Yakobo 1:12 - BAIBLO ALOO NGMAMI KLƆUKLƆU Ɔ

¹² Nɔ nɛ ke a ngɛ lɛ kae ɔ, e toɔ e tsui si, nɛ e ngmɛɛ we e hemi kɛ yemi he ɔ, á gbaa lɛ. Ejakaa ke e nyɛ gblee ka a mi ɔ, neneene wami nɛ Mawu wo si kaa a ma ha nihi nɛ suɔ lɛ ɔ, e nine maa su nɔ.

Somi He Ɔ

¹² Agbaa nyumu nɛ toɔ e tsui si ngɛ ka mi, ejakaa ke a ka lɛ nɛ e nyɛ nya da a, e ma na wami jlasi nɛ Nyɔmtsɛ ɔ wo he si ha ninɛmɛ nɛ suɔ lɛ ɔ.

Yakobo 1:12 ပူးပေါင်းရင်းမြစ်များ

Mose I, 22:1

Pee se ɔ, Mawu ka Abraham. Mawu tsɛ Abraham ke, “Abraham!” Nɛ Abraham he nɔ ke, “Ne mi!”

Nehemia 1:5

“Yawɛ Mawu nɛ ngɛ hiɔwe lee! O kle, nɛ o he ngɛ gbeye. O yeɔ anɔkuale, nɛ o yeɔ o siwo nɔ. Nihi nɛ suɔ mo, nɛ a peeɔ níhi nɛ o fa ke a pee ɔ, o naa mɛ mɔbɔ.

Hiob 2:10

Hiob he nɔ ke, “O ngɛ munyu tue kaa bɔ nɛ yihi kuasia amɛ a ti nɔ ko maa tu munyu pɛ. Ke Mawu ha wɔ nɔ́ kpakpa a, tse wa heɔ. Lɛ ke e ha wɔ nɔ́ yaya a, wa ko ngɔ lo?” Enɛ ɔ tsuo mi ɔ, Hiob pee we yayami; e de we nɔ́ ko kɛ si we Mawu.

Hiob 5:17

A gbaa nɔ nɛ Mawu kaa e hɛ mi ɔ. Ke Mawu Ope ɔ ngɛ o hɛ mi kae ɔ, koo ngɔ lɛ kaa nɔ́ ko nyafii.

La 11:5

Yawɛ kaa dali. Se yayami peeli, kɛ yiwutsotsɛmɛ lɛɛ e sume mɛ kulaa.

La 119:67

Loko o gbla ye tue ɔ, i pɔɔ blɔ tlami, se jehanɛ lɛɛ i yeɔ o munyu ɔ nɔ.

La 119:71

E hi ha mi kaa o gbla ye tue, konɛ ma kase o mlaa amɛ.

La 119:75

Yawɛ, i le kaa o ye dami sane, nɛ o gbla ye tue bɔ nɛ sa mi, ejakaa moo lɛɛ anɔkuale pɛ o yeɔ.

La 5:11

Se nihi tsuo nɛ ba saa we ngɛ o ngɔ ɔ, ha nɛ a nya, nɛ a la kɛ bua jɔmi daa. Ni nɛmɛ nɛ suɔ mo ɔ, buu a he, konɛ a na bua jɔmi ngɛ o mi.

La 94:12

Yawɛ, nɔmlɔ nɛ o tsɔseɔ lɛ, nɛ o tsɔɔ lɛ o mlaa a, a gbaa lɛ.

Mose II, 20:6

Se nihi akpe abɔ nɛ suɔ mi, nɛ a yeɔ ye mlaa amɛ a nɔ ɔ, mɛɛ i naa mɛ mɔbɔ.

Abɛ Womi 17:3

La a kɛ tsuɔ sika tsu kɛ sika hiɔ he, se Yawɛ lɛ kaa adesa tsui hyɛɔ.

Yesaya 64:4

Kɛ je blema lokoo ɔ, nɔ ko nui hyɛ, nɛ nɔ ko hu nɛ kaa o se ɔ, mawu kpa ko ngɛ nɛ peeɔ nɔ́ haa nihi nɛ ngɔɔ a hɛ ngɔ fɔɔ e nɔ ɔ!

Zakaria 13:9

Ma ngɔ mi dlami etɛ mi kake nɛ ɔ kɛ wo la mi, nɛ ma tsu a he kaa bɔ nɛ a tsuɔ sika hiɔ he ɔ. Ma tsu a he kaa bɔ nɛ a tsuɔ sika tsu he. Kɛkɛ ɔ, a maa fa kue ma tsɛ mi, nɛ ma he nɔ. Ma de mɛ ke, ‘Ye ma ji nyɛ,’ nɛ a ma de ke, ‘Yawɛ ji wa Mawu.’ ”

Mateo 10:22

Ye he ɔ, nihi tsuo maa nyɛ nyɛ. Se nɔ nɛ ma wlua lɛ kɛ yaa si nyagbe ɔ, a ma he e yi wami.

Mateo 25:34

Kɛkɛ ɔ, matsɛ ɔ ma de nihi nɛ ngɛ e hiɔ nɔ ɔ ke, ‘Nyɛ nihi nɛ Tsaatsɛ gbaa nyɛ, nyɛɛ ba! Matsɛ yemi ɔ nɛ a dla ngɔ to nyɛ kɛ je be nɛ a to je ɔ sisi ɔ, nyɛ ba ngɔ.

Luka 6:22

“Ke nimli nyɛ nyɛ, loo a kua nyɛ, loo a jɛ nyɛ, loo a puɛ nyɛ biɛ ke nimli yayamihi ji nyɛ, ngɛ imi Nɔmlɔ Bi ɔ, ye he ɔ, á gbaa nyɛ!

Romabi 5:4

nɛ tsui si tomi haa nɛ wa peeɔ Mawu suɔmi nya ní. Nɛ ke wa ngɛ Mawu suɔmi nya ní pee ɔ, e haa waa kɛ wa hɛ fɔɔ Mawu nɔ Kulaa.

Romabi 8:28

Wa le kaa nɔ́ tsuaa nɔ́ mi ɔ, Mawu piɛɔ nihi nɛ suɔ lɛ ɔ a he, konɛ e hi ha mɛ. Nimli nɛ ɔmɛ ɔ, Mawu nitsɛ nɛ to e yi mi, nɛ e tsɛ mɛ.

1 Korintobi 2:9

Se, kaa bɔ nɛ a ngma a, “Nɔ́ nɛ hɛngmɛ nɛ́ hyɛ, Nɔ́ nɛ tue nui hyɛ, Nɔ́ nɛ adesa ko juɛmi sui he ɔ, Lɔ ɔ nɔuu Mawu dla ngɔ to nihi nɛ suɔ lɛ.”

1 Korintobi 8:3

Se nɔmlɔ nɛ suɔ Mawu ɔ, Mawu le lɛ.

1 Korintobi 9:25

Nihi nɛ kaa a kpɔhi a mi ɔ, a hɛ mi kaa si be tsuaa be, bɔ nɛ pee nɛ a ná jlasi nɛ puɛɔ. Se wɔɔ lɛɛ wa peeɔ jã, konɛ wa nine nɛ su jlasi nɛ puɛ we gblegbleegble ɔ nɔ.

Mose V, 13:3

nyɛ ko bu lɛ tue fɛɛ. Yawɛ, nyɛ Mawu ɔ gu nɔ́ nɛ ɔ nɔ kɛ ngɛ nyɛ kae nɛ e hyɛ kaa nyɛ suɔ lɛ, Yawɛ ɔ saminya ngɛ nyɛ tsui mi lo.

Mose V, 7:9

Nyɛ na nɛ nyɛɛ le kaa Yawɛ, nyɛ Mawu ɔ, lɛ pɛ ji Mawu, nɛ e yeɔ anɔkuale. E maa ye e somi nɔ, nɛ e ma je e suɔmi nɛ ngɛ daa a kpo kɛ tsɔɔ yi nɔhi akpe abɔ nɛ suɔ lɛ, nɛ a yeɔ e mlaa amɛ a nɔ ɔ,

Mose V, 8:2

Nyɛ kai kaa Yawɛ, nyɛ Mawu ɔ kpaka nyɛ ngɛ blɔ gagaa nɛ ɔ nɔ kɛ gu nga kplanaa a nɔ jeha nyingmi eywiɛ sɔuu. E ha hɛdo níhi kɛ nyɛ kpe kɛ ka nyɛ hyɛ, konɛ e kɛ le nɔ́ nɛ ngɛ nyɛ tsui mi, kaa nyɛ maa ye e mlaa amɛ a nɔ, loo nyɛ be a nɔ yee.

2 Timoteo 2:15

Bɔɔ mɔde wawɛɛ kaa ní tsulɔ kpakpa, konɛ Mawu nɛ ná o he bua jɔmi. E ko pee mo zo kulaa kaa o maa tsɔɔ anɔkuale munyu ɔ saminya.

2 Timoteo 4:8

Lɔ ɔ he ɔ, Mawu ngɔ ye hiɔwo nɛ ji jlasi nɛ e kɛ haa nihi tsuo nɛ peeɔ nɔ́ nɛ da a ngɔ to ha mi. Kojomi ligbi ɔ, Nyɔmtsɛ Yesu Kristo, nɔ nɛ yeɔ dami sane ɔ maa ngɔ ye jlasi ɔ ngɔ ha mi. Pi imi nɔ kake pɛ nɛ e ma ha, se mohu e ma ha nihi tsuo nɛ suɔ lɛ, nɛ a ngɛ e bami ɔ blɔ hyɛe ɔ.

Hebribi 10:32

Nyɛ kai bɔ nɛ nyɛ hi si sa a. Benɛ nyɛ ba le Mawu ɔ, nyɛɛ kɛ hɛ mi miami na amanehlu babauu.

Hebribi 11:17

Hemi kɛ yemi lɛ ha nɛ Abraham ngɔ e bi Isak kɛ ha Mawu, benɛ Mawu ka lɛ hyɛ ɔ. E ngɛ mi kaa bi nɛ ɔ he si nɛ a wo Abraham lɛɛ, se kɛ̃ e pee klaalo kaa e maa ngɔ e bi kake too ɔ kɛ sã bɔ ha Mawu.

Hebribi 12:5

Anɛ nyɛ hɛ je bua womi munyu nɛ kɛ nyɛ tuɔ munyu kaa bɔ nɛ a kɛ bimɛ tuɔ munyu ɔ nɔ lo? “Ye bi, koo ngɔ Nyɔmtsɛ ɔ tsɔsemi ɔ kaa nɔ́ ko nyafii; nɛ jehanɛ ke e gbla o tue ɔ, ko ha o nine mi nɛ wo nyu.

Hebribi 6:15

Abraham to e tsui si, nɛ e nine su nɔ́ nɛ Mawu ke e ma ha lɛ ɔ nɔ.

Yakobo 2:5

Ye nyɛmimɛ nɛ i suɔ, nyɛɛ bu tue. Tse nyɛ le kaa nihi nɛ je ɔ buu mɛ ohiatsɛmɛ ɔ, mɛ Mawu hla a. Akɛnɛ a heɔ Yesu yeɔ ɔ, nimli nɛ ɔmɛ ba pee mumi mi niatsɛmɛ, nɛ matsɛ yemi ɔ nɛ Mawu wo si ha nihi nɛ suɔ lɛ ɔ ba pee a nɔ.

Yakobo 5:11

Niinɛ, nihi nɛ to a tsui si wawɛɛ ɔ, wa buu mɛ nihi nɛ a gbaa mɛ. Nyɛ nu bɔ nɛ Hiob to e tsui si, nɛ́ nyagbe ɔ, Nyɔmtsɛ ɔ ha e na ní babauu. Nyɔmtsɛ ɔ mi mi jɔ, nɛ e naa mɔbɔ.

1 Petro 3:14

Nɛ ke nyɛ naa amanehlu tete po ngɛ kpakpa nɛ nyɛ peeɔ he ɔ, a gbaa nyɛ pɛ! Nyɛ ko ye nihi nɛ maa pee nyɛ yayami ɔ gbeye, nɛ nyɛ ko hao nyɛ he hulɔ.

1 Petro 4:13

Se mohu, nyɛ bua nɛ jɔ kaa amanehlu nɛ Kristo na a, nyɛ hu nyɛ ngɛ nae. Kɛkɛ ɔ, ke e ba ekohu kɛ he wami kpetekpleenyɛ ɔ, nyɛ ma na bua jɔmi babauu.

1 Petro 4:14

Ke nihi jɛ nyɛ kaa Kristo se nyɛɛli ji nyɛ ɔ, a gbaa nyɛ pɛ. Enɛ ɔ tsɔɔ kaa mumi nɛ hɛ mi ngɛ nyami, nɛ ji mumi nɛ je Mawu ngɔ ɔ kɛ nyɛ ngɛ.

1 Petro 5:10

Se ke nyɛ na amanehlu be bɔɔ se ɔ, Mawu nɛ dlooɔ wɔ níhi tsuo ɔ, lɛ nitsɛ e maa pee nɔ́ tsuaa nɔ́ nɛ he hia ha nyɛ. E maa waje nyɛ; e maa wo nyɛ he wami, nɛ e ma ha nɛ nyɛ ma fi si kaa nyɛ le lɛ daa. Lɛ nɛ e tsɛ nyɛ, konɛ nyɛɛ kɛ lɛ ba hi e hɛ mi nyami nɛ ngɛ kɛ yaa neneene ɔ mi; ejakaa nyɛɛ kɛ Kristo ba pee kake.

1 Petro 5:4

Nɛ ke to hyɛlɔ nɔkɔtɔma a ba a, nyɛ nine maa su hɛ mi nyami jlasi nɛ maa hi kpɛe nylamnylam daa a nɔ.

1 Yohane 4:19

Wa suɔ Mawu, ejakaa lɛ nɛ suɔ wɔ kekle.

Kpojemi 2:10

Koo ye amanehlu nɛ ma o nɔ ɔ gbeye! Hyɛ! Abosiami miɔ nɛ e maa wo nyɛ ti ni komɛ tsu, konɛ a kɛ ka nyɛ; nɛ nyɛ maa na nɔ́ ligbi nyɔngma. Ye mi anɔkuale kɛ yaa si gbenɔ mi tete po, nɛ ma ha mo wami kaa kunimi nɛ o ye ɔ he jlasi.

Kpojemi 3:19

Nihi nɛ i suɔ mɛ ɔ, i kaa a hɛ mi, nɛ i gblaa a tue. Lɔ ɔ he ɔ, o hɛ nɛ dɔ, nɛ o tsake o tsui.

Kpojemi 3:21

Ni nɛmɛ nɛ maa ye kunimi ɔ, ma ha mɛ blɔ nɛ a maa hi ye kasa nya ngɛ ye matsɛ sɛ ɔ nɔ kaa bɔ nɛ imi hu i ye kunimi, nɛ amlɔ nɛ ɔ, i hii si ngɛ Tsaatsɛ kasa nya ngɛ e matsɛ sɛ ɔ nɔ ɔ.