Yeremia 14:14 - BAIBLO ALOO NGMAMI KLƆUKLƆU Ɔ

¹⁴ Se Yawɛ he nɔ ke, “Lakpa gbami gbali ɔmɛ ngɛ gbae ngɛ ye biɛ mi ɔ nɛ; i tsɔ we mɛ, i fa we mɛ, nɛ i kɛ mɛ tu we munyu ko hulɔ. Ninahi nɛ a ngɛ a he munyu tue ɔ, pi ye ngɔ nɛ a je; klaami nɛ a ngɛ klaae ɔ, yakayaka níhi nɛ mɛ nitsɛmɛ a susu ji lɔ ɔmɛ.

Yeremia 14:14 ပူးပေါင်းရင်းမြစ်များ

Ezekiel 12:24

“Lakpa nina, loo klaami nɛ a kɛ sisiɔ nɔ ɔ, ekoeko be si hie hu ngɛ Israel ma a mi tsuo.

Yeremia 29:31

ma tsɔ nɛ a ngɔ sɛ gbi nɛ ɔ nɛ kɔɔ Shemaya he ɔ ya ha nihi tsuo nɛ a nuu mɛ kɛ ho ɔ ke, “Imi Yawɛ, ma gbla Shemaya kɛ e nina tsuo a tue. I tsɔ we lɛ, se e kɛ nyɛ ba tu munyu kaa nɔ́ nɛ gbalɔ ji lɛ; nɛ e ha nɛ nyɛ he e lakpa munyu ɔmɛ ye. E nina ko nina ko be nyɛ kpɛti hie. Ní kpakpahi nɛ ma ba pee kɛ ha ye ma a hwɔɔ se ɔ, e be je mi hie kɛ yaa si jamɛ a be ɔ nɛ e ba na kɛ e hɛngmɛ; ejakaa e de ye ma a ke a tsɔ atuã kɛ wo mi. Imi, Yawɛ lɛ i de.”

Kɔmɔ Yemi 2:14

O gbali ɔmɛ be nɔ́ kpakpa ko nɛ a ma de mo; lakpa pɛ a yeɔ mo. A fiɛɔ kɛ sisiɔ mo. A je we o tɔmi kpo kɛ tsɔɔ mo. A ha nɛ o susu kaa e hia we nɛ o tsake o tsui.

Mika 3:11

Ma nimeli ɔmɛ heɔ nyɔ mi ní loko a buá sane he; osɔfo ɔmɛ heɔ hiɔwo loko a tsɔɔ mlaa a sisi; gbali ɔmɛ heɔ sika loko a gbaa. Se mɛ tsuo a buɔ Mawu kua pɛɛ nɛ a deɔ ke, “Yawɛ kɛ wɔ ngɛ; nɔ́ ko nɔ ko be wɔ pee!”

Yeremia 5:31

Gbali ɔmɛ a sɛ gbi ɔ, lakpa sɔuu; nɔ́ nɛ mɛɛ a fa osɔfo ɔmɛ ke a pee ɔ, lɔ ɔ osɔfo ɔmɛ peeɔ. Nɛ ye ma a hu suɔ ja. Se nyagbe ɔ, kɛ a maa pee kɛɛ?”

Ezekiel 21:29

Ninahi nɛ nyɛ na a tsuo, lakpa sɔuu; gbamihi nɛ nyɛ ngɛ gbae ɔ hu jã kɛ̃. Nyɛ yiwutsotsɛmɛ nɛ yayami pɛ nyɛ peeɔ, nyɛ be ɔ su ta; be nɛ a maa gbla nyɛ tue ɔ ma oo! A kɛ klaate ma kpata nyɛ hɛ mi pɛsɛpɛsɛ.’

1 Timoteo 4:2

A maa pee a he lakpatsɛmɛ, kɛ nɔ sisili nɛ a he nile gbo pɛsɛpɛsɛ.

Zakaria 13:3

Enɛ ɔ se, ke nɔ ko maa te si ke gbalɔ ji lɛ ɔ, e nyɛ kɛ e tsɛ nɛ fɔ lɛ ma de lɛ ke, ‘Ja a gbe mo; ejakaa o ngɔ Mawu biɛ kɛ ngɛ lakpa yee.’ Ke e ya nɔ ngɛ gbae ɔ, e nyɛ kɛ e tsɛ nɛ fɔ lɛ ɔ maa fia lɛ nɔ nɛ a gbe.

Zakaria 10:2

Amaga amɛ de we nɔ́ ko nɛ juɛmi ngɛ mi; klaali ɔmɛ lɛɛ lakpa munyuhi sɔuu a tuɔ. Ni komɛ hu tsɔɔ nlamihi a sisi, nɛ a kɛ sisiɔ nyɛ kɛ woɔ nyɛ bua kɛkɛ. Enɛ ɔ ha nɛ ma a tsuo ngɛ lalaalo woe kaa tohi, nɛ a ngɛ nɔ́ nae, ejakaa a be hyɛlɔ.

Ezekiel 13:23

Lɔ ɔ he ɔ, yakayaka nina ko be kpo jee ha nyɛ hu; nɛ nyɛ be klae hu. Ma kpɔ ye ma a kɛ je nyɛ he wami sisi, nɛ nyɛ be he wami hie ngɛ a nɔ; kɛkɛ ɔ, nyɛ maa le kaa imi ji Yawɛ.”

Yeremia 37:19

O gbali ɔmɛ nɛ de mo ke Babilonia matsɛ ɔ be bae nɛ e ba tua mo, loo zugba nɛ ɔ, jije a ngɛ?

Yeremia 29:21

“Kolaya bi Ahab, kɛ Maaseya bi Zedekia nɛ a ngɛ lakpa gbami gbae ngɛ ye biɛ mi kɛ ngɛ nyɛ hae ɔ, bɔ nɛ Yawɛ Tabohiatsɛ, Israel Mawu ɔ de ngɛ a he ji nɛ ɔ nɛ. E ke e maa ngɔ mɛ kɛ wo Babilonia matsɛ, Nebukadnezar dɛ, nɛ Nebukadnezar maa gbe mɛ ngɛ nyɛ hɛ mi.

Yeremia 28:15

I bɔ gbalɔ Hanania amaniɛ nɛ ɔ, nɛ i ya nɔ nɛ i de lɛ ke, “Hanania, bu tue! Yawɛ tsɔ we mo fɛɛ, nɛ o ha nɛ ma nɛ ɔ he lakpa munyu ɔmɛ ye.

Yeremia 28:13

ma ya nɛ ma ya de Hanania ke, “Yawɛ ke o ku tso kuɛpã tso ɔ lɛɛ, se e maa pee dade nɔ́ kɛ to nane mi.

Yesaya 9:15

Nikɔtɔmahi, kɛ nihi nɛ a buu mɛ ji yi ɔ nɛ; nɛ lakpa gbali ɔmɛ ji hlemi ɔ nɛ.

1 Yohane 4:1

Ye nyɛmimɛ nɛ i suɔ, nyɛ ko he nɔ tsuaa nɔ ko kɛkɛ nɛ deɔ ke e ná Mawu mumi ɔ nyɛɛ ye. Se mohu nyɛɛ ka nɔ tsuaa nɔ nɛ nyɛɛ hyɛ kaa mumi nɛ e ngɛ ɔ je Mawu ngɔ lo. Ejakaa je ɔ hyi tɔ kɛ lakpa gbali sɔuu.

Mose V, 18:20

Se ke gbalɔ ko te si nɛ e gba ngɛ ye biɛ mi, nɛ pi imi nɛ i fa lɛ ɔ, á gbe lɛ; á gbe gbalɔ saisaa nɛ gbaa ngɛ mawu kpahi a biɛ mi ɔ jã kɛ̃.’

Yesaya 56:10

E ke, “Ma hɛ mi nyɛɛli ɔmɛ nɛ sa kaa a kaa ye ma a hɛ mi ɔ, hɛ yuyuili ji mɛ tsuo; a li nɔ́ ko nɔ́ ko! A ngɛ kaa we he bumi gbehi nɛ kpa we ngmlaa; daa nɛ ɔ, mahe mi kɛkɛ a hii nɛ a hii nlae. Lɔ ɔ ji nɔ́ nɛ a suɔ!

Yeremia 8:11

Pá nɛ ngɛ ye ma mi bi ɔmɛ a he ɔ, a tsɔɔ lɛ fa kɛ fa kɛkɛ, nɛ e peeɔ mɛ kaa pá a gbo. Lɔ ɔ he ɔ, a deɔ ke, ‘Wa ngɛ tue mi jɔmi, wa ngɛ tue mi jɔmi’, be mi nɛ tue mi jɔmi ko be.

Yeremia 20:6

Nɛ mo Pashur! A maa nuu mo hu o kɛ o we mi bimɛ tsuo nyɔguɛ kɛ ya Babilonia. Lejɛ ɔ o ma ya gbo ngɛ, nɛ lejɛ ɔ ji he nɛ a maa pu mo, kɛ o huɛmɛ ɔmɛ tsuo nɛ o gba lakpa gbami ha mɛ ɔ ngɛ.’ ”

Yeremia 28:11

Nɛ e de ngɛ ma a tsuo hɛ mi ke, “Yawɛ ke, kuɛpã tso ɔ nɛ Babilonia matsɛ, Nebukadnezar ngɔ wo je ma amɛ tsuo a kuɛ ɔ, bɔ nɛ lɛ Yawɛ ɔ maa ku jamɛ a kuɛpã tso ɔ ji nɛ ɔ nɛ. E maa pee nɔ́ nɛ ɔ hiɛmɛ nɛ ɔ jeha enyɔ mi.” Kɛkɛ nɛ i je lejɛ ɔ.

Kɔmɔ Yemi 2:9

Zu ha agbo ɔmɛ a nɔ; a ku a se lami ní ɔmɛ a mi dukuduku. A nuu matsɛmɛ ɔmɛ, kɛ ganɔ ɔmɛ kɛ ho ma se ya. Nɔ ko tsɔɔ we mlaa a hu. Yawɛ je we nina kɛ ha we gbali ɔmɛ hu.

Yeremia 8:10

Lɔ ɔ he ɔ, ma ngɔ a ngmɔ ɔmɛ kɛ ha ni nɛmɛ nɛ ma ba ye a nɔ ɔ; a yi ɔmɛ hu i kɛ ma ha nyumu kpahi. Kɛ je nimli wawihi a nɔ kɛ ya si nimli nguahi a nɔ ɔ, nɔ tsuaa nɔ hɛ dɔ kɛ ngɛ nɔ sisie nɛ e kɛ na ní. Gbali kɛ osɔfohi po ngɛ nɔ sisie.

Ezekiel 13:2

“Nɔmlɔ adesa, gbaa kɛ si Israel gbali ɔmɛ nɛ nɔ́ nɛ je mɛ nitsɛmɛ a yi mi kɛkɛ a gbaa a. De mɛ ke a bu Yawɛ tue!”