Yeremia 22:21 - BAIBLO ALOO NGMAMI KLƆUKLƆU Ɔ

²¹ Benɛ nyɛ ná nyɛ he ɔ, Yawɛ kɛ nyɛ tu munyu, se nyɛ kua lɛ tue bumi. Kɛ je nyɛ nihe mi ɔ, nɔ́ nɛ nyɛ peeɔ ji kaa nyɛ bui Yawɛ tue.

Yeremia 22:21 ပူးပေါင်းရင်းမြစ်များ

Yeremia 32:30

Kɛ je blema teteete ɔ, yayami sɔuu lɛ Israel bi, kɛ Yuda bi ngɛ pee, nɛ a kɛ ngɛ ye mi mi la woe.

Yeremia 3:25

Nyɛ ha nɛ waa kɛ zo nɛ pee wa heha nɔ́ kɛ hwɔ si, ejakaa wa pee yayami kɛ si Yawɛ, wa Mawu ɔ. Wa nɛmɛ ɔmɛ pee a nɔ́, nɛ wɔ hu kɛ je wa jokuɛwi a si kɛ ba si mwɔnɛ ɔ, wa kpa we. Wa yi Yawɛ, wa Mawu ɔ mlaa amɛ a nɔ.”

Yesaya 48:8

Nyɛ nui hyɛ, nɛ nyɛ li lolo; kɛ je blema lokoo ɔ, nyɛ tue bli we lolo! Ejakaa i le kaa yi wu tso níhi nyɛ peeɔ; kɛ je nyɛ fɔmi be mi tɔɔ ɔ, atuã tsɔli a tsɛɔ nyɛ.

Abɛ Womi 30:9

Ke i na ní kpɔtɔɔ ɔ, ma kua mo, nɛ ma de ke, “Mɛnɔ kulaa ji Yawɛ nɛ ɔ?” Jã kɛ̃, ke i ye ohia a, ma ju, nɛ ma wo ye Mawu ɔ he mu.

Ezekiel 20:8

Se a tsɔ ye hɛ mi atuã; a kplɛɛ we nɛ a bu mi tue; nɔ ko nɔ ko sakee we yakayaka ní ɔmɛ ngɔ pue he; a hɛɛ Egipt amaga amɛ a mi wawɛɛ. Kɛkɛ nɛ i to ye yi mi kaa ma ha nɛ a nu ye we abofu gbeyegbeye ɔ he ngɛ Egipt.

Yeremia 35:15

Daa nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ. A ba deɔ nyɛ ke nyɛɛ kpale kɛ je nyɛ blɔ yayami ɔmɛ a nɔ, nɛ nyɛɛ pee nɔ́ nɛ da. A bɔ nyɛ kɔkɔ ke nyɛ ko ja mawu kpahi, nɛ nyɛ ko sɔmɔ mɛ hulɔ, bɔ nɛ pee nɛ nyɛɛ hi zugba a nɛ i ha nyɛɛ kɛ nyɛ nɛmɛ ɔmɛ ɔ nɔ. Se nyɛ bui mi tue, nɛ ye munyu ɔmɛ hu nyɛ ngɔɛ.

Yeremia 6:16

Yawɛ de e ma a ke, “Nyɛ ya da blɔ gbla nya nɛ nyɛɛ hyɛ. Nyɛ bi nɛ a tsɔɔ nyɛ blema nane blɔ kpakpa amɛ nɛ nyɛɛ nyɛɛ nɔ. Nyɛɛ pee ja, konɛ nyɛ na tue mi jɔmi.” Se ma a he nɔ ke, “Dɛbi, wa be pee fɛɛ!”

Ezekiel 20:28

I ngɔ mɛ kɛ ba zugba nɛ i wo si kaa ma ha mɛ ɔ nɔ. Se he tsuaa he nɛ a na yoku gojoo, aloo tso nɛ bɔ kusuu ngɛ ɔ, kɛkɛ a ya sã bɔ ngɛ lejɛ ɔ. A sã bɔhi nɛ jee via, kɛ wai bɔ hulɔ; a pee ní nɛ ɔmɛ kɛ wo ye mi mi la.

Ezekiel 20:21

“Se jamɛ a yi nɔ bi ɔmɛ hu tsɔ ye hɛ mi atuã; a nyɛɛ we ye blɔ nya tomi ɔmɛ a nɔ, nɛ a yi ye mlaa amɛ a nɔ. A ble ye Hejɔɔmi ligbi ɔmɛ hulɔ. Níhi nɛ ke nɔmlɔ pee nɛ e yi ma na wami ɔ, a pee we. Lɔ ɔ he ɔ, i to ye yi mi kaa ma ha nɛ a nu ye we abofu gbeyegbeye ɔ he ngɛ nga a nɔ.

Ezekiel 20:13

Se Israel ma a tsɔ ye hɛ mi atuã ngɛ nga a nɔ. A yi ye mlaa amɛ, kɛ blɔ nya tomi ɔmɛ a nɔ; a bui mɛ kaa níhi nɛ ke nɔmlɔ ye a nɔ ɔ, e yi ma na wami. A ble ye Hejɔɔmi ligbi ɔmɛ hu kpɔtɔɔ. Kɛkɛ nɛ i to ye yi mi kaa ma ha nɛ a nu ye we abofu gbeyegbeye ɔ he ngɛ nga a nɔ, nɛ ma kpata a hɛ mi pɛsɛpɛsɛ.

Yeremia 2:31

Nyɛ Israel ma, nyɛɛ bu nɔ́ nɛ imi, Yawɛ i ngɛ dee ɔ tue. Anɛ i kɛ nyɛ ye sane nɛ dɛ lo? Anɛ i pee kaa nga kplanaa, aloo zugba nɛ e nɔ wo diblii kpii ha nyɛ lo? Mɛni he je mɔ nɛ nyɛ deɔ ke, ‘Jehanɛ lɛɛ wa ye wa he, wa pa be Mawu ngɔ yae hu?’ ɔ.

Kronika II, 33:10

Yawɛ bɔ Manase kɛ e ma a kɔkɔ, se a bui tue.

Mose V, 31:27

I le kaa a kuɛ wa, nɛ a tsɔɔ atuã. Be mi nɛ i ngɛ je mi ɔ, a tsɔ Yawɛ hɛ mi atuã, nɛ ke i gbo lɛɛ kɛ e ma ba hi kɛɛ?

Mose V, 9:24

Kɛ je be nɛ i le nyɛ ɔ, Yawɛ hɛ mi atuã sɔuu nyɛ ngɛ tsɔe.

Mose V, 9:7

“Nyɛ hɛ ko je nɔ kɔkɔɔkɔ, bɔ nɛ nyɛ wo Yawɛ, nyɛ Mawu ɔ mi mi la ngɛ nga kplanaa a nɔ. Kɛ je ligbi ɔ nɛ nyɛ je Egipt zugba a nɔ kɛ ba si be nɛ nyɛ ba su hiɛmɛ nɛ ɔ, Yawɛ hɛ mi atuã sɔuu nyɛ ngɛ tsɔe.

La 129:1

Israel, jehanɛ de, “Kɛ je ye jokuɛwi a si tɔɔ ɔ, ye he nyɛli wa mi yi mi wawɛɛ nitsɛ!”

Yeremia 3:24

Baal jami kpata níhi tsuo pɛpɛɛpɛ nɛ wa nɛmɛ ɔmɛ gbo dengme kɛ na ha wɔ blema a, tohi, nahi, kɛ binyumuhi kɛ yihi a hɛ mi.

Yeremia 13:10

Nimli yiwutsotsɛmɛ nɛ ɔmɛ kua mi tue bumi. A wa tue, nɛ a pee nɔ́ nɛ a suɔ; a ya ja mawu kpahi, nɛ a sɔmɔ mɛ. Enɛ ɔmɛ a he je ɔ, ma ha nɛ a maa pee kaa bɔjuɛ nɛ ɔ nɛ he be se nami ko hu ɔ.

Yeremia 19:15

“Bɔ nɛ Yawɛ Tabohiatsɛ, Israel Mawu ɔ de ji nɛ ɔ nɛ: ‘Kaa bɔ nɛ i de to ɔ, i kɛ haomi nɛ nya wa maa ba ma nɛ ɔ, kɛ mahi tsuo nɛ bɔle lɛ ɔ a nɔ. Ma pee nɔ́ nɛ ɔ, ejakaa nyɛ tue wa, nɛ nyɛ nui ye munyu ɔmɛ.’ ”

Yeremia 48:11

Bɔ nɛ Yawɛ de ji nɛ ɔ nɛ: “Moab he mi jɔ lɛ kɛ je sa, nɛ a ngɔɛ lɛ kɛ yɛ ma se hyɛ. Moab ngɛ kaa wai atiati nɛ a si ngɛ tɔ mi kɛ ma si, nɛ a plɛ we kɛ wui tɔ kpa mi. Bɔ nɛ e ngɛ sa a, ja ko e ngɛ; e nya nyu gbo we, nɛ e puɛ we hulɔ.

Zakaria 7:7

Munyu nɛ ɔmɛ nɔuu ji sɛ gbi nɛ Yawɛ ha kɛ gu gbali nɛ sɛ hlami ɔ a nɔ. Jamɛ a be ɔ, Yerusalem na ní kpɔtɔɔ. Jamɛ a be ɔ, nihi babauu ngɛ Yerusalem ma a mi; nɛ kɔpe ɔmɛ nɛ bɔle ma a, kɛ zugba a nɛ ngɛ leneyi je, kɛ yo ɔmɛ a kuɔ si ɔ tsuo hyi tɔ kɛ nimli.

Yeremia 2:25

I de mo ke, Israel, kpa mawu kpahi a se nyɛɛmi, bɔ nɛ pee nɛ o nane nɛ ko ba gbo, nɛ kuma ba gbe mo. Se o de ke, ‘Dɛbi! I be ye se kpalee; i suɔ ma se mawuhi, nɛ ma se mawuhi a se lɛ ma nyɛɛ.’ ”

Yeremia 25:3

“Kɛ je be nɛ Yuda matsɛ, Yosia, Amon bi ɔ na jeha nyɔngma kɛ etɛ ngɛ e sɛ ɔ nɔ hluu kɛ ba si mwɔnɛ ligbi nɛ ɔ, jeha nyingmi enyɔ kɛ etɛ sɔuu ji nɛ ɔ nɛ. Kikɛmɛ a be nɛ ɔ tsuo ɔ, be tsuaa be ɔ, i naa sɛ gbi kɛ jeɔ Yawɛ ngɔ kɛ haa nyɛ. I deɔ nyɛ nɔ́ tsuaa nɔ́ fitsofitso; se nyɛ bui tue.

Yeremia 25:4

Daa nɛ ɔ, Yawɛ tsɔɔ e tsɔli gbali ɔmɛ kɛ baa nyɛ ngɔ. Se nyɛ bui mɛ tue, nɛ sɛ gbi nɛ a kɛ ba a hu nyɛ bui.

Yeremia 25:7

Se Yawɛ nitsɛ de ke nyɛ bui lɛ tue fɛɛ. Mohu ɔ, nyɛɛ kɛ nyɛ we amaga amɛ wo e mi mi la, nɛ nyɛɛ kɛ ye nyɛ nitsɛmɛ nyɛ he awi.

Yeremia 25:8

“Lɔ ɔ he ɔ, akɛnɛ nyɛ bui Yawɛ Tabohiatsɛ ɔ tue he je ɔ, bɔ nɛ lɛ hu e ngɛ nyɛ dee ji nɛ ɔ nɛ:

Zefania 3:2

Yerusalem bui Yawɛ tue; e kplɛɛ we nɛ a kaa e hɛ mi. E ngɔɛ e hɛ kɛ fɔɛ Yawɛ nɔ, nɛ e hla we e Mawu ɔ se blɔ.