Yeremia 26:13 - BAIBLO ALOO NGMAMI KLƆUKLƆU Ɔ

¹³ Lɔ ɔ he ɔ, nyɛ dla nyɛ blɔ ɔmɛ; nyɛ kpa yayami peemi, nɛ nyɛɛ bu Yawɛ, nyɛ Mawu ɔ tue. Ke nyɛ pee ja a, lɛɛ yi mi nɛ e to kaa e maa gbla nyɛ tue ngɛ nyɛ ní yayami ɔmɛ a he ɔ, e ma tsake jamɛ a yi mi tomi ɔ.

Yeremia 26:13 ပူးပေါင်းရင်းမြစ်များ

Yona 4:2

Lɔ ɔ he ɔ, e kɛ hɛdɔ fa kue ha Yawɛ nɛ e de ke, “Yawɛ, benɛ i na we ma je ye zugba a nɔ lokoo ɔ, enɛ ɔ nɛ i na nɛ i de ɔ nɛ. Enɛ ɔ he je nɛ i tu fo kɛ ho Spania ya a nɛ. Ejakaa mo Mawu ɔ, i le kaa o mi mi jɔ, o naa mɔbɔ, o toɔ o tsui si, o suɔmi tsakee we; nɛ o kɛ nɔ he yayami paa nɔ.

Yona 3:9

kaa alini Mawu ma tsake e yi mi tomi; kaa alini Mawu mi mi fumi ɔ nya maa ba si, nɛ wa hɛ mi be kpatae.”

Yesaya 1:19

Ke nyɛ maa bu mi tue ɔ, lɛɛ nyɛ maa ye zugba a mi niba ní kpakpa.

Hebribi 5:9

Benɛ Mawu ha nɛ e hi kɛ pi si ɔ, e ba pee nɔ nɛ haa nihi nɛ buɔ lɛ tue ɔ naa neneene yi wami hemi.

Yoel 2:14

Alini, Yawɛ, nyɛ Mawu ɔ, ma tsake e susumi ngɛ nyɛ he, nɛ e maa gbaa nyɛ kɛ niba ní babauu. Ke e ba mi ja a, nyɛ maa sã niye ní bɔ ha lɛ, nɛ nyɛ maa ngɔ wai kɛ piɛ he.

Yeremia 38:20

I de lɛ ke, “Dɛbi, a be mo ngɔe kɛ wo a dɛ. I kpa mo pɛɛ nɛ o bu Yawɛ sɛ gbi nɛ i kɛ ha mo nɛ ɔ tue. Ke o pee ja a, e maa hi ha mo, nɛ o yi ma na wami.

Yeremia 36:3

Eko piɔ Yuda bi ɔmɛ maa nu kaa i to ye yi mi kaa ma kpata a hɛ mi, nɛ a maa kpale kɛ je a blɔ yayami ɔmɛ a nɔ. Ke a pee ja a, ma ngɔ a tɔmi ɔmɛ, kɛ a he yayami ɔmɛ kɛ pa mɛ.”

Yeremia 35:15

Daa nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ. A ba deɔ nyɛ ke nyɛɛ kpale kɛ je nyɛ blɔ yayami ɔmɛ a nɔ, nɛ nyɛɛ pee nɔ́ nɛ da. A bɔ nyɛ kɔkɔ ke nyɛ ko ja mawu kpahi, nɛ nyɛ ko sɔmɔ mɛ hulɔ, bɔ nɛ pee nɛ nyɛɛ hi zugba a nɛ i ha nyɛɛ kɛ nyɛ nɛmɛ ɔmɛ ɔ nɔ. Se nyɛ bui mi tue, nɛ ye munyu ɔmɛ hu nyɛ ngɔɛ.

Yeremia 26:19

Nɛ Mika de nɔ́ nɛ ɔ, anɛ Yuda matsɛ, Hezekia kɛ ma a tsuo gbe lɛ lo? Dɛbi! Nɔ́ nɛ Hezekia pee mohu ji kaa e ye Yawɛ gbeye, nɛ e hla e se blɔ. Enɛ ɔ he je ɔ, yi mi nɛ Yawɛ to kaa e kɛ amanehlu maa ba ma a nɔ ɔ, Yawɛ tsake jamɛ a yi mi tomi ɔ. Amlɔ nɛ ɔ, wɔɔ lɛɛ wa ngɛ hlae nɛ waa kɛ amanehlu agbo nɛ ba wɔ nitsɛmɛ wa nɔ.”

Yeremia 26:3

Alini a maa bu tue nɛ a maa kpale kɛ je a blɔ yayami ɔmɛ a nɔ. Ke a pee ja a, lɛɛ yi mi nɛ i to kaa ma gbla a tue ngɛ a ní yayami ɔmɛ a he ɔ, ma tsake jamɛ a yi mi tomi ɔ.”

Yeremia 18:8

nɛ jamɛ a je ma a ma kpa a ní yayami ɔmɛ peemi ɔ, imi hu ma kpale ye nya se; yayami nɛ i to ke ma pee mɛ ɔ, i be pee hu.

Yesaya 55:7

Nyɛ yiwutsotsɛmɛ, nyɛ kpa awi yemi, nyɛ yayami peeli, nyɛ ko susu nɔ́ yaya hu. Nyɛɛ kpale kɛ ba Yawɛ, wa Mawu ɔ ngɔ. E naa mɔbɔ, nɛ be tsuaa be ɔ, e kɛ nɔ tɔmi paa.

Ezekiel 33:11

De mɛ ke imi Nyɔmtsɛ Yawɛ, i ngɛ ye he kita kae ke i na we yayami peelɔ gbenɔ he bua jɔmi, se mohu i suɔ kaa e kpa yayami peemi, konɛ e yi nɛ na wami. Israel, nyɛ kpa yayami nɛ nyɛ ngɛ pee ɔ. Mɛni he je nyɛ suɔ mohu kaa nyɛ ma gbo ɔ?

Yeremia 42:10

‘Ke nyɛ maa hi zugba nɛ ɔ nɔ ɔ, lɛɛ ma gbaa nyɛ, nɛ i be nyɛ hɛ mi kpatae; ma to nyɛ si, nɛ i be nyɛ hiae hu. E dɔ mi babauu kaa i gbla nyɛ tue kaa kikɛ nɛ ɔ.

Manyadali 2:18

Be tsuaa be nɛ Yawɛ ma ha Israel manyadalɔ ko ɔ, e piɛɔ e he kɛ kpɔɔ ma a kɛ jeɔ a he nyɛli ɔmɛ a dɛ mi e wami ligbi ɔmɛ tsuo. Ejakaa kɛmɛmi nɛ a hii kɛmɛe ngɛ a yi mi wali, kɛ ni nɛmɛ nɛ haoɔ mɛ ɔ a dɛ mi ɔ peeɔ Yawɛ mɔbɔ.

Mose V, 32:36

Yawɛ ma kpɔ e ma a kɛ je he nyɛli a dɛ mi be mi nɛ e na kaa a he wami tsuo ta. Nihi nɛ sɔmɔɔ lɛ ɔ lɛɛ ke e na bɔ nɛ peepee ta a he ha a, e maa na mɛ mɔbɔ.

Mose II, 32:14

Kɛkɛ nɛ Yawɛ kpale e nya se, nɛ yayami nɛ jinɛ e to kaa e maa ba ma a nɔ ɔ bɛ a nɔ hu.

Yeremia 11:4

Benɛ i jé a nɛmɛ ɔmɛ kɛ je Egipt ɔ, somi nɛ i kɛ mɛ so ji nɛ ɔ nɛ. Egipt zugba a ngɛ kaa flɔɔnɔɔ kɛ e mi la nɛ ngɛ tsoe gegeege. I wo mɛ mlaa ke a bu mi tue, nɛ nɔ́ tsuaa nɔ́ nɛ i de mɛ ke a pee ɔ, a pee. I de mɛ ke, ke a bu mi tue ɔ, a maa pee ye ma, nɛ imi hu ma pee a Mawu.

Yeremia 18:11

Lɔ ɔ he ɔ, de Yuda ma a, kɛ Yerusalem ma mi bi ɔmɛ ke, i ngɛ a yi nɔ soe, nɛ ma gbla a tue. De mɛ ke a jɔɔ yayami peemi, nɛ a dla a blɔ ɔmɛ, nɛ a pee nɔ́ nɛ da.