Yeremia 14:13 - BAIBLO ALOO NGMAMI KLƆUKLƆU Ɔ

¹³ Kɛkɛ nɛ i de ke, “Nyɔmtsɛ Yawɛ! Mo nitsɛ o le kaa gbali ɔmɛ deɔ ma a ke ta, loo hwɔ be bae, ejakaa o wo si veveeve kaa tue mi jɔmi pɛ lɛ maa hi zugba a nɔ.”

Yeremia 14:13 ပူးပေါင်းရင်းမြစ်များ

Yeremia 6:14

Pá nɛ ngɛ ye ma mi bi ɔmɛ a he ɔ, a tsɔɔ lɛ fa kɛ fa kɛkɛ, nɛ e peeɔ mɛ kaa pa a gbo. Lɔ ɔ he ɔ, a deɔ ke, ‘Wa ngɛ tue mi jɔmi, wa ngɛ tue mi jɔmi,’ be mi nɛ tue mi jɔmi ko be.

2 Petro 2:1

Lakpa gbali te si ngɛ ma a mi be ko nɛ be ɔ, nɛ ja nɔuu lakpa tsɔɔli maa te si ngɛ nyɛ hu nyɛ kpɛti. A kɛ lakpa tsɔɔmihi nɛ kpataa nɔ hɛ mi maa ba ngɛ laami mi. Tsɔɔlɔ ɔ nitsɛ nɛ kpɔ mɛ ɔ po a ma kua lɛ, nɛ nɔ́ nɛ ɔ ma ha nɛ a ma kpata mɛ nitsɛmɛ a hɛ mi si kake too.

Mika 3:11

Ma nimeli ɔmɛ heɔ nyɔ mi ní loko a buá sane he; osɔfo ɔmɛ heɔ hiɔwo loko a tsɔɔ mlaa a sisi; gbali ɔmɛ heɔ sika loko a gbaa. Se mɛ tsuo a buɔ Mawu kua pɛɛ nɛ a deɔ ke, “Yawɛ kɛ wɔ ngɛ; nɔ́ ko nɔ ko be wɔ pee!”

Yeremia 23:17

Daa nɛ ɔ, bɔ nɛ a deɔ ni nɛmɛ nɛ sume nɛ a buɔ ye munyu ɔ tue ji, ‘Nyɛ ko ye tsui tete! Nɔ́ tsuaa nɔ́ maa hi.’ Tue wali ɔmɛ lɛɛ bɔ nɛ a deɔ mɛ ji, ‘Haomi ko haomi ko be nyɛ nɔ bae fɛɛ.’ ”

Yeremia 4:10

Kɛkɛ nɛ i de ke, “Ao, Nyɔmtsɛ Mawu, anɔkuale mi ɔ, o sisi Yerusalem bi ɔmɛ pɛ! Mo lɛ o wo si ke tue mi jɔmi maa ba ma a mi, se klaate mohu ji nɛ ɔ ngɛ ni ɔmɛ a kuɔ si.”

Yeremia 8:11

Pá nɛ ngɛ ye ma mi bi ɔmɛ a he ɔ, a tsɔɔ lɛ fa kɛ fa kɛkɛ, nɛ e peeɔ mɛ kaa pá a gbo. Lɔ ɔ he ɔ, a deɔ ke, ‘Wa ngɛ tue mi jɔmi, wa ngɛ tue mi jɔmi’, be mi nɛ tue mi jɔmi ko be.

Ezekiel 13:22

“Ejakaa dalɔ nɛ i sume kaa e ye aywilɛho ɔ, nyɛ ngɔɔ nyɛ lakpa munyu ɔmɛ kɛ yeɔ e tsui. Se nyɛ woɔ yayami peelɔ mohu he wami konɛ e ko kpa yayami peemi, nɛ a ko he e yi wami.

Yeremia 5:31

Gbali ɔmɛ a sɛ gbi ɔ, lakpa sɔuu; nɔ́ nɛ mɛɛ a fa osɔfo ɔmɛ ke a pee ɔ, lɔ ɔ osɔfo ɔmɛ peeɔ. Nɛ ye ma a hu suɔ ja. Se nyagbe ɔ, kɛ a maa pee kɛɛ?”

Yeremia 5:12

Yawɛ ma mi bi ɔmɛ sisi mɛ nitsɛmɛ a he, nɛ a de ke, “Yawɛ loo! Mɛni e ma nyɛ maa pee? Haomi ko haomi ko be wa nɔ bae fɛɛ! Ta, loo hwɔ hu be bae.”

Yeremia 1:6

I he nɔ ke, “Ao, Nyɔmtsɛ Yawɛ! I li munyu tumi; niheyo kɛkɛ ji mi.”

Yesaya 56:10

E ke, “Ma hɛ mi nyɛɛli ɔmɛ nɛ sa kaa a kaa ye ma a hɛ mi ɔ, hɛ yuyuili ji mɛ tsuo; a li nɔ́ ko nɔ́ ko! A ngɛ kaa we he bumi gbehi nɛ kpa we ngmlaa; daa nɛ ɔ, mahe mi kɛkɛ a hii nɛ a hii nlae. Lɔ ɔ ji nɔ́ nɛ a suɔ!

Yeremia 5:13

A deɔ ke gbali ɔmɛ a munyu ɔmɛ ngɛ kaa kɔɔhiɔ kɛkɛ; Yawɛ sɛ gbi ko be mi. Yawɛ Tabohiatsɛ Mawu ɔ de mi ke, “Yeremia, akɛnɛ nimli nɛ ɔmɛ tu kikɛmɛ a munyu nɛ ɔmɛ he je ɔ, ma ha nɛ ye munyu ɔmɛ maa pee kaa la ngɛ o nya mi. Ma nɛ ɔ maa pee kaa lɛ́, nɛ la a maa sã mɛ.”

Ezekiel 12:24

“Lakpa nina, loo klaami nɛ a kɛ sisiɔ nɔ ɔ, ekoeko be si hie hu ngɛ Israel ma a mi tsuo.

Yeremia 20:6

Nɛ mo Pashur! A maa nuu mo hu o kɛ o we mi bimɛ tsuo nyɔguɛ kɛ ya Babilonia. Lejɛ ɔ o ma ya gbo ngɛ, nɛ lejɛ ɔ ji he nɛ a maa pu mo, kɛ o huɛmɛ ɔmɛ tsuo nɛ o gba lakpa gbami ha mɛ ɔ ngɛ.’ ”

Yeremia 37:19

O gbali ɔmɛ nɛ de mo ke Babilonia matsɛ ɔ be bae nɛ e ba tua mo, loo zugba nɛ ɔ, jije a ngɛ?