinɛ, e yi ma na wami.

Hosea 11:9

I be nyɛ tue gblae ngɛ ye mi mi fumi ɔ nya. I be Israel hɛ mi kpatae hu. Ejakaa Mawu ji mi, pi nɔmlɔ adesa ji mi. Imi Nɔ Klɔuklɔu ɔ, i kɛ nyɛ ngɛ. I be nyɛ ngɔ bae kɛ abofu.”

Yoel 2:14

Alini, Yawɛ, nyɛ Mawu ɔ, ma tsake e susumi ngɛ nyɛ he, nɛ e maa gbaa nyɛ kɛ niba ní babauu. Ke e ba mi ja a, nyɛ maa sã niye ní bɔ ha lɛ, nɛ nyɛ maa ngɔ wai kɛ piɛ he.

Yona 4:2

Lɔ ɔ he ɔ, e kɛ hɛdɔ fa kue ha Yawɛ nɛ e de ke, “Yawɛ, benɛ i na we ma je ye zugba a nɔ lokoo ɔ, enɛ ɔ nɛ i na nɛ i de ɔ nɛ. Enɛ ɔ he je nɛ i tu fo kɛ ho Spania ya a nɛ. Ejakaa mo Mawu ɔ, i le kaa o mi mi jɔ, o naa mɔbɔ, o toɔ o tsui si, o suɔmi tsakee we; nɛ o kɛ nɔ he yayami paa nɔ.