Yeremia 11:15 - BAIBLO ALOO NGMAMI KLƆUKLƆU Ɔ

¹⁵ Yawɛ ke, “Nimli nɛ i suɔ saminya a, yayami sɔuu lɛ a ngɛ pee. Anɛ a ngɛ he blɔ kaa a hii ye we ɔ mi lo? Anɛ a susu kaa ke a wo mi si babauu, nɛ a ngɔ lohwehi kɛ sã bɔ ha mi ɔ, haomi ko nɛ maa ba a nɔ ɔ, a kɛ ní nɛ ɔmɛ a peemi maa tsi jamɛ a haomi ɔ nya lo? Ke e ba mi ja a, anɛ a ma na bua jɔmi lo?

Yeremia 11:15 ပူးပေါင်းရင်းမြစ်များ

Abɛ Womi 2:14

nihi nɛ nyaa yayami peemi he, nɛ a naa bua jɔmi ke a ngɛ nɔ́ nɛ dɛ pee,

Tito 1:15

Nihi nɛ a he tsɔ ɔ, nɔ́ tsuaa nɔ́ he tsɔ ha mɛ. Se nihi nɛ ble a he, kɛ ni nɛmɛ nɛ he we yi ɔ lɛɛ nɔ́ ko nɔ́ ko he tsɔ we ha mɛ; ejakaa a ble a juɛmi, kɛ a he nile tsuo.

Yakobo 4:16

Se nyɛ woɔ nyɛ he nɔ, nɛ nyɛ fĩaa. Ní nɛ ɔmɛ tsuo ji yayami peemi.

1 Korintobi 13:6

Suɔmi nya we nɔ́ yayami he; anɔkuale mohu he nɛ e nyaa.

Romabi 11:28

Ngɛ sane kpakpa a blɔ fa mi ɔ, nyɛ he ɔ, Yuda bi ɔmɛ peeɔ Mawu he nyɛli. Se akɛnɛ e hla a nɛmɛ ɔmɛ momo he je ɔ, Mawu suɔ mɛ.

Luka 8:28

Benɛ e na Yesu ɔ, e hia ngmlaa nɛ e ho ya kpla si ngɛ e nane nya, nɛ e kɛ ngmlaa de ke, “Yesu, Hiɔwe Mawu No ɔ Bi! Mɛni sane i kɛ mo ngɛ? I kpa mo pɛɛ, koo hao mi!”

Mateo 22:11

“Se benɛ matsɛ ɔ ba nɛ e ba hyɛ nihi nɛ a kpee ɔ, e na nyumu ko ngɛ lejɛ ɔ nɛ lɛɛ e wui yo kpeemi tade.

Hosea 3:1

Yawɛ de mi ekohu ke, “Yaa nɛ o ya hla yo gba puɛlɔ, nɛ o suɔ lɛ, kaa bɔ nɛ imi hu i suɔ ye ma Israel ɔ. Ye ma Israel kua mi; a ya ngɛ mawu kpahi a se nyɛɛe, nɛ a kɛ wai yiblii gbigbli sãã bɔ kɛ haa mɛ lɛɛ, se kɛ̃, i suɔ mɛ.”

Yeremia 15:1

Kɛkɛ nɛ Yawɛ de mi ke, “Ke Mose kɛ Samuel ba da ye hɛ mi nɛ a fa kue ha mi tete po, i be nimli nɛ ɔmɛ mɔbɔ nae. Fie mɛ kɛ je ye hɛ mi hiɛmɛ nɛ ɔ nɛ a ho.

Yeremia 12:7

Yawɛ ke, “I ngmɛɛ Israel he; ye ma nɛ i je blɔ hla a, i kua mɛ. I ngɔ nimli nɛ i suɔ mɛ saminya a kɛ wo a he nyɛli a dɛ mi.

Yeremia 3:14

“Atuã tsɔli! Nyɛɛ kpale kɛ ba ye ngɔ koo; ye ma ji nyɛ. Ma ngɔ nyɛ kɛ ba Zion yo ɔ nɔ ekohu: ma tsuaa ma a, ma ngɔ nɔ kake, nɛ we puɔ nya tsuaa we puɔ nya a, ma ngɔ ni enyɔ.

Yeremia 3:8

Yuda na kaa i ha Israel gba mi pomi womi nɛ i fie lɛ, ejakaa e je ye se nɛ e ya bɔ ajuama. Se Yuda nɛ ngɛ kaa e nyɛmiyo Israel ɔ yi gbeye.

Yeremia 2:2

ma fiɛ ha nɔ tsuaa nɔ ngɛ Yerusalem ke, “I kai kaa be nɛ nyɛ ngɛ nihe mi ɔ, nyɛ ye mi anɔkuale, nɛ nyɛ je nyɛ suɔmi kpo kɛ tsɔɔ mi kaa bɔ nɛ ayɛflo suɔ e huno ɔ; nyɛ nyɛɛ ye se kɛ ya gu nga kplanaa nɔ ngɛ zugba nɛ a du we ní ngɛ nɔ ɔ nɔ.

Yesaya 50:1

Yawɛ ke, “Anɛ nyɛ susuɔ kaa i ha ye ma a je ye he kɛ ho kaa bɔ nɛ nyumu kɛ e yo poɔ gba mi, nɛ e haa yo ɔ gba mi pomi womi ɔ lo? Ke ja nyɛ susu ɔ, jije gba mi pomi womi ɔ ngɛ mɔ? Anɛ nyɛ susuɔ kaa i jua nyɛ kɛ ho ma se ya kaa bɔ nɛ a juaa bimɛ kaa nyɔguɛhi lo? Dɛbi, nyɛ yayami ɔmɛ a he nɛ a jua nyɛ ɔ nɛ; nyɛ mlaa tɔmi ɔmɛ a he a fie nyɛ kɛ ho ɔ nɛ.

Abɛ Womi 28:9

Nɔ nɛ sume kaa e yeɔ mlaa nɔ ɔ, ke e fa kue ha Mawu po, e bɔ musu.

Abɛ Womi 26:18

Nɔmlɔ nɛ sisiɔ e nyɛmi, nɛ pee se ɔ, e deɔ lɛ ke, “Oo, pe i kɛ mo ngɛ fiɛe” ɔ, jamɛ a nɔ ɔ ngɛ kaa godotsɛ nɛ e kɛ la tso, loo kɛ̃ɛ̃, loo gbenɔ nitsɛ ngɛ fiɛe.

Abɛ Womi 21:27

Yayami peelɔ bɔ ɔ, Yawɛ sume kulaa, hluu nɛ a de ke yi mi tomi yayami piɛ bɔ ɔ he.

Abɛ Womi 15:8

Yayami peelɔ bɔ sami ɔ, Yawɛ sume kulaa; se ke nɔmlɔ kpakpa fa kue ɔ, e naa he bua jɔmi.

Abɛ Womi 10:23

Kuasia ngɛ nɛ ɔ, yayami peemi peeɔ lɛ bua jɔmi; juɛmitsɛ lɛɛ nile ji nɔ́ nɛ haa lɛ bua jɔmi.

La 50:16

Se yayami peelɔ ɔ, bɔ nɛ Mawu ngɛ lɛ dee ji, “Mɛnɔ ha mo he blɔ ke o kane ye mlaa amɛ blɛblɛɛblɛ, loo o tu ye somi ɔ he munyu?

La 60:5

Ngɔɔ o he wami kpetekpleenyɛ ɔ kɛ he wa yi wami. Bu wa kue fami ɔ tue, konɛ ma nɛ mo nitsɛ o suɔ ɔ yi nɛ na wami.

Yeremia 13:27

Yawɛ na nyɛ nɛ nyɛ ngɛ níhi nɛ e sume pee. E na nyɛ nɛ nyɛ ya ngɛ mawu kpahi a se nyɛɛe ngɛ nga nɔ kɛ yokuhi a nɔ. E na nyɛ nɛ nyɛ ngɛ huhui kpae kaa okpɔngɔ kuhi kɛ okpɔngɔ yihi nɛ ngɛ bɔe. Yerusalem bi, musu tloo nyɛ! Mɛni be po nyɛ he ma tsɔ?

Yeremia 23:11

Yawɛ ke, “Gbali ɔmɛ, kɛ osɔfo ɔmɛ tsuo li Mawu; nimli yayamihi ji mɛ. I naa mɛ nɛ a ngɛ yayami pee ngɛ ye we ɔ mi tete po.